Odeyi 11 - IWE ỌNỊNỊ

Ipita ộ kà enube Íjerusarẹmị

¹ Apositeri nịnị ọnịrị ọdọwụ nịnị ene hi avaba Ijudiya ệ wụ́ ka Anigiriki ẹnị ẹ rẹ sị ịrẹyị Ohomorihi dọ.

² Ípita mẹ̀ hịrẹ nọ Ijerusarẹmị, dị ọdọwụ Aniju nịnị ee beri ọọ nyị ahankata nị.

³ Dị ẹ ka, “Sị ẹ vẹ di u ne chí ini eehi aza ẹnẹ ẹ̀ yị jị ụvẹvẹnẹ, dị ẹwụrị wa hyakụ aa rị ịsa bẹẹ?”

⁴ Dị Ipita nyima, dị ọ kà enube avaba ịsa ana mẹ yị wa ahụ-ahụ nị. Dị ọ ka:

⁵ “Ịnị ẹkụra Ịjọpa mị yà aa mẹ̀ aduwa, di mi re ẹtẹ nị. Mê re ịsa ọnya anka ịta ọgana avọọ, dị a za a ụtọ ẹyịna, di e chí ọọ hụrẹ ẹbẹẹba hi ẹtẹ ọgụrị mị nị.

⁶ Dị mị na jị eyi ngụ ọ, di mi re ịsụpa ịnị avị irenyi-irenyi ọnịrị ẹwụ nịnị beri inomi nịnị nị.

⁷ Dị mị wụ́ ọngwẹ ọnya, dị ọ ka: ‘Ipita, kwẹẹtẹ, wa wụ̀ wa, dị ụ waa rị ọọ!’

⁸ Ama dị mị ka: ‘Vụrụ-vụrụ, Ananyị yị, mẹ yị sị ịsa ẹnẹ ẹ̀ yị nị, ọnịrị ịsa eenyisi kanyị irenu amị da.’

⁹ Dị ọngwẹ ọnọọ re tụ́ ohi hụrẹ ẹbẹẹba dị ọ ka: ‘Ịsị Ohomorihi ọ̀ọ sị vara ọnịnị, asị ụ kụkụ hị́ ọọ ịsa eenyisi!’

¹⁰ Ịrẹyị ọnọnị ộ maanị mẹ tù ụpẹ ẹẹta, dị a kụ́ avaba ịsa ẹnẹẹ varẹma nọ ẹbẹẹba nị.

¹¹ Ịnị ụmẹ ọnọọ gẹdẹ-gẹdẹ, aza ẹnị ẹẹta ana a tụ́ hụrẹ Isesariya vẹ ịdị amị, ẹ va sị ngụ ini eehi ọnị mị yà.

¹² Dị Ụhwẹ Ọnịnị ka ma wụsẹẹ dị waa na, asị mị mẹ ayị ẹẹva nị. Anda ayị ịhịnọnyị ẹnẹnị ệ saasa mị nọ ini eehi ọnọrụ ọnọọ.

¹³ Dị ọ kà a yị ka oni ô re anggẹẹrị ka ọ jẹẹ ini eehi anị. Dị ọ ka ộ kà a yị ọnị ka ọnị ọ̀ tụ́ aza nọ Ịjọpa, dị ẹ̀ na hị́ ọza ịnya ana aā hị́ Ịsayịmọnị, ọnị ịrẹha ẹtẹ anị rị Ipita, va ini eehi anị,

¹⁴ ka ọ vaa kà ịrẹyịị yị ọnị ana vaa mẹ ka ọnịrị aneehi anị ẹ̀ zụ há.

¹⁵ M màa yịị kà ịrẹyị yị wa, dị Ụhwẹ Ọnịnị dọ avaba ayị ẹnịnị, anka ọ mẹ̀ rẹ dọ avaba ayị ẹyị ịpaapa ịhị ọnọọ nị.

¹⁶ Dị mị tamayị ịrẹyị ana Ananyị yị kà ka Ịjọọnụ aa sị enyi mẹ ọyịhwenyii yị aza, ama Ụhwẹ Ọnịnị a vaa sị mẹ ọyịhwenyii yị ẹwụ nịnị nị.

¹⁷ Avaba ọzọza ô re e ka ẹyịza ọnyọọnya Óhomorihi sị yị aza ẹnẹẹ ẹnẹ ẹ̀ yị vị Aniju nị, anka ọ mẹ̀ rẹ sị yị ẹyị, ị mẹ̀ sị ayị tụra Ijeesu Ikirisiti Ananyị yị. Ẹnẹ vị ẹmị, ana vaa dọ Ohomorihi oro ka asị ọ mẹ ịsị ọ ka ọnị aa mẹ?”

