Ịrịka 24 - IWE ỌNỊNỊ

¹ Ịnị ụmẹ ọnịnị, Ịbaraamị ọ sị yẹ ka Ẹnẹyịmavara ve ene si ka o zee yị Anisirẹrị nịnị agụvị avọọ, ẹ yị kụkụ nee si ụvọ zee dị ọ yẹ. Ama dị o ve eyi ka oze eyi ịnị ụnọmị nị.

² Ịzọọ ọ yaa re Anisirẹrị nịnị mẹmẹ sị ịrẹsụ-ịrẹsụ jị ajẹngụ ẹnịnị okooro-okooro nị. Dị Ụhwẹ Ohomorihi vana dọ ọ ayị,

³ di o nyima aa ka ịsẹ ka: Ịrẹyị ọnị Ịbaraamị ozi Ịbẹyọ ka yị, ịrẹyị anị vị ịzẹyịza.

⁴ Ịrẹyị ọnọọ vị ana hụ ịda Ohomorihi Ochẹtẹẹngụ vẹ. Ọnị mẹ vaku ẹtẹ yọ ọnị re etore Isirẹrị nị.

⁵ Ajẹngụ awụ nịnị ọ́ da zoza kẹnẹ, ẹwụnị Anisirẹrị!

⁶ Ịzọọ sị mẹ̀ẹ anka iruku ọsọchị ana gọdọ avọọ nị. Ọ sị mẹ̀ẹ anka ụbazị ana ya ụtọ okuha avọọ nị. Ọ rẹ sị mẹ̀ẹ anka ọchị aro ọnị Ẹnẹyịmavara chire avọọ, a vị ọchị Isida ene hi ụtọ enyi

⁷ Isirẹrị ọnịrị evere anị vị ọnị o vee zee yị, dị ohinọyị ẹnịnị nyị ụkata dị ọ hụụnị Agagị ana vị ohinọyị Anamarẹkị.

⁸ Ohomorihi vị ana kụ́ wa hụrị Ijipiti, dị ọ vụ ịrẹvụ yị wa anka ẹya avọọ nị. Avaba ọnịvị ẹnịnị vị ọnị o vú ẹtẹ, di o che wa ọpa, di o che ẹchụkụ ẹnịnị rugu-rugu va ha nị.

⁹ Anisirẹrị vị ana hụtụ anka idu ana tụ́ ụhwọ́ ịrẹma ọnị o ba egidi kwooze avọọ. Ẹnẹ nyayịnẹ ne ziizi ọ re? Ọza ana ka o zee yọ, vị ọnị o vee zee yị, ọza ene chi hi ọ vị ọnị ozirenu va za.

¹⁰ Ịjị Ịbarakị vavọọ wụ́, dị ọ nyayịnẹ du ayị hi Ịbaraamị, dị ọ sị ụvọ nya ọsa, di o nowu, dị ọ kà ọnị hị́ ọ ka o chi hi ọnịvị anị, dị vana kụkụ aa mẹ̀ aduwa yị wa nị.

¹¹ Dị ọ kà Ịbaraamị ọ wụsẹ-wụsẹ hụụ ịzọọ, di oo na eehi. Ọ kà ọnị ọ vịdị reè tenyi ẹngụ ka ọnị vaa mẹ̀ ẹyịza ẹtẹẹtẹrẹ. Ama Ẹnẹyịmavara ẹ yị zẹ ka ọ́ dọ ọ.

¹² Dị Ịbaraamị tụ́ Ịbarakị ohi ka, ayị wéé hi ọ ụtụ ọnị ọnị tụ ozi ahụ anị hị́ ọ nị? Ọnị kà,

¹³ ọ̀ọ daka sị avaba irehi anị ohihi igooru ọnịrị isiriva yị ọnị, ọnị ẹ yị nyị ụkata mẹ̀ ịsa ọnị Ẹnẹyịmavara e yi si. Ịsị ọ kà kẹnẹ ọnị vaa mẹ nị.

¹⁴ Avọọ ọnị aa nọ eehi, ama ọnị aa ka a ọnọ ịsa ọnị Anisirẹrị nịnị vaa mẹ aza ụhụụhwọ.

Ịsẹ ọdịrẹma ọnị Ịbaraamị kà

¹⁵ Ịbaraamị kà, ịrẹyị ọnị ozi Ịbẹyọ kà vị ịzẹyịza.

¹⁶ Ohomorihi ene hu kere-kere ọ̀ sị ịrẹyị ọnọọ yị ọnị nị. Ọnịrị eyi anị o va ku ẹtẹ, dị Ẹnẹyịmavara Ochẹtẹẹngụ sị etore zụ ọnị nị.

¹⁷ Ụmẹ ọnị ẹtẹ ọnị o re aanị vaa sị mẹ, o yi tu. Ẹkụhị ọnya, ohinọyị vaa kwẹẹtẹ hụrị Isirẹrị anka ụzọmị ana zẹtẹ avọọ. Dị o vu Animowabi nịnị ẹtẹ, dị ọ wụ evere Iseti nịnị va ha.

¹⁸ Ohinọyị ọnọọ rẹẹ̀ va nyị ẹbẹẹba Anedomi nịnị, dị ọ dọ Ịsẹyị ẹtẹ yị Anisirẹrị, dị ẹ kụkụ ee huna wa na.

¹⁹ Dị Anisirẹrị nịnị kụkụ aa mẹ ohinọyị tụra wa ịrẹsụ, di e vu aza ana vọ ẹtẹ.

²⁰ Ịbaraamị o re re ịsị e vee tu Anamarẹkị. Ọ kà, ẹnịnị ẹ́ nyị ụkata hu anẹkụra ana vọ nị, ama ịrẹma anị vị ọnị e vee vú ẹtẹ saka-saka hụrẹ ẹtẹ.

²¹ Dị ọ kà yị Anikeeni nịnị ka ẹnịnị e ro ka ẹnị ẹ ha agụvị ka ẹ ra ịnị akakana ịrẹta ẹbẹẹba,

²² ama Anasiriya nịnị vee vu wa ẹtẹ ịjị ẹ za wa.

²³ Ẹ yị nyị ọza ana vaa vọ ẹtẹ Ohomorihi aa mẹ̀ ẹ.

²⁴ Ẹpa vaa kụ́ aza hụrị Ịsayịpụrụsị ene vee vu aza ana ra ịnị ẹtẹ Asiriya ọnịrị Ẹba ẹtẹ. Ama Ịsayịpụrụsị nyẹmba vị ene vee vú ẹtẹ.

²⁵ Ịjị Ịbaraamị raà ka ịrẹyị anị ta, dị a na eehi, dị Ịbarakị ọnị raà na eehi anị nị.