Ịrịka 22 - IWE ỌNỊNỊ

Ịbarakị ộ sị ẹkẹhị yị Ịbaraamị ka o chi hi Anisirẹrị nịnị

¹ Anisirẹrị nịnị ệ hụrị ẹtẹ Ịbasanị na ngụ ịnị inoze ẹtẹ Imowabi. Dị ệ jị udu tụ akẹnẹ irehu Ijodani ana va eyi ka ẹkụra Ijeriko nị.

² Â nyị ọnọrụ ọnya aanị ana a hị́ Ịbarakị ana vị ozi Izipọ ana vị ohinọyị Animowabi. Ộ wụ̀ avaba ịsa ọnị Anisirẹrị nịnị mè Anamọrị nịnị.

³ Ịjị Animowabi nịnị re ka Anisirẹrị nịnị ẹ̀ rụrụ ẹtẹẹtẹrẹ, dị angwa nyayịnẹ e hi ẹnịrị ohinọyị ẹnịnị nị.

⁴ Dị ẹnịnị kà yị ọdọvịdị Animidiya nịnị ka, ọkọnị Anisirẹrị ẹnẹnị vị ene du avaba ịsa ana kara ẹnị anka ụnọọ̄ mẹẹ rị avị za ẹtẹ avọọ. Agụvị avọọ dị Ịbarakị ozi Izipọ, Ohinọyị Imowabi

⁵ tụ́ hị́ Ịbaraamị ozi Ịbẹyọ ana ra Ipetọrị ọgụrị irehu Iyuhwuretisi ịnị ẹtẹ Amawi. Enube ọnị ọnụtụ anị nịnị kà yị Ịbaraamị yị. Ọ kà â nyị anẹkụra nịnị ana hụrị ẹtẹ Ijipiti vẹ. Ẹnịnị ẹ kụ gara hi ozi, dị ẹ yaa mọ ka ẹnị aa dọ ẹnị ẹtẹ ẹnịnị nị.

⁶ Ộ kà aza ẹnẹẹ ẹ raà nyị ụkata huni ẹnị. Agụvị avọọ Ịbaraamị ọ vẹ dị o chi hi wa ịsavọ ẹnị vaa zụ nyị ẹbẹẹba ẹnịnị, dị ẹnị dụ wa hụụnị ẹtẹ ẹnịnị. Ịbarakị kà ọnị ọ yẹ ka ọza ọnị ọ̀ọ mẹ̀ aduwa yị, ee zee yọ nị. Ama ọza ọnị òo chi hi vị ọnị ozirenu anị aa za a.

⁷ Ịzẹyịza, dị azọkụ Animowabi ẹnịrị azọkụ Animidiya nịnị sị ẹkẹhị rị ụvọ ne tu Ịbaraamị nị. Di e kà enube Ịbarakị yị ọ nị.

⁸ Dị Ịbaraamị kà ẹnịnị ẹ sụ ịzọọ dị ọnị ọ sị ohi yị wa eyinẹhẹ anị ịsị Ẹnẹyịmavara ọ̀ọ ka yị ọnị. Agụvị avọọ, dị ẹnịnị sụ pe e ịzọọ nị.

⁹ Ịrahụ ọnọọ Ohomorihi vee tu Ịbaraamị, dị họ̀ ọ ka ẹnẹ nyị aza ana ya pe e?

¹⁰ Dị Ịbaraamị kà, Ịbarakị ozi Izipọ ana vị ohinọyị Animowabi ọ̀ tụ wa ụtụ ve tu ọnị nị.

¹¹ Ộ kà Ịbarakị ka ọnị ọ vaa tụ ozirenu hi aza ana hụrị Ijipiti va ra kara ọnị aanị. Ọnị e si ka ọnị ọ dụ wa jịnẹ hụụ ịzọọ.

¹² Ohomorihi ộ ka yị Ịbaraamị ka asị ọ saasa ọnụtụ ẹnẹẹ, dị asị ọ rẹ chi hi Anisirẹrị agụvị ka aza ọnị ọnị raà mẹ̀ ka o zee yị ẹ vẹ nị.

