Odeyi 16 - IWE ỌNỊNỊ

Itimoti ộ saasa Ịpọọrụ ọnịrị Isira

¹ Ịpọọrụ ọ na ngụ Idabe ọnịrị Ịrịsịtịra. Â nyị ọdọwụ ọnya aanị ana ra ịzọọ, ana aā hị́ Itimoti. Ọnyị anị ọnị rẹ vị ọdọwụ, dị ahịka Aniju ọ vị nị. Ama ada anị vị Anigiriki.

² Ọdọwụ nịnị ene hi Ịrịsịtịra ọnịrị Ayịkọnịyọmị vị ana nyayịnẹ aa kà ịrẹyị ọyịza Itimoti.

³ Ịpọọrụ ee sì ka ọnị ọ̀ sị Itimoti za, agụvị avọọ dị ọ jị ọọ ụvẹvẹnẹ nị. Ọ vavọọ mẹ, agụvị ka avaba Aniju ene hi ịzọọ ệ yẹ Itimoti ka ada anị vị Anigiriki.

⁴ Ẹ màa na ịnị ẹkụra ẹnẹẹ, dị ẹ kà a yị ọdọwụ ene re hi ịzọọ ka è sị eyi pe ọda ana odeyi nịnị ọnịrị azọkụ ịragụ Ohomorihi mẹ Íjerusarẹmị nị.

⁵ Avọọ ánịragụ Ohomorihi màa nyị ụkata ịnị ẹdọwụ ẹnịnị; dị ẹyaa rụrụụ hu avọọ eyinị-eyinị nị.

Ịpọọrụ ô re Animasedoniya ịnị ẹtẹ oni o re

⁶ Ịpọọrụ nịnị ệ zị oze ẹtẹ Ihwirigiya ọnịrị Ịgaratịya na para hu, agụvị ka Ụhwẹ Ọnịnị ọ yị zẹẹ ka ẹ̀ kà ịrẹyị Ohomorihi ịnị ẹtẹ Esiya.

⁷ E mèe vee tù ẹtẹ Imisiya, di eyee sì ka ẹnị ẹ̀ nọ Ibitiniya nị. Ama Ụhwẹ Ọnịnị ọ yị zẹẹ wa.

⁸ Dị ẹ zị oze Imisiya, di e chí na ngụ Itirowasị nị.

⁹ Ịrahụ ịhị ọnọọ, Ịpọọrụ ô re ẹtẹ. Ô re ka â nyị ọnọrụ Animasedoniya ana jẹẹ dị aa dá ịpẹẹ yị ọnị ka, ọnị ọ̀ vẹ Imasedoniya, dị ọnị ọ̀ va gụ ẹnị ụvọ.

¹⁰ Ị́pọọrụ mè yi re ẹtẹ ọnọnị kẹnẹ, di i tenyi ẹngụ ka yaa nọ Imasedoniya nị. Ya sị yẹ ka Ohomorihi ọ hị́ yị ka ya na kà enube ọyịza yị anịzọọ nị.

Ịnị ẹkụra Ihwiripi, Iridiya ộ sị ayị tụra Ijeesu

¹¹ Yâ ngụ ẹpa hụrẹ Itirowasị, dị ị na taara na ngụ Isamotirake nị. Eyinẹhẹ anị, dị ị nọ Ineyapori nị.

¹² Dị ị hụụ ịzọọ, dị ị nọ ẹkụra Ihwiripi nị. Ihwiripi ọ vị ẹkụra ịpaapa ịnị ẹtẹ Imasedoniya nị. Aniroomi ọ raa mẹ ịjọvaa tụra a nị. Yâ yà ịnị ẹkụra ọnọọ mẹ ẹkụhị chee.

¹³ Ịjị ẹkụhị ụhwọtụ si tù, dị ị hụụnị ẹkụra ọnọọ nọ ụtọ okuha, ịzị i ro ka â nyị aha ana a yàā mẹ̀ aduwa. Yâ yaayịtẹ ịzọọ, dị yaa kà ịrẹyị yị anyẹnẹẹ ana kụ́ gụ hi ịzọọ nị.

