Iruutu 2 - IWE ỌNỊNỊ

Iruutu ộ nọ ịnị aarẹ Ibowazị

¹ Inawomi ộ nyị ohova ọnị ịrẹha anị rị Ibowazị. Ibowazị ọnịrị Ẹrịmẹrẹkị vi ana hụrẹ ovwoovu ọnya vẹ. Ibowazị vị opisa ọnị eyi yẹ. Dị aza sị ụbanyị yọ nị.

² Ẹkụhị ọnya dị Iruutu kà a yi Inawomi ka ọ̀ jẹẹ ọnị ọ̀ nọ ịnị aarẹ. Ọ kà ịsavọọ oni òo re ọza ana aa mẹ ibaari, di o nyị oni iyi nị, dị ọnị ọ̀ tọ̀ọ́ ịzaha ịrẹma ẹnịnị. Di Inawomi ka ooho nị.

³ Ọ mẹ̀ na ịhyọnọọ ka ọnị ọ̀ na tọ̀ọ́ ịzaha ịrẹma aza ana aa mẹ ibaari dị ọ na ngụ ịnị aarẹ ọnya aanị, ama ọ yị yẹ ka aarẹ ọnọọ vị ọnya ịnị aarẹ Ibowazị ana vị anda Ẹrịmẹrẹkị.

⁴ Ẹ mẹ̀ vavọọ hi ịzọọ, di e vene re ka Ibowazị ộ hụrẹ ịnị ubooro Ịbẹtịrẹhẹmị aa vẹ nị. Dị ọ kụ́ anụkọrọ ẹnẹẹ nị, dị ọ ka, “Ẹnẹyịmavara ọ̀ yà pè wụ nịnị.” Dị ẹnịnị va ụkụ yọ ka, “Ẹnẹyịmavara ọ navọ ò zee wu.”

⁵ Dị Ibowazị họ̀ ozi ahụ anị ana vị ọdọvịdị anụkọrọ anị ka, “Ẹnị ozi ọnẹẹ ọnọnị vị kẹ?”

⁶ Dị ọ tụ ohi ka, “Ozi ọnẹẹ Animowabi ana saasa Inawomi hụrẹ ẹtẹ Imowabi vẹ yọ nị.

⁷ Ộ dá ịpẹ yị mị ka, aarịhịnị ọnị ọ̀ tọ̀ọ́ ịzaha ịnị akakana ọdụ ene hi ịrẹma ọnụkọrọ nịnị. Hụrẹ ẹnẹnẹ ọ jẹẹ ịzẹnị nị. Ọ mẹ yịị va yaayịtẹ ịnị ajẹngụ yị.”

⁸ Di Ibowazị kà a yị Iruutu, dị ọ ka, “Jẹẹ ma kà ịsa ọnya yị wụ, o! Asị ụ para ịzẹnị hu na tọọ́ ịzaha ịnị aarẹ ọsa. Yà ịzẹnị pè ozwoorihi amị ẹnẹnị.

⁹ Sị eyi pè ịzị ẹ yà aa mẹ ibaari, dị wa saasa ozwoorihi ẹnẹẹ. Mị vaa kà a yị ezi anọrụ amị ka asị ẹ zigi wụ. Ịsa odenyi e hi ẹtẹ avọọ nị. Ezi anọrụ amị ẹ raà dà enyi hi wa. Ịjị enyi àa kụ̀ wụ, na wa na ká a hú.”

¹⁰ Di Iruutu và kú ẹtẹ, dị ọ sị ịrẹsụ kà ẹtẹ, dị ọ ka, “Nda, ẹnị ẹ vị ẹmị ọnị wụ maanị nyị iyi, dị ụ sị ayị nọ ịnị ịrẹyị amị. Ẹmị ana ahịka anikinami mị vị nị.”

¹¹ Di Ibowazị tụ́ ọ ohi dị ọ ka, “Â kà a mị avaba ịsa ọnị wụ mẹ yị ọnyị ọva awụ, ịrẹma ọnị ọva awụ sú. Mâ wụ́ ọ ka wâ navọ ada awụ ọnịrị ọnyị awụ beri ịzị a ma wụ tụ́ tịtẹ, dị wụ va ra ịda aza ọnị wụ wẹ́ yị vịdị yẹ da nị.

