Iruuku 7 - IWE ỌNỊNỊ

Ọga isoja nịnị ana sị ayị tụra Ijeesu ẹtẹẹtẹrẹ

¹ Ịjị Ijeesu sị ịrẹyị anị kà yị aza ẹnẹẹ ta, dị ọ nọ Ikapanawumi nị.

² Ọga isoja ẹchẹhị ọnya aanị ộ nyị ozi ahụ oni o sì ịrẹyị anị ẹtẹẹtẹrẹ. Ẹngụ aa zị ozi ahụ anị ọnọọ, ee vee sú.

³ Ọ́ga isoja nịnị ọnọọ mẹ̀ wụ́ ịrẹyị Ijeesu, dị ọ tụ́ azọkụ Aniju hi ọọ nị. Dị ọ ka ẹ̀ dá ịpẹ yị Ijeesu ka ọ̀ vẹ, dị ọ̀ va mẹ ozi ahụ anị ọnọọ ụkụ nị.

⁴ Ịjị e ve tù Ijeesu, dị ẹyaa dá ịpẹẹ yọ ẹtẹẹtẹrẹ nị, dị ẹ ka, “Â vọrọ ka wa mẹ ọgụvọ yị ọnọrụ ọnọnị,

⁵ agụvị ka ô sì ịrẹyị aza ayị, dị ọ hyakụ dà irehi Ohomorihi yị nị.”

⁶ Dị Ijeesu dụ wa aa na nị. Ijeesu aa vaa ngụ ịzọọ, dị ọga isoja nịnị ọnọọ tụ́ na gẹrị ọọ, ka ẹ̀ kà a yọ ka, “Nda, asị ụ mẹ̀ akanya vẹ, agụvị ka mẹ yị yà ọza ana a vọrọ ka wa ngụ irehi anị.

⁷ Mẹ yị rẹ yà ọza ana a vọrọ ka ọ̀ vẹ ịdị awụ. Mị mẹ ọda kẹnẹ, ka ẹngụ ozi ahụ amị vaa ta.

⁸ Ẹ ma rẹ nyị ọza ana nyị ọda amị, dị ẹmị rẹ nyị isoja nịnị hi akẹtẹ ọnị mị nyị ọda anị nị. Màa mẹ ọda yị ọnya ka ọ̀ na, vi aa na nị. Màa rẹ mẹ ọda yị ọsa ka ọ̀ vẹ, vị ọ raa vẹ nị. Màa ka ẹ yị ozi ahụ amị ka ọ̀ maanị mẹ, avọọ ọ màa mẹ nị.”

⁹ Ịjị Ijeesu maanị wụ́, ô hí ọọ irenu, dị ọ vara eyi, dị ọ kà a yị aza ana aa dụ ọọ ịrẹma, dị ọ ka, “Mẹ ẹ̀ yị maanị re ọza ana maanị sị ayị tụra mị da; ịzẹyịza, m maa kà a wụ nịnị nị, mẹ yị hyakụ re ẹngụ ẹdọwụ ọnọnị ịdị Anisirẹrị nịnị.”

¹⁰ Dị ọnụtụ ẹnẹẹ varẹma nọ ịdị ọga ọnọọ, di e ne tù ka ẹngụ ozi ahụ anị ộ ta nị.

Ijeesu ộ ha ozi osoku ọnya hụụnị isu

¹¹ Eyinẹhẹ anị, Ijeesu ộ nọ ẹkụra ọnya ana aā hị́ Inayini; di ezirẹma anị beri aza ọrụrụ-ọrụrụ saasa a na nị.

¹² Ọ màa vaa ngụ oze ana na ngụ ịnị ẹkụra ọnọọ, di o re ka â nyị oku ana a sị aa vẹ nị. Oku ọnọọ ọ vị ozi ọnọrụ ikonya ọnị ọnyị anị ma nị. Ọnyị anị vị osoku. Dị anẹkụra ọnọọ hara saasa a aa na nị.

¹³ Ịjị Ananyị yị re e, ayị anị ộ vá a. Dị ọ kà a yọ ka, “Asị u rè sụ ùnè!”

¹⁴ Dị Ijeesu na, dị ọ sị ụvọ kanyị odooro ana a sị oku ọnọọ tụ́ nị. Dị aza ana za a jẹẹ nị. Dị Ijeesu ka, “Ozi ọnọrụ, mị ka wa kwẹẹtẹ!”

¹⁵ Dị ọza ene vịdị sú ịsọọnị kwẹẹtẹ yaayịtẹ, dị aa kà ịrẹyị nị. Dị Ijeesu sị ọ chire ọnyị anị ụvọ nị.

¹⁶ Angwa ô hí avaba ẹnịnị, dị ẹyaa ga Ohomorihi nị, dị ẹ ka, “Ọnịsẹ ọbanyị ọ sị kwẹẹtẹ ịnị akakana ayị o, Ohomorihi ọ zị vẹ ka ọnị ọ̀ va gụ aza anị ụvọ”.

¹⁷ Dị ịrẹyị Ijeesu ọnọnị sị ngụ ịrẹyị ịnị avaba Ijudiya ọnịrị ẹkụra ana kara a nị.

