Ịrịka 8 - IWE ỌNỊNỊ

Eerọnị ộ kụ Ịrakotupa ịhịmba tụ aha anị

¹ Ẹnẹyịmavara ộ kà Imosiisi ka,

² ọ ka yị Eerọnị o hù ịrakotupa ịhịmba gẹ ịnị ọchị anị agụvị dị ịra ọ sị ẹtẹ hweyi ọvịdị.

³ Ịzẹyịza, dị Eerọnị mẹ̀ anka Imosiisi mẹẹ ka yị ọ nị.

⁴ Avaba ọchị ịrakotupa ọnọnị vị ana a sị igooru tu hụrị uruvo na ngụ ịrẹsụ ịzị a sị ododo mẹ̀ ọvị. Ọchị ịrakotupa ọnọnị vị ana mẹ̀ anka Ẹnẹyịmavara mẹ jị uwe yị Imosiisi.

 sị Anireevi nịnị chire Ẹnẹyịmavara ụvọ

⁵ Ẹnẹyịmavara ọ kà yị Imosiisi ka;

⁶ ọ ha Anireevi nịnị hi hụụnị akakana Anisirẹrị, dị ọ mẹ wa aza anị.

⁷ Imosiisi o che irenyi sẹ wa ẹngụ dị ọ nyịna ịvị ẹnịnị kwooze. Dị ọ̀ ka yị wa ka ẹ kụ avaba ẹyị ene hi ịnị ẹngụ ẹnịnị dị ẹ nyịna achị ẹnịnị.

⁸ Ẹnịnị ẹ sị ụnọ ọnịrị ịsa ịsọvọ ayị akụ ana a sị angwẹ orivi hura vẹ. Ẹ sị ụnọ ọhụva ana a vaa sị mẹ̀ ịsọvọ vaka vẹ.

⁹ Ẹnẹyịmavara kà, Imosiisi ọ kụ Anireevi nịnị vẹ ọvịdị ịragụ avaba Anisirẹrị nịnị ọvịdị ajẹngụ anị.

¹⁰ Avaba Anisirẹrị nịnị ẹ sị ụvọ tụra wa,

¹¹ dị Eerọnị sị wa chire Ẹnẹyịmavara ụvọ anka ẹyịza ọnị ẹ sị yọ agụvị ẹ mẹ̀ ụkọrọ anị.

¹² Ọ vavẹ ịrẹma ọnọọ, dị Anireevi nịnị ẹ kụ ụvọ tụra ụnọ ẹnẹẹ ịrẹsụ. Dị a sị ụnọ ọnya mẹ̀ ịsọvọ ẹvagu ịvị, dị a rị ụnọ ọsa ịra dị a sị hine Ẹnẹyịmavara ayị.

¹³ Ịrẹma ọsọnị, dị Anireevi nịnị va jẹẹ ọvịdị ụta anị eyi Eerọnị ọnịrị ezi anị, dị Eerọnị sị wa chire Ẹnẹyịmavara ụvọ.

¹⁴ Ịsa ana a mẹ aanị, vaa sị zụ ka Anireevi nịnị ẹ sị vara ọtirenyi agụvị ka ẹ sị vara aza Ẹnẹyịmavara.

¹⁵ Ẹnịnị ẹ nyẹngụ kụkụ aa mẹ̀ ụkọrọ ịnị ajẹngụ anị agụvị ka a raa sị wa chire Ẹnẹyịmavara ụvọ, dị ọ dọ wa nị.

¹⁶ Anireevi nịnị Ohomorihi sị yị ẹngụ anị. Ẹnị ẹ jẹẹ udi ezi ịpaapa anọrụ Anisirẹrị nịnị ana vị anị nị.

¹⁷ Ọ̀ọ mẹ wụ ezi ịpaapa Anijipiti nịnị, ọ kà a ka avaba ezi anọrụ ịpaapa Anisirẹrị ọnịrị ịsụpa ẹnịnị kụkụ vị anị nị.

¹⁸ Ama booro aanị, ọnị ọ ra nyị Anireevi nịnị dọ wa ịrẹsụ.

¹⁹ Ẹnẹyịmavara kà ọnị ọ raa sị wa yị Eerọnị ọnịrị ezi anị. Ẹnịnị vị ana vaa mẹ̀ ụkọrọ ịnị ajẹngụ anị, dị ẹ mẹ̀ ịsọvọ ịvị Anisirẹrị agụvị ẹ gụrị ajẹngụ anị asị Ohomorihi kụ akanya tu wa.

 sị Anireevi nini chire Ohomorihi ụvọ

²⁰ Imosiisi ọnịrị Eerọnị ne beri Anisirẹrị nịnị ẹ mẹ̀ avaba ịsa ọnị Ẹnẹyịmavara kà yị Anireevi nịnị.

²¹ Anireevi nịnị ẹ che enyi sẹ ẹngụ ẹnịnị, dị ẹ nyị ẹvagu hụụnị ịvị ẹnịnị, dị ẹ nyịna achị ẹnịnị. Dị Eerọnị sị wa vẹ ọvịdị ụta, dị ộ mẹ̀ ịsọvọ ịvị ẹnịnị agụvị dị Ẹnẹyịmavara ọ dọ wa.

²² Eerọnị mẹ maanị sị ọ mẹ̀, dị Anireevi nịnị kụkụ aa mẹ̀ ụkọrọ ịnị ajẹngụ Ẹnẹyịmavara anka ọ mẹ mẹ̀ ọda yị wa nị.

²³ Ẹnẹyịmavara ộ kà yị Imosiisi ka;

²⁴ Anireevi nịnị ana sị gụ ẹhụ ịrayị ohurẹẹhị da va hịrẹ avọọ ẹ zụ mẹ̀ ụkọrọ ịnị ajẹngụ Ẹnẹyịmavara nị.

²⁵ Ama aza ana sị gụ ịrayị ẹvarẹwụ vị ana hụrẹ ụvọ ụkọrọ tịtẹ, dị ẹẹ tụ́ ụhwọ́, dị asị ẹ kụkụ mẹ̀ ụkọrọ vụrụ-vụrụ.

²⁶ Ẹngụ azọkụ ẹnẹẹ ẹ nyẹngụ gụ Anireevi nịnị ana a mẹ̀ ụkọrọ ụvọ kẹnẹ ama ẹnịnị ẹ yị nyị ụkọrọ ẹnẹ ẹ kụkụ aa mẹ.