¹² Ẹnẹyịmavara ò si wu ụta ịsị ọnị wụ mẹ. Ẹnẹyịmavara Ohomorihi Anisirẹrị ọnị wụ vẹ va vaka vee si wụ ụta gụ.”

¹³ Di Iruutu tụ́ ohi dị ọ ka, “Nda, we reè nyị mi yi. Ịrẹyị ayamva ọnị ụ kà mị aanị, ọ raà sị ayị amị nẹtẹ. Mẹ yị hụ ọ vị ọnya ịnị ezi ahụ awụ.”

¹⁴ Ụmẹ ịsọyịrị mè sí tù, di Ibowazị hị́ Iruutu ka ọ̀ vẹ va sị ịbụrẹẹdị vá eche ọsụrẹyị rị nị. Di Iruutu yaayịtẹ akaha anụkọrọ nịnị nị. Di Ibowazị hara ibaari ana a wara yọ, dị ọ rị, dị ịnẹ ha a, dị ọ vẹtẹ nị.

¹⁵ Iruutu mẹ̀ sị ịsa rị, dị ọ kwẹẹtẹ, dị ọ naa tọ̀ọ́ ịzaha nị. Dị Ibowazị kà a yị ezi anọrụ anị ka ẹnịnị ẹ̀ navọ ọ̀ rẹ mẹ ibaari ini akakana ọdụ ẹnẹẹ. Asị a nyị ọza ana kù ọ ụhụ.

¹⁶ Dị ẹ̀ rẹ nyị ibaari hụụnị ẹnị ẹ mẹ̀ rị ụvọ hị́ ẹtẹ yọ, dị ọọ tọ̀ọ́ yọ. Dị ọ ka yị wa ka asị ẹ zigi ọ nị.

¹⁷ Ịzẹyịza, avọọ Iruutu mẹ̀ mẹ ibaari ịnị aarẹ pooro dị oruva tù nị. Avaba ibaari ọnị o re ịzọọ ịjị ọ naa ta tù, vị ẹhụụ orogo ẹẹta avọọ.

¹⁸ Dị ọ sị ẹnya anị vẹ eehi, dị ọ sị ịsa ọnị ọ tọ̀ọ́ va zụ̀ ọnyị ọva anị nị. Dị ọ sị ana vẹtẹ ịnị ịsa ọnị ọ rị, dị ọ sị yị ọnyị ọva anị nị.

¹⁹ Dị Inawomi họ̀ ọ use ka, ịzị ọ maanị tọ̀ọ́ ịzaha hụrẹ ajịnị? Dị ọ rẹ họ̀ ọ ka ịzị ọ na mẹ̀ ụkọrọ nị? Dị ọ kà ò zee yị ọza ana maanị nyị wụ iyi nị. Dị Iruutu kà a yọ ka ọza ọnị ọnị na mẹ̀ ụkọrọ ịnị aarẹ anị ajịnị aā hị́ Ibowazị nị.

²⁰ Dị Inawomi ka, “Ẹnẹyịmavara vaa mẹ ka ò zee yi Ibowazị. Ẹnẹyịmavara o yi mē hí ayị ọza ene sú ọnịrị ọza ana yàra. Oō vayị ẹnịnị.” Dị Inawomi ka, “Wáá yẹ ka ọnọrụ ọnọọ vị anda ayị. Ọza ana vọrọ ka ọ̀ za ẹnya ayị ọ vị nị.”

²¹ Di Iruutu kà, “Ộ hyakụ rẹ kà a mị ka ma jẹẹ pè ezi ahụ anị pooro ne tù ụmẹ ẹnị ẹnịnị vaa mẹ ibaari ọnịrị ihwiti anị ta.”

²² Dị Inawomi tụ́ o ohi ka, “Ộ vavọọ zoza ka wa yà pè anẹẹ anụkọrọ ene hi ịnị aarẹ anị agụvị asị aa nyị ọza ene re oze sị ụvọ kanyị wụ ịnị aarẹ ọza ẹnẹsa.”

²³ Avọọ Iruutu mẹ̀ mẹ̀ ụkọrọ ịnị aarẹ Ibowazị beri ezwoorihi ịda Ibowazị pooro dị ibaari ọnịrị ihwiti ta mẹ nị. Dị ahịka ịnị eehi ịda ọnyị ọva anị ọ ya nị.