Ịjọọnụ ọhwọzenyi ộ tụ́ ne tù Ijeesu

¹⁸ Ezirẹma Ịjọọnụ ệ kà ịrẹyị ẹnẹnị zụ̀ Ịjọọnụ.

¹⁹ Dị Ịjọọnụ hị́ ẹẹva ini ezirẹma anị, dị ọ tụ́ wa nọ ịdị Ananyị yị ka ẹ̀ na họ̀ ọ ka, “Ẹwáá vị ọza ana a ka ọ vaa vẹ nị, à vị ye yii zí ọza ẹnẹsa eyi?”

²⁰ Ịjị aza ẹnẹẹ tù ịdị Ijeesu, dị ẹ kà a yọ ka, “Ịjọọnụ ọhwọzenyi ọ tụ́ yị hi wu nị. Ọ kà ya họ̀ wụ ka: ‘Ẹwáá vị ọza ana a ka ọ vaa vẹ nị, à vị ye yii zí ọza ẹnẹsa eyi?’ ”

²¹ Ụmẹ ọnọọ gẹdẹ-gẹdẹ, Ijeesu ộ mẹ̀ ụkụ ọrụrụ-ọrụrụ yị aza; ộ dụ ụhwẹ echu jịnẹ hụụnị ẹngụ aza, dị ọ rẹ há eyi ogweyi nịnị nị.

²² Dị ọ tụ́ ọnụtụ ẹnẹẹ ohi, dị ọ kà a yị wa ka, “Na kà a yị Ịjọọnụ nịnị ịsị u re ọnịrị ịsị ụ wụ́ nịnị! Ogweyi nịnị ee re ẹtẹ, oswahụ nịnị aa zị ụsẹ, aa mẹ ọnịkwọbanyị nịnị ụkụ, ogutọ nịnị raa wụ́ ịrẹyị, aa ha oku nịnị kwẹẹtẹ hụụnị isu, dị a raa kà enube ọyịzaa yị onosiye nịnị nị.

²³ Ọza ẹnẹ ẹ̀ yị jị mị ịrẹka, vaa daa jẹ.”

Ijeesu ộ kà ịrẹyị Ịjọọnụ ọhwọzenyi

²⁴ Ịjị ọnụtụ Ịjọọnụ si hu, di Ijeesu nyima aa kà ịrẹyị Ịjọọnụụ zụ̀ aza ẹnẹẹ nị. Dị ọ ka, “Ụ mẹ̀ nọ ịnị ụnọmị ne tù Ịjọọnụ, si u ro ka u vee re nịị? Ịkẹ ana ahị ee henyi wáá yọ?

²⁵ Si u ne re nịnị, ọza ene chire irikimba wáá yọ? Wâ yẹ ka aza anaā vavọọ kụ́ ẹnya, dị ẹyaa mẹ ụbanyị, vị anaā yà ịdị ohinọyị.

²⁶ Si u ve ne re nịnị? Ọnịsẹ wáá yọ? Avọọ yịị yọ; dị ma kà a wụ nịnị ka ọza oni u re nịnị ộ hyakụ huna ọnịsẹ bẹẹ.

²⁷ Ịjọọnụ ọnọọ a vịdị chẹrẹ ẹ tịtẹ ini oze anị ka: ‘Re! maa tụ́ ọnụtụ amịị dọ ọvịdị awụ, di ò ne tenyi oze tịtẹ zí wu.’

²⁸ Dị ma kà a wụ nịnị, ịnị avaba aza ana a ma, Ịjọọnụ ọhwọzenyi ọ nyị ụbanyị hu nị. Ama ọza ene weyi hu ịzị Ohomorihi yà aa mẹ ịjọva, ọ nyị ụbanyị hu Ịjọọnụ nị.

²⁹ “Avaba aza ọnịrị ọdẹkẹhirehi nịnị ệ wụ́ ịrẹyị anị, ẹnịnị ệ dọ ka Ohomorihi vị ọnịzẹyịza, agụvị ka Ịjọọnụ ọ sị ọyịhwọzenyi mẹ yị wa.

³⁰ Ama Anihwarisi nịnị ọnịrị ọzwọzọda nịnị ẹ yị dọ ịsa oni Ohomorihi sì ka ọnị ọ̀ mẹ yị wa; ẹnịnị ẹ yị zẹẹ ka Ịjọọnụ ọ̀ mẹ̀ ọyịhwọzenyi yị ẹnị.”

³¹ Dị Ananyị yị ka, “Si mi ve sii juwe aza ene hi ịnị ẹhẹ booro aanị kẹ? Sị ẹnịnị véné?

³² Vị ẹ sị mẹẹ anka ezi eweyi ana yaayịtẹ ini orere avọọ nị. Dị ẹnịnị ee nowuu hị́ ẹngụ, dị ẹ ka: ‘Yê hú okokoro yị wụ nịnị, ama wẹ yị nyị ẹzẹ nịnị. Ya rẹ jị òrèrè yị wụ nịnị, ama wẹ yị jị òrèrè nịnị.

