Odeyi 17 - IWE ỌNỊNỊ

Ịpọọrụ ộ nọ Ịtẹsaronika

¹ Ịpọọrụ ọnịrị Isira ệ zị oze Anhwipori ọnịrị Aporoniya, dị ẹ na ngụ Ịtẹsaronika nị. Irehi ahẹkẹ Aniju nịnị yà ịzọọ.

² Anka Ị́pọọrụ mẹ̀ yị mẹ, dị ọ rẹ ngụ ini irehi Ohomorihi ọnọọ nị. Ộ yà ịzọọ mẹ ẹkụhị ụhwọtụ ẹẹta, dị aa sị ịrẹyịị hụụnị Iwe Ohomorihi beri wa kà ịrẹyị nị.

³ Dị aa kà a yị wa, dị ọ raa sịị zụ̀ wa ka â nyị ka Ikirisiti ọ̀ rị ụya, dị ọ̀ rẹ ha kwẹẹtẹ hụụnị isu nị. Dị Ịpọọrụ ka Ijeesu ọnị ọnị aa kà ịrẹyị anịị yị wa aanị, ọ vị Ọdọzaha nị.

⁴ Aza ẹnyị ệ dọ wụ́, dị ẹ kụkụ aa saasa Ịpọọrụ ọnịrị Isira nị. Anigiriki ọrụrụ-ọrụrụ ana aa hẹkẹ Ohomorihi beri anyẹnẹẹ ene eyi yẹ ịnị ẹkụra, ẹnị ẹ rẹ dọ wụ́.

⁵ Ama Aniju nịnị aa kụ̀ ụhị. Dị ẹ na tọ̀ọ́ aza kẹnẹ-kẹnẹ hụrẹ oze vẹ, dị ẹ kụ́ ẹngụ gụ nị. Dị ẹ za ẹkụra, dị ẹ vàa zí nị. Dị ẹ hara nọ ini eehi Ijasoni, di eyee sì ka ẹnị ẹ̀ sị Ịpọọrụ ọnịrị Isira tụ́ ẹhẹ yị aza nị.

⁶ Ịjị ẹnịnị è yi re wa, di e tura Ijasoni ọnịrị ọdọwụ ẹnyị nọ ịdị ọdọvịdị ẹkụra nịnị nị. Di eyee nowu ka, “Aza ẹnẹnị ẹ kụ́ ẹhẹ và angga, ẹ rẹ va sị ngụ ịzẹnị bẹẹ.

⁷ Ijasoni ộ dọ wa ọzọga tụ́ ini eehi. Avaba ẹnịnị aa jịnẹ ọda oni ohinọyị Aniroomi mẹ. Ẹ ka â nyị ohinọyị ọsa ana aā hị́ Ijeesu.”

⁸ Ayị aza ẹnẹẹ ọnịrị ọdọvịdị ẹnịnị ẹ kụ́ vazi, ẹ mẹ̀ maanị wụ́ ịrẹyị ọnọnị.

⁹ Ịjị Ijasoni ọnịrị aza ana vọ raà sị ẹkẹhị na jẹẹ, dị a hụrẹ wa ụvọ nị.

Ịpọọrụ ọ rẹ nọ Ibereya

¹⁰ Ẹ́tẹ mè si hozi kẹnẹ, dị ọdọwụ nịnị ka Ịpọọrụ ọnịrị Isira ẹ̀ẹ nọ Ibereya nị. Ịjị e tù ịzọọ, dị ẹ nọ ini irehi Ohomorihi Aniju nịnị nị.

¹¹ Anibereya nịnị ẹ dọ ịrẹyị Ohomorihi tụ́ ịnị ayị huna Anịtẹsaronika nịnị nị. Ệ sị avaba ayị ẹnịnị dọ ịrẹyị Ohomorihi. Dị ẹyaa zama Iwe Ohomorihi re eyinị-eyinị ka eni è re e, àa vị ịzẹyịza avaba ịrẹyị ọnị Ịpọọrụ kà vị nị.

