Odeyi 10 - IWE ỌNỊNỊ

Ịrẹyị Ipita ọnịrị Ịkọnẹrịyọsị

¹ Â nyị ọnọrụ ọnya aanị ẹkụra Isesariya ana aā hị́ Ịkọnẹrịyọsị. Ọga isoja ẹchẹhị nịnị ọ vị nị. Ini isoja nịnị Aniroomi ẹ yà nị.

² Ộ nyị ahẹkẹ ẹtẹẹtẹrẹ, ọnịrị aneehi anị ệ nyị angwahi Ohomorihi. Ọ rẹẹ̄ mẹ aza ẹyịza, dị ọ rẹẹ̄ mẹ̀ aduwaa hi Ohomorihi ụmẹ tụra ụmẹ nị.

³ Ẹkụhị ọnya ịnị ụmẹ agogo ẹẹta ọọdụ, ô re ẹtẹ. Di o re anggẹẹrị Ohomorihi, dị ọ ngụ eehi ve tù ọọ, dị ọ hị́ ọọ ka, “Ịkọnẹrịyọsị!”

⁴ Ô re anggẹẹrị ọnọọ, dị angwa hí ọọ nị. Dị ọ ka, “Sị ẹ vị ọnọọ, Ananyị yị?” Dị anggẹẹrị ọnọọ ka, “Ohomorihi ọ raà tamayị aduwa awụ ọnịrị ẹyịza ọnị ụ waa mẹ.

⁵ Booro aanị, tụ́ aza nọ Ịjọpa na hị́ ọnọrụ ọnya aanị ana aā hị́ Ịsayịmọnị, ịrẹha ẹtẹ anị ọ rị Ipita nị.

⁶ Ô chí ị́dị ọnịtụmpaha ọnya aanị ana aā hị́ Ịsayịmọnị. Irehi anị vị ana gụrị ụtọ oku.”

⁷ Dị anggẹẹrị ene ee pe e kà ịrẹyị, si hu nị. Dị Ịkọnẹrịyọsị hị́ ezi ahụ anị ẹẹva beri isoja ọnya ana rẹ nyị ahẹkẹ, ana aa mẹ̀ ụkọrọ yị Ịkọnẹrịyọsị ọnị ụvọta.

⁸ Dị ọ kà a yị wa ịsị ẹ mẹ, dị ọ tụ́ wa aa nọ Ịjọpa nị.

Ipita ô re ẹtẹ

⁹ Eyinẹhẹ anị, aza ẹnẹẹ màa na, ẹyaa vaa ngụ Ịjọpa. Ịnị ẹhụụ ụmẹ agogo ẹwụrẹva, dị Ipita hịrẹ nọ ịrẹsụ irehi ka ọnị ọ̀ na mẹ̀ aduwa nị.

¹⁰ Ụngwẹ aa kụ̀ ọọ, di ee sì ka ọnị ọ̀ rị ịsa nị. A màa mẹ̀ ịsa, dị Ipita re ẹtẹ nị.

¹¹ Ô re ka ihinẹba ộ na, dị ịsa ọnya aanị ana sị mẹẹ anka ịta ọgana avọọ, dị a za a ụtọ ẹyịna, di ee chí ọọ hi ẹtẹ nị.

¹² Uye irenyi-irenyi hi ịnị anị beri ẹwụ nịnị ọnịrị inomi nịnị.

¹³ Dị ọngwẹ ọnya kà a yọ ka, “Ipita, kwẹẹtẹ, wa wụ̀ wa, dị waa rị ọọ!”

¹⁴ Dị Ipita ka, “Vụrụ-vụrụ, Ananyị yị. Mẹẹ̀ yị rị ịsa eenyisi, à vị ịsa ẹnẹ ẹ yị nị ọnyọọnyị da.”

¹⁵ Dị ọngwẹ ọnọọ rẹ kà a yọ ka, “Ịsị Ohomorihi ọ̀ọ sị vara ọnịnị, asị ụ kụkụ hị́ ọọ ịsa ene du ẹngụ.”

¹⁶ Ịrẹyị ọnọnị ộ maanị mẹ ụpẹ ẹẹta, dị a rẹ sị ịsa ọnọọ varẹma nọ ini ihinẹba nị.

Ipita ộ nọ ịdị Ịkọnẹrịyọsị

¹⁷ Ipita ee ro o ka sị ẹ vị iruvo ẹtẹ oni oni re aanị. Ịjọnọọ ọnụtụ Ịkọnẹrịyọsị ẹnẹẹ ẹ sị irehi Ịsayịmọnị re, dị ẹ jẹẹ enoze nị.

