Iruuku 20 - IWE ỌNỊNỊ

Ịrẹyị ọda Ijeesu

¹ Ẹkụhị ọnya, Íjeesu màa zụ̀ aza ịsa ini irehi Ohomorihi, dị aa kà enube ọyịzaa yị wa nị. Ohirẹsụ ẹbanyị irehi Ohomorihi ọnịrị ọzwọzọda nịnị beri ọdọvịdị nịnị ê ve tù,

² dị ẹ kà a yọ ka, “Kà ẹ yị, ọda ịsị ụ maanị aa sịị mẹ? Ẹnẹ sị ọda ọnọnịị wụ?”

³ Di Ijeesu tụ́ ohi, dị ọ ka, “Ẹmị raa họ̀ wụ nịnị use ịrẹyị ọnya: di u we tụ́ mi ohi nịnị!

⁴ Ọyịhwọzenyi ọnị Ịjọọnụ aa mẹ avọọ, Ohomorihi ọ́ọ́ sị ọda anịị yọ nị, à vị aza?”

⁵ Di eyee pe ẹngụ nyị ahankata nị, dị ẹ ka, “Yàa kà a ka: ‘Ohomorihi ọ sị yọ nị’, dị ọ ka sị ẹ vẹ dị ẹyị ẹ̀ yị dọ ọ wụ́?

⁶ Ama yàa na kà a ka ọza ọ sị yọ nị, vị avaba aza ẹnẹnị ee ne yi ịrẹta nị, agụvị ka ẹnịnị ệ dọ ka Ịjọọnụ vị ọnịsẹ.”

⁷ Agụvị avọọ, di e tụ́ Ijeesu ohi ka, “Yẹ yị yẹ ịzị o re ọda ọnọọ hụrẹ.”

⁸ Dị Ijeesu ọnị rẹ kà a yị wa ka, “Ẹ̀hẹẹ, ẹmị ẹ yị rẹ vaa kà a wụ nịnị ọda ọnị mị maanị aa sịị mẹ.”

Ụhịrẹyị aza ana a dà ẹtẹ yị

⁹ Dị Ijeesu nyima aa sị ụhịrẹyị ọnọnịị kà ịrẹyị yị wa nị. Dị ọ ka, “Â nyị ọza ịnya aanị ana dà ụbazị, di o si rere aza anaā sịị eyii pe ụbazị nị. Di o si hu aa hụrẹ eehi nee kù nị.

¹⁰ Ịjị ụmẹ si tù ka à kụ́ ẹtụtụ gụ, dị ọ tụ́ ozi ahụ anị ọnya ne tù aza ẹnẹẹ ọnị ọ dà ẹtẹ yị ka ọ̀ na dọ ẹtụtụ ana vị áanị va yị ọnị nị. Ama aza ẹnẹẹ ệ za ozi ahụ ọnọọ, di e tụ́ ọọ, dị ẹ dụ ọọ avosusu na jịnẹ nị.

¹¹ Dị ọ rẹ tụ́ ozi ahụ anị ọsa na nị. Dị aza ẹnẹẹ rẹ za a, di e tụ́ ọọ, dị ẹ mẹ̀ ụhị nyị ọọ, dị ẹ rẹ dụ ọọ jịnẹ avosusu nị.

¹² Dị ọza ana nyị ụbazị ọnọọ rẹ tụ́ ozi ahụ anị ọhụta na nị. Dị ẹ rẹ za ọnọọ, dị ẹ tụ̀ ọ ụnava, dị ẹ tụ ọ ụvọ tụ́ ẹhẹ nị.

¹³ Dị ọza ana nyị ụbazị ọnọọ kụkụ ka: ‘Sị mị vaa mẹ aanị?’ Dị ọ ka: ‘Maa tụ́ ozi emi oni mi sì ịrẹyị anịị na. Mâ yẹ ka ẹ daba vaa sị ụbanyịị yọ, èe re e.’

¹⁴ Ama ịjị aza ana a dà ụbazị yị re ozi anị ọnọọ, dị ẹ kụkụ gẹ eyi nị, dị ẹ ka: ‘Ozi ọnọnị ọ vaa kụ́ ogu ada anị nị; à vẹ ya wụ ọọ nịnị, di ogu anị ò kụkụ vị áayị!’

¹⁵ Ịzẹyịza, dị ẹ sị ọọ nọ ịrẹma ụbazị, dị ẹ wụ̀ ọ tụ́ ịzọọ nị. Si u ro nịnị ka ọza ana nyị ụbazị ọnọọ vaa mẹ aza ẹnẹẹ?

