Odeyi 18 - IWE ỌNỊNỊ

Ịpọọrụ ộ nọ Ịkọrịntị

¹ Ịrẹma ịrẹyị ẹnẹnị, dị Ịpọọrụ hụrẹ Atẹnị, dị ọ nọ Ịkọrịntị nị.

² O ne tù Aniju ọnya ịzọọ, ana aā hị́ Akwira; ẹkụra Ịpọntụsị a yà ma a nị. Ose anị ọ rị Ipirisira nị. Oò yi kù ẹnẹ ẹnịnị hụrẹ ẹtẹ Itari vẹ. Ệ hụụ ịzọọ, agụvị ka ohinọyị Ịkịrawụdịyọsị ộ mẹ̀ ọda ka à dụ avaba Aniju nịnị jịnẹ hụrẹ Iroomi. Dị Ịpọọrụ ne hee wa,

³ dị ọ yà ịzọọ pe wa, agụvị ka ụkọrọ ọnyọọnya ẹẹ̄ mẹ nị. Ụkọrọ ajẹngụ ana aā sị ịtụmpahaa mẹ, ẹẹ̄ mẹ nị. Dị ẹnịnị dudu aa mẹ ụkọrọọ vaabẹ nị.

⁴ Ẹkụhị ụhwọtụ-ẹkụhị ụhwọtụ, dị Ịpọọrụ aa nọ ini irehi Ohomorihi Aniju ịzọọ, di ee pe waa kà ịrẹyị nị. Di ee sì ka ọnị ọ̀ mẹ ka Aniju ọnịrị ịzọọ, di ee pe waa kà ịrẹyị nị. Di ee sì ka ọnị ọ̀ mẹ ka Aniju ọnịrị Anigiriki nịnị ẹ̀ vara ayị nị.

⁵ Ịjị Isira ọnịrị Itimoti hụrẹ Imasedoniya vẹ, dị Ịpọọrụ kụkụ nyayịnẹ aa kà enube ọyịza nị. Dị aa kà a yị Aniju nịnị ka Ijeesu ọ vị Ikirisiti nị.

⁶ Ịjị ẹnịnị kwẹẹtẹ tù Ịpọọrụ, dị ẹyaa kụ̀ ọọ ụhụ, dị ọ bànyị awuru hi wa, dị ọ ka, “Wèe kuku vú nịnị, ẹwụ nịnị ọ nyị ohuvọ anị nị! Mẹ yị nyị ụvọ tụ́ ịnị usu awụ nịnị. Hụrẹ ọyaanị na, ịdị Anigiriki, mị kụkụ aa nọ nị.”

⁷ Dị ọ hụụ ịzọọ, dị ọ na yà ini eehi ọza ịnya aanị ana aā hị́ Ịtayịtọsị Ịjọsịtọsị nị. Ọọ̄ hẹkẹ Ohomorihi. Irehi anị vị ana gụrị irehi Ohomorihi ọnọọ.

⁸ Ikirisipụsị ana vị ọdọvịdị ini irehi Ohomorihi ọnọọ ọnịrị avaba aneehi anị ệ sị ayị tụra Ananyị yị. Anịkọrịntị ọrụrụ-ọrụrụ ana wụ́ ịrẹyị Ohomorihi ệ rẹ sị ayị tụra a bẹẹ, dị a mẹ̀ ọyịhwọzenyi yị wa nị.

⁹ Ịrahụ ẹkụhị ọnya, Ịpọọrụ ô re ẹtẹ, dị Ananyị yị kà ịrẹyịị yọ nị. Dị ọ ka, “Asị u hí angwa, wa yịị kà enube ọyịza! Asị ụ hụrẹ ụvọ,

¹⁰ agụvị ka mâ yà pe wu. Ẹ yị nyị ọza ana zụ mẹ wụ ịsọnyị-ịsọnyị. Mâ nyị aza rụrụ hi ịnị ẹkụra ọnọnị.”

¹¹ Dị Ịpọọrụ yà ịzọọ mẹ ịrayị ọnya tụra ụhwẹ ịhịnọnyị, dị aa sị ịrẹyị Ohomorihi zụ̀ aza nị.

¹² A mẹ̀ yị sị Igariyo rị ohinọyị ana jẹẹ yị Aniroomi ịnị ẹtẹ Akaya, dị Aniju nịnị wụsẹ kwẹẹtẹ, dị ẹ za Ịpọọrụ, dị ẹ sị ọọ nọ ikootu nị.

¹³ Dị ẹ ka, “Ọnọrụ ọnọnị aa za aza ka ẹ̀ẹ hẹkẹ Ohomorihi ini oze ọnị ọda ayị ọ̀ yị zẹẹ.”

¹⁴ Ị́pọọrụ mẹ̀ ka ọnị ọ̀ yị há irenu ịrẹyị kẹnẹ, dị Igariyo kà a yị Aniju nịnị ka, “Àa yaanị vị ịrẹyị ka ọza ộ jịnẹ ọda, à vị ka ộ mẹ̀ ịsa odivi ẹnyị kẹnẹ yọ nị, ọ yaanị vọrọ ka me batọ ịrẹyị awụ nịnị, ẹwụ nịnị Aniju.

