Iruuku 2 - IWE ỌNỊNỊ

A mẹmẹ ma Ijeesu

¹ Ịnị ụmẹ ọnọọ, Ọgọsịtọsị ohinọyị Aniroomi ộ mẹ̀ ọda ka à chẹrẹ avaba anẹhẹ.

² Ọnọọ ọ vị ọyịchẹrẹ aza ịpaapa, Íkiriniyu mẹ̀ vị ịgọvọnọ tụ́ ẹtẹ Isiriya nị.

³ Dị ọzọza nọ ẹkụra anị ka à na chẹrẹ ẹnị nị.

⁴ Ijosẹẹhụ ọnị ọ rẹ hụrẹ ẹkụra Ịnazarẹtị ịnị ẹtẹ Igariri nọ Ijudiya, dị ọ nọ ẹkụra Ịbẹtịrẹhẹmị ịzị a yà ma Idevidi ohinọyị nị. Ijosẹẹhụ ộ nọ ịzọọ, agụvị ka ini ovwoovu Idevidi ọ chị hụrẹ vẹ nị.

⁵ Ọnịrị Imeri ọ zị na ka à na chẹrẹ ẹnị nị. Imeri vị oni Ijosẹẹhụ nyị tụ́ oze. Ịjọnọọ, Imeri ee zyẹẹ.

⁶ Ẹnịnị mẹ̀ yà Ịbẹtịrẹhẹmị, ụhwẹ ọ sị gụ Imeri ana a vọrọ ka ọ̀ sị ma ozi.

⁷ Dị ọ ma ozi ịpaapa anị ọnọrụ nị, dị ọ sị ịta para a, dị ọ sị ọọ tụ́ ịzị ịsụpaā yàa rị ịsa nị. Ẹnịnị e yi re aha yà ini irehi ọnị ọzọgaā chí.

Oseratẹmẹ ọnịrị anggẹẹrị nịnị

⁸ Â nyị oseratẹmẹ ẹnyị aanị ịnị ẹkụra ọnọọ. Dị ẹnịnị hi ịnị avị ịrahụ, di eyee sere atẹmẹ ẹnịnị nị.

⁹ Dị anggẹẹrị Ohomorihi vana hụrẹ hi wa nị; dị igirima Ohomorihi aa zẹtẹẹ kara wa nị. Dị angwa ee hí wa ẹtẹẹtẹrẹ nị.

¹⁰ Dị anggẹẹrị ọnọọ kà a yị wa ka, “Asị u rè hí angwa nịnị! Enube ọyịza mị va kà wụ nịnị nị, ọnị ọ vị ka ịnẹ avaba aza vee hine ẹtẹẹtẹrẹ.

¹¹ A sị ozi ọnya ma yị wụ nịnị ajịnị tụ́ ịnị ẹkụra Idevidi. Ozi ọnọọ ọ vị Ọdọzaha nị, ọnị ọ vị Ikirisiti Ananyị yị nị.

¹² Wáá yẹ ịsị ụ va sị yẹ ozi ọnọọ nịnị? U vee re ozi ọnọọ nịnị ka â sị ịta para a, dị a sị ọọ hụtụ ịzị ịsụpaā yàa rị ịsa nị.”

¹³ Kẹnẹ, dị anggẹẹrị ọrụrụ-ọrụrụ jịnẹ hụrẹ ẹbẹẹba ve tù anggẹẹrị ịsọọnị nị. Dị ẹyaa jị ahẹ ga Ohomorihi, dị ẹ ka:

¹⁴ “À vẹ yaa sị ụbanyịị yị Ohomorihi ana yà ẹbẹẹba keekere, ọ vaa sị ẹngwọọrọ yị aza ene hi ịnị ẹhẹ ana ayị anị hine tù.”

¹⁵ Ịjị anggẹẹrị ẹnẹẹ sị hụụ ịdị ẹnịnị varẹma nọ ẹbẹẹba, di oseratẹmẹ ẹnẹẹ kà a yị ẹngụ ka, “À vẹ vị ya yịị nọ Ịbẹtịrẹhẹmị booro aanị, di ye ne re ịsa ana mẹ, oni Ohomorihi Ananyị yị va kà yị aanị.”

¹⁶ Dị ẹ wụsẹ zwe na, di e ne tù Imeri ọnịrị Ijosẹẹhụ beri ozi ọnọọ ka â sị ọọ hụtụ ịzị ịsụpaā yàa rị ịsa nị.

¹⁷ Ịjị e si oo re, ẹnịnị ệ kà ịrẹyị ọnị anggẹẹrị kà yị wa ini oze ozi ọnọọ.

¹⁸ Avaba aza ana wụ́ ịrẹyị oni oseratẹmẹ ẹnẹẹ kà, ô hí wa irenu ẹtẹẹtẹrẹ.

