Iruuku 18 - IWE ỌNỊNỊ

Ụhịrẹyị ọmọkarẹyị ọnya ọnịrị osoku ọnya

¹ Ijeesu ô che ụhịrẹyị ọnya yị wa, ana sị zụ̀ wa ka â vọrọ ka ọza ọ̀ọ mẹ̀ aduwa pooro, dị asị ọ tụ́ ọọ.

² Ọ kà, “Ịnị ẹkụra ọnya aanị, â nyị ọmọkarẹyị ọnya ene è yi mē hí angwa Ohomorihi, dị ọ̀ yị mā rẹ sị ụbanyị yị aza.

³ Ịnị ẹkụra ọnọọ, a rẹ nyị osoku ọnya aanị, anaā vẹ ịdị ọmọkarẹyị ọnọnị pooro, dị aa dá ịpẹẹ yọ ka ọ̀ gụ ọnị ụvọ agụvị ọnịrẹyị anị.

⁴ Ộ maanị vẹ pooro, ama ọmọkarẹyị ọnọọ o yi sì ka ọnị ọ̀ gụ ọọ ụvọ. Ịjị ọ da kù, dị ọmọkarẹyị ọnọọ ka: ‘Mẹ̀ yị daka hí angwa Ohomorihi, dị mẹ̀ yị mā sị ụbanyị yị ọza nị,

⁵ ama agụvị ka ọnẹẹ ọnọnị aa kụ́ ọọ kata mị ẹngụ, maa mẹ̀ ịsa ana vọrọọ yọ; ẹ̀ yị vị avọọ, aanị ọ mẹ̀ vaa vẹ pooro, dị ọ raà kụ́ ọọ du mi eyi nị.’ ”

⁶ Dị Ananyị yị ka, “Mee sì ka wa wụ́ ịrẹyị ọnị ọmọkarẹyị onirikichi ọnọnị kà.

⁷ Wéé ro ka Ohomorihi ọ yị vaa mẹ̀ ịsa ana vọrọọ yị aza anị ọnọọ nyị, ene ee nowuu hị́ ọọ, ọọdụ ọnịrị ịrahụ, ọ̀ọ daka za wa tura ẹtẹ?

⁸ Dị ma kà a wụ nịnị ka o vee jintuu mẹ̀ ịsa ana vọrọọ yị wa. Mị ka ee, ịhị ẹmị Ozi ọza onigirima ọ̀ọ vavẹ, méé kuku vee tù ka aza ẹ sị sị ayị tụra mị ịnị ẹhẹ?”

Ụhịrẹyị Anihwarisi ọnya ọnịrị ọdẹkẹhirehi ọnya

⁹ Ijeesu o re che ụhịrẹyị ọnọnị yị aza ene ee re ẹngụ ẹnịnị ka ẹnị ệ vị ọnịzẹyịza, dị ẹyaa sị eyii wụ̀ aza ana vọ. Ọ kà,

¹⁰ “Â nyị aza ẹnị ẹẹva ana hịrẹ nọ ini irehi Ohomorihi ka ẹnị ẹ̀ na mẹ̀ aduwa. Ọnyara vị Anihwarisi, dị ọsa ọnị vị ọdẹkẹhirehi nị.

¹¹ Dị Anihwarisi ọnọọ kwẹẹtẹ jẹẹ aha anị irenyi, dị ọ maanị aa mẹ̀ aduwa nị ka: ‘Ohomorihi, mâ kụ́ wụ avọ ka mẹ yị yà aza ana vọ mẹ̀ yà: aza anaā họ́họ̀ha, dị ẹyaa mẹ irikichi, dị ẹ rẹ yaa sẹ̀ ịrẹka. Mẹ yị hyakụ yà anka ọdẹkẹhirehi ọnọnị bẹẹ.

¹² Mịị̄ za awẹ ụpẹ ẹẹva ịnị ọsẹ, mị rẹẹ̄ tụ́ agẹẹwụ avaba ịsị màa nyị.’

