Odeyi 15 - IWE ỌNỊNỊ

Eyọgẹ ana a nyị Íjerusarẹmị

¹ Â nyị aza ẹnyị aanị ana hụrẹ Ijudiya vẹ, dị ẹyaa zụ̀ ọdọwụ nịnị ịsa nị, dị ẹ ka, “Ẹ̀ yị vị a jị wụ nịnị ụvẹvẹnẹ anka ọda Imosiisi, wẹ yị zụ há nịnị.”

² Agụvị avọọ, Ịpọọrụ ọnịrị Ịbanabasị ê pe wa nyị ahankata ẹtẹẹtẹrẹ. Dị ọdọwụ nịnị ka Ịpọọrụ ọnịrị Ịbanabasị ẹ̀ hịrẹ nọ Ijerusarẹmị ne tù odeyi ọnịrị azọkụ ịragụ Ohomorihi agụvị ịrẹyị ọnọnị nị.

³ Dị anịragụ Ohomorihi kụ́ wa ka ẹ̀ nyaatụ, dị ẹyaa na nị. E mè zị oze Ihwonesiya ọnịrị Ịsamarịya na para hu, ệ kà a, Anigiriki nịnị mẹmẹ và ká Ohomorihi na. Ịjị ọdọwụ nịnị wụ́ ọọ, avaba ẹnịnị ệ jẹ ẹtẹẹtẹrẹ.

⁴ Ịjị e tù Ijerusarẹmị, anịragụ Ohomorihi beri odeyi nịnị ọnịrị azọkụ ịragụ nịnị ệ kụ́ wa nyaasẹ ẹtẹẹtẹrẹ. Dị Ịpọọrụ nịnị kà a yị wa avaba ịsị Ohomorihi pe wa mẹ nị.

⁵ Ama dị aza ẹnyị ini ogu Anihwarisi nịnị ana va dọ wụ́ kwẹẹtẹ, dị ẹ ka, “Â nyị ka à jị wa ụvẹvẹnẹ, di è re hú wa ụvọ ka è sị eyi pe ọda Imosiisi!”

⁶ Dị odeyi nịnị ọnịrị azọkụ ịragụ nịnị gẹ, ka eni è ro tụ́ ịnị ịrẹyị ọnọọ nị.

⁷ Ịjị ẹ da ahankata nyị, di Ipita kwẹẹtẹ, dị ọ ka, “Anda ayị nịnị, wâ yẹ nịnị ka ịnị ụmẹ ọnya o si kù aanị, Ohomorihi ộ nyị mị hụụnị akakana awụ nịnị ka ma na kà enube ọyịza yị Anigiriki nịnị, agụvị dị ẹ̀ zụ dọ wụ́.

⁸ Ohomorihi ana yẹ ayị ọza, ộ sị zụ̀ ka ọnị ộ dọ Anigiriki nịnị, agụvị ka ộ sị Ụhwẹ Ọnịnị yị wa, anka ọ mẹ̀ rẹ sị yị ẹyị.

⁹ O yi sị eyi irenyi re ẹyịrị wa. Ộ mẹ ayị ẹnịnị ọnịnị, agụvị ka ệ sị ayị tụra a.

¹⁰ Agụvị avọọ, sị ẹ vẹ di u wee sì ka wa zama Ohomorihi re nịnị, di u wee sì ka we kune ẹnya tụra ezirẹma nịnị, ẹnya oni ohiku ayị nịnị beri ẹyị ẹ̀ yị zụ za?

¹¹ Ẹyị â dọ wụ́ ka agụvị ayamva Ijeesu Ikirisiti Ananyị yị ị sị há nị. Avọọ ẹ́nị mẹ̀ rẹ yà nị.”

¹² Ịbanabasị ọnịrị Ịpọọrụ ệ kwẹẹtẹ, dị ẹyaa kà a ụkọrọ ohyozirenu ọnịrị apọtẹrẹwa oni Ohomorihi zị oze ịnị ụvọ ẹnịnị mẹ ịnị akakana Anigiriki nị. Ẹ màa kà a, dị avaba ẹnịnị kú irenu nị.

¹³ Ịjị ẹ sị ịrẹyị ẹnịnị kà ta, dị Ijemiisi tụ́ ohi nị, dị ọ ka, “Ẹwụ nịnị ẹyịnyara amị! Batọ ịrẹyị amị nịnị!