¹⁹ Dị Imeri sị ịrẹyị ẹnẹẹ tụ́ ịnị ayị anị, di ee ro o nị.

²⁰ Di oseratẹmẹ ẹnẹẹ varẹma aa na, dị ẹyaa kụ́ Ohomorihi avọ, dị ẹ rẹ yaa sị ụbanyịị yọ nị agụvị avaba ịsa ene e re dị ẹ rẹ wụ́. Ánggẹẹrị ọnọọ mẹ̀ yị kà a yị wa gẹdẹ-gẹdẹ ọ vị nị.

 yị Ijeesu ịrẹha

²¹ Ịhị ẹkụhị ịhịnta sị gụ, ana a vọrọ ka à jị ozi ọnọọ ụvẹvẹnẹ, dị a hị́ ịrẹha anị Ijeesu nị. Ịrẹha ana anggẹẹrị yị ọọ, di Imeri ve zyẹẹ anị ọ vị ọnọọ nị.

²² Ẹkụhị ọ sị gụ ana a vọrọ ka Imeri ọ̀ sị na nyịna ẹngụ anị anka ọda oni Imosiisi mẹ, dị ẹ sị ozi ọnọọ nọ Ijerusarẹmị ka ẹnị ẹ̀ sị na yị Ohomorihi nị.

²³ Â maanị chẹrẹẹ tụ́ ịnị ọda Ohomorihi ka, “Ozi ịpaapa ọnyẹnẹẹ, ọ̀ọ vị ọnọrụ, vị ọ vaa sị ọọ tụ́ irenyii yị Ohomorihi nị.”

²⁴ Ẹ rẹ na ka ẹnị ẹ̀ na sị arekuku ẹẹva, àa vị ezi arivadi ẹẹva, dị ẹnị ẹ̀ sị mẹ̀ ịsọvọ, anka ọ́da Ohomorihi mẹ̀ rẹ kà a.

²⁵ Â nyị ọnọrụ ọnya aanị Íjerusarẹmị ọnị ịrẹha anị rị Isimiyọnị. Ọnịzẹyịza ọ vị nị, dị ọ rẹẹ̄ hẹkẹ Ohomorihi nị. Ee zí eyi ka Ohomorihi ọ̀ va kụ́ Anisirẹrị vavẹ udi ẹnịnị. Ụhwẹ Ọnịnị yà ịnị ayị anị.

²⁶ Ộ vịdị sị zụ̀ ọ ka o yi vee sú pooro di ò re Ikirisiti oni Ohomorihi aa tụ́ụ vẹ ẹhẹ.

²⁷ Aza ana ma Ijeesu ệ sị ọọ nọ ini irehi Ohomorihi ka ẹnị ẹ̀ na mẹ̀ ịsa ọnị ọda Imosiisi kà. Ịhị ọnọọ, Ụhwẹ Ọnịnị ộ mẹ̀ ka Isimiyọnị ọ̀ nọ ini irehi Ohomorihi.

²⁸ Dị Isimiyọnị sị ozi ọnọọ rị ụvọ, dị aa sị ụgaa yị Ohomorihi nị, dị ọ ka:

²⁹ “Ananyị mị, ẹmị ozi ahụ awụ ọ̀ọ kụkụ aa na booro aanị, ẹngwọọrọ ọ vị nị, agụvị ka ịsị ụ ka waa mẹ, wa sị ọọ mẹ.

³⁰ Ma raà sị eyi amị re ẹdọha

³¹ oni u reè tenyi tịtẹ éyi avaba aza.

³² Ọnị ọ va ẹtohweyi ana vaa sị oze zụ̀ Anigiriki nị, dị ọ raa sị ụbanyịị yị Anisirẹrị ana vị aza awụ.”

³³ Ịrẹyị oni Isimiyọnị vavọọ kà ini oze Ijeesu aanị, ô hí Ijosẹẹhụ ọnịrị ọnyị Ijeesu irenu.

³⁴ Dị Isimiyọnị rẹ mẹ̀ aduwa yị wa nị. Dị ọ kà a yị Imeri ọnyị Ijeesu ka, “Ohomorihi ọ sị ozi ọnọnị nyị ka ini oze anị aza ẹnyị ịnị Anisirẹrị nịnị vaa yàa hyẹdụ, dị aza ẹnyị rẹ varẹma kwẹẹtẹ nị. Ohomorihi ọ raà sị ọọ mẹ apọtẹrẹwa ọnị aza ẹnyị vee yii tịtẹ;

³⁵ dị ọ sị ịsị aza ọrụrụ-ọrụrụ were ee roo tụ́ ẹhẹ. Ẹwụ ọnyị anị, ayị awụ vee du anka èe rere jị ụhwọ ngụ ọza ayị avọọ.”

