Iruuku 22 - IWE ỌNỊNỊ

A mẹmẹ gẹ eyi Ijeesu

¹ Ụmẹ eche ana a sịị̄ rị Ịbụrẹẹdị ọnị ọza ọ̀ yị mā sị òwù tụ́, ọ sị gụrị ẹtẹ. Eche ọnọọ a rẹẹ̄ hị́ Eche Ọyịparahu nị.

² Dị ohirẹsụ ẹbanyị irehi Ohomorihi ọnịrị ọzwọzọda nịnị ee sì oze ka ẹ́nị mẹmẹ vaa mẹẹ wụ Ijeesu nị, agụvị ka angwa aza vị ene ee hí wa.

³ Di Echu sị ngụ ịnị ayị Ijudasi ọnị ịrẹha ẹtẹ anị rị Isikarịyọtị nị. Ọnị rẹ vị ọnya ini ezirẹma ẹwụrẹva.

⁴ Dị ọ na, dị ọnịrị ohirẹsụ ẹbanyị irehi Ohomorihi beri iporisi ana sị eyi pe irehi Ohomorihi na gẹ eyi ka ọnị aa sị Ijeesuu chire wa ụvọ nị.

⁵ Dị aza ẹnẹẹ aa jẹ, dị ẹ ka ẹnị vaa sị ẹkẹhịị yọ nị.

⁶ Dị Ijudasi sị avaba ayị anị dọ ooho nị. Di o kuku ee sì oze, ọ́ nị mẹmẹ vaa sị Ijeesuu chire wa ụvọ, dị asị aza yẹ vụrụ-vụrụ nị.

Ijeesu ô tenyi ẹngụ Eche Ọyịparahu

⁷ O si tù ẹkụhị Eche Ịbụrẹẹdị ẹnẹ ẹ̀ yị nyị òwù. Ịhị ọnọọ a rẹẹ̄ wụ ozi ịdẹba Eche Ọyịparahu nị.

⁸ Dị Ijeesu tụ́ Ipita ọnịrị Ịjọọnụ kà è ne tenyi ịsa Eche Ọyịparahu tịtẹ, dị ẹnị ẹ̀ na rị ọ nị.

⁹ Dị ẹ họ̀ ọ ka, “Ịzị u sì ka ye ne tenyi ọọ tịtẹ?”

¹⁰ Dị ọ kà a yị wa ka, “Re! Wàa maanị aa yịị ngụ ịnị ẹkụra ọnọọ nịnị kẹnẹ, ụ vaa gẹrị ọnọrụ ọnya aanị nịnị; ộ sị ụnọkọ dà enyi. Dụ ọọ na ngụ ini irehi ọnị ọ̀ọ na ngụ nịnị!

¹¹ Dị ụ wa kà a yị adarehi ọnọọ nịnị ka: ‘Ọga ka ịzị ẹtapa ọzọga yà, ịzị ọnịrị ezirẹma anị vaa rị Eche Ọyịpara hu?’

¹² Ọza ọnọọ vaa zụ̀ wụ nịnị ẹtapa ọbanyị ọnya ẹ́bẹẹba, ene e si tenyi, dị ụ wa kụ́ avaba ịsa oni yee sì hi ịzọọ yị!”

¹³ Dị ezirẹma anị ẹnẹẹ si hu, di e re e, Íjeesu mẹ̀ yị kà a yị wa gẹdẹ-gẹdẹ nị. Di e tenyi ịzọọ tịtẹ yị Eche Ọyịparahu nị.

Ịsa oruva ọdịrẹma

¹⁴ Ịjị ụmẹ si tù, dị Ijeesu yaayịtẹ beri ezirẹma anị ka ẹnị ẹ̀ rị ịsa nị.

¹⁵ Dị Ijeesu kà a yị wa ka, “Mâ da sì ka ẹmịrị ẹwụ nịnị ò dudu rị ịsa Eche Ọyịparahu ọnọnị, dị ma va rị ụya.

¹⁶ Dị ma kà a wụ nịnị ka mẹ mā vana rị ịsa ọnọnị, pooro di iruvo anị obooro ọ̀ tụ́ ẹhẹ ịzị Ohomorihi yà aa mẹ ịjọva.”

¹⁷ Dị Ijeesu sị ako ana a sị ká eche tịtẹ, dị ọ kụ́ Ohomorihi avọ, dị ọ sị yị wa, dị ọ ka ẹ̀ gà a hú nị:

¹⁸ “Dị ma kà a wụ nịnị ka, me mē vene hú ịnị ẹtụtụ ọchị ịvayịnị ọnọnị, pooro dị ụmẹ oni Ohomorihi aa mẹ ịjọva ọ̀ vẹ.”