¹⁴ Ịsayịmọnị ọ sị ọọ kà a yị, Óhomorihi ọnị ụvọta meme nyima aa sị ayịị tụ́ ịnị ịrẹyị Anigiriki bẹẹ. Agụvị avọọ dị ọ nyị aza hụụnị Anigiriki ka ẹ̀ vị aza anị nị.

¹⁵ Ịrẹyị ọnị ọnịsẹ nịnị kà ọnịrị ịrẹyị ọnọnị ệ dọ ẹngụ ivenu. Iwe Ohomorihi ộ kà a ka:

¹⁶ ‘Ananyị yị ka ịrẹma ọsọnị ọnị vaa vaavẹ, di oni ò ve tenyi irehi Idevidi ene si wú hi ẹtẹ dà, di oni tenyi eburu anị dà;

¹⁷ di avaba aza ana vọ è zụ sì Ohomorihi, ọnị ọ vị ka avaba Anigiriki ọnị ọnị raà hị́ ka ẹ̀ vị áanị. Ananyị yị ana mẹ avaba ịsa ẹnẹnị ọ vavọọ kà a nị.’

¹⁸ Â yẹ ịsa ẹnẹnị hụrẹ ụmọrụmọ.”

¹⁹ Dị Ijemiisi rẹ ka, “Ini eyi amị, ayị vọrọ ka ya kụ́ ọọ kata Anigiriki ana và ká Ohomorihi vẹ ẹngụ.

²⁰ Ama à vẹ ya chẹrẹ iwe tụ́ hi wa ka asị ẹ nyị ụvọ tụ́ ịnị ịrẹyị ori, ka ọ va vara wa aza ẹnẹ ẹ̀ yị nị. À rẹ kà a yị wa ka asị ẹ rẹ sẹ̀ ịrẹka, asị ẹ rẹ̀ rẹ rị uye enee sima ọrọkọ wụ. Asị ẹ rẹ rị anya.

²¹ Agụvị ka o si kù ana a hụrẹ aa kà ọda Imosiisi ini irehi Ohomorihi, dị aa kà ịrẹyị anị avaba ẹkụra ịnị ẹkụhị ụhwọtụ-ẹkụhị ụhwọtụ nị.”

Iwe ana a chẹrẹ tụ́ hi ọdọwụ nịnị ẹnẹ ẹ̀ yị vị Aniju

²² Dị odeyi nịnị ọnịrị azọkụ ịragụ Ohomorihi ne beri anịragụ Ohomorihi ro ka ô zoza ka ẹnị ẹ̀ nyị ọza hụụnị akakana ẹnịnị, dị ẹnị ẹ̀ tụ́ wa saasa Ịpọọrụ ọnịrị Ịbanabasị nọ Antịyọkị. Ệ nyị Ijudasi ọnị ịrẹha ẹtẹ anị rị Ibarisabasi, beri Isira. Ẹnị ẹyịva ẹnẹnị vị ana nyayịnẹ nyị ụbanyị ịnị akakana ọdọwụ nịnị.

²³ Dị a chẹrẹ iwe ọnọnị, dị a sị tụ́ wa ụtụ nị: “Ẹyị odeyi beri azọkụ ịragụ Ohomorihi ọnịrị ọdọwụ ana vọ, yâ kụ́ wụ nịnị ẹtẹẹtẹrẹ, ẹwụ nịnị anda ayị ẹnẹ ẹ̀ yị vị Aniju ene hi Antịyọkị ọnịrị Isiriya ne beri Isirisiya!

²⁴ Yâ wụ́ ka aza ẹnyị ana hụụnị akakana ayị vẹ, aa sẹ̀ ịrẹkaa kụ́ ọọ kata wụ nịnị ẹngụ. Eyee sì ka ẹnị ẹ̀ và ayị awụ nịnị zí. Ama yẹ yị tụ́ wa ụtụ vụrụ-vụrụ.

²⁵ Ị mẹ̀ gẹ, avaba ayị ộ dọ ka ô zoza ka ya tụ́ hi wu nịnị. Agụvị avọọ ị nyị aza, dị ị tụ́ wa saasa Ịbanabasị ọnịrị Ịpọọrụ nị. Yee sì ịrẹyị ẹnịnị ẹtẹẹtẹrẹ.