¹³ Dị ọdẹkẹhirehi ọnọọ ọnị jẹẹ ẹ́nẹẹnẹ nị. Ọ yị hyakụ nyayịnẹ sị eyi anị tụ́ ẹba. Dị ọ sị ụvọ kú ịrẹsụ, dị ọ ka: ‘Ohomorihi, aarịhịnị, vayị ẹmị ọnịvị!’ ”

¹⁴ Dị Ijeesu ka, “Dị ma kà a wụ nịnị ka ọdẹkẹhirehi ọnọọ Óhomorihi jị ịhị yị, dị aa nọ eehi nị, ẹ yị vị Anihwarisi ọnọọ. Agụvị ka ọza ana àa kà ẹngụ anị hịrẹ, vị Ohomorihi vaa kà a chí nị; ọza ana àa rẹ kà ẹngụ anị chí, dị Ohomorihi kà a hịrẹ.”

Ijeesu ọnịrị ezi eweyi

¹⁵ Aza ẹnyị aanị ệ kụ́ ezi eweyi ká Ijeesu vẹ ka ọ̀ sị ụvọ tụra wa. Ịjị ezirẹma anị re aza ẹnẹẹ, dị ẹyaa tụ́ wa ohuvọ nị.

¹⁶ Dị Ijeesu hị́ ezi ẹnẹẹ pe ẹngụ nị, dị ọ ka, “Navọ ezi eweyi nịnị ẹ̀ vẹ ịdị amị! Asị ụ dọ wa oro, agụvị ka ẹngụ ẹnịnị ẹ nyị ịzị Ohomorihi yà aa mẹ ịjọva nị.

¹⁷ Ịzẹyịza, m maa kà a wụ nịnị nị, ọza tụra ọza ẹnẹ ẹ̀ yị dọ ịjọva Ohomorihi, anka ózi oweyi mẹ̀ẹ̄ dọ, ọ yị zụ ngụ ịzọọ.”

Ọza ịnya ene sì ịrẹyị ẹkẹhị hu Ohomorihi

¹⁸ Ọdọvịdị Aniju ọnya aanị ọ va họ̀ Ijeesu use ka: “Nda ọyịza, sị a vọrọ ka ma mẹ, dị ma nyẹngụ yàra pooro zịna-zịna ị́dị Ohomorihi?”

¹⁹ Dị Ijeesu kà a yọ ka, “Sị ẹ vẹ dị waa hị́ mị Nda ọyịza? Ẹ yị nyị ọza ọyịza ikonya vụrụ-vụrụ, ẹ̀ yị vị Ohomorihi ọnịnya kẹnẹ.

²⁰ Wâ yẹ ọda oni Ohomorihi mẹ ka: Asị ụ sẹ̀ ịrẹka; Asị ụ wụ̀ ọza; Asị u yi oyi; Asị ụ dọ ivenu ireche; Sị ụbanyị yị ada awụ ọnịrị ọnyị awụ.”

²¹ Dị ọnọrụ ọnọọ ka, “M mẹ̀ hụrẹ vị ozweyi, mị hụrẹ sị ụvọ za avaba ọda ẹnẹnị geri-geri nọ.”

²² Ịjị Ijeesu maanị wụ́ ọọ, dị ọ kà a yọ ka, “Ọ sị vọ ịsa ọnya chọchọchọ ana a vọrọ ka wa mẹ: Na, ná avaba ogu ọnị ụ nyị, dị ụ wa sị ẹkẹhị anị mẹ ọpịsarị nịnị ẹyịza, dị ụ wa nyẹngụ nyị ogu tụ́ ịdị Ohomorihi; dị ụ wa vẹ, dị ụ wa vaa dụ mịị zịịzị!”

²³ Ịjị ọ maanị wụ́, ayị anị o si du, agụvị ka opisa ọbanyị ọ vị nị.

²⁴ Ịjị Ijeesu vavọọ re e, ayị anị o si du, dị ọ ka, “Ọ vaa daa tụ́ akanyaa yị ọnyẹkẹhị nịnị kẹnẹ, dị ẹ̀ ngụ ịzị Ohomorihi yà aa mẹ ịjọva.

²⁵ Ộ tụ́ akanya yị opisa ka ọ̀ ngụ ịzị Ohomorihi yà aa mẹ ịjọva, huna ọ mẹ̀ tụ́ akanya ka ịnyaakụmị ọ̀ ngụ ini uhwohwo ọrịhị na para hu.”