¹⁸ Ịjị ẹ maanị wụ́, dị ẹ kụ́ ịrẹka ẹnịnị kwooze, dị ẹ kụkụ aa ga Ohomorihi nị. Dị ẹ ka, “Ọnị ọ vị ka Ohomorihi ọ rẹ raà sị oze yị Anigiriki ka eni è re zụ ro ịnẹ varẹma, dị ẹ̀ zụ yàra ị́dị anị zịna-zịna.”

Ịragụ Ohomorihi ana yà Antịyọkị

¹⁹ Ọdọwụ ẹnyị vị ana gara hi ịnị ụmẹ ụyọrị ana a yà ịnị anị wụ Isitivini. Aza ẹnyị ệ hyakụ na pooro na ngụ Ihwonesiya, aza ẹnyị ệ nọ Ịsayịpịrụsị, dị aza ẹnyị rẹ nọ Antịyọkị nị. Dị ẹ yaa kà enube ọyịza ọnọọ yị Aniju nịnị kẹnẹ nị.

²⁰ Ẹnyị ịnị ọdọwụ ẹnẹẹ vị Aniju ana hụrẹ Ịsayịpịrụsị ọnịrị Isayirini vẹ. Ệ nọ Antịyọkị, dị ẹyaa kà enube ọyịza Ijeesuu yị Anigiriki nịnị bẹẹ nị.

²¹ Ohomorihi ộ sị ụkata yị wa ẹtẹẹtẹrẹ, dị Anigiriki ọrụrụ-ọrụrụ dọ wụ́, dị ẹ và ká Ananyị yị vẹ nị.

²² Anịragụ Ohomorihi Íjerusarẹmị ệ wụ́ ịrẹyị ọnọọ, dị ẹ tụ́ Ịbanabasị nọ Antịyọkị nị.

²³ Íbanabasị mè tù ịzọọ, di o re ịsị Ohomorihi mẹ ịzọọ ịnị ayamva anị, ayị anị ô hine. Di o hú wa ụvọ ka ẹ̀ nyị ayị ọnya, dị ẹ̀ yịị sị ayị ẹnịnịị yị Ohomorihi nị.

²⁴ Ịbanabasị vị ọza ọyịza. Ụhwẹ Ọnịnị ộ dọ avaba ayị anị, dị ọ rẹ sị ayị tụra Ohomorihi ẹtẹẹtẹrẹ nị. Ohomorihi ộ kụ́ aza ọrụrụ-ọrụrụ va yị ẹngụ anị.

²⁵ Dị Ịbanabasị nọ Ịtasọsị ka oni ò ne sì Ịsọọrụ nị.

²⁶ O mè si oo re, dị ọ sị ọọ vẹ Antịyọkị nị. Ịnị ịrayị ọyịvụrụ ọnya, ẹnẹ ẹnịrị anịragụ Ohomorihi aa kụ́ gụ, dị ẹyaa zụ̀ aza ọrụrụ-ọrụrụ ịsa nị. Antịyọkị a vịdị yà hị́ ọdọwụ nịnị “Evere Ikirisiti” ịpaapa nị.

²⁷ Ịnị ụmẹ ọnọọ, ọnịsẹ ẹnyị ệ hụrẹ Ijerusarẹmị nọ Antịyọkị.

²⁸ Ọnya ịnị ẹnịnị ana aā hị́ Agabọsị, ộ kwẹẹtẹ, dị Ụhwẹ Ọnịnị sị ụkata yọ, dị ọ kà ịsẹ ka ụngwẹ ọbanyị aa vẹ ịnị avaba ẹhẹ nị. Ụngwẹ ọnọọ ộ vẹ ịnị ụmẹ oni Ịkịrawụdịyọsị sị rị ohinọyị.

²⁹ Dị ezirẹma nịnị ka ọzịnya-ọzịnya ẹnịnị ẹ̀ sị vụrị, dị ẹ̀ sị ịsị èe re na mẹ ọgụvọ yị anda ẹnịnị ene hi Ijudiya.

³⁰ Ịzẹyịza, dị ẹ vavọọ mẹ nị. Dị ẹ sị ịsị e re tụ́ Ịbanabasị ọnịrị Ịsọọrụ hi azọkụ ịragụ Ohomorihi ene hi Ijerusarẹmị nị.