Ịzẹhwanaya 3 - IWE ỌNỊNỊ

Anijerusarẹmị ệ mẹ̀ ebira odivi ama Ohomorihi ộ dọ wa ha.

¹ Ịrẹyị o tù Ijerusarẹmị ẹngụ agụvị ka ẹkụra ọnọọ o si du. Aza ana ra ịzọọ aa mẹ akamawụ, dị ẹ yaa chamayị yị ẹngụ nị.

² Ẹnịnị ẹ yị wụ́ chire Ẹnẹyịmavara. Àa kà a yị wa pooro ẹnịnị ẹ yị dọ. Ẹnịnị ẹ yị sị ayị tụra Ẹnẹyịmavara, di e vee hyakụ si ọgụvọ hụụnị ụvọ anị.

³ Ọdọvịdị ẹnịnị vị ana sị mẹẹ anka idu ene ee si ọza ana a sị mẹ ụngwẹ avọọ. Ọhọ̀ha ẹ yị zẹẹ ka à nyị ịsị ẹ vọ tịtẹ vụrụ-vụrụ. Ọmọkarẹyị ẹnịnị vị ana yà anka akatapooro ọnị ụngwẹ aa kụ avọọ.

⁴ Ọnịsẹ ẹnịnị vị oyi ana dụ ẹngụ ẹnịnị kẹnẹ. Ẹnịnị ẹ yị wụra sị ayị tụra. Ohirẹsụ irehi Ohomorihi ẹnịnị vị ana aa sị akamawụ mẹ̀ ịsa enyisi ịnị irehi Ohomorihi. Ẹnịnị ẹ raà sị ọda Ohomorihi siisi ẹtẹ.

⁵ Ẹnẹyịmavara vị ana yị yà pe wa, dị aa mẹ̀ ịsa ana vọrọ nị. Eyinị-eyinị Ẹnẹyịmavara aa sị ịzẹyịza anị zụ̀ wa, ama aza edivi ene hi ịzọọ vị ana yịị mẹ̀ ebira odivi ẹnịnị, dị ụhị ẹ yị nyị wa.

⁶ Ẹnẹyịmavara kà ọnị ọ raà wụ̀ avaba anẹkụra nịnị ha, dị ọnị chaka ọvọ ẹnịnị, dị ẹkụra ẹnẹẹ tu osusu, dị ubooro ẹnịnị jị ọngwa nị. Ẹ yị nyị ọza ana vọ ẹtẹ tụ́ ịzọọ.

⁷ Ẹnẹyịmavara kà ọnị ô ro kà ịrẹyị ene tù wa aanị vaa zụ wa ịrẹyọyẹ, dị ẹ nyị angwahi anị, dị ẹ wụ́ ịrẹyị ọnị ọnị ọ ka yị wa. Ama dị ahịka ẹnịnị aa da ụvọ tụ ịnị ụvọ ịnị ebira odivi huna avọọ nị.

Ụya ọnịrị ọyịro ịnẹ Anẹkụra Nịnị

⁸ Dị Ẹnẹyịmavara kà ee nee zi ẹkụhị ọnị ọnị vaa kwẹẹtẹ tù wa. Ọ kà, ọnị vaa kú avaba ẹkụra ọnịrị ịjọva ẹkụra irenyi-irenyi gụ dị ọnị ọ kụ́ ayị hi wa. Dị avaba ẹtẹ rị ịra agụvị ka ayị anị aa dà ọva.

⁹ Ịhị ọnọọ, Ẹnẹyịmavara kà ọnị vaa vara aza, dị ẹ kụkụ a hẹkẹ ọnị, dị ẹnịnị ẹ yị kụkụ mẹ̀ ori. Dị ẹnịnị kụkụ aa wụ́ chire ọnị Ẹnẹyịmavara.

¹⁰ Hụrẹ ẹtẹ Etiyopiya, aha ẹnẹẹnẹ, aza Ẹnẹyịmavara ana gara hi ozi vaa sị ịsa ịsọvọ vaa yọ.

¹¹ Dị Ẹnẹyịmavara kà, ịnị ụmẹ ọnọọ, ụhị ọ yị kụkụ vaa nyị aza anị ana vịdị mẹ̀ akamawụ hi ọnị. Ọ kà ọnị va kụ́ aza ana aa sị ẹngụ tụ́ ẹba kwooze, dị aza ẹ yị kụkụ vaa mẹ̀ akamawụ hi ọnị ịnị ataba ọnịnị anị.

¹² Dị Ẹnẹyịmavara kà ọnị vaa navọ aza ana ka ẹngụ ẹnịnị chi di e zwe va rị ọnị ka ẹ̀ ra ịzọọ.

¹³ Ẹnị ana ha ịnị Anisirẹrị ẹ yị kụkụ vaa mẹ̄ ebira odivi, ẹ yị rẹ kụkụ vee chechee, ẹ yị kụkụ vee vene ọza. Dị Ẹnẹyịmavara ee sere wa, dị angwa o yi hi wa, dị ọ mẹ ka ò zee yị wa.

Ahẹ ayohine

¹⁴ Ẹwụnị Anisirẹrị waa jẹ, dị waa jị ahẹ, dị waa ka bobooro! Wee nyii, waa mẹrẹ sadaa ẹwụnị Anijerusarẹmị.

¹⁵ Ẹnẹyịmavara ọ raà za ụya awụ nịnị jẹẹ. Ộ sị ọnịvị awụ nịnị dụ kwooze. Ẹnẹyịmavara ana vị ohinọyị Anisirẹrị jẹ wụ nịnị ịrẹma. Ẹ yị nyị ka we kuku hí angwa nịnị.

¹⁶ Ụmẹ aa vẹ ọnị a vaa kà yị Anijerusarẹmị ka asị ẹnịnị rẹ hụrẹ ayịnẹ, dị asị ẹ va ẹngụ hii.

¹⁷ Ẹnẹyịmavara ana vị Ohomorihi awụ nịnị yà pe wụ. Ụkata anị aa sị wụ nịnị nyị ehuna ọnịvị awụ nịnị nị. Agụvị ka o sì ịrẹyị ẹnịnị, ọ vaa sị ayị awụ nịnị nẹtẹ, O vee hine ayị tu wu nịnị, dị aa jị ahẹ ịnohine.

¹⁸ Ẹnẹyịmavara kà, ụya awụ nịnị ọ ta. Ụhị ọ yị kụkụ vaa nyị wụ. Ayị awụ nịnị vee hine anka ọza o rere aa rị eche avọọ.

¹⁹ Ẹnẹyịmavara kà ụmẹ aa vẹ ọnị ọnị vaa sị ụya rị aza ana chamayị yị wụ. Ọnị vaa dọ ọkụmị nịnị ha, dị ọnị kụ́ aza ana a za ọrịhị nọ ẹkụra ọsa vavẹ eehi. Ọnị vaa vara ụhị ẹnịnị ka ọ vị ịsa ụbanyị yị wa. Avaba anẹhẹ vaa ga wa.

²⁰ Ẹnẹyịmavara kà, ụmẹ aa vẹ ọnị ọnị vaa kụ́ aza ana gara hi ẹhẹ vavẹ eehi ẹnịnị. Ọnị vaa mẹ̀ ka ẹ ngụrẹyị ịnị avaba ẹhẹ Ẹnẹyịmavara kà ọnị vaa mẹ̀ ka ọ varẹma zee yị avaba ẹnịnị.