¹⁶ Vị aa vẹ, dị ọ va wụ̀ aza ẹnẹẹ nị, dị ọ sị ụbazị ọnọọ yị aza ẹnẹsa.” Ịjị ẹ maanị wụ́, dị ẹ ka, “Asị Ohomorihi zẹẹ!”

¹⁷ Di Ijeesu kana eyi re wa nị, dị ọ ka, “Sị ẹ va vị iruvo ịrẹyị ọnọnị ana a chẹrẹ tụ́ ini Iwe Ohomorihi? ‘Ịrẹta ọnị ọtụrarehi nịnị yi tịtẹ, ọnị ọ vana vị ọọnyị ịnị ịrẹta ana a sịị̄ dà irehi nị.’

¹⁸ Ọza ana àa hyẹdụ nya ịrẹta ọnọọ, vị aa gara nị. Ama ọza ọnị ịrẹta ọnọọ ọ̀ọ hụrẹ nya, vị aa kụ̀ ọọ nẹrẹ-nẹrẹ nị.”

Ịrẹyị ẹkẹhị irehi

¹⁹ Ohirẹsụ ẹbanyị irehi Ohomorihi ọnịrị ọzwọzọda nịnị ê sì ka ẹnị è za Ijeesu ịzị ịzọọ, agụvị ka ịrẹyị ẹnịnị Íjeesu si che ụhịrẹyị ọnọọ nị. Ama angwa aza ee hí wa.

²⁰ Dị ẹnịnị kuku ee be e nị. Dị ẹ tụ́ aza ana aa mẹ apẹ ka ẹnị ệ nyị ịzẹyịza ka è ne be Ijeesu ịnị ịrẹyị ana aa kà nị, agụvị dị ẹnị ẹ̀ zụ za a, dị ẹnị ẹ̀ sị ọọ ne chire ọda ịgọvọnọ ụvọ. Ịgọvọnọ ọnọọ vị Aniroomi; ộ nyị ọda ọnịrị ụkata.

²¹ Dị aza ẹnẹẹ na họ̀ Ijeesu use ka, “Nda, yâ yẹ ka ịrẹyị ịzẹyịza ụ waa kà, dị ụ raa sịị zụ̀ aza nị. We mē re eyi ọza, ịzẹyịza oze Ohomorihi kẹnẹ, ụ sịị̄ zụ̀ aza nị.

²² Ọ́ọ́ vọrọ ka yaa tụ́ ẹkẹhị irehii yị ohinọyị Aniroomi, à vị ọ yị vọrọ?”

²³ Ama Ijeesu ộ yẹ irikichi ẹnẹ ẹyaa mẹ, dị ọ kà a yị wa ka, “Sị ẹ vẹ dị ụ waa zama mịị re nịnị?

²⁴ Sị ẹkẹhị enyusẹ ọnyaa mị, di a re nịnị! Ẹnị uhwoto anị ọnịrị ịrẹha anị yà ịnị anị aanị?” Di e tụ́ ohi dị ẹ ka, “Óohinọyị Aniroomi yọ nị.”

²⁵ Dị Ijeesu kà a yị wa ka, “Ẹ̀hẹẹ, sị ịsa ana àa vị óohinọyị Aniroomi yọ! Dị ụ wa rẹ sị ịsa ana àa vị ịsa Ohomorihi, yị Ohomorihi nịnị!”

²⁶ Ẹnịnị ẹ yị nyẹngụ sị ịrẹyị ọnyọọnyị za Ijeesu éyi aza ịzọọ. Dị ẹnịnị kú irenu nị, agụvị ka ohi ọnị ọ sị yị wa, o si hí wa irenu.

Oku nịnị wáá vanaa haa hụụnị isu?

²⁷ Aza ẹnyị aanị ana aā hị́ Anisadusi nịnị, ệ ká Ijeesu vẹ. Ẹnịnị ẹẹ̄ kà a ka oku ọ yị vaa haa hụụnị isu nị. Ệ họ̀ Ijeesu use ka:

²⁸ “Nda, Imosiisi ộ chẹrẹ ẹ tịtẹ yị ka, ọza òo sú, dị ọ navọ ose anị tịtẹ dị ọ̀ yị ma ozi nị, ọyịnyara anị ọ̀ kụ́ ọnẹẹ ọnọọ ogu, dị ọ̀ ma ozi yị ẹnẹbẹnị anị ene sú.

