Ịrịka 27 - IWE ỌNỊNỊ

 sị ẹtẹ yị ezi anẹẹ Izerohwehadi

¹ Â nyị ọnọrụ aanị ana aā hị́ Izerohwehadi ana vị ozi Ihehwa, ana vị ozi Igiriyadi, ana vị ozi Imakiri, ana vị ozi Ịmanasẹ, ana vị ozi Ijosẹẹhụ. Izerohwehadi ọnọọ ộ ma ezi anẹẹ-anẹẹ ẹẹhị ana aa hị́ Imahira, Inowa, Ihogira, Imirika ọnịrị Itiriza.

² Ẹkụhị ọnya aanị, dị ezi anẹẹ ẹnẹẹ nọ ịnị ajẹngụ Ẹnẹyịmavara ịzị e ne tụ́ Imosiisi ọnịrị, Eriyaza ne beri ọdọvịdị Anisirẹrị nịnị vaka ọkọnị Anisirẹrị. Dị ezi anẹẹ ẹnẹẹ kà,

³ ada ẹnịnị ẹ̀ yị ma ozi ọnọrụ di o ve su ịnị ụnọmị. Ọ yị ịnị aza ana saasa Ikora mẹ̀ akamawụ hí Ẹnẹyịmavara, ama usu ịvị ẹngụ anị o su nị.

⁴ Sị ẹ vẹ dị a ka ịrẹha ada ẹnịnị o vu, agụvị ka ọ yị ma ozi ọnọrụ wáá yọ? Dị ẹ ka Imosiisi ọ sị ẹtẹ ana vị ịpa ada ẹnịnị yị ẹnị nị.

⁵ Imosiisi ộ sị ịrẹyị ẹnịnị vị ọvịdị Ẹnẹyịmavara,

⁶ dị Ẹnẹyịmavara kà a yị Imosiisi ka;

⁷ ịsị ẹ vọrọ ezi anẹẹ Izerohwehadi họ̀ use anị aanị nị. Agụvị avọọ, Imosiisi ọ̀ sị ẹtẹ ana vị áada ẹnịnị ịdị anda ada ẹnịnị yị wa.

⁸ Ẹnẹyịmavara kà Imosiisi ọ ka yị Anisirẹrị nịnị ka ọza ẹnẹ ẹ̀ yị ma ozi ọnọrụ di o su, a sị ẹtẹ anị yị ezi anẹẹ anị.

⁹ Ama ẹ̀ yị ma ozi vụrụ-vụrụ, dị a sị ẹtẹ anị yị ẹyịnyara anị.

¹⁰ Ẹ yị nyị ọyịnyara, a sị ẹtẹ anị yị ẹyịnyara ada anị nịnị.

¹¹ Aa vị ka ọ yị nyị ọyịnyara ụvọta ọnịrị ọyịnyara ada, a sị ẹtẹ anị yị anda ana gụrị ọ huu kere-kere. Ẹnẹyịmavara kà avaba Anisirẹrị ẹ sị ụvọ za ọda ọnọnị pooro.

 nyị Ijosuwa dọ Imosiisi ịrẹsụ

¹² Ẹkụhị ọnyara aanị, dị Ẹnẹyịmavara kà Imosiisi ka ọ hịrẹ nọ ịrẹsụ ataba Abarimi, di o re ẹtẹ ọnị raà sị yị Anisirẹrị nịnị.

¹³ Òo sị ọ re, o vee su anka ẹnẹbẹnị anị Eerọnị me su avọọ.

¹⁴ Ẹnị ẹyịva ê su agụvị ka ẹnịnị ẹ sị ahụ jịnẹ ọda Ẹnẹyịmavara ịnị ụmẹ ọnị avaba ịragụ Anisirẹrị sị zyaazị hị́ ọnị agụvị enyi Imeriba ịnị ụnọmị Izini.

¹⁵ Imosiisi ộ mẹ̀ aduwa, dị ộ kà,

¹⁶ Taarụ! Ẹnẹyịmavara Ohomorihi ana yẹ ịsa ya ịnị ayị ẹyọza, navọ wa nyị ọza ana vaa vị ọdọvịdị yị Isirẹrị.

¹⁷ Ọza ọnọọ ọ vaa kụ́ aza nọ ịrẹkụ agụvị asị aza anị sị mẹẹ anka atẹmẹ nịnị ẹnẹ ẹ yị nyị ọza ene sere e avọọ.

¹⁸ Dị Ẹnẹyịmavara kà Imosiisi ka ọ sị Ijosuwa ozi Inuni ọnị Ụhwẹ Ohomorihi yà pe, dị ọ sị ụvọ tụra a ịrẹsụ.

¹⁹ Dị ọ sị Ijosuwa jẹẹ ọvịdị Eriyaza ana vị ohirẹsụ irehi Ohomorihi ọnịrị avaba ịragụ.

²⁰ Dị ọ si ụkata yọ, dị avaba ịragụ ọ sị ịrẹsụ yọ.

²¹ Ama Ijosuwa vaa nọ ọvịdị Eriyaza ohirẹsụ irehi Ohomorihi, di Eriyaza sị urimi ne sì iruvo ịrẹyị ịnị ụvọ Ẹnẹyịmavara, dị ọ kà a yị wa ịsị a vọrọ ka ẹ̀ mẹ ẹ̀ẹ yaa jịnẹ ọnịrị ẹ̀ẹ yaa vẹ ini eehi.

²² Ịzẹyịza dị Imosiisi vavọọ mẹ̀ ẹ anka Ẹnẹyịmavara mẹ ka yọ, dị ọ sị Ijosuwa jẹẹ eyi Eriyaza ọnịrị avaba ịragụ Anisirẹrị;

²³ dị ọ sị ịrẹsụ, dị ọ sị ọ jẹẹ ka ọ vị ọdọvịdị anka Ẹnẹyịmavara mẹ ka nị.