²⁶ Dị aza ana maanị wụ́ ọọ ka, “Ho! Ẹnẹ vaa há aanị?”

²⁷ Dị Ijeesu ka ịsị ọza ọ̀ yị zụ mẹ, Ohomorihi ọ nyẹngụ mẹẹ nị.

²⁸ Dị Ipita ka, “Re, avaba ịsa ẹ́yị navọ tịtẹ, dị yaa dụ wụụ zị nọ.”

²⁹ Dị Ijeesu ka, “Ịzẹyịza, m maa kà a wụ nị, ọza ọ̀ọ navọ irehi anị, àa vị ose anị, ọ̀ọ vị ẹyịnyara anị, ọ̀ọ vị ada anị ọnịrị ọnyị anị, ọ̀ọ vị ezi anị tịtẹ, agụvị ka Ohomorihi aa mẹ ịjọvaa tụra a,

³⁰ Ohomorihi rẹ vaa sị ịsa ene huna avọọ sí ọọ atọ ịnị ẹhẹ ọnọnị. Ịnị ẹhẹ ana aa vẹ, Ohomorihi vaa mẹ ka ọ̀ yàra pooro zịna-zịna.”

Ijeesu ộ kà ịrẹyị isu anị

³¹ Ijeesu ộ hị́ ezirẹma anị ẹwụrẹva tụ́ oboka, dị aa kà a yị wa ka, “Re nịnị, yaa hịrẹẹ nọ Ijerusarẹmị. Avaba ịsị ọnịsẹ nịnị chẹrẹ tịtẹ ini oze ẹmị Ozi ọza onigirima vaa sẹ.

³² A vaa sị mịị chire anarịmadọwụ nịnị ụvọ, dị a sị mị mẹ̀ enyinyi, dị a kụ̀ mị ụhụ, dị a rẹ jị atẹ kú mi.

³³ E re vee tụ́ mi ịjapa, dị ẹ wụ̀ mị. Ama ịhyẹgwẹta anị, mị rẹ vaa haa hụụnị isu.”

³⁴ Ezirẹma anị ẹ yị yẹ ịsa ana aa kà aanị, ẹnịnị ẹ yị hyakụ yẹ ịrẹyị ọnọọ vụrụ-vụrụ.

Ijeesu ộ há ogweyi ọnya eyi

³⁵ Ẹkụhị ọnya, Ijeesu aa vaa ngụ Ijeriko. Ogweyi ọnya aanị ộ yaayịtẹ ụtọ oze, dị aa pà ịsaa rị nị.

³⁶ Ọ mẹ̀ wụ́ ka ọkọnị aza aa parahu, di o họ̀ use ka, “Sị ẹ vị ọnọọ kẹ?”

³⁷ Dị ẹ kà a yọ ka Ijeesu Anịnazarẹtị aa parahu nị.

³⁸ Di o nowu zẹtẹ, dị ọ ka, “Ijeesu, ẹwụ Ozi Idevidi, vayị amị!”

³⁹ Dị aza ene hi ọvịdị aa tụ́ ọọ ohuvọ ka ọ̀ sị irenu anị kú oku nị. Ama di o nowu tụ́ ẹba hu avọọ nị ka, “Ẹwụ Ozi Idevidi, vayị amị!”

⁴⁰ Dị Ijeesu jẹẹ, dị ọ ka a sị ọọ ve tù ọnị nị. Ịjị o ve si tù ọọ, dị Ijeesu họ̀ ọ ka,

⁴¹ “Si u wee sì ka ma mẹ yị wụ?” Dị ọ ka, “Ananyị yị, aarịhịnị mị ka mee re ẹtẹ nọ.”

⁴² Dị Ijeesu kà a yọ ka, “Wee re ẹtẹ! Ụkụ awụ ộ ta, agụvị ka wâ sị ayị tụra mị.”

⁴³ Obooboro ọnọọ, di ee re ẹtẹ nị. Dị aa dụ Ijeesu na, dị aa sị ụgaa yị Ohomorihi nị. Ịjị avaba aza ẹnẹẹ re e, dị ẹnị raa ga Ohomorihi nị.