Ịrịka 20 - IWE ỌNỊNỊ

Enyi ọ jịnẹ hụụnị ịda Imeriba

¹ Ịnị ụhwẹ ịpaapa ọnị avaba Anisirẹrị nịnị na ngụ ịnị ụnọmị ẹtẹ Izini, ẹ̀ ka ahụ jẹẹ ịzị aaā hị́ Ikadesi. Ịzọọ Imeriyamị ya su, di e ne e nị.

² Ịnị ụmẹ ọnọọ, ẹ yị nyị enyi ana vọrọ ka aza e hú. Agụvị avọọ dị avaba Anisirẹrị nịnị gẹ tù Imosiisi ọnịrị Eerọnị nị.

³ Dị aza aa zyaazị hi Imosiisi ka, ẹnị ee vene su beri anda ẹnịnị ene su ọvịdị Ẹnẹyịmavara ọ gụ yị ẹnị nị.

⁴ Sị ẹ vẹ dị ọ kụ ẹnịrị ịsụpa ẹnịnị vẹ ịnị ụnọmị ka ẹnị e ve su ha nị?

⁵ Sị ẹ vẹ dị ọ kụ ẹnị hụrị Ijipiti va ngụ aha odivi ọnọọ? Ẹ yị nyị aha ana vọrọ ka ẹnị ẹ kụ akụ, a vị ihwigi, a vị ịvayịnị, a vị ipomagiranati, dị ẹ yị rẹ va nyị enyi ana vọrọ ka ọza o hu nị.

⁶ Dị Imosiisi ọnịrị Eerọnị jịnẹ hụụnị akakana ẹnịnị nọ enoze ajẹngụ Ẹnẹyịmavara, dị ẹ vaku ẹtẹ, dị Ẹnẹyịmavara sị ẹngụ zụ wa nị.

⁷ Dị ọ kà yị Imosiisi ka,

⁸ ọ sị okutẹ, dị ọnịrị Eerọnị ẹ hị́ ịragụ gụ, dị ọ ka ịda ka ọ sị enyi yị wa eyi ẹnịnị. Avọọ ẹnịnị mẹ va sị enyi yị Anisirẹrị ẹnịrị ịsụpa ẹnịnị hụụnị ịnị ịda nị.

⁹ Ịzẹyịza, dị Imosiisi na sị okutẹ anka Ẹnẹyịmavara mẹ ka yọ nị.

¹⁰ Dị ọnịrị Eerọnị hị́ aza gụ kara ịda ọnọọ nị. Ịjị ẹ sị gụ tụ ịzọọ, dị Imosiisi ka, re ẹwụ nịnị anakamawụ ẹnẹnị, ụ wáá ka yaa sị enyi yị wụ nịnị hụụnị ịda nị?

¹¹ Dị ọ kụ̀rà okutẹ anị dị ọ sị nya ịda ọnọọ ụpẹ ẹẹva, dị enyi kụ ọhaara jịnẹ hụụnị anị, dị avaba aza ẹnịrị ịsụpa ẹnịnị hú enyi nị.

¹² Dị Ẹnẹyịmavara kà yị Imosiisi ọnịrị Eerọnị ka agụvị ka ẹnịnị ẹ yị sị ayị tụra ọnị, dị ẹ sị ụkata anị zụ eyi avaba Anisirẹrị, ẹnịnị ẹ yị va kụ aza anị na ngụ ẹtẹ ọnị ọnị raà sị yị wa.

¹³ Dị Anisirẹrị hị́ enyi ọnọọ enyi Imeriba ọnị iruvo anị vị ịrazị. Anisirẹrị nịnị e beri Ẹnẹyịmavara zyaazị, dị ọ sị ụkata ọnịnị anị zụ wa nị.

Anedomi ẹ yị zẹ ka Anisirẹrị nịnị ẹ parahu ịnị ẹtẹ ẹnịnị.

¹⁴ Dị Anisirẹrị nịnị va hụrị Ikadesi, Imosiisi tụ́ aza ne tụ́ ohinọyị Anedomi ka, ẹnị Anisirẹrị ẹnị ẹnịrị wa vị ezi ẹyịnyara avọọ, ẹ tụ́ ve tụ́ wa nị. Ẹnịnị ẹ yẹ akanya ọnị ẹnị yaa ịnị anị booro aanị.

¹⁵ Ohiku ẹnịnị ẹ nọ Ijipiti na ra ku ịzọọ, dị ahịka Anigipiti nịnị naa mẹ ẹvaya yị ẹnị ẹnịrị ohiku ẹnịnị ẹnẹẹ nị.

¹⁶ Ịjị ụya sị hụ ẹnị, dị ẹnị nowu na za Ẹnẹyịmavara, dị ọ wụ́ orere ẹnịnị, dị ọ tụ́ anggẹẹrị anị ana kụ ẹnị jịnẹ hụrị ẹtẹ Ijipiti nị. Booro aanị ẹnị ya ịzị aa hị́ Ikadesi ẹhụ ẹgẹ ẹtẹ ẹnịnị.

¹⁷ Ọ kà aarịhịnị kwogwo, ẹ navọ ẹnị ẹ che oze parahu ịnị ẹtẹ ẹnịnị. Ẹnị ẹ yị vaa ha ngụ aarẹ ẹnịnị, a vị ụbazị. Ẹnị ẹ yị hyakụ vaa ka enyi ịnị ịkangga ẹnịnị hu. Oze ọbanyị ana zị ịzọọ ẹnị aa vatụra parahu kẹnẹ nị.

¹⁸ Dị Anedomi nịnị va ohi na yị wa ka, òo zee wa eyi ẹ parahu. Ama ẹnịnị èe hira, ẹnị aa jịnẹ tụ́ ẹhẹ tù wa nị.

¹⁹ Dị Anisirẹrị nịnị rẹ va ohi yị wa ka, oze ọbanyị ọbanyị ẹkụra kẹnẹ ẹnị aa vatụra a che ẹtẹ ẹnịnị parahu nị. Ọ̀ọ vị ọza, a vị ịsụpa ẹnịnị o hú enyi, ẹnị vee si wa ụta. Ahụ kẹnẹ ẹnị aa sị parahu nị.

²⁰ Dị Anedomi nịnị tụ́ ohi ka, òo zee wa eyi, ee parahu, ama ẹnị vaa kụ isoja hi ẹhẹ tu wa.

²¹ Ka Anedomi ẹ yị zẹ ka ẹnịnị ẹ parahu, dị Anisirẹrị nịnị zị ụsẹ jesi kara ẹtẹ na zị oze ọsa nị.

Usu Eerọnị

²² Dị Anisirẹrị nịnị hụrị Ikadesi na ngụ ataba Ihuuri nị.

²³ Ataba Ihuuri vị ana gụrị ẹhwị ẹtẹ Edomi. Ịzọọ Ẹnẹyịmavara ya kà yị Imosiisi ọnịrị Eerọnị ka,

²⁴ ụmẹ o si tu ka Eerọnị ọ na yẹ ozu anị. Ọ kà ẹnị ẹyịva ẹ yị vaa ngụ ẹtẹ ọnị ọnị sị Anisirẹrị agụvị akamawụ ẹnị ẹ mẹ̀ ịzị ọnị yaa sị yị wa Imeriba.

²⁵ Dị Ẹnẹyịmavara kà Imosiisi ọ̀ sị