¹² Agụvị avọọ ọrụrụ-ọrụrụ ẹnịnị ệ dọ wụ́. Anigiriki ọrụrụ-ọrụrụ anọrụ beri anyẹnẹẹ ene eyi yẹ ịnị ẹkụra, ẹnị ẹ rẹ dọ wụ́.

¹³ Ịjị Aniju ene hi Ịtẹsaronika wụ́ ka Ịpọọrụ ọ na kà ịrẹyị Ohomorihi Íbereya, dị ẹ nọ ịzọọ, dị ẹ na tụ́ aza ịrẹyị ẹtẹẹtẹrẹ nị.

¹⁴ Dị ọdọwụ ene hi ịzọọ wụsẹ ka Ịpọọrụ ọ̀ọ na huuu dị ọ̀ na ngụ ụtọ oku nị. Di Isira ọnịrị Itimoti ẹnị yị yà Ibereya nị.

¹⁵ Aza ana sị Ịpọọrụ aa na, ệ sị ọọ ne tù Atẹnị. Dị ẹ varẹma aa nọ Ibereya nị. Dị Ịpọọrụ kà a yị wa ka ẹ̀ kà a yị Isira ọnịrị Itimoti ka ẹ̀ wụsẹ ve tù ọnị nị.

Ịpọọrụ ộ nọ Atẹnị

¹⁶ Ị́pọọrụ mẹ̀ jẹẹ Atẹnị, ee zí wa, ayị ộ kụ́ ọọ ẹtẹẹtẹrẹ, o mè re ka ẹkụra ọnọọ vị ori-ori.

¹⁷ Di ee pe Aniju nịnị ọnịrị aza ana vọ ana aa hẹkẹ Ohomorihi kà ịrẹyị ini irehi Ohomorihi ẹnịnị. Dị ọ raa nọ ini orere eyinị-eyinị, ọza ana àa vẹ ini orere, di ee pe waa kà ịrẹyị.

¹⁸ Â nyị aza ẹnyị ana yẹ ịrẹyị ẹtẹẹtẹrẹ ịzọọ. Aā hị́ ẹnyị “Anepikuri”, dị a rẹẹ̄ hị́ ọsa “Anisitoyiki” nị. Dị ẹnịrị Ịpọọrụ sị gẹ tụ́ ịnị ahankata nị, ẹnyị ịnị aza ẹnẹẹ ka, “Sị ọnọrụ ene ee sì ịrẹyịị kà aanị ee sì ka ọnị ọ̀ ka kẹ?” Dị aza ẹnyị rẹ ka, “Vị ọ sị mẹẹ ka vị a nyị ịrẹyị ori ọzọga ọnị ọnị rẹ za vẹ nị.” Ẹ maanị aa kà, agụvị ka Ịpọọrụ ộ kà ịrẹyị Ijeesu ọnịrị ọ mẹmẹ ha hụụnị isu.

¹⁹ Dị ẹ sị Ịpọọrụ nọ ịnị ataba Ariyopagusi ịzị ẹ kụ́ gụ, dị ẹ ka, “Yee sì ka ya yẹ ịrẹyị ọwọọwa ọnị ụ waa sịị zụ̀ aza aanị.

²⁰ Ịrẹyị awụ ẹnyị ọnị yaa wụ́ vị ọzọga ịnị ụtọ ayị. Yee sì ka ya yẹ ịsị ẹ vị iruvo ịrẹyị ẹnẹẹ.”

²¹ Avaba Anatẹnị ọnịrị azọga ene hi ịzọọ vị eneē sì ka ẹnị ẹ̀ sị avaba ụmẹ ẹnịnị tịtẹ, dị ẹnị ẹ̀ sịị kà ịrẹyị, dị ẹ̀ rẹẹ̄ wụ́ ịtọpa ịsa ọwọọwa ana àa mẹ kẹnẹ.

²² Dị Ịpọọrụ jẹẹ ịnị akakana aza ana gụ ị́rẹsụ ataba Ariyopagusi, dị ọ ka, “Ẹwụ nịnị Anatẹnị, mee re ka wâ nyị ori irenyi-irenyi ọnị ụụ̄ hẹkẹ nịnị ẹtẹẹtẹrẹ.

