Ịrịka 9 - IWE ỌNỊNỊ

Eche ọyịparahu ọhụva

¹ Ịnị ụhwẹ ịpaapa ịnị ịrayị ọhụva ọnị Anisirẹrị nịnị jịnẹ hụrị Ijipiti va ngụ ịnị ụnọmị Ịsịnayị, Ẹnẹyịmavara ô pe Imosiisi kà ịrẹyị.

² Ọ kà Imosiisi ọ ka yị Anisirẹrị nịnị ẹ rị eche ọyịparahu ịnị ụmẹ anị.

³ Oruva ẹkụhị ẹwụrẹna ịnị ụhwẹ ọnọọ ọ vị ụmẹ ana a sị rị eche ọnọọ nị. Di o hu wa ụvọ ka ẹ za avaba ido anaā sịị rị ọ nị.

⁴ Ịzẹyịza, dị Imosiisi kà yị wa ẹ bẹdọ rị eche ọyịparahu ọnọọ nị.

⁵ Dị ẹnịnị rị eche ọnọọ oruva ịnị ẹkụhị ẹwụrẹna ịnị ụhwẹ ịpaapa anka Ẹnẹyịmavara mẹ ọda anị tụ Imosiisi hi wa nị.

⁶ Â nyị aza ẹnyị ịnị ẹngụ Anisirẹrị ẹnẹ ẹ yị rị eche ọyịparahu beri aza ana vọ. Ẹnịnị ẹ kanyị oku ọza ene du wa ẹngụ. Dị ẹnịnị họ̀ Imosiisi ọnịrị Eerọnị ka,

⁷ sị ẹ vẹ dị ẹnị ana kanyị oku ẹ yị zụ rị eche ọyịparahu, dị ẹnị mẹ̀ ịsọvọ hi Ẹnẹyịmavara anka aza ana vọ ụmẹ ọnyọọnya?

⁸ Dị Imosiisi tụ wa ohi ka, ẹnịnị ẹ jẹẹ zi ụmẹ ọnị Ẹnẹyịmavara ọ̀ọ ka yị ọnị.

⁹ Ẹnẹyịmavara ộ ka yị Imosiisi ka,

¹⁰ ọ ka yị ịragụ Anisirẹrị ka, ụmẹ tụra ụmẹ ọnị àa nyị ọza ẹnẹ ẹ yị zụ rị eche ọyịparahu agụvị ka ọ̀ kanyị oku ene du ọ ẹngụ, a vị ka ọ jịnẹ na aha onoze, ọ zụ varẹma rị ọ.

¹¹ Ẹngụ aza ẹnẹẹ ẹ zụ rị eche ọnọọ ịnị oruva ẹkụhị ẹwụrẹna ịnị ụhwẹ ọhụva anị. Dị ẹ rị ọ beri ịbụrẹdị ẹnẹ ẹ nyị owu vaka avị ọnyịrẹyị.

¹² Ẹ za avaba ido eche ọyịparahu. Asị a nyị ịsị ẹ vọ ẹtẹ tịtẹ tu eyinẹhẹ anị, dị asị ẹ chaka ẹchụkụ uye anị.

¹³ Àa nyị ọza ọnị ẹ yị nị, a vị dị ẹ yị jịnẹ nị, dị o yi ka ọnị ẹ yị rị eche ọnọọ nị, ọ vaa rị ụya ịvị anị, kụkụ vaa za ọza ọnọọ ịrịka beri aza Ohomorihi agụvị ka ẹ yị sị ịsọvọ va yị Ẹnẹyịmavara ịnị ụmẹ anị.

¹⁴ Anikinami ana ra beri wa ẹẹ ka ẹnị aa rị eche beri wa, ẹ za avaba ido eche ọnọọ.

Eguhi ọnịrị ịra ịrẹsụ ajẹngụ

¹⁵ Ịhị ọnị a jị ajẹngụ Ẹnẹyịmavara, eguhi vị ene ku ọ ịrẹsụ pooro na ngụ oruva, dị ọ vara ịra ku ọ ịrahụ nị.

¹⁶ Avọọ ẹtẹ mẹ vana ya ịnị avaba ụmẹ nị.

¹⁷ Ụmẹ ọnị eguhi ọ̀ọ va hịrẹ ịrẹsụ ajẹngụ, dị aza aa saasa a ịzị ọ zị pooro ne tu ịzị ọ jẹẹ, dị ẹ ka ahụ jẹẹ ịzọọ.

¹⁸ Ẹnẹyịmavara ọ̀ọ ka ẹ kwẹẹtẹ, dị ẹ kwẹẹtẹ, ọ̀ọ ka ẹ jị udi tụ ịzọọ, dị ẹ ka ahụ jẹẹ. Ụmẹ tụra ụmẹ ọnị eguhi ọ ya ịrẹsụ ajẹngụ, ẹ yị nyị ọza ana kwẹẹtẹ.

¹⁹ Eguhi ọnọọ ọ daka ku ịrẹsụ ajẹngụ anị, ẹnịnị vị ana yịị jẹẹ ịzọọ anka Ẹnẹyịmavara mẹ mẹ̀ ọda anị yị wa.

²⁰ Ụmẹ ẹnyị eguhi vị ana mẹ ẹkụhị che kẹnẹ ịrẹsụ ajẹngụ, dị Ẹnẹyịmavara ọ kà a ka ẹẹ kwẹẹtẹ, dị ẹ rẹ kwẹẹtẹ.

²¹ Ụmẹ ẹnyị eguhi vị ana mẹ eyinẹhẹ kẹnẹ, dị aza kwẹẹtẹ obobooro ọnịrị ụmẹ tụra ụmẹ ọnị eguhi oo hu ahụ.

²² Ọ̀ọ daka vị ẹkụhị ẹẹva, ọ vị ụhwẹ, a vị ịrayị eguhi mẹ ịrẹsụ ajẹngụ nị, Avaba Anisirẹrị vị ana vavọọ e zi ọ. Ịhị ọ̀ọ kwẹẹtẹ kẹnẹ ẹnị re wu ẹnịnị dị ẹ yaa zị ụsẹ nị.

²³ Ịsị Ẹnẹyịmavara ọ ka yị Imosiisi tụ hi wa kẹnẹ ẹ yaa saasa nị. Ọ̀ọ ka ẹ kwẹẹtẹ, dị ẹ kwẹẹtẹ, ọ̀ọ kà a ẹ jẹẹ dị ẹ jẹẹ.