Ịrịka 30 - IWE ỌNỊNỊ

Ọda anaā sị́ zẹ ịzẹzẹ

¹ Ịnị ụmẹ ọnọọ, Ẹnẹyịmavara ộ kà a yị Imosiisi ka, ọ̀ kà yị ọdọvịdị Isirẹrị nịnị ka

² asị ẹ̀ sị ahụ jịnẹ ọda anaā sị́ zẹ ịzẹzẹ. Ẹ́ mẹ ido avaba ịsa ọnị Ẹnẹyịmavara va ọ̀ọ ka yị wa.

³ Ozwoorihi ana àa yị ra ini eehi ada anị ọ̀ọ hị́ eku, ka ọnị aa sị ịsaa yị Ẹnẹyịmavara, à vị ka vị wo oto ka ọnị ẹ yị vaa mẹ̀ ịsa ẹnyị nị

⁴ áa nyị ka ọ̀ mẹ avaba ịsị o hị́ eku anị, à vị ịsị o wo oto anị; ẹ̀ yị vị ada anị wụ́ dị ọ ka heyiye.

⁵ Ama ada anị ọ̀ọ wụ ọ, dị ọ ka asị ọ mẹ ịsị o hị́ eku anị nị; ịsị ọ́ hị́ eku anị à vị ịsị o wo oto anị ọ sị vị osusu. Ẹnẹyịmavara vaa vagu ọ, agụvị ka ada anị ọ rẹ ẹ̀ yị zẹẹ yọ ka ọ̀ mẹ̀ ẹ nị.

⁶ Ọnẹẹ ẹnẹ ẹ̀ẹẹ yị va ọnọrụ ọ̀ọ hị́ eku ka ọnị vaa mẹ̀ ịsa, à vị ka vị o wo oto ka ọnị ẹ yị vaa mẹ̀ ịsa ẹnyị nị, ộ yẹ dị ọ́ hị́ eku ọnọ o, à vị ọ́ hị́ ọ kẹnẹ-kẹnẹ nị o, ọ̀ọ vana vá ọnọrụ nị,

⁷ áa nyị ka ọ̀ mẹ avaba ịsị ọ hị́ eku anị, à vị ịsị o wo oto anị, ẹ̀ yị vị ọva anị wụ́ ọ dị ọ ka heyiye.

⁸ Ama ọva anị ọ̀ọ wụ ọ, dị ọ ka a sị ọ mẹ ịsị ọ hị́ eku anị nị, ộ nị ọ, ẹ̀ yị mẹ̀ ẹ. Ẹnẹyịmavara vaa vagu ọ.

⁹ Osoku à vị ọnẹẹ ene yi ọnọrụ ọ̀ mẹ avaba ịsị ọ̀ọ hị́ eku anị. Ịsị ọ̀ọ ka ọnị ẹ yị vaa mẹ, a sị ọ mẹ̀ ẹ.

¹⁰ Ọnẹẹ ana vá ọnọrụ ọ̀ọ hị́ eku ka ịsị ọnyọọnyị, à vị ka o wo oto ka ọnị ẹ yị vaa mẹ ịsị ọnyọọnyị nị,

¹¹ â nyị ka ọ̀ mẹ ịsị ọ hị́ eku anị. Ịsị o wo oto ka ọnị ẹ yị vaa mẹ a sị ọ mẹ̀ ẹ, ẹ̀ yị vị ọva anị wụ ọ, dị ọ ka heyiye.

¹² Ama ọva anị ọ̀ọ wụ ọ dị ọ ka ọnị ẹ yị dọ ka ọ̀ mẹ ịsị ọ hị́ eku anị nị, ịsị ọ hị́ eku anị, à vị ịsị wo oto anị ọ́ sị vị osusu. Ẹnẹyịmavara vaa vagu ọ agụvị ka ọva anị ọ rẹ ẹ̀ yị zẹẹ ka ọ̀ mẹ ịsị o wo oto anị nị.

¹³ Ọva anị ọ zụ sị ụvọ tụ ọ yọ ka ọ̀ mẹ ịsị ọ hị́ eku anị à vị isi o wo oto anị. Ọ́ rẹ zụ kụ́ ịsị ọ hị́ eku anị à vị ịsị o wo oto anị kwooze.

¹⁴ Ama àa vị ka ịhị ọnị ọva anị wụ ọ, ẹ yị kà a ka heyiye, â nyị ka ọ̀ mẹ avaba ịsị ọ hị́ eku anị à vị oto oni o wo. Vị́ ọva anị sị ụvọ tụ ịnị ịsị ọ hị́ eku anị à vị ịsị o wo oto anị avọọ nị, agụvị ka ẹ yị kà a ka heyiye.

¹⁵ Ama ọva anị ọ̀ọ varẹma na kụ eku ọnị ọ hị́ à vi oto oni ó wo aanị kwooze, dị ẹ̀ yị mẹ̀ ẹ nị, ọva anị vaa rị ụya anị.

¹⁶ Ọda ẹnẹnị Ẹnẹyịmavara sị yị vị ọnọrụ dị ọ ra ini eehi ada anị, à vị ọnẹẹ ana ya eehi ọnọrụ hị́ nị.