¹⁹ [Dị ọ rẹ sị Ịbụrẹẹdị, dị ọ kụ́ Ohomorihi avọ tụ́ ọọ nị. Dị ọ dà a, dị ọ sị yị ezirẹma anị nị. Dị ọ ka, “Ọsọnị ọ vị ẹngụ amị ana a sị mẹ̀ ịsọvọ agụvị awụ nịnị nị. Waa mẹ ọsọnị, dị ụ wa sịị tamayị amị nịnị!”

²⁰ Dị ọ rẹ sị ako ana a sị ká eche tịtẹ, ẹ mẹ̀ sị ịsa oruva ọnọọ rị nị. Dị ọ ka, “Eche ini ako ọnọnị ọ vị oto ọwọọwa oni Ohomorihi sị anya amị sị ụvọ tụ́ nị. Mi vee che anya amị ọnọọ sẹ́ ẹtẹ yị wụ nịnị.]

²¹ Ama, re nịnị! Ọza ana vaa sị mịị chire ọnịvị amị ụvọ yà ịzị mị yà aa rị ịsa booro aanị.

²² Ịzẹyịza ẹmị Ozi ọza onigirima vee sú, anka Óhomorihi mẹ̀ vịdị mẹ eto anị tịtẹ; ama ọza ana vaa sị mịị chire ọnịvị amị ụvọ, ọ sị dà.”

²³ Dị ezirẹma anị nyima aa họ̀ ẹngụ use ka ẹnị ọ vị ịnị ẹnịnị ana vavọọ vaa mẹ nị.

Ẹnẹ vị ene hu keekere?

²⁴ Ezirẹma anị aa nyị ahankata ka ẹnẹ vị ene hu keekere ịnị ẹngụ ẹnịnị.

²⁵ Dị Ijeesu kà a yị wa ka, “Wâ yẹ ka ohinọyị anẹhẹ ọnọnị vị anaā mẹ ehunaa yị aza ẹnịnị. Ọza ana aa mẹ ọda tụra wa, ẹẹ̄ hị́ ọta ẹnịnị nị.

²⁶ Ama ẹ yị vọrọ ka áawụ nịnị ọ̀ vavọọ yà. Ọza ene èe hu ịnị ẹngụ awụ nịnị, a vọrọ ka ọ̀ sị ẹngụ anị tụ́ udi oweyi nị. Ọza ana àa vị ọdọvịdị, ọ̀ọ mẹ̀ ebira ozi ahụ.

²⁷ Ọza ana yaayịtẹ aha ịsọyịrị kẹnẹ ọnịrị ọza ana aa sị ịsaa yọ, ye re ene hu? Yâ yẹ ka ọza ana yaayịtẹ kẹnẹ yọ nị. Ama ẹmị vị ana yà ịnị akakana awụ nịnị, dị maa zị wụ nịnị ụtụ.

²⁸ “Wá raa jẹẹ pe mi nịnị pooro ịnị avaba ẹzamare amị nịnị.

²⁹ Anka Áda amị mẹ̀ sị ọdaa mị ka ma vị ohinọyị, avọọ ẹ́mị mẹ̀ rẹ sị ọdaa wụ nịnị nị,

³⁰ ka wa yaayịtẹ aha ịsọyịrị amị ịzị mị yà aa mẹ ịjọva nịnị, dị ụ waa rị, di u wee hú nịnị. Ẹwụ nịnị rẹ vaa vị ohinọyị, dị ụ waa mẹ̀ ọkarẹyị tụ́ ịrẹsụ ovwoovu ẹwụrẹva Anisirẹrị nịnị.”

Ijeesu kà Ipita vee yi ọnị

³¹ Dị Ananyị yị ka, “Ịsayịmọnị, Ịsayịmọnị! Re, Echu ee sì ka ọnị ọ̀ sị wụ nịnị, di oni ò pehe wu nịnị, dị à zụ yẹ aza ana vị azịzẹ ọnịrị akụ.

³² Ama ma raà mẹ̀ aduwa yị wụ ka asị ẹdọwụ awụ jị wụ ụvọ. Ịjị ụ wàa sị và ká mị vẹ, dị ụ waa sị ụkataa yị ẹyịnyara awụ ana vọ!”

³³ Dị Ipita ka, “Ananyị yị, ma sị ẹngụ tenyi ka à za ẹmịrị ẹwụ tụ́ ịnị ẹngwa, dị à hyakụ wụ ẹmịrị ẹwụ bẹẹ.”

³⁴ Dị Ijeesu kà a yọ ka, “Ipita, ụkọkọrọ o yi vee nowu ajịnị, dị ụ wa kà a tù ụpẹ ẹẹta ka wẹ yị yẹ mị.”

Ịrẹyị ụmẹ ọkatẹngụ

³⁵ Dị Ijeesu rẹ kà a yị wa ka, “M mẹ̀ tụ́ wụ nịnị jịnẹ, dị mị ka asị ụ sị asụnụ ọnịrị ampo beri adava nịnị, áá nyị ịsị ụ rị ụya anị nịnị?” Dị ẹnịnị ka, “Eyiye” nị.

