Iruuku 16 - IWE ỌNỊNỊ

Ozi ahụ onirikichi ọnya

¹ Dị Ijeesu rẹ kà a yị ezirẹma anị ka, “Â nyị ọzọbanyị ọnya aanị ana nyị ozi ahụ ana sị eyi pe ụkọrọ anịị yọ. Dị ọza ịnya va kà a yị ọzọbanyị ọnọọ ka ozi ahụ ọnọọ ee du ogu anịị ha nị.

² Dị ọ va hị́ ozi ahụ ọnọọ, dị ọ ka: ‘Ịrẹyị awụ ịsị mị wụ́ aanị kẹ? Chẹrẹ ẹ vẹ dị a re, ụ mẹmẹ mẹ̀ ụkọrọ awụ; agụvị ka wẹ yị kụkụ sị eyi pe ụkọrọ amị.’

³ Dị ozi ahụ ọnọọ ka ẹ yị ẹngụ anị ka: ‘Sị mị vaa mẹ? Ọga amị aa dọ mị ụkọrọọ tịtẹ. Mẹ yị zụ ba ẹtẹ, ụhị aa nyị mị ọyịna pà ịsa rị.

⁴ Ma sị yẹ ịsị mị vaa mẹ, agụvị àa sị mị dọ ụkọrọ tịtẹ, dị aza ẹ̀ zụ dọ mị pe ẹngụ tụ́ ini eehi ẹnịnị.’

⁵ Dị ọ hị́ avaba ọnụta ọga anị vẹ nị. Dị ọ họ̀ ọnịpaapa use ka: ‘Ọ yà ụ rị ọga amị ụta?’

⁶ Dị ọnọọ ka ọnị ộ rị ọ ụta angwẹ ịgarụwa ịrẹka nị. Dị ozi ahụ ọnọọ kà a yọ ka ọ̀ dọ iwe anị dị ọ̀ wụsẹ yaayịtẹ, dị ọ̀ chẹrẹ ịgarụwa ẹchẹhị tụ́ ọọ.

⁷ Dị ọ rẹ hị́ ọsa nị, dị ọ ka: ‘Ẹwụụ yọ, ọ yà ụ rị?’ Dị ọnị rẹ ka ọnị ộ rị ọọ ụta akụ opuuru ẹchẹhị. Dị ọ rẹ kà a yị ọnọọ ka ọ̀ dọ iwe anị dị ọ̀ chẹrẹ opuuru ẹbẹẹna tụ́ ọọ.

⁸ Dị ọga ọnọọ kà ọda yị ozi ahụ onirikichi ọnọọ nị, agụvị ka ộ vavọọ sị ịrẹyọyẹ mẹ. Anẹhẹ ọnọnị aa mẹ̀ ebira ịrẹyọyẹ ịnị ẹhẹ ẹnịnịị huna aza ana ka ẹnị yà ini ẹtohweyi nị.”

⁹ Dị Ijeesu rẹ ka, “Avọọ m mẹ̀ kà a wụ nịnị nị, ka wa sị ẹkẹhị ọnị ụ zị oze asuvu nyị, di u we si beri aza za ọta nịnị! Agụvị ịjị ayị ẹkẹhị òo hí, dị à dọ wụ nịnị tụ́ ịzị ọzaā yàra pooro zịna-zịna.

¹⁰ Ọza ana àa nyị ịzẹyịza tụ́ ịnị ịsa kiiki, ọ rẹ vaa nyị ịzẹyịzaa tụ́ ịnị ịsa ọbanyị. Ọza ana àa rẹ vị onirikichi ịnị ịsa kiiki, vị ọ raa yịị mẹ irikichi ịnị ịsa ọbanyị nị.

¹¹ Wẹ̀ yị nyị ịzẹyịza ịnị ịrẹyị ẹkẹhị ọnị ụ zị oze asuvu nyị, ẹnẹ nyẹngụ sị ịsa ụbanyị obooro chire wu ụvọ?

¹² Wẹ̀ yị rẹ mẹ ịzẹyịza ịnị ịsa ọnịsa, ẹnẹ aa sị ịsa awụụ yị wụ?

¹³ “Ozi ahụ ọnya ọ yị nyẹngụ aa hẹkẹ ọga ẹẹva. Ọ vaa nyị ịhyẹrẹ ọnya, di o sì ịrẹyị ọsa; ẹ̀ yị vị avọọ, dị ọ sị ayị yị ọnya, dị aa sị eyii wụ ọsa. Wẹ yị nyẹngụ aa hẹkẹ Ohomorihi, dị ụ wa rẹẹ hẹkẹ ẹkẹhị nịnị.”

Ẹkẹhị ọnịrị ọda oni Imosiisi mẹ

¹⁴ Ánihwarisi nịnị mẹ̀ wụ́ ịrẹyị ọnọnị, dị ẹyaa sị Ijeesu mẹ̀ isiya nị, agụvị ka ẹnịnị ê sì ịrẹyị ẹkẹhị.

¹⁵ Dị Ijeesu kà a yị wa ka, “Ẹwụ nịnị ọọ̄ jị ịhị yị ẹngụ awụ nịnị éyi ọza nị. Ama Ohomorihi ộ yẹ ayị awụ nịnị. Ịsị aza ro ka ịsa ẹtẹẹtẹrẹ ọ vị nị, ịsa kẹnẹ-kẹnẹ ọ vị ini eyi Ohomorihi nị.