²⁶ Ẹnịnị ệ sị ịrẹsụ tụ́ isu agụvị ụkọrọ Ijeesu Ikirisiti Ananyị yị.

²⁷ Ya rẹ tụ́ Ijudasi ọnịrị Isira hi wu nịnị ka ẹ̀ rẹ sị irenu kà a wụ nịnị.

²⁸ Ẹyịrị Ụhwẹ Ọnịnị ô ro o ka ô zoza ka à sị sị ẹnya ọrata tụra wụ nịnị, ẹ̀ yị vị ịrẹyị chee ẹnẹnị kẹnẹ, ana a nyị ka wa sị eyi pe nịnị:

²⁹ Asị ụ rị ịsa ana a sị mẹ̀ ịsọvọ hi ori nịnị! Asị ụ rị anya nịnị; asị ụ rẹ rị uye enee sima ọrọkọ wụ nịnị! Asị ụ rẹ sẹ̀ ịrẹka nịnị! O vee zoza, wàa sị eyi pe ẹngụ awụ nịnị, dị ụ wẹ̀ yị mẹ̀ ịsa ẹnẹnị nịnị nị. Adịhyọsa nịnị!”

³⁰ Ịjị a sị ọnụtụ ẹnẹẹ tụ́, di e si hu, di e chí na ngụ Antịyọkị nị. Dị ẹ kụ́ ọdọwụ nịnị gụ ịzọọ, dị ẹ sị iwe ọnọọ yị wa nị.

³¹ Ịjị aza ẹnẹẹ kà iwe ọnọọ, ayị ẹnẹnị ô hine ẹtẹẹtẹrẹ agụvị ụtụ ayọnẹtẹ ana a tụ́ hi wa.

³² Ijudasi ọnịrị Isira ẹnị vị ọnịsẹ. Ê pe aza ẹnẹẹ kà ịrẹyị ẹtẹẹtẹrẹ, di e hú wa ụvọ, dị ẹ tụ́ wa ọtụtụrụma nị.

³³ Ịjị ẹ sị ụhwọ tụ́ ịzọọ chee, dị ọdọwụ ẹnẹẹ sị wa na tụ́ ịnị ẹngwọọrọ nị. Dị ẹ varẹma ne tù aza ana tụ́ wa ụtụ nị.

³⁴ [Ama di Isira ka ọnị kụkụ aa yà ịzọọ da nị.]

³⁵ Ịpọọrụ ọnịrị Ịbanabasị ệ yà Antịyọkị kù, dị ẹnịrị aza ọrụrụ-ọrụrụ aa kà ịrẹyị Ananyị yị, dị ẹyaa sị ịsaa zụ̀ aza nị.

Ịpọọrụ ọnịrị Ịbanabasị ệ há hi

³⁶ Ịjị ọ da kù, ịnị ẹkụhị ọnya, dị Ịpọọrụ kà a yị Ịbanabasị ka, “Vẹ ya varẹma ne hee anda ayị nịnị ịnị avaba ẹkụra ọnị ị yà kà ịrẹyị Ananyị yị, di ye ne re wa, ẹ mẹmẹ yà!”

³⁷ Ịbanabasị ee sì ka ẹnịrị Ịjọọnụ ọnị ịrẹha ẹtẹ anị rị Ịmaakị ẹ̀ zị.

³⁸ Ama Ịpọọrụ oni o yi ro ka â vọrọ ka ẹnị rị ọọ ẹ̀ zị, agụvị ka Ịmaakị ọ yị saasa wa ne tù ẹtẹ; Ipamihwiriya ọ yà varẹma, dị ọ navọ wa nị.

³⁹ Ahankata ẹnịnị ọnọọ ộ banyị pooro ne tù ka ẹnịnị sị há hi. Dị Ịbanabasị sị Ịmaakị, dị ẹ ngụ ẹpa, dị ẹ nọ Ịsayịpịrụsị nị.

⁴⁰ Dị Ịpọọrụ ọnị rẹ nyị Isira, dị ọdọwụ nịnị sị wa chire Ohomorihi ụvọ ka ọ̀ mẹ ọyịza yị wa; dị ẹyaa na nị.

⁴¹ Dị ọ zị oze Isiriya ọnịrị Isirisiya na para hu, dị ẹyaa tụ́ anịragụ Ohomorihi ẹnẹẹ ọtụtụrụma nị.