Iruutu 3 - IWE ỌNỊNỊ

Iruutu ô re ọnọrụ

¹ O mè si kù chee, ẹkụhị ọnya di Inawomi kà a yị Iruutu, dị ọ ka, “Mee si ọ mẹ̀ mẹ vee zoza yị wụ, dị ayị awụ ọ̀ zụ nẹtẹ.

² Wáá yẹ ka Ibowazị ana nyị aarẹ ịzị ẹwụrị ezi anẹẹ anị yà mẹ̀ ụkọrọ vị anda ayị? Ọ vaa nọ ịzị eē tụ́ ibaari anị ịrahụ ajịnị.

³ Na hụ enyi dị wa dá ịsa sisi ẹngụ di we chire awuru awụ, di wa nọ ịzị eē tụ́ ịsa. Ama asị ụ zẹẹ ka Ibowazị ọ̀ yẹ ka wụ yà ịzọọ pooro dị ọ rị, dị ò hú.

⁴ Sị eyi pè ịzị ọ hụtẹtẹ tụ́. Ịjị ara ọ̀ọ sị ọ dọ, dị wa hụ ịta ahụtara anị, dị wa hụtẹtẹ ahụtara anị pè e. Ọ vaa kà yị wụ ịsa ana a vọrọ ka wa mẹ.”

⁵ Di Iruutu ka, “Mị vaa mẹ avaba ịsa ọnị wàa kà yị mị.”

⁶ Ịzẹyịza, dị Iruutu nọ ịzị a yàa tụ́ ịsa, dị ọ mẹ avaba ịsa anka ọnyị ọva anị mẹ̀ kà a yọ nị.

⁷ Ịjị Ibowazị sị ịsa rị, dị ọ sị eche hú, dị ayị anị ee hine, dị ọ na sụ pè ịzị a kụ́ ibaari anị gụ tụ́ nị. Dị Iruutu were-were na hụ ịta ahụtara anị, dị ọ hụtẹtẹ tụ́ ahụtara anị nị.

⁸ Ịnị agẹvịrahụ, Ibowazị ộ jị giri dị ẹngụ anị aa da ẹgahị nị. Ọ mẹ̀ vara akaha, dị ọ vẹ tù ọnyẹnẹẹ ahụtara anị nị.

⁹ Di Ibowazị họ̀ ọ use ka, “Ẹnị ẹ yà ịzọọ?” Dị Iruutu ka ọnị ọ vị Iruutu ozi ịdị anị nị. Dị ọ rẹ ka, “Ẹwa vị anda ọva amị ana a vọrọ ka ọ̀ kú mị ogu nị.”

¹⁰ Di Ibowazị ka, “Ẹnẹyịmavara ọ̀ navọ ò zee wụ, ozi emi. Ịsị ụ mẹ̀ aanị ô huna ọnị ụ vịdị mẹ̀ ana sị zụ ka wâ sị ayị yị ovwoovu ọva awụ. Wẹ yị kà a ka wee si ezwọọmụha, ọ̀ọ nyị ịsa, ọ̀ọ yị nyị.

¹¹ Ọ mẹ̀ maanị yà aanị, asị u hí angwa ozi emi. Mị vaa mẹ̀ ịsa tụra ịsa ọnị weè họ̀ use anị yị wụ, agụvị ka avaba anẹkụra ệ yẹ ka ọnyẹnẹẹ obooro ụ vị nị.

¹² Ịzẹyịza, ẹmị a vọrọ ka ọ̀ kụ́ ụ ogu nị, ama â nyị ohova awụ ọsa ana gụrị ọva awụ huna amị.

¹³ Yà ịzẹnị tù ẹnẹnẹ ụhwọọ, dị ma họ̀ ọ use ka ọ́ọ́ dọ ka ọnị ọ̀ kụ wụ ogu. Ọ̀ọ dọ, o zoza, dị ọ kụ wụ ogu. Ama àa vị ọ̀ yị dọ nị, Ẹnẹyịmavara ọ̀ọ yà ịzọọ, mị vaa kụ wụ ogu. Na hụtẹtẹ tù ẹnẹnẹ ụhwọọ.”

¹⁴ Ịzẹyịza, dị Iruutu varẹma na hụtẹtẹ tụ́ ahụtara anị nị. Ịnị ụmẹ eyọnị viri-viri, dị ẹtẹ ve hweyi, dị ọ kwẹẹtẹ hụ ịzọọ nị. Ịjọnọọ ọza ộ yị zụ yẹ ọza. Ộ vavọọ jintu kwẹẹtẹ agụvị ka Ibowazị e yi sì ka à nyị ọza ene re ka ộ vẹ ịzị eē tụ́ ibaari anị.

¹⁵ Ịnị ẹnẹnẹ ọnọọ dị Ibowazị kà a yọ ka ọ̀ ngwa ọtịịza anị, dị ọ̀ gana a rị ụvọ nị. Ịzẹyịza, dị Iruutu vavọọ mẹ̀ nị. Di Ibowazị ká ibaari orogo ịhịnọnyị tụ ọ yọ nị. Dị o pè e ụvọ nị. Di Ibowazị si hu aa nọ ịnị ubooro nị.

¹⁶ Di Iruutu ọnị ra ne eehi nị. Ọ mẹ̀ yị ngụ eehi kẹnẹ, dị ọnyị ọva anị aa họ̀ ọ use ịrẹyị nị. Dị ọ ka, “Ozi emi, wụ mẹmẹ zị ụsẹ awụ?” Dị Iruutu kà enube avaba ịsa ọnị Ibowazị mẹ yọ nị.

¹⁷ Dị ọ rẹ kà a yọ ka, “Ibowazị ộ sị ibaari orogo ịhịnọnyị mẹ̀ ọnị ẹyịza nị. Ọ kà Ibowazị ọ yị sị̀ ka ọnị ọ̀ jị avọ osusu varẹma ve tụ́ ọ.”

¹⁸ Dị Inawomi kà a yọ ka, “Yaayịtẹ ozi emi, dị wa yẹ ịsa ana vaa mẹ. Maa yẹ ka Ibowazị ẹ yị vaa tụ́ ụhwọ́ pooro dị ịrẹyị ọ̀ vị ajịnị.”