¹³ Eyinẹhẹ anị dị Ịbaraamị kà yị ọnụtụ Ịbarakị ẹnẹẹ ka ẹ na eehi ka Ẹnẹyịmavara kà asị ọnị saasa wa.

¹⁴ Dị ọnụtụ ẹnẹẹ na eehi na kà a ka Ịbaraamị ka o yi ka ọnị ọ saasa ẹnị vẹ.

¹⁵ Dị Ịbarakị varẹma tụ́ aza ọrụrụ ẹnị udi ẹnịnị huuna ẹnị ana vịdị ne tu Ịbaraamị nị.

¹⁶ Di e ne tu Ịbaraamị, dị ẹ̀ kà ụtụ Ịbarakị ozi Izipọ yọ nị. Ịbarakị kà, Ịbaraamị ọ̀ọ vẹ Imowabi,

¹⁷ ọnị vee si ọ ụta ẹtẹẹtẹrẹ, dị ọnị mẹ̀ ịsa tụra ịsa ọnị o họ̀ use anị yọ. Aarịhịnị, ọ vẹ vaa chi hi aza ẹnẹnị yị ọnị.

¹⁸ Dị Ịbaraamị va ohi kà a, Ịbarakị ọ̀ daka sị isiriva a vị igooru ene hi irehi anị yị ọnị, ọnị ẹ yaa va jịnẹ ọda Ẹnẹyịmavara Ohomorihi anị.

¹⁹ Dị Ịbaraamị kà yị ọnụtụ ẹnẹẹ ka ẹnị ẹ rẹ sụ eyinẹhẹ agụvị dị ẹ wụ ịsị Ẹnẹyịmavara ọ̀ọ na ka yị ọnị.

²⁰ Ịnị ịrahụ ọnọọ, Ohomorihi kà ọnị vaa zẹ ka Ịbaraamị ọ saasa wa nọ Imowabi, ama ọ mẹ ịsị ọnị ọnị ka yị ọ.

²¹ Ịzẹyịza dị Ịbaraamị kwẹẹtẹ ẹnẹnẹ eyinẹhẹ anị dị ộ tụra Ịkẹrịkẹtẹ, dị ọnịrị wa dudu vẹ Imowabi nị.

Ịbaraamị ọnịrị ịkẹrịkẹtẹ anị ê tu Anggẹẹrị

²² Ịbaraamị ộ kụ ezi ahụ anị ẹẹva saasa ẹngụ dị tụra ịkẹrịkẹtẹ anị aa na nị. Ohomorihi ô du ayị ka Ịbaraamị aa na, dị anggẹẹrị anị na jẹẹ oze zi ọ ka ọnị ọ dụ varẹma nị.

²³ Ịjị ịkẹrịkẹtẹ Ịbaraamị re ka anggẹẹrị Ẹnẹyịmavara ọ̀ sị ụhwọ jẹ oze, dị ọ ha ngụ avị nị. Dị Ịbaraamị nya a ọchị ka ọ va jị oze nị.

²⁴ Dị anggẹẹrị jẹẹ oze tịyẹ-tịyẹ ana yị ịnị akakana ọvọ ịrẹta ana jị kara ụbazị ịvayịnị ẹẹva nị.

²⁵ Ịkẹrịkẹtẹ ọnọnị mèe re anggẹẹrị Ẹnẹyịmavara, dị ọ zị oze akaha ọnya aa hana ọvọ ka ọnị parahu, dị ộ kụ ahụ Ịbaraamị họ̀rọ ugene nị. Agụvị avọọ, dị Ịbaraamị rẹ nya a ịsa nị.

²⁶ Dị anggẹẹrị Ẹnẹyịmavara kà nọ ọvịdị anị na jẹẹ ịzị ẹ hana huu ọnị ịkẹrịkẹtẹ e yi vee re oze parahu, ọ vị eyi ụvọrị a vị eyi ụvọha.

²⁷ Ịjị ịkẹrịkẹtẹ maanị re e, dị ọ va ku ẹtẹ agada Ịbaraamị nị. Dị ayị kụ Ịbaraamị, dị ọ̀ va okutẹ anị hi ọ ẹngụ nị.

