Iruuku 21 - IWE ỌNỊNỊ

Ẹyịza oni osoku ọnya sị yị Ohomorihi

¹ Ijeesu ộ kana eyi, di o re, opisa nịnị màa sị ẹyịza ẹnịnị vaa tụ́ ịzị aā sị ẹkẹhịị tụ́ ini irehi Ohomorihi nị.

² Di o re re osoku onosiye ọnya aanị, ọ́nị mẹ̀ rẹ sị anini ẹẹva tụ́ ịzọọ nị.

³ Di Ijeesu ka, “Ịzẹyịza m maa kà a wụ nịnị nị, osoku onosiye ọnọnị ọ mẹ huna avaba aza ana vọ nị;

⁴ agụvị ka avaba aza ẹnẹnị ệ nyị ẹkẹhị, dị ẹ sị hụụnị anị va tụ́ ịzị aā sị ẹyịza ana a sị va yị Ohomorihi tụ́ nị. Ama àa vị ọnẹẹ ọnọnịị yọ, ọ mẹ̀ yị vị onosiye, avaba ịsa ọnị ọ nyị, ọ sị tụ́ ịzọọ avọọ nị, avaba ịsa ana a vọrọ ka ọ̀ yaanị sị hị́ ịsa rị.”

E vee wú irehi Ohomorihi

⁵ Aza ẹnyị aa kà ịrẹyị irehi Ohomorihi, o meme zoza ọnịrị ịrẹta ozoza-ozoza ana a sị dà a. Dị ẹ rẹ yaa kà a, aza mẹmẹ aa sị ẹyịza vaa yị Ohomorihi nị. Dị Ijeesu ka:

⁶ “Avaba ịsị u wee re nịnị aanị, ụmẹ aa vẹ ana ahịka ịrẹta ẹnẹnị, ọnyara ọ yị vaa vọ tụ́ ịrẹsụ ọsa; vi e vee wú waa ha saka-saka nị.”

Ẹzẹtẹ ẹhẹ

⁷ Dị ẹnịnị họ̀ ọ ka, “Nda, ye re ụmẹ ọnị ịsa ẹnẹnị vaa sị mẹ? Sị ẹ vị apọtẹrẹwa ana vaa sị zụ̀ ka ịsa ẹnẹnị aa vaa mẹ?”

⁸ Dị Ijeesu ka, “Sị eyi pe ẹngụ awụ nịnị, oo! Asị ụ zẹẹ ka è vene wu nịnị! Aza ọrụrụ-ọrụrụ vaa rị ịrẹha amị, dị ẹ vẹ, dị ẹ ka ẹnị ẹ vị Ọdọzaha nị. Dị ẹ rẹ ka ụmẹ aa gụrị ẹtẹ. Asị ụ saasa wa nịnị!

⁹ Ịjị ụ wàa wụ́ ekuku ịrẹkụ irenyi-irenyi nịnị, asị u hí angwa nịnị! Ẹ yị zụ nyị ka ọ yị vavọọ yà; ama ẹzẹtẹ ẹhẹ ọọ̀ yị vẹ.”

¹⁰ Dị ọ rẹ kà a yị wa ka, “Anẹkụra ẹnyị vaa kwẹẹtẹ tù ọsa, dị ẹkụra ohinọyị ẹnyị rẹ kwẹẹtẹ tù ọsa.

¹¹ Ẹtẹ vee henyi jigi-jigi aha ọrụrụ-ọrụrụ, ụngwẹ vaa kụ̀, ụkụ vee hi ẹtẹ. Apọtẹrẹwa irenyi-irenyi anaā sịị angwaa hí ọza, vaa jịnẹẹ hi ẹbẹẹba.

¹² Dị ịsa ẹnẹnị ẹ̀ va mẹ, a vaa za wụ nịnị, dị aa sị ụyaa rị wụ nịnị. A vaa za wụ nịnịị nọ ini irehi Ohomorihi, dị ẹ kụ́ wụ nịnị hi ịnị ẹngwa. A rẹ vaa za wụ nịnịị nọ ịdị ohinọyị ọnịrị ọdọvịdị nịnị agụvị amị.

¹³ Ọnọnị vaa mẹ ka we re oze dọ ivenu amị nịnị.

¹⁴ Jintu sị ayị awụ nịnị vị ọnya ka we yi vee ro o tịtẹ, ụ mẹmẹ vaa kụ́ irenu awụ nịnị!

¹⁵ Mị vaa sị ịrẹyị tụ́ wụ nịnị irenu, dị mị rẹ sị ịrẹyọyẹ wụ nịnị, ana ahịka ọnịvị awụ nịnị ẹ yị va zụụ jẹẹ pe wu nịnị, e yi re ve zuu yi ịrẹyị ọnị ụ wàa kà nịnị.

¹⁶ Aza ana ma wụ nịnị, ọnịrị ẹyịnyara awụ nịnị beri anda awụ nịnị ọnịrị ọta awụ nịnị vaa sị wụ nịnịị chire ọnịvị awụ nịnị ụvọ. Ẹ vaa mẹ ka à wụ̀ aza ẹnyị awụ nịnị.

¹⁷ Dị avaba aza aa nyị ịhyẹrẹ awụ nịnị kẹnẹ agụvị amị.

¹⁸ Ama ẹyị ịrẹsụ awụ nịnị ikonya o yi vee vú.

¹⁹ Wàa jẹẹ geri-geri nịnị, ọnị ọ vaa mẹ ka wa zụ yara nịnị obooro nị.”