³⁶ A rẹ nyị ọnịsẹ ọnẹẹ ọnya aanị ana aā hị́ Aana; ozi Ịhwanụwẹẹrị ọ vị nị. Ovwoovu Aseri ọ chị hụrẹ vẹ nị. Ọ sị vị ọzọkụ ẹtẹẹtẹrẹ. Ọ mẹ̀ hụrẹ hụ orihi, ịrayị ịhịmba ọ́nịrị ọva anị ra vị nị.

³⁷ Dị ọ kụkụ vana aa mẹ osoku hụrẹ ịrayị ẹbẹẹna tụra ẹẹna nị. Ọ mā hụụnị irehi Ohomorihi pooro. Dị aa ba awẹ, dị ọ raa mẹ̀ aduwa, ọ màa hẹkẹ Ohomorihi ọọdụ ọnịrị ịrahụ nị.

³⁸ Ụmẹ ana a sị Ijeesu vẹ gẹdẹ-gẹdẹ, dị ọnị rẹ vẹ, dị ọnị raa kụ́ Ohomorihi avọ nị. Dị ọ kà ịrẹyị ini oze ozi ọnọọ yị avaba aza ene ee zí Ohomorihi eyi ka ọ̀ va dọ Ijerusarẹmị tụ́ nị.

³⁹ Ịjị ẹ sị avaba ịsị ọda Ohomorihi ka à mẹ mẹ, dị ẹ varẹma nọ Igariri, dị ẹ nọ ẹkụra ẹnịnị ana vị Ịnazarẹtị nị.

⁴⁰ Dị ozi ọnọọ aa hụ nị, dị aa nyị ụkata nị, ọ raa yẹ ịrẹyị ẹtẹẹtẹrẹ. Dị Ohomorihi aa mẹ ọyịzaa yọ nị.

Íjeesu mẹ̀ vị ozweyi, ộ nọ ini irehi Ohomorihi

⁴¹ Aza ana ma Ijeesu vị anaā nọ Ijerusarẹmị ịrayị-ịrayị, dị ẹ̀ na rị Eche Ọyịparahu.

⁴² Íjeesu mẹ̀ sị gụ ịrayị ẹwụrẹva, di e dudu zị nọ Ijerusarẹmị, anka ẹ mẹ̀ vịdị yị mẹ nị.

⁴³ Ịjị eche ta, dị ẹyaa nọ eehi, dị Ijeesu ọnị jẹẹ Ijerusarẹmị nị; ama aza ana ma a ẹnị ẹ yị yẹ.

⁴⁴ Agụvị ka ê ro ka vị Ijeesu yà ịnị akakana aza nị, ẹ sị ụsẹ ẹkụhị ọnya zị, di e kuku vee sì ọọ ngụ ịnị akakana anda ẹnịnị ọnịrị ọta ẹnịnịị zị nị.

⁴⁵ Ịjị è yi re e, dị ẹ varẹma raa nọ Ijerusarẹmị, di eyee sì ọọ nị.

⁴⁶ Ịhyẹgwẹta anị, di e ve ne tù ọ ini irehi Ohomorihi nị. Di e ne tù ka ộ yaayịtẹ ịnị akakana ọzwọzịsa nịnị di aa wụ́ ịrẹyị ẹnịnị, dị ọ raa họ̀ wa use ịrẹyị nị.

⁴⁷ Avaba aza ana wụ́ ịrẹyị anị, ô hí wa irenu ịnị ẹngụ ịrẹyọyẹ ọnị ọ nyị ọnịrị ohi ana aa tụ́ wa.

⁴⁸ Ịjị aza ana ma a re e, ayị ẹnịnị ẹ sị vazi. Dị ọnyị anị kà a yọ ka, “Ho! Ozi emi, sị ẹ vẹ dị ụ maanị mẹ yị aanị? Wee re, ayị ẹmịrị ada awụ ẹ yị nẹtẹ vụrụ-vụrụ, i mèe sì wu zị.”

⁴⁹ Dị Ijeesu kà a yị wa ka, “Sị ẹ vẹ di u wee sì mi nịnị? Aanịka wẹ yị yẹ nịnị ka â vọrọ ka ma yà ini eehi Ada amị?”

⁵⁰ Ama ẹnịnị ẹ yị yẹ ịrẹyị oni Ijeesu kà yị wa.

⁵¹ Dị Ijeesu saasa wa varẹma nọ Ịnazarẹtị nị. Ijeesu ộ ká ịrẹsụ hi yị wa. Dị ọnyị anị sị ịrẹyị ẹnẹnị tụ́ ịnị ayị anị nị.

⁵² Ijeesu aa vịra, aa yẹ ịrẹyịị hu avọọ, ọ raa hụ. Ohomorihi ô sì ịrẹyị anị, aza eni ree sì ịrẹyị anịị hu avọọ bẹẹ.