¹⁵ Ama a mẹ̀ hị́ ka ịrẹyị ahẹkẹ ọnịrị ịrẹha aza ẹnyị beri ọda awụ nịnị, ụ waa nyị ahankata anị nịnị aanị nị, ẹwụ nịnị ụvọta ọ̀ na mẹ̀ ọkarẹyị ẹngụ awụ nịnị! Mẹ yị vaa mẹ̀ ọkarẹyị ẹngụ ịrẹyị ẹnẹẹ.”

¹⁶ Dị Igariyo dụ wa hụụnị ikootu nị.

¹⁷ Dị Anigiriki nịnị za Isositenesi ana vị ọdọvịdị irehi Ohomorihi Aniju, di e tụ́ ọọ ọ́vịdị ikootu gẹdẹ-gẹdẹ nị. Ama ẹ yị nyị ịzị ọnọọ kanyị Igariyo vụrụ-vụrụ.

Ịpọọrụ ộ varẹma nọ Antịyọkị Isiriya

¹⁸ Ịpọọrụ ộ yà Ịkọrịntị pe ọdọwụ nịnị kù. Dị ọ hụụ ịzọọ, dị ọnịrị Ipirisira beri Akwira ngụ ẹpa, ka ẹnị ẹ̀ nọ Isiriya nị. Dị ẹ va na, ô beri Ohomorihi zẹẹ ịzẹzẹ Íkenkire, dị ọ kụ́ ịrẹsụ anị nị.

¹⁹ Ẹ mẹ̀ va sị ngụ Ẹhwẹsọsị, dị Ịpọọrụ navọ wa tụ́ ịzọọ nị. Dị ọnị nọ ini irehi Ohomorihi Aniju nịnị, di e pe Aniju nịnị kà ịrẹyị nị.

²⁰ Ẹnịnị ê sì ka Ịpọọrụ ọ̀ yà ịdị ẹnịnị kù chee, ama ô yi.

²¹ Ama ọ màa na, dị ọ kà a yị wa ka, “Ohomorihi òo sì, maa vaavẹ.” Dị ọ ngụ ẹpa hụrẹ Ẹhwẹsọsị aa na nị.

²² O mè tù Isesariya, dị ọ hịrẹ nọ Ijerusarẹmị, dị ọ na kụ́ anịragụ Ohomorihi ene hi ịzọọ, dị ọ kụkụ aa nọ Antịyọkị nị.

²³ Ộ yà Antịyọkị chee, dị ọ rẹ hụụ ịzọọ nị. Dị ọ zị oze Ịgaratịya ọnịrị Ihwirigiya na para hu, dị aa tụ́ ọdọwụ ene hi ịzọọ ọtụtụrụma nị.

Aporo ộ nọ Ẹhwẹsọsị ọnịrị Ịkọrịntị

²⁴ Â nyị ọnọrụ ọnya aanị ana aā hị́ Aporo, ana vẹ Ẹhwẹsọsị. Ẹkụra Arekisandiriya a yà maa nị. Ọ zụ kà ịrẹyị ẹtẹẹtẹrẹ, dị ọ rẹ yẹ ịrẹyị Ohomorihi ẹtẹẹtẹrẹ nị.

²⁵ A raà sị ịrẹyị Ananyị yị zụ̀ ọnọrụ ọnọnị. Dị aa sị ịrajẹẹ kà ịrẹyị, dị aa sị ịrẹyị Ijeesuu zụ̀ aza ahụ-ahụ nị. Ama ọyịhwọzenyi ọnị Ịjọọnụ aa mẹẹ yị aza kẹnẹ ọ yẹ nị.

²⁶ Di o nyima aa sị ọtụtụrụma kà ịrẹyị ini irehi Ohomorihi Aniju nị. Ípirisira ọnịrị Akwira mẹ̀ wụ́ ịrẹyị anị, dị ẹ sị ọọ nọ ini eehi, dị ẹ sị oze Ohomorihi zụ̀ ọọ ẹtẹẹrẹ huna avọọ nị.

²⁷ Ịjị Aporo ka oni ee sì ka ọnị ọ̀ nọ Akaya, dị ọdọwụ nịnị chẹrẹ iwe tụ́ hi ezirẹma ene hi ịzọọ ka ẹ̀ dọ ọ pe ẹngụ nị. Ịjị Aporo tù ịzọọ, ộ mẹ̀ ọgụvọ yị aza oni Ohomorihi mẹ ọyịza yị, dị ẹ dọ wụ́ nị.

²⁸ Ọ́nịrị Aniju nịnị màa nyị ahankata ịnị orere dị aa sịị zụ̀ waa hụụnị Iwe Ohomorihi ka Ijeesu ọ vị Ikirisiti nị; dị ẹnịnị kuku ee re ẹtẹ kẹnẹ nị.