³⁶ Dị Ijeesu va kà a yị wa ka, “Ama booro aanị, ọza ana àa nyị asụnụ, àa vị ampo, ọ̀ sị ọọ! Ọza ene èe re ka ọnị ọ yị nyị ụhwọ, ọ̀ na ná awuru anị, dị ọ̀ sị hị́ ụhwọ.”

³⁷ Dị ma kà a wụ nịnị ka â nyị ka ịrẹyị ọnọnị ana a vịdị chẹrẹ tịtẹ aanị, ọ̀ sẹ ị́rẹsụ amị. Ịrẹyị ọnọọ ka: “Â za a ịrịka beri aza ana jịnẹ ọda. Avaba ịsa ẹnẹnị e si nyima aa sẹ ị́rẹsụ amị.”

³⁸ Dị ẹ ka, “Ananyị yị ụhwọ ẹẹva yà ịzẹnị, ọ!” Dị Ijeesu ka, “Ô ze.”

Ijeesu ộ mẹ̀ aduwa ị́rẹsụ Ataba Orivi

³⁹ Ijeesu ọ rẹ jịnẹ nọ ịnị Ataba Orivi, anka ọ mẹ̀ vịdị yị mẹ; dị ezirẹma anị rẹ saasa a na nị.

⁴⁰ E mè si tù ịzọọ, dị ọ kà a yị wa ka, “Waa mẹ̀ aduwa nịnị, agụvị asị ụ ngụ ịnị ọyịzamare nịnị!”

⁴¹ Dị ọ para wa hu na chee, di o ku ẹtẹ, dị aa mẹ̀ aduwa nị.

⁴² Dị ọ ka, “Ada amị, wèe sì, ụ sị ako ụyọrị ọnọnị hụrẹ mị ịrẹsụ. Ama ẹ yị vị ịsị mi sì, mẹ ịsị u wèe sì!”

⁴³ [Dị anggẹẹrị ọnya hụrẹ ẹbẹẹba vẹ, di o ve tù ọọ, dị ọ sị ụkata yọ nị.

⁴⁴ Ayị Ijeesu o si du ẹtẹẹtẹrẹ, dị aa mẹ̀ aduwa hu avọọ nị. Ẹhị ana aa tọ̀ hụụnị ẹngụ anịị hi ẹtẹ vị ana sị mẹẹ anka anya avọọ.]

⁴⁵ Ọ mẹ̀ kwẹẹtẹ hụụnị aduwa, di o ve tù ezirẹma anị, di o ve tù ka ẹyaa sụ ara nị, agụvị ka ayị ẹnịnị o si du.

⁴⁶ Dị Ijeesu kà a yị wa ka, “Sị ẹ vẹ dị ụ waa sụ ara nịnị? Kwẹẹtẹ, wa mẹ̀ aduwa nịnị ka ụ va ngụ ịnị ẹzamare nịnị!”

 za Ijeesu

⁴⁷ Íjeesu mẹ̀ yị yà ịnị ịrẹyị aa kà kẹnẹ, dị ọkọnị aza vana vẹ nị, beri ọza ịnya aanị ana aā hị́ Ijudasi, ana vị ọnya ini ezirẹma ẹwụrẹva. Dị ọ kà pe Ijeesu, ka oni ò kú ọ irenu nị;

⁴⁸ Dị Ijeesu kà a yọ ka, “Ijudasi, wee kú emi Ozi ọza onigirima irenu, agụvị di u we re oze sị mị chire ọnịvị amị ụvọ nịị?”

⁴⁹ Ịjị ezirẹma ana vọ ana jẹẹ pe Ijeesu ee re ịrẹyị ana aa vaa mẹ, dị ẹ ka, “Ananyị yị ụ wáá ka ya tụ̀ ụhwọ ayị tù wa nị?”

⁵⁰ Dị ọza ịnya ẹnịnị tụ̀ ụhwọ, dị ọ sị jị ozi ahụ ohirẹsụ ọbanyị irehi Ohomorihi ụtọ ụvọrị nị.

⁵¹ Dị Ijeesu tụ́ ohi, dị ọ ka, “Ọnọọ ô ze!” Dị ọ sị ụvọ kanyị ụtọ ọnọrụ ọnọọ, dị ọ mẹ̀ ẹ yọ nị.

⁵² Dị Ijeesu kà a yị ohirẹsụ ẹbanyị irehi Ohomorihi beri iporisi ana sị eyi pe irehi Ohomorihi, ọnịrị ọdọvịdị nịnị ana vẹ ka, “Ẹmị ụ kụ́ ụhwọ ọnịrị arubebe ee vee tù nịnị anka oyi avọọ nịị!