¹⁸ Di e nowu họ̀ use ka, “Áá nyị ọzọga ene chí ịzẹnị ana rị Ịsayịmọnị Ipita?”

¹⁹ Ipita ee yii sì ka ọnị ọ̀ yẹ iruvo ẹtẹ oni oni re aanị, dị Ụhwẹ Ọnịnị kà a yọ ka, “Re, â nyị aza ẹnị ẹẹta ene ee sì wu.

²⁰ Kwẹẹtẹ, chí na, dị ụ wa saasa wa! Asị ụ mẹ ayị ẹẹva, agụvị ka ẹma tụ́ wa vẹ nị!”

²¹ Dị Ipita chí ne tù wa, dị ọ kà a yị wa ka, “Ẹmị oni u wee sì nịnị yị. Si u sì vẹ nịnị?”

²² Dị ẹ ka, “Ịkọnẹrịyọsị ọga ayị vị ọnịzẹyịza, dị ọ rẹ nyị angwahi Ohomorihi nị. Avaba Aniju nịnị ệ sị ụbanyị yọ ẹtẹẹtẹrẹ. Anggẹẹrị Ohomorihi ọnya ộ kà a yọ ka ọ̀ tụ́ hị́ wụ vẹ ini eehi ịdị anị, dị ọ̀ wụ́ ịrẹyị ọnị ụ wàa nyị ọyịkà.”

²³ Dị Ipita hị́ wa ngụ eehi, dị ẹ sụ̀ ịzọọ nị. Eyinẹhẹ anị, dị ọ kwẹẹtẹ, dị ọ saasa wa aa na nị. Dị ọdọwụ ẹnyị ene hi Ịjọpa rẹ saasa wa na nị.

²⁴ Eyinẹhẹ anị, dị ọ na ngụ Isesariya nị. Ịkọnẹrịyọsị ọnịrị anda ẹnịnị ne beri ọta anị hi ịzọọ, ee zí wa.

²⁵ Ípita màa vaa ngụ eehi, dị Ịkọnẹrịyọsị na gẹrị ọọ, dị ọ và ku ẹtẹ kụ́ ọọ nị.

²⁶ Dị Ipita sị ọọ kwẹẹtẹ, dị ọ ka, “Kwẹẹtẹ, ka ọza kẹnẹ ẹ́mị rẹ vị nị.”

²⁷ Dị Ipita ee pe Ịkọnẹrịyọsị kà ịrẹyị, ẹ màa nọ ini eehi, di e ne tù ka aza ọrụrụ-ọrụrụ ẹ sị kụ́ gụ ini eehi nị.

²⁸ Dị ọ kà a yị wa ka, “Ẹwụ nịnị nyẹmba ộ yẹ ka ahẹkẹ Aniju ọ mā zẹẹ ka ẹnịrị Anigiriki ẹ̀ mẹ ẹvabẹ. Aniju ẹ mā rẹ ngụ ini eehi ẹnịnị. Ama Ohomorihi ọ raà sị zụ̀ mị ka asị mị kụkụ hị́ ọzọnyị-ọzọnyị ka ẹ yị nị, à vị ka di mee re wa anka ịsa eenyisi.

²⁹ Agụvị avọọ m maa vẹ, ụ mẹ̀ tụ́ va hị́ mị dị mẹ̀ yị nyị ahankata nị. Kà a mị sị ẹ vẹ dị ụ tụ́ va hị́ mị?”

³⁰ Dị Ịkọnẹrịyọsị ka, “Ụmẹ aanị ajịnọgwẹẹna mị sị sị aa mẹ̀ aduwa ini eehi amị nị, ịnị ụmẹ agogo ẹẹta ọọdụ. Di mi vene re ka ọza ịnya ene chire awuru ọvụ sẹnẹ-sẹnẹ jẹẹ ọ́vịdị amị nị.

³¹ Dị ọ ka: ‘Ịkọnẹrịyọsị! Ohomorihi ọ sị aduwa awụ dọ. Ọ rẹ tamayị ẹyịza ọnị ụ waa mẹ.

³² Tụ́ na Ịjọpa na hị́ Ịsayịmọnị ọnya, ọnị ịrẹha ẹtẹ anị rị Ipita. Ô chí ini eehi Ịsayịmọnị ọnịtụmpaha, ana ra ụtọ oku.’