²⁸ Ịjọnọọ Ẹnẹyịmavara ha ịkẹrịkẹtẹ irenu, dị ọ họ̀ Ịbaraamị ka ịsị ọnị mẹ̀ ẹ dị aa nya ọnị ịsa ụpẹ ẹẹta?

²⁹ Dị Ịbaraamị tụ ịkẹrịkẹtẹ ohi ka agụvị ka ọ jị ọnị ụra. Ọnị ọ̀ọ nyị ụhwọ ọnị yaanị wụ̀ ọ tụ ịzẹnị booro aanị nị.

³⁰ Ama dị ịkẹrịkẹtẹ va ohi yị Ịbaraamị ka, aanịka ẹ vị ọnị ọ vị ịkẹrịkẹtẹ awụ ọnị ụụ̄ tụra pooro? Ọnị wáá maanị vịdị mẹ̀ ebira hi ọ nị? Dị ọ tụ ohi ka eyiyee!

³¹ Obobooro ọnọọ Ẹnẹyịmavara ha Ịbaraamị eyi ka o re anggẹẹrị ana sị ụhwọ rị ụvọ jẹẹ oze, dị Ịbaraamị ka ịrẹsụ hi nị.

³² Dị anggẹẹrị Ẹnẹyịmavara họ̀ ọ ka, sị ẹ vẹ dị ọ nya ịkẹrịkẹtẹ ịsa ụpẹ ẹẹta? Ọnị ọ va jẹẹ oze ka asị o re oze parahu agụvị ụsẹ akụvị anị nị.

³³ Ịkẹrịkẹtẹ vị ene re ọnị, dị ọ jesi eyi ụpẹ ẹyịta. Ẹ̀ yị vị ọnị ịkẹrịkẹtẹ vara eyi, ọnị yaanị sị Ịbaraamị wụ̀, dị ọnị ẹ yị kanyị ọ.

³⁴ Dị Ịbaraamị tụ́ ọ ohi ka, ọnị o nyeeyi. Ọnị ẹ yị yẹ ka anggẹẹrị jẹẹ oze ka asị ọnị re oze na. Òo re e ka ịsa ọnị aa mẹ̀ ẹ yị vọrọ, ọnị aa va ne eehi anị avọọ ne.

³⁵ Dị anggẹẹrị Ẹnẹyịmavara kà ọ kụ aza anị varẹma ama dị ọ ka ịsị ọnị ka yọ. Avọọ Ịbaraamị mẹ kụ ọnụtụ Ịbarakị nịnị varẹma nị.

Ịbarakị ô ne tu Ịbaraamị

³⁶ Ịjị Ịbarakị wụ́ ka Ịbaraamị ọ̀ vẹ, dị ọ na gẹrị ọ ẹkụra ana aā hị́ Iri ana ya irehu Arinọnị ẹgẹ ẹtẹ Imowabi

³⁷ Dị Ịbarakị họ̀ ọ ka, sị ẹ vẹ dị ẹ yị vẹ ọnị mẹ tụ hị́ ọ ịpaapa? Óó ro ka ọnị e yi vee sì ọ ụta a mẹ vọrọ nị?

³⁸ Dị Ịbaraamị tụ ọ ohi ka, ọnị ọ vẹ booro aanị, ama ọnị ọ yị nyị ụkata ọyị ka ene tu ọnị irenu kẹnẹ. Ịsị Ohomorihi ọ́ọ sị tụ ọnị irenu ọnị vaa ka nị.

³⁹ Dị Ịbaraamị saasa Ịbarakị nọ Ikiriyati Ihuzoti nị.

⁴⁰ Ịzọọ Ịbarakị ya wụ̀ ụnọ ọnịrị atẹmẹ mẹ̀ ịsọvọ, dị ọ da uye anị yị Ịbaraamị ọnịrị ọnụtụ anị ana saasa a nị.

⁴¹ Eyinẹhẹ anị, dị Ịbarakị sị Ịbaraamị nọ ịnị ataba Ibamoti Ịbaarị. Ịrẹsụ ataba ọnọọ vị ana va ịzị Anisirẹrị ya chire.