⁵³ Ẹ́mị rị ẹwụ nịnị mẹ̀ẹ̄ yà ini irehi Ohomorihi eyinị-eyinị, wẹ yị sị ụvọ kanyị mị nịnị. Ama ụmẹ awụ nịnị ọnịrị ụmẹ ụkata ịrahụ o si tù.”

Ipita ka ọnị ọ yị yẹ Ijeesu

⁵⁴ Ệ za Ijeesu, dị ẹ sị ọọ nọ ini eehi ohirẹsụ ọbanyị irehi Ohomorihi nị. Dị Ipita aa dụ ọọ na ẹ́nẹẹnẹ nị.

⁵⁵ Â kà ịra tụ́ ịnị akakana ohweje, dị ẹ yaayịtẹ ịzọọ nị. Dị Ipita ọnị rẹ yaayịtẹ pe wa nị.

⁵⁶ Di ozi ahụ ọnẹẹ ọnya aanị re ka Ipita ộ yaayịtẹ pe ịra nị. Dị ọ na jị eyi ngụ ọọ, dị ọ ka, “Ọnọrụ ọnọnị vị ana rẹẹ̄ dụ Ijeesuu zị.”

⁵⁷ Dị Ipita ka ireche yọ nị. Ọ kà, “Ọnẹẹ ọnọnị, mẹ yị hyakụ yẹ ọza ọnị ụ waa kà aanị.”

⁵⁸ Ịjị ọ naa daa kù chee, ọza ẹnẹsa ô re re Ipita, dị ọnị rẹ ka, “Ọza ịnyara ẹnịnị ụ vị nị.” Dị Ipita rẹ ka, “Ọnọrụ ọnọnị, ẹ yị vị ẹmị ụ waa kà.”

⁵⁹ Ịjị ọ rẹ naa mẹ agogo ọnyaa tụ́ ọọ, dị ọza ịnya rẹ sị kà geri-geri, dị ọ ka, “Ịzẹyịza, ọza ọnọnịị̄ dụ ọọ zị, agụvị ka Anigariri ọ vị nị.”

⁶⁰ Dị Ipita rẹ ka, “Ọnọrụ ọnọnị, mẹ yị hyakụ yẹ ịrẹyị ọnị ụ waa kà aanị.” Ípita màa yịị kà ịrẹyị kẹnẹ, dị ụkọkọrọ nowu nị.

⁶¹ Dị Ananyị yị kana eyi, di o re Ipita nị. Di Ipita sị tamayị ịrẹyị ana Ananyị yị vịdị kà yọ ka, “Ụkọkọrọ o yi vee nowu, dị ụ wa kà a tụ́ ụpẹ ẹẹta ka wẹ yị yẹ mị.”

⁶² Di Ipita jịnẹ tụ́ ẹhẹ, dị ọ jị òrèrè ana nyị ịrẹyị nị.

 za Ijeesu nọ ini ikootu

⁶³ Dị aza ana sị eyi pe Ijeesu aa mẹ̀ ẹ isiya, di eyee tụ́ ọọ nị.

⁶⁴ Dị ẹ sị ịsa kú ọọ eyi, dị ẹyaa họ̀ ọ ka, “Kà ẹ yị di a re ene ee tụ́ wu aanị?”

⁶⁵ Avọọ ẹ màa yịị kụ̀ ọọ ụhụ irenyi-irenyi nị.

⁶⁶ Éyi mẹ̀ yị sị nị kẹnẹ, dị ọdọvịdị aza ẹnẹẹ ọnịrị ohirẹsụ ẹbanyị irehi Ohomorihi ne beri ọzwọzọda nịnị kụ́ gụ nị, dị ẹ sị Ijeesu nọ ini ikootu ẹnịnị nị. Dị ẹ ka:

⁶⁷ “Kà ẹ yị, ẹwáá vị Ikirisiti ọnọọ nị?” Dị Ijeesu kà a yị wa ka: “Màa kà a wụ nịnị, wẹ yị vaa dọ ọ wụ́ nịnị.

⁶⁸ Màa rẹ họ̀ wụ nịnị use ịrẹyị, we yi vee tụ́ ohi nịnị.

⁶⁹ Ama hụrẹ ọyaanị na, ẹmị Ozi ọza onigirima vaa yaayịtẹ éyi ụvọrị Ohomorihi Ochẹtẹngụ.”

⁷⁰ Dị avaba ẹnịnị ka, “Ọnị ọ vị ka ẹwa vị Ozi Ohomorihi nịị?” Dị Ijeesu kà a yị wa ka, “Ụ ka ẹmịị yọ nị.”

⁷¹ Dị ẹnịnị ka, “Onivenu ịsị i kuku ee sì? Ẹ yị ụvọta ọ sị ịrẹyị irenu anị wụ́.”