¹⁶ “Ọda Imosiisi ọnịrị ịrẹyị ọnịsẹ nịnị ẹ́ jẹẹ pooro ve tù ụmẹ Ịjọọnụ ọhwọzenyi. Hụrẹ ụmẹ ọnọọ a hụrẹ aa kà enube ọyịza ka Ohomorihi aa mẹ ịjọva nị. Ọzọza aa vụrịị sị ụkataa ngụ ọọ.

¹⁷ Ọ rụra mẹ ka ẹhẹ ọnịrị ẹbẹẹba ẹ̀ ta; ama àa vị ọdaa yọ, ẹ yị nyị ana vaa jịị ha ịnị anị.

¹⁸ Ọza ene èe yi ose anị, dị ọ na nyị ọsa nị, ộ sẹ̀ ịrẹka. Ọza ana àa na nyị ọnẹẹ ene e yi tịtẹ, ọnị ọ rẹ sẹ̀ ịrẹka.”

Ọnyẹkẹhị ọnya ọnịrị Ịrasarụsị

¹⁹ “Â nyị ọnyẹkẹhị ọnya aanị anaā hara ịta ẹbanyị-ẹbanyịị hi ẹngụ, dị aa rị ẹhẹ ẹtẹẹtẹrẹ eyinị-eyinị.

²⁰ A rẹ nyị ọpịsarị ọnya aanị ana aā hị́ Ịrasarụsị ẹnẹ ẹngụ anị vị ịtahụ-ịtahụ. Aā sị ọọ vaa tụ́ enoze ọnyẹkẹhị ọnọọ.

²¹ Ee sì ka ịsa ana àa jị hi ẹtẹ hụrẹ ịzị ọnyẹkẹhị ọnọọ yà aa rị ịsa, ọnị ọ̀ tọ̀ọ́ yọọ rị; ama dị irezi vẹ, di eyee ree yọ ịtahụ.

²² Ẹkụhị ọnya, dị ọpịsarị ọnọọ wusu nị. Dị anggẹẹrị nịnị sị ọọ na yaayịtẹ pe Abụrahamị nị. Dị ọnyẹkẹhị ọnọọ oni re sú, di e ne e nị.

²³ E mè ne e, ộ na yà ini ẹkụra, dị aa rị ụya nị. Dị ọ kụ̀rà eyi tụ́ ẹba, di ee re Abụrahamị ẹ́nẹẹnẹ nị. Di o ree re Ịrasarụsị ị́dị anị nị.

²⁴ Ọnyẹkẹhị ọnọọ ô nowu tụ́ ẹba, dị ọ ka: ‘Abụrahamị ada ayị, aarịhịnị vayị amị, dị ụ wa tụ́ Ịrasarụsị ka ọ̀ jị ịrẹsụ igege anị ngụ enyi, dị ọ̀ va tọ ọ tụ́ mị ịrarẹ, di ò hunẹnẹ; ka ịra ọnọnị aa sị ụyaa rị mị ẹtẹẹtẹrẹ.’

²⁵ Dị Abụrahamị ka: ‘Ozi, tamayị ka ụ mẹ̀ yà ẹhẹ, wâ dọ ịsa ọyịza-ọyịza, di Ịrasarụsị ọnị rị ụya ẹtẹẹtẹrẹ nị. Ama booro aanị, ẹngụ anị ọ sị rọ tụ́ ịzẹnị, ama ẹwụ aa rị ụya ịzọọ.

²⁶ À hyakụ kụ́ ẹnẹẹ kwooze, ọbọbọ ọbanyị ọnya yà ịnị akakana ẹyịrị ẹwụ; agụvị ọza ana àa ka ọnị aa hụụ ịzẹnị vẹ ịdị awụ ịzọọ, asị ọ zụ vẹ; dị ọza ana àa rẹ ka ọnị aa hụụ ịzọọ vẹ ịdị ẹyị ịzẹnị, asị ẹnị rẹ zụ vẹ.’

²⁷ Dị ọnyẹkẹhị ọnọọ rẹ ka: ‘Ada ayị, aarịhịnị, navọ wa tụ́ ọ nọ ini eehi ada amị kẹ!

²⁸ Agụvị ka mâ nyị ẹyịnyara ẹẹhị, ọ̀ na kà wa ọnọ, agụvị asị ẹ vẹ aha ụyọrị ọnị mị yà aanị!’

²⁹ Dị Abụrahamị kà a yọ ka: ‘Ẹyịnyara awụ ệ nyị ịrẹyị Imosiisi ọnịrị ọnịsẹ nịnị, ẹ̀ wụ́ ịrẹyị ẹnẹẹ!’

³⁰ Dị ọnyẹkẹhị ọnọọ ka: ‘Eyiye de, Abụrahamị ada ayị, ọza ọ̀ọ hụụnị eku na kà ịrẹyị yị wa, e vee ro ịnẹẹ varẹma.’

³¹ Dị Abụrahamị kà a yọ ka: ‘Ẹ̀ yị wụ́ ịrẹyị Imosiisi ọnịrị ọ́ọnịsẹ nịnị, ọza ọ̀ọ daka hụụnị eku na kà ịrẹyị yị wa, ẹ yị rẹ yaa yịị wụ́.’ ”