³³ Dị mị wụsẹ tụ́ va hị́ wụ nị. Wâ mẹẹ dị ụ vẹ. Avaba ayị hi ọvịdị Ohomorihi ịzẹnị, yee zí ka ya wụ́ ụtụ oni Ohomorihi ọ̀ọ tụ́ wụ hi yi.”

Ịrẹyị oni Ipita kà

³⁴ Dị Ipita nyima, dị ọ ka, “Ịzẹyịza, mê re ka Ohomorihi ọ mā nyị ọza remeyi.

³⁵ Ọza ene èe hí angwa anị, dị ọ mẹ̀ ịsa ana vọrọ nị, vị Ohomorihi aa dọ ọ nị, anẹkụra tụra anẹkụra ọnị ọ̀ọ vị.

³⁶ Wâ yẹ ụtụ oni Ohomorihi tụ́ hi Anisirẹrị nịnị. Ini oze Ijeesu Ikirisiti, ộ kà enube ọyịza ẹngwọọrọ yị aza. Ijeesu ọnọọ ọ nyị avaba ịsa nị.

³⁷ Wa rẹ yẹ ịsa ana mẹ nịnị, hụrẹ Igariri na ngụ avaba ẹtẹ Ijudiya. Ịsa ẹnẹẹ ệ mẹ ị́rẹma ọnị Ịjọọnụ sị ọọ kà ka aza ẹ̀ mẹ̀ ọyịhwọzenyi.

³⁸ Wa rẹ yẹ Ijeesu Anịnazarẹtị nịnị. Ohomorihi ộ sị Ụhwẹ Ọnịnị ọnịrị ụkata yọ ẹtẹẹtẹrẹ. Aa ngụ ọọ zị, dị aa mẹ ọyịza, dị ọ raa mẹ aza ene Echu aa sị ụyaa rị ụkụ nị, agụvị ka Ohomorihi ộ yà pe e.

³⁹ Avaba ịsị ọ mẹ ẹkụra Aniju ọnịrị Íjerusarẹmị vị eyi ayị. Ama ệ kanyị ọ za apavahị, dị ẹ wụ̀ ọ nị.

⁴⁰ Ama ịhyẹgwẹta anị, dị Ohomorihi ha a hụụnị isu nị. Dị ọ mẹ ka ọ̀ sị ẹngụ anị zụ̀ gedebee nị.

⁴¹ Ẹ yị vị avaba aza ọ sị ẹngụ zụ̀, ẹ̀ yị vị onivenu oni Ohomorihi vịdị sị nyị. Ẹyị rẹ yà ini onivenu ẹnẹẹ. Ẹyịrị ọ ộ rị, yê hú, ọ mẹ̀ sị ha hụụnị isu.

⁴² Dị ọ mẹ ọdaa yị ka ya kà enube ọyịza yị aza, dị ya kà a yị wa ka ọnị Óhomorihi nyị ka ọ̀ vị ọmọkarẹyị aza ana yàra ọnịrị aza ene sú nị.

⁴³ Avaba ọnịsẹ ệ kà ịrẹyị anị ka ọza tụra ọza ana àa sị ayị tụra a, ọ vaa vagu wa ịnị ịvị ẹnịnị ịnị ụkata ịrẹha anị.”

Aza ẹnẹ ẹ̀ yị vị Aniju ệ dọ Ụhwẹ Ọnịnị

⁴⁴ Ípita màa yịị kà ịrẹyị, dị Ụhwẹ Ọnịnị dọ ayị avaba aza ana aa wụ́ ịrẹyị anị nị.

⁴⁵ Ô hí ọdọwụ Aniju nịnị ana saasa Ipita vẹ irenu ka Ohomorihi ộ sị Ụhwẹ Ọnịnị mẹ Anigiriki ẹyịza bẹẹ.

⁴⁶ Ẹnịnị ệ wụ́ ka ẹyaa sị ẹkụra ọsaa kà ịrẹyị, ẹyaa sị ụgaa yị Ohomorihi. Dị Ipita ka:

⁴⁷ “Aza ẹnẹnị ẹ sị Ụhwẹ Ọnịnị dọ, anka ẹ́yị mẹ̀ rẹ dọ; áá nyị ọza ana kụkụ zụ za wa ka asị a sị enyi mẹ Ọyịhwenyi ẹdọwụ yị wa?”

⁴⁸ Dị ọ ka à mẹ̀ ọyịhwọzenyi yị wa ịnị ịrẹha Ijeesu Ikirisiti nị. Dị ẹ dá ịpẹ yị Ipita ka ọ̀ yà ịdị ẹnịnị mẹ ẹkụhị chee nị.