¹⁴ Â nyị ọnẹẹ ọnya aanị ana wụ́ ịrẹyị ayị. Ịrẹha anị ọ rị Iridiya nị; anẹkụra Itiyatira ọ vị nị. Dị ọọ̄ sẹ ohu ịta ovivi ana katarihi nị. Ọ rẹẹ̄ hẹkẹ Ohomorihi. Ohomorihi ộ mẹ̀ ka ọ̀ dọ ịrẹyị ọnị Ịpọọrụ aa kà, dị ọ rẹ dọ ọ wụ́ nị.

¹⁵ Â mẹ̀ ọyịhwọzenyi yọ beri aneehi anị. Dị ọ dá ịpẹ ka ya vẹ ini eehi anị, yàa dọ ka ọnị ộ nyị ịzẹyịza hi Ananyị yị. Dị ọ dá ịpẹ yị ẹtẹẹtẹrẹ nị.

 za Ịpọọrụ ọnịrị Isira tụ́ ịnị ẹngwa

¹⁶ Ẹkụhị ọnya, ị màa naa mẹ̀ aduwa, ozi ahụ ọnẹẹ ọnya aanị ọ va gẹrị ẹyị. Ozi ọnẹẹ ọnọọ ộ nyị ụhwẹ echu ana aa mẹẹ ka ọ̀ọ kà ịsẹ. Ọọ̄ kà ịsẹ, dị aa sị dọ ẹkẹhịị yị ọga anị ẹtẹẹtẹrẹ.

¹⁷ Dị aa dụ ẹyịrị Ịpọọrụ zị, di ee nowu ka, “Aza ẹnẹnị vị ezi ahụ Ohomorihi ana nẹba hu kere-kere. Ẹ yaa kà a wụ nịnị, ụ mẹmẹ zụ há nịnị.”

¹⁸ Ẹkụhị ọrụrụ-ọrụrụ ọ maanị sị sị aa yịị kà nị. Ụpẹ ọnya kẹnẹ, ọ sị kụ́ Ịpọọrụ ayị, dị ọ vara eyi, dị ọ kà a yị ụhwẹ echu ọnọọ ka, “Ịnị ịrẹha Ijeesu mâ mẹ ọdaa wụ, ka wa jịnẹ hụụnị ẹngụ anị!” Dị ụhwẹ echu ọnọọ wụsẹ jịnẹ hụụnị ẹngụ anị nị.

¹⁹ Ịjị ọga ozi ọnẹẹ ọnọọ re ka oze ẹkẹhị ẹnịnị o si gu, dị ẹ wụsẹ va za Ịpọọrụ ọnịrị Isira, di e tura wa nọ ini orere ịdị ọdọvịdị ẹnịnị nị.

²⁰ Dị ẹ kụ́ wa nọ ịdị Aniroomi ana vị ọmọkarẹyị ẹnịnị nị. Dị ẹ ka, “Anọrụ ẹnẹnị vị Aniju, dị ẹyaa và ẹkụra ayịị zí ẹtẹẹtẹrẹ nị.

²¹ Ịsị ẹyaa sịị zụ̀ ọza, ọda ọ yị vavọọ dọ. Aniroomi ẹ́yị vị nị, yẹ yị nyẹngụ dọ ẹngụ ịrẹyị ẹnẹẹ, yẹ yị rẹ zụ mẹ wa.”

²² Dị ọkọnị aza kwẹẹtẹ tù wa, dị ọmọkarẹyị nịnị za wuru Ịpọọrụ nịnị dị ẹ na a hụrẹ wa ẹngụ nị. Dị ẹ mẹ ọda ka è tụ́ wa ịjapa nị.

²³ Ịjị a sị wa tụ́ ẹtẹẹtẹrẹ, dị a kụ́ wa và hi ịnị ẹngwa nị. Di e hú ọga anịnẹngwa nịnị ị ụvọ ka ò chire oze hi wa nganganga nị.

²⁴ Ịjị a maanị sị ọọ kà a yọ, dị ọ kụ́ Ịpọọrụ nịnị ne hi ịnị aku ọdịrẹma ịnị ẹngwa, dị ọ kụ́ ọchị ẹbanyị-ẹbanyị hi wa ahụ tụ́ ịzọọ nị.

²⁵ Ịnị agẹvịrahụ, dị Ịpọọrụ ọnịrị Isira aa mẹ̀ aduwa, dị ẹyaa jị ahẹ ga Ohomorihi nị. Dị anịnẹngwa ana vọ aa wụ́, ẹ màa jị ahẹ nị.