²³ M màa parahu ịnị ẹkụra awụ nịnị, di mi re avaba ịzị ụụ̄ mẹ hẹkẹ nịnị; mê re ụta ọnya anaa chẹrẹ ịsa tụ́ ka: ‘Ohomorihi ọnị ọza ẹ̀ yị yẹ.’ Ohomorihi ọnọọ ọnị ụ waa hẹkẹ nịnị, dị ụ wẹ̀ yị yẹ ẹ nịnị, m maa kà ịrẹyị anịị wụ nịnị aanị nị.

²⁴ Ohomorihi ana mẹ ẹhẹ ọnịrị avaba ịsa ene hi ịnị anị, ọnị ọ nyị ẹbẹẹba ọnịrị ẹhẹ nị. Ọ mā ra ini irehi ana aza dà.

²⁵ Ẹ yị nyị ịsị ọ̀ yị nyị, agụvị avọọ ẹ yị nyị ka ọza ọ̀ na sị ụvọ anị mẹ̀ ụkọrọ dị ọ̀ sị ịsa va yọ. Ọnị ọ vanaā sị ụhwẹẹ yị aza ọnịrị avaba ịsa ana vọ nị.

²⁶ Hụụnị oze ọza ịnya ọ zị mẹ avaba anẹhẹ nị, dị ọ mẹ ka ẹ̀ ra hi avaba ẹhẹ nị. Dị ọ sị eto mẹ tịtẹ ụmẹ ana aza vaa sị ra, ọnịrị ịzị ẹ vaa ra nee tù nị.

²⁷ Ọ vavọọ mẹ, agụvị aza èe sì ọọ, ịsavọọ è zụ re e. Ẹ yị vị ka vị Ohomorihi noze rịrị ọzịnya-ọzịnya ayị nị.

²⁸ Ini oze anị, ị yà nyị ụhwẹ, dị yaa zịị, dị ị yàra nị. Ọjahẹ awụ nịnị ọnya ộ hyakụ kà a ka: ‘Ezi anị ẹ́yị rẹ vị nị.’

²⁹ Yàa vị ezi Ohomorihi, ẹ yị vọrọ ka ye ro o ka ya zụ sị ịsa anaa sị igooru ọnịrị ọmọ beri ịrẹta bẹ juwe anị. Ịsa ẹnẹẹ vị ụkọrọ ụvọ aza kẹnẹ; ariro aza ẹ jẹẹ yị nị.

³⁰ Ụmẹ ana aza ẹ̀ yị sị yẹ ịsa ẹnẹnị, Ohomorihi ọ raà sị eyi jịnẹ ẹ. Ama booro aanị, ọ raà mẹ ọda ka avaba aza avaba aha è ro ịnẹ varẹma.

³¹ Ohomorihi ộ nyị ẹkụhị ọnya ọnọọ vaa sị sị ịzẹyịzaa mẹ̀ ọkarẹyị avaba anẹhẹ. Ọ vavọọ vaa mẹ ini oze ọza ọnị ọ sị nyị. Ọ raà sị zụ̀ avaba aza ka ịzẹyịza yọ, ọ mẹ̀ ha ọza ọnọọ hụụnị isu.”

³² Ẹ mẹ̀ wụ́ ka Ịpọọrụ ộ kà ịrẹyị ka aa ha ọzaa hụụnị isu, aza ẹnyị aa kụ́ ọọ isiya. Dị aza ẹnyị ka, “Yee sì ka ye re tenyi ịrẹyị ọnọọ wụ́ ịhị ọsa.”

³³ Dị Ịpọọrụ hụụ ịdị ẹnịnị nị.

³⁴ Ama aza ẹnyị ệ sị ẹngụ vaka a, dị ẹ sị ayị tụra Ijeesu nị. Idiyonisu ana vị anikootu Ariyopagusi vị ọnya ịnị aza ẹnẹẹ. Ọnẹẹ ọnya ana aā hị́ Idamarisi ọnị rẹ yà ịnị aza ẹnẹẹ, beri aza ana vọ.