E vee vú Ijerusarẹmị ẹtẹ

²⁰ “Ịhị wèe re nịnị ka isoja tatarata ẹ sị kara Ijerusarẹmị okiri-okiri, yẹ nịnị ka vi ee vee vú ọọ ẹtẹ avọọ nị.

²¹ Ịjọnọọ Anijudiya nịnị è zwe nọ ịnị ataba! Aza ana àa yà ịnị akakana ẹkụra ịzọọ, è zwe hụụ ịzọọ! Aza ene èe hi ịnị aarẹ, asị ẹ kụkụ nọ ịnị ẹkụra ọnọọ!

²² Ẹkụhị ana a vaa sị sị ụyaa rị ọza ọ vị nị, agụvị dị ịrẹyị ana a chẹrẹ tụ́ ini Iwe Ohomorihi ọ̀ zụ sẹ.

²³ Ọ vaa daa divii yị ọnịrẹẹ ọnịrị aza ana sị ozi rị ụvọ nịnị ịhị ọnọọ kẹnẹ. Ụyọrị ọbanyị vaa vẹ ịnị ẹtẹ ọnọnị, Ohomorihi vaa kụ́ ayịị hi aza ẹnẹnị.

²⁴ A vaa sị ụhwọọ wụ̀ aza ẹnyị, dị a rẹ za aza ẹnyị ọrịhị ne hi ẹkụra irenyi-renyi. Dị anarịmadọwụ nịnị du Ijerusarẹmị ha saka-saka, pooro dị ụmẹ ẹnịnị ọ̀ va ta.”

Ozi ọza onigirima vaa vaavẹ

²⁵ Dị Ijeesu ka, “A vaa nyị apọtẹrẹwa ịnị ọyị ọnịrị ịnị ụhwẹ beri ụzọmị nịnị. Anẹhẹ nịnị vaa rị ụya ẹtẹẹtẹrẹ, dị ayị ẹnịnị kụ́ vazi agụvị òkū ana aa dà, dị aa sụ́ ịrẹyị.

²⁶ Dị ayị anẹhẹ kụ́ sụ̀ enyi, ángwa òo mèe hí wa, agụvị ka ệ jẹẹ ee zí ụyọrị ana vọ ana aa vẹ ịnị ẹhẹ. Ịsa ene hi ẹbẹẹba vee henyi.

²⁷ Di e vene re ka ẹmị Ozi ọza onigirima aa vẹ ini eguhi beri ụkata ọnịrị igirima.

²⁸ Ịjị ịsa ẹnẹnị èe si nyima aa mẹ, sị eyi tụ́ ẹba nịnị, dị ụ wa kụ̀rà ịrẹsụ tụ́ ẹba nịnị, agụvị ka ụmẹ oni Ohomorihi aa sịị dọ wụ nịnịị há, ọ sị gụrị ẹtẹ.”

²⁹ Dị Ijeesu re che ụhịrẹyị ọnya yị wa nị ka, “Re ọchị ana sị mẹẹ anka ezu avọọ nịnị ọnịrị ọchị ana vọ!

³⁰ Ịjị èeyee nyị avị, wèe ree, dị ẹwụ nịnị ụvọta yẹ ka ị̀rẹ̀sụ̀ aa vaa vẹ.

³¹ Avọọ gẹdẹ-gẹdẹ wèe re ka ịsa ẹnẹẹ aa mẹ nịnị, yẹ nịnị ka ụmẹ oni Ohomorihi vaa sị mẹ ịjọva aa vaa vẹ.

³² Ịzẹyịza m maa kà a wụ nị, aza ene hi ẹhẹ booro aanị, ẹ yị vaa taa hụụnị ẹhẹ, dị avaba ịsa ẹnẹnị ẹ̀ mẹ.

³³ Ihinẹba ọnịrị ẹhẹ vaa ta, ama àa vị ịrẹyị amịị yọ, o yi vee vú.”

 nyị ka wee zì nịnị

³⁴ Dị Ijeesu ka, “Sị eyi pe ẹngụ awụ nịnị, oo! Asị ụ sị eche ọyịrị pooro ọnịrị eche ahaahara oyihú ne beri ariro ẹhẹ ọnọnị dọ ẹngụ awụ nịnị oro! Agụvị ka ẹ̀ yị vị avọọ, ẹkụhị ọnọọ o vee tù wu nịnị ịnị ụmẹ oni u wè yi ro nịnị.

³⁵ Ẹkụhị ọnọọ vana vaa sị mẹẹ ịrẹpa avọọ yị avaba anẹhẹ ịhị ọ̀ọ vẹ.

³⁶ Agụvị avọọ, wee zí nịnị, dị ụ waa mẹ̀ aduwa nịnị ụmẹ tụra ụmẹ, agụvị dị ụ wa nyẹngụ há hụụnị avaba ịsa ana aa vẹ nịnị aanị, dị ụ wa zụ jẹẹ ọ́vịdị ẹmị Ozi ọza onigirima.”

³⁷ Ụmẹ ọnọọ, dị Ijeesu aa zụ̀ aza ịsa ụmẹ ọọdụ ini irehi Ohomorihi nị. Ịrahụ, dị ọ na yà ịnị ataba ana aā hị́ Ataba Orivi.

³⁸ Ẹnẹnẹ viri-viri, dị avaba ọzọza nọ ini irehi Ohomorihi ka ẹnị ẹ̀ na wụ́ ịrẹyị anị.