²⁹ A va nyị ẹyịnyara ịhịmba. Ị́ịpaapa ộ nyị ọnẹẹ, ọnọrụ ọnọọ ô wusu, ọ yị ma ozi.

³⁰ Ọhụva anị ọ rẹ kụ́ ọnẹẹ ọnọọ ogu, ọ yị ma ozi yọ, di oni re sú.

³¹ Ọnọhụta ọnị ọ rẹ kụ́ ọọ ogu, avọọ ọ́nị mẹ̀ rẹ yà nị, pooro naa ngụ ọnọhụhịmba. Ộ yị ma ozi yị avaba ẹnịnị ana nyị ọọ, di e sú.

³² Ọdịrẹma anị, dị ọnẹẹ ọnọọ oni re sú nị.

³³ Ịnị ụmẹ oni oku nịnị vaa sị haa hụụnị isu, ẹnẹ ọnẹẹ ọnọọ kụkụ vaa vị ose anị? Ẹnị ịhịmba ọ nyị ọọ aanị nị.”

³⁴ Dị Ijeesu tụ́ wa ohi ka, “Anẹhẹ ọnọnị aa nyị ọnẹẹ, dị ẹyaa va ọnọrụ nị.

³⁵ Ama aza oni Ohomorihi re ka ộ vọrọ ka ẹ̀ ha hụụnị isu, dị ẹ̀ rẹ ra ị́dị Ohomorihi, ẹ yị kụkụ vaa nyị ọnẹẹ, dị à hyakụ va sị aza ẹnyị gà ọnọrụ.

³⁶ Vị ẹ rẹ vaa sị mẹẹ anka anggẹẹrị nịnị avọọ nị, e yi kuku vee sú. Ezi Ohomorihi ẹ rẹ vị nị, agụvị ka ẹ sị ha hụụnị isu.

³⁷ Imosiisi nyẹmba, ộ hyakụ sị zụ̀ ka oku nịnị vaa ha hụụnị isu ini oze ịrẹyị ọnọọ kà ịzị avị yà aa rị ịra; ộ hị́ Ananyị yị ‘Ohomorihi Abụrahamị ọnịrị Ohomorihi Ayiziiki beri Ohomorihi Ijekọvụ.’

³⁸ Ohomorihi ọ yị vị Ohomorihi aza ene wusu, ama Ohomorihi aza ana yàra; agụvị ka avaba aza vị ana yàra yọ.”

³⁹ Dị ọzwọzọda ẹnyị ka, “Nda, ohi awụ ô zoza.”

⁴⁰ Ịrẹma ọsọnị ẹ yị nyị ọza ana vana nyayịnẹ họ̀ ọ use ịrẹyị ọnyọọnyị.

Ẹ̀nị Ikirisiti vị ozi anị?

⁴¹ Dị Ijeesu họ̀ wa ka, “Sị ẹ vẹ dị aza kà a ka Ikirisiti vị ozi Idevidi?

⁴² Idevidi ọnị nyẹmba ộ kà a ini iwe ahẹ ụga ka: ‘Ohomorihi ộ kà a yị Ananyị mị ka: Yaayịtẹ éyi ụvọrị amị

⁴³ pooro dị ma sị ọnịvị awụ tụ́ ịzị ụ waa kụ́ ahụụ hi!’

⁴⁴ Idevidi ọnị ụvọta ộ hị́ ọọ Ananyị mị, Íkirisiti mẹmẹ rẹ va mẹ vị ozi Idevidi?”

Ijeesu ộ kà ọ̀nọ̀ agụvị ọzwọzọda nịnị

⁴⁵ Avaba aza mẹ̀ sị ụtọ pe ịrẹyị Ijeesu, dị ọ kà a yị ezirẹma anị ka:

⁴⁶ “Sị eyi pe ẹnụ awụ nịnị ịnị ụvọ ọzwọzọda nịnị. Eē sì ka eni èe chire awuru ọgọdọọ zịịzị, dị aza ẹ̀ẹ kụ́ ẹnị ini ohu. E reē sì ka ẹnị ẹ̀ẹ yaayịtẹ aha ene hu keekere ini irehi Ohomorihi ọnịrị ịzị àa kụ́ gụ aa rị eche.

⁴⁷ Ẹnị ẹẹ̄ sị irikichi dọ osoku nịnị irehi nị, ama dị ẹyaa mẹ apẹẹ mẹ̀ aduwa ọgọdọ. Ẹnị ẹ vaa rị ụya hu nị.”