Ịrịka 4 - IWE ỌNỊNỊ

Ụkọrọ ezi Ikohati nini

¹ Ẹnẹyịmavara ộ ka yị Imosiisi ọnịrị Eerọnị ka,

² ọ za aza ịrẹsụ Ikohati kẹnẹ ịrịka Ovwoovu-ovwoovu ọnịrị abara-abara.

³ Ẹ za avaba anọrụ ana da hụrẹ ịrayị ohurẹẹwụ na ngụ ịrayị ẹvarẹwụ ana hụụ mẹ̀ ụkọrọ ajẹngụ Ẹnẹyịmavara.

⁴ Ẹnị ẹ nyị ọyị sị eyi pe ẹnya ana a sị mẹ ahẹkẹ ịnị irehi Ẹnẹyịmavara nị.

⁵ Àaa nyị ka ẹyaa kwẹẹtẹ hụrị aha ọnyị ngụ ọsa, Eerọnị ọnịrị ezi anị ẹ vịdị va ngụ ịnị ajẹngụ na tụ achị ịnị akakana ne ku apoti oto da nị.

⁶ Dị ẹ sị ụ̀pà ku ọ, dị ẹ varẹma sị ụ̀pà ọkatẹngụ ọsa ana vị onivuru rẹ ku ọ. Dị ẹ kụ ọchị ana a sịị̄ sị ọ chire aha ọzọza.

⁷ Ẹnịnị ẹ gana achị onuvuru ku iteburu anaā sịị ụvụrẹẹdị Ẹnẹyịmavara tụ. Dị ẹ kụ ịchacha, ẹnya eturare, ẹnya ọbanyị, ako ọnịrị ụvụrẹẹdị otirenyi.

⁸ Ẹ vavọọ ra kụ ọ hi ẹtẹ, dị ẹ sị achị ovivi ku ọ. Dị ẹ rẹ sị achị ọvwọọvụ vaku ọ

⁹ Ẹnịnị vaa sị achị ọnuvuru ku ọchị ịrakotupa ọnịrị ịrẹsụ ịra beri ẹnya anị ọnịrị okoko angwẹ

¹⁰ Dị aa kụ wa vahụra ẹnya ana sị ụtụmpaha ozoza ku, dị aa kụ tụra ọchị anaā sịị kụ wa.

¹¹ Eerọnị ọnịrị ezi anị vaa sị achị onuvuru kú ụta ana a sị Igooru mẹ̀. Dị ẹ va ụtụmpaha ozoza kú ọ, dị ka ọchị ana a sịị̄ sị ọ ngụ ọ.

¹² Dị aa sị achị ọnuvuru para avaba ẹnya irehi Ohomorihi ana vọ. Dị aa va ụtụmpaha ozoza kú wa, dị kụ́ tụra ọchị anaa sị kú wa.

¹³ Dị ẹ kụ́ atịtọ hụrẹ ịrẹsụ ụta ịsọvọ, dị va achị odozeyirị kú ọ.

¹⁴ Avọọ ẹ mẹ va sị achị ọnịrị ụtụmpaha kú avaba ẹnya ana sị mẹ̀ ụkọrọ ụta anka ịpanụ ọnyịra, ẹnya odenyi, ịchọvịrị, ọnịrị Isiivi ẹhanyị.

¹⁵ Eerọnị ọnịrị ezi anị ẹ sị mẹ ta dị ezi Ikoha va kú ẹnya ẹnẹẹ nọ ịzị a nọ. Ama ẹ yị nyị ọza ana nyayịnẹ sị ụvọ kanyị ẹnya ẹnẹẹ ẹ vị e si isu yị ẹngụ anị. Ezi Ikoha kẹnẹ ẹ zụ kú ẹnya ẹnẹẹ nị.

¹⁶ Eriyaza ozi Eerọnị ana vị ohirẹsụ irehi Ohomorihi ọ vị ụkọrọ anị ka o si eyi pe angwẹ ịrakotupa, eturare, akụ ana sị mẹ̀ ịsọvọ ọnịrị angwẹ ana sị nyị ọza.

¹⁷ Ẹnẹyịmavara ộ ka yị Imosiisi ọnịrị Eerọnị ka,

¹⁸ asị ẹ zẹ ka ezi Ikoha e vú ẹtẹ ịnị akakana Anireevi nịnị.

¹⁹ Ẹẹ saasa wa na kụ ẹnya ịnị irehi Ohomorihi. Dị sị zụ wa a mẹ vọrọ ka ọzọza ọ za ẹnya anị agụvị asị e su.

²⁰ Asị a nyị ụmẹ ọnị ezi Ikoha sị re ẹnya ẹnẹẹ ẹ vị e yee si usu.

Ụkọrọ ezi Igerisoni

²¹ Ẹnẹyịmavara ộ ka Imosiisi ka,

²² ọ za abara-abara ọnịrị ovwoovu-ovwoovu Igerisoni ana ya ịnị ịrẹsụ Ireevi ịrịka.

²³ Ọ chẹrẹ aza ana sị gụ ịrayị ohurẹẹwụ na ngụ ẹvarẹwụ ana sị hụ ọ mẹ̀ ụkọrọ ịnị irehi Ohomorihi.

