Ịzẹhwanaya 1 - IWE ỌNỊNỊ

¹ Â nyị ụmẹ ọnya aanị, ịnị ụmẹ ọnọọ Ijosaya ana vị ozi Amọnị sị vị ohinọyị Ijuda nị. Ịnị ụmẹ ọnọọ â nyị ọnọrụ ọnya aanị ọnị ịrẹha anị rị Ịzẹhwanaya. Ada anị ọ rị Ikusi ana vị ozi Igidarịya, ozi Amarịya ana ada anị rị Ihezekaya nị. Ẹnẹyịmavara ộ tụ ộ ụtụ hi Anịjuda nịnị.

Ọkarẹyị ọnị Ẹnẹyịmavara vaa mẹ yị Ijuda

² Ẹnẹyịmavara kà ọnị vee vu avaba ịsavịsavị ene hi ẹhẹ ẹtẹ saka-saka.

³ Oni e hì aza ọnịrị uye beri inomi ọnịrị ivovo nịnị hụrị ẹhẹ. Ọnị vaa mẹ ka aza edivi ọnịrị aza anaa tụ ọza ẹda ka ẹ hyẹdụ. Avaba aza ọnị vee vu ẹtẹ hụrẹ ịrẹsụ ẹtẹ nị.

⁴ Ẹnẹyịmavara kà ọnị vaa tana ụvọ za aza ana ra hi Ijerusarẹmị ọnịrị avaba ẹtẹ Ijuda. Dị ọnị wu aza ana aa hẹkẹ ori ana aā hị́ Ịbaarị ọnịrị ọnụtụ ori ẹnẹẹ.

⁵ Ọ kà avaba aza ana hịrẹ tụ ịrẹsụ irehi na hẹkẹ ọyị ọnịrị ụhwẹ neberi ụzọmị nịnị ẹ yị vaa ha. Ẹnẹyịmavara kà ọnị vaa pa ịva yị aza ana mẹ ayị ẹẹva, dị ẹ yaa hẹkẹ ọnị, dị ẹ ya sị ịrẹha anị hị́ eku, dị ẹ rẹ yaa hẹkẹ ori ana aā hi Imorẹkị.

⁶ Ẹnẹyịmavara kà aza ana va hụ ịrẹma anị, dị ẹ yị kụkụ họ̀ ọnị use ka ọnị ọ zụ ẹnị oze vee re ẹẹva.

⁷ Dị ọ ka, ẹnịnị ẹ mẹ hẹẹ ka ẹkụhị ọnị ọnị vaa sị mẹ̀ ọkarẹyị yị wa aa gụrị ẹtẹ. Ọ kà ọnị ô tenyi ẹngụ ka ọnị ọ̀ hụrẹ wa ụvọ, dị ọnịvị ẹnịnị ẹ va hụ wa hụụnị ẹtẹ ẹnịnị.

⁸ Ẹnẹyịmavara kà ịhị eyi usu ẹnịnị ọ̀ọ nị, ọnị vaa sị ụya rị ọdọvịdị nịnị ọnịrị ezi ohinọyị neberi aza anaa hama ebira edivi anẹkụra ọsa.

⁹ Ịhị ọnọọ, Ẹnẹyịmavara vaa sị ụya rị aza ana aa saasa ori ọnịrị aza ana aa sị àko ọnịrị apẹ kụ́ ogu aza nee hi ịnị eehi ọga ẹnịnị.

¹⁰ Ẹnẹyịmavara kà, ịnị ẹkụhị ọnọọ aza vaa wụ́ owu ùnè hụrẹ oze ọbanyị ọbanyị ana aā zị ngụ Ijerusarẹmị ana aā hị́ Ozovwoovu Ivovo. Avọọ a mẹ rẹ vaa wụ́ owu boro-boro ịzị aza aā hị́ okokooro ọhụva, dị ẹtẹ aa sụ ịrẹyị waaa ịrẹsụ ataba ene hi ịzọọ.

¹¹ Ịjị ẹnị ana ra eyi ụvẹtẹ Ijerusarẹmị ẹ̀ẹ maanị aa wụ́ owu, ẹnị ẹ rẹẹ tụ orere, di ee na owu booro-booro agụvị ka avaba osohu ọnịrị aza ene che ẹkẹhị nịnị vee su.

¹² Ẹnẹyịmavara kà ọnị vee hu ịra si aza ene hi Ijerusarẹmị, dị ọnị ọ tana ụvọ za wa. Ẹnịnị vị ana sị ọkakara yaayịtẹ ka ẹ yị nyị ịsa ọnị vaa mẹ, ọ̀ọ vị odivi ọ̀ọ vị ọyịza.

¹³ A vaa dọ wa ogu ẹnẹ ẹ nyị. Ẹnịnị ẹ yị vaa ra ịnị irehi ẹnị ẹ sị ụvọta ẹnịnị da. Ẹnịnị e yi vee re oze mẹ eche hụụnị ụbazị ịvayịnị ẹnịnị, dị ẹ hyakụ vee hú ịnị anị. Irehi ẹnịnị vị ana vaa chaka, dị ẹ para eburu anị hu.

Ẹkụhị ọbanyị Ẹnẹyịmavara

¹⁴ Ẹkụhị ọnị Ẹnẹyịmavara vaa sị ụya rị wa aa gụrị ẹtẹ. Ẹ yị jẹẹ dị eyi anị ọ nị. Ẹkụhị odivi ọnọọ aa vẹ ọnị ọka ịrẹkụ ọnọrụ nịnị vee nowu ịjị ẹtẹ ọ̀ọ ka za wa.

¹⁵ Ịhị ọnọọ Ẹnẹyịmavara vaa sị zụ wa ịzị ayị kụ ọ ne tu, dị ahịka ẹngụkata ọnịrị ụya kẹnẹ e yee re nị. Ogu ọnị ẹ nyị vị ene e vee du ha, dị ọọdụ vara ịrahụ yị wa.

¹⁶ Ịhị ọnọọ ọpanyị ịrẹkụ kẹnẹ ọnịrị owu ịrẹkụ ọkụrẹkụ nịnị ana nọ ịrẹkụ ẹkụra ana aa jị ọvọ kara, dị a da irehi ọgọdọ-ọgọdọ hi, aza vaa wụ́ ịrẹyị nị.

¹⁷ Ẹnẹyịmavara kà ọnị vaa kụ ọ hana wa, dị ẹnịnị ẹ yị yẹ oze ana vọrọ ka ẹ zị anka ogweyi avọọ. Agụvị ebira odivi ọnị ẹ mẹ̀ hi Ẹnẹyịmavara, a vaa wụ̀ wa dị anya ẹnịnị ee sii vaa ha anka enyi avọọ, dị oku ẹnịnị vụ và hí ẹtẹ anka ịhyẹrẹ avọọ.

¹⁸ Ịhị Ẹnẹyịmavara aa kụ ayị hi wa, avaba ẹkẹhị ọnị ẹ nyị ọ yị vaa dọ wa ha hụrẹ ẹ ụvọ. Ẹnẹyịmavara vị ana vaa sị ọyịkụ-ọyịkụ vu avaba aza ene hi ẹhẹ ẹtẹ. Dị ọ da ẹhẹ ẹnịnị ẹjịjị ịnị asigiri.