³³ Ị́jọọnụ ọhwọzenyi mẹ̀ vẹ, ọ yị rị ịsa, o yi hú eche, dị ụ ka vị ọ nyị ụhwẹ echu nịnị nị.’

³⁴ Ẹ mị Ozi ọza onigirima ọ vavẹ, maa rị, mee hú, ụ rẹ ka ‘Ho! Wee re ọnịnọbanyị ọnịrị ohweche! Ọta ọdẹkẹhirehi ọnịrị aza edivi ọ vị nị.’

³⁵ Ama ịrẹyọyẹ Ohomorihiī sị ẹngụụ zụ̀ ịnị ẹhẹ aza ana dọ ọ.”

Ijeesu ộ nọ ịdị Anihwarisi ọnya

³⁶ Anihwarisi ọnya ộ kà a yị Ijeesu ka ò ve pe ọnị rị ịsa. Dị ọ nọ ini eehi Anihwarisi ọnọọ, di e dudu yaayịtẹ aa rị ịsa nị.

³⁷ Â nyị ọnẹẹ ọnya aanị ịnị ẹkụra ọnọọ, ana ahịka ọsẹrẹka ọ vị nị. Ộ wụ́ ka Ijeesu yà ini eehi Anihwarisi ọnọọ aa rị ịsa. Dị ọ sị eturare ohihi ijogo ọnya vẹ nị.

³⁸ Ộ na jẹẹ ịrẹma Ijeesu, dị ọ jẹẹ ịpa ahụ anị, di ee sụ ùnè, dị aa ká ẹgọọ kú Ijeesu ahụ nị. Ọ raa sị ẹyị ịrẹsụ anịị nyee ẹgọ ọnọọ, di ee kú ahụ Ijeesu irenu, di aa và eturare ọnọọ hi Ijeesu ahụ nị.

³⁹ Ịjị Anihwarisi ana hị́ Ijeesu nọ ini eehi anị aanị maanị re e, dị aa kà a ịnị ayị anị ka, “Àa vị ọnịsẹ ọnọrụ ọnọnị vị nị, ọ yaanị yẹ ẹngụ ọnẹẹ ana aa kanyị ọọ aanị, ka ọsẹrẹka ọ vị nị.”

⁴⁰ Dị Ijeesu tụ́ ohi, dị ọ kà a yọ ka, “Ịsayịmọnị, â nyị ịsị mee sì ka ma kà wụ.” Di Ịsayịmọnị ka, “Wa kà a, ọga!”

⁴¹ Di Ijeesu ka, “Â nyị ọza ịnya aanị ana nyị ọnụta ẹẹva. Ọnyara ọ rị ọọ achuchu ẹẹhị, dị ọsa rị ọọ achuchu ẹvarẹwụ nị.

⁴² Ịjị ẹnị ẹyịva è yi zụ sí ụta, dị ọ và hụụnị anị yị wa saka-saka nị. Kà a mị di a re, ene vee sì ịrẹyị ọza ọnọọ hu ịnị ẹnị ẹyịva?”

⁴³ Dị Ịsayịmọnị ka, “Mee ro ka ọza ana a và hụụnị ẹkẹhị ọbanyị yị yọ nị.” Di Ijeesu ka, “Wâ kà a ẹtẹẹrẹ.”

⁴⁴ Di Ijeesu và eyi ká ọnẹẹ ọnọọ, dị ọ kà a yị Ịsayịmọnị ka, “U wee re ọnẹẹ ọnọnị? Mâ vẹ ini eehi awụ, wẹ yị ká enyi mị ka ma sị nyịna ahụ. Ama ẹgọ anị ọ́nị sị nyịna ahụ amị, dị ọ sị ẹyị ịrẹsụ anị nyee yọ nị.

⁴⁵ M mẹ̀ vẹ, we yi kú mi irenu; ama m mẹ̀ hụrẹ vẹ ọnẹẹ ọnọnị hụrẹ ee kú ahụ amị irenu nị.

⁴⁶ Wẹ yị rẹ sị angwẹ sisi mi ibe; ama eturare ọnẹẹ ọnọnị sị, di ee sii sisi mi ahụ nị.

⁴⁷ Dị ma kà a wụ, ịvị anị ana rụrụ a raà vagu ọ ịnị anị. Ịrẹyị amị ọnọọ maanị sì aanị, ọ́ sị zụ̀ ka a raà vagu ọọ ịnị ịvị anị. Ọza ana àa vagu chee, vị ene sì ịrẹyị ọza chee.”

⁴⁸ Dị Ijeesu kà a yị ọnẹẹ ọnọọ ka, “Ma raà vagu wu ịnị ịvị awụ.”

⁴⁹ Dị aza ana vọ ana aa rị ịsa ịzọọ, aa kà a yị ẹngụ ka, “Ho! Ẹnẹ vị ọnọnị, ana raa vagu ọza ịnị ịvị anị bẹẹ?”

⁵⁰ Dị Ijeesu kà a yị ọnẹẹ ọnọọ ka, “Ọnẹẹ ọnọnị, ẹdọwụ awụ ọ sị wụ dọ há; wa na ịnị ẹngwọọrọ!”