²⁴ Ẹnịnị ẹ va za ẹnya irehi Ohomorihi nị.

²⁵ Ẹnị ẹ va za achị anaā kụ jị aha irenyi-irenyi ini ajẹngụ, ẹnya ajẹngụ ọnịrị avaba ịsị kụ ọ ịrẹsụ vaka ụtụmpaha ozoza ana a sịị̄ vaa ịrẹsụ achị oze ọbanyị.

²⁶ Ẹnị ẹ raa kụ ẹnya ana sị jị ọvọ kara ajẹngụ ọnịrị oze ana ngụ ịnị ụba ne beri avaba ẹnya eneē si hí ụta, obo ọnịrị avaba ẹnya ụkọrọ irehi Ohomorihi; ẹnị mẹ̀ ụkọrọ ana a sị yị wa nị.

²⁷ Eerọnị ọnịrị ezi anị aa zụ evere Igerisoni a vọrọ ka ẹ mẹ̀ ụkọrọ ọnyọọnyị nị. Ọ̀ọ daka vị ka ẹ za ẹnya hụrẹ aha ẹnyị na ngụ ọsa.

²⁸ Ịtama ozi Eerọnị o si eyi pe wa ịnị avaba ụkọrọ ẹnị ẹ yaa mẹ ịnị irehi Ohomorihi nị.

Ụkọrọ ezi Imerari

²⁹ Dị Ẹnẹyịmavara rẹ ka Imosiisi ọ za evere Imerari ịrịka abara-abara ọnịrị ovwoovu-ovwoovu ene hi ịnị Anireevi nị.

³⁰ Ọ za anọrụ ana gụ ịrayị ohurẹẹwụ na ngụ ẹvarẹwụ ana nẹngụ mẹ̀ ụkọrọ ini irehi anị.

³¹ Ẹnị ẹ̀ vaa kụ ọchị irehi, ẹwara anị ọnịrị avaba ohinẹ ne beri ohi ẹtẹ irehi nị.

³² Ọnọrụ ọzọza vana a si ẹnya anị yị ana a za a. Ẹnya ẹnẹẹ ẹ vị ọtụ ọvọ, obo, ịpẹgị ọnịrị avaba ẹnya ụkọrọ ana vọ.

³³ Ẹsẹnị ẹ vị ụkọrọ ịrẹsụ Imerari ịnị Ajẹngụ Ohomorihi nị. Ịtama ozi Eerọnị o re si eyi pe ẹnị ẹnẹẹ ịnị ụkọrọ ẹnịnị nị.

 za Anireevi nini ịrịka

³⁴ Imosiisi ọnịrị Eerọnị beri ọdọvịdị ana vọ ệ za evere Ikoha abara-abara ọnịrị ovwoovu-ovwoovu ịrịka nị.

³⁵ Aza ẹnị ẹ zarịka vị anọrụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ịnị irehi Ohomorihi.

³⁶ Avaba aza ana zarịka vị akawụ tụra akatarẹchẹhị tụra ẹvarẹwụ (2,750).

³⁷ Avaba evere Ikoha ana zụ mẹ̀ ụkọrọ ịnị irehi Ohomorihi ẹnị Imosiisi ọnịrị Eerọnị zarịka anka Ẹnẹyịmavara mẹ ọda anị yị wa yị.

³⁸ Evere Igerisoni vana rẹ vavọọ zarịka.

³⁹ Ẹhụ anọrụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ini irehi Ohomorihi aa zarịka nị.

⁴⁰ Avaba ẹnịnị vị Akawụ tụra akata tụra ohurẹẹwụ (2,630)

⁴¹ ẹnị Imosiisi ọnịrị Eerọnị zarịka anka Ẹnẹyịmavara mẹ ọda yị wa.

⁴² Evere Imerari vị ana rẹ zarịka abara-abara ọnịrị ovwoovu-ovwoovu,

⁴³ ẹhụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ini irehi Ohomorihi.

⁴⁴ Avaba ẹnịnị saka-saka vị akawụrakahị (3,200).

⁴⁵ Avaba ịrịka Animerari ana zụ mẹ̀ ụkọrọ ini irehi Ohomorihi ẹnị Imosiisi ọnịrị Eerọnị zarịka anka Ẹnẹyịmavara mẹ ọda anị yị wa yị.

⁴⁶ Avọọ Imosiisi ọnịrị Eerọnị beri ọdọvịdị ana vọ mệ za avaba Anireevi ịrịka nị.

⁴⁷ Avaba anọrụ ana gụ ịrayị ohurẹẹwụ na ngụ ẹvarẹwụ ana nẹngụ mẹ̀ ụkọrọ ini irehi Ohomorihi ana kụ ẹnya vị

⁴⁸ ịrịka akawụ-akawụ oze ẹẹna tụra akavarẹchẹhị tụra ẹbẹẹva (8,580)

⁴⁹ Ọzọza vana sị ụkọrọ anị yị ọnịrị ẹnya ana vọrọ ka ọ za anka Ẹnẹyịmavara mẹ ọda anị yị Imosiisi nị. Avọọ a mẹmẹ za wa ịrịka anka Ẹnẹyịmavara mẹ ọda anị yị Imosiisi nị.