Ịrịka 5 - IWE ỌNỊNỊ

Ido irenyi-irenyi ọnị Ohomorihi mẹ̀ yị Anisirẹrị Aza ana vọrọ ka e hi ịrẹma ẹkụra

¹ Ẹnẹyịmavara ộ ka yị Imosiisi ka,

² ọ̀ ka yị Anisirẹrị ka ẹ dụ ọza ana nyị ụkụ ana zụ da gẹ ọza anka ụkụ ọbanyị ọnịrị ọza ana nyị ịtahụ anaa va enyi beri ọza ana kanyị oku hụrẹ ẹngụ.

³ Ohomorihi ka ẹ̀ dụ ọza tụra ọza anaaa nyị ẹngụ ụkụ ẹnẹẹ. Ịzị ẹ ya ọ̀ nị agụvị ka ọnị ya ịnị akakana ẹnịnị.

⁴ Ịzẹyịza, dị Anisirẹrị nịnị aa mẹẹ anka Ẹnẹyịmavara mẹ mẹ̀ ọda anị yị Imosiisi nị.

Ụtosì ọza ene yi oyi

⁵ Dị Ẹnẹyịmavara rẹ ka Imosiisi ka,

⁶ ọ̀ ka yị Anisirẹrị ka, ọza ọ̀ọ mẹ̀ ebira odivi hi ọnọhụva anị, ọ̀ rị ịvị, dị ọ sị ahụ jịnẹ ịrẹyị anị

⁷ Ọ dọ irenu ebira odivi ọnị ọ̀ mẹ̀, dị o si ụta beri achehi ẹẹhị varẹma yị ọza ọnị ọ mẹ̀ ẹ hi.

⁸ Ama ọza ọnọọ òọ wusu dị ẹ yị nyị anda anaa vọrọ ka o si ụta yị nị, ọ sị ịsa ọnọọ beri ịdẹba ọnị ọ sị nyịna ịvị anị yị ohirẹsụ irehi Ohomorihi agụvị ka Ẹnẹyịmavara ọ kụkụ nyị nị.

⁹ Avaba ịsa ọnị Anisirẹrị ẹ̀ sị va yị Ohomorihi vị ohirẹsụ irehi Ohomorihi ana a tana ẹ yị.

¹⁰ Ọnị ọ nyị ịsa ọnọọ nị.

Ịrẹyị ose ọza ana zị ụsẹ ịbẹhị

¹¹ Ẹnẹyịmavara ộ ka yị Imosiisi ka,

¹² ọ̀ ka yị Anisirẹrị ka ọnyẹnẹẹ ẹ yị mẹ ịzẹyịza ka ọva anị na nị,

¹³ dị ọnọrụ ọsa pe e sụ̀ dị ẹ̀ yị nyị onivenu agụvị ka ọza ẹ̀ yị za wa nị, o re du ẹngụ anị.

¹⁴ Àa vị ọva anị ro ka ọ̀ọ sẹ̀ ịrẹka nị, a vị ọ̀ọ jịmọjịmọ tụra a kẹnẹ nị,

¹⁵ dị ọ̀ sị ọ vee tu ohirẹsụ irehi Ohomorihi. Dị ọ sị ibaari ana kwọ orogo ẹẹva dị asị a sị angwẹ hura a, dị asị ọ rẹ nyị eturare agụvị ka ịsa ịsọvọ ọnị ọva anị mẹ agụvị ka aa kụ ụhị ka ọnị ọ yẹ ịzẹyịza ose anị yọ nị.

¹⁶ Dị ohirẹsụ irehi Ohomorihi sị ọnẹẹ ọnọọ vị ọvịdị Ẹnẹyịmavara.

¹⁷ Dị ọ sị enyi ọnịnị tụ ịnị ụnọkọ, dọ ka ezi ini eteesu irehi Ohomorihi va hura a.

¹⁸ Dị ọ hụ́ ịta hụrẹ ana vị ọnẹẹ ịrẹsụ, dị ọ sị ịsa ịsọvọ ọnọọ tụra a ụvọ. Dị ọnị sị ịpa ọnịrị enyi ọnyịrẹyị ana a sị tụ́ ozirenu rị ụvọ.

¹⁹ Dị ohirẹsụ irehi Ohomorihi ka yọ ka o hị́ eku ka ọnịrị ọnọrụ ọsa ẹ̀ yị sụ́. Ọnị e yi dụ ẹngụ anị ha. Ọnịrị ọnọrụ ọsa ọ̀ọ sụ́, asị eku enyi ọnịrẹyị nị ọnị.

²⁰ Ama ọ̀ọ sẹ̀ ịrẹka,

²¹ Ẹnẹyịmavara mẹ ozirenu za a eyi anda ẹnịnị, dị ịhị ozi anị kachị, dị ịrẹka anị wu.

²² Enyi ọnọnị ọ ngụ ọ ịnẹ di o wu, dị ịhị ozi anị o kachị, dị usi anị e wu. Dị ọnyẹnẹẹ ọnọọ ha aamị.

²³ Dị ohirẹsụ irehi Ohomorihi chẹrẹ ịrẹyị ozirenu ọnọọ tụ ịnị ọparị, dị ọ sị enyi ọnyịrẹyị ọnọọ nyịna a

²⁴ yọ dị o hu ọ. Ọ̀ọ mẹ̀ ẹ dị ọ̀ kụ ẹngụkata tu ọ.

²⁵ Dị ohirẹsụ irehi Ohomorihi dọ ọ ayị hụrẹ ụvọ, dị ọ kụ̀rà tụ́ ẹba hi Ẹnẹyịmavara, dị ọ sị ọ na ịrẹsụ ụta.

²⁶ Dị ọ̀ ka ayị ọnọọ ụvoku ọnya ana a sịị tamayị, dị ọ rị ọ ịra ịrẹsụ ụta. Ọ̀ọ sị ọ rị ịra, dị ọ mẹ ka ọnyẹnẹẹ ọnọọ o hú enyi ọnyịrẹyị ọnọọ.

²⁷ Áa vị ka ọnyẹnẹẹ ọnọọ ộ sẹ̀ ịrẹka, enyi ọnị o hu aanị vaa vị ka ozirenu ọ za a. Dị ị̀rẹ̀ka anị o wu, di ịhị ozi va ngụ ọ ẹngụ, dị ẹ yị kụkụ zụ ma ozi. Dị ọvị ọza ozirenu ini akakana aza anị.

²⁸ Ama ana vị ọnyẹnẹẹ ẹ̀ẹ yị sẹ̀ ịrẹka, dị ọ nị ọ nị, ẹ yị nyị ịsị a mẹ̀ ẹ, dị ọ zụ zyẹẹ dị ọ ma a.

²⁹ Ido ọnọnị vị anaā za agụvị ịrẹyị ụhị ọyị kụ̀. Ọnẹẹ ọ̀ọ va jịnẹ ọva na ẹhẹ na sẹ̀ ịrẹka.

³⁰ Ọva ana vị ọnẹẹ àa jị ose anị ịrẹka ka aa sẹ̀ ịrẹka, dị ọ sị ọ vị ọvịdị Ẹnẹyịmavara ọnịrị ohirẹsụ irehi Ohomorihi. Dị aa zama a re.

³¹ Ana vị ọnọrụ òo nyeeyi, ọza ẹ yị sị ụya rị ọ; ama ose anị ọ̀ọ rị ịvị, dị ọ rị ụya anị.