²⁶ Kẹnẹ, dị ẹtẹ vene henyi jigi-jigi, dị avaba irehi ẹngwa na ngụ ịzị a kà ẹtẹ hụrẹ henyi jigi-jigi nị. Obooboro dị avaba oze na hi ẹtẹ, dị ịchẹkẹchẹkẹ anịnẹngwa nịnị hụrẹ và hi ẹtẹ pẹrẹ-pẹrẹ nị.

²⁷ Dị ọga anịnẹngwa ọnọọ sị ha nị. O mè re ka oze ẹngwa ẹ kụ́ na hi ẹtẹ, di o ro o ka vị́ avaba anịnẹngwa ẹnẹẹ e si zwe nị. Agụvị avọọ, dị ọ tụ̀ ụhwọ ka ọnị ọ̀ wụ ẹngụ anị nị.

²⁸ Dị Ịpọọrụ nowu kà a yọ ka, “Asị ụ tụ̀ ẹngụ awụ ụnava, ka avaba ayị hi ịzẹnị!”

²⁹ Dị ọga ọnọọ ka à sị ịra vẹ, di o zwe ngụ ini eehi ẹngwa, dị aa dá ẹgahị, dị ọ và ku ẹtẹ ọ́vịdị Ịpọọrụ ọnịrị Isira nị.

³⁰ Dị ọ kụ́ wa jịnẹ tụ́ ẹhẹ, dị ọ ka, “Nda, sị a vọrọ ka ma mẹ dị ma zụ há nịnị?”

³¹ Dị ẹ kà a yọ ka, “Sị ayị tụra Ijeesu Ananyị yị, ka ọ vaa dọ wụụ há beri aneehi awụ!”

³² Dị ọ kà ịrẹyị Ananyị yịị yọ ọnịrị avaba aneehi anị nị.

³³ Dị ọ kụ́ Ịpọọrụ nịnị ụmẹ ọnọọ gẹdẹ-gẹdẹ ịnị ịrahụ ọnọọ, dị ọ nyịna ụnava ẹnịnị nị. Dị a wụsẹ mẹ̀ ọyịhwọzenyi yị ọnịrị aneehi anị nị.

³⁴ Dị ọ sị Ịpọọrụ ọnịrị Isira nọ ini eehi anị, dị ọ sị ịsọyịrị yị wa nị. Ọnịrị aneehi anị kụkụ aa jẹ, agụvị ka ẹ sị Ohomorihi dọ wụ́.

³⁵ Ịjị eyi sị nị, dị ọmọkarẹyị ẹnẹẹ tụ́ iporisi ka ẹ̀ na kà a yị ọga ọnọọ ka ọ̀ hụrẹ aza ẹnẹẹ ụvọ nị.

³⁶ Dị ọga anịnẹngwa kà a yị Ịpọọrụ ka, “Ọmọkarẹyị ệ tụ́ vẹ ka à hụrẹ ẹwụrị Isira ụvọ. Agụvị avọọ waa na ịnị ẹngwọọrọ nịnị!”

³⁷ Dị Ịpọọrụ kà a yị wa ka, “Ẹ yị nyị ịsị ẹ kà a ka yâ rị ịvị anị. Ama dị ẹ yị za yị, di e tụ́ yi ịjapa ịnị orere nị, ẹyị ana vị Aniroomi. Dị ẹ kụ́ yị và hi ịnị ẹngwa nị. Á yị di eyee sì ka eni è were kụ́ yị jịnẹ!”

³⁸ Dị iporisi ẹnẹẹ maanị na kà a yị ọmọkarẹyị ẹnẹẹ nị. Ẹ mẹ̀ wụ́ ka Aniroomi Ị́pọọrụ nịnị vị nị, angwa ô hí wa.

³⁹ Dị ẹ va kụ́ Ịpọọrụ nịnị nyarọyịkụ, dị ẹ kụ́ wa hụụnị ẹngwa, dị ẹ dá ịpẹ yị wa ka ẹ̀ hụụnị ẹkụra ọnọọ nị.

⁴⁰ Dị Ịpọọrụ ọnịrị Isira hụụnị ẹngwa, dị ẹ nọ ini eehi Iridiya nị. É re ọdọwụ nịnị ịzọọ, dị ẹ tụ́ wa ọtụtụrụma, dị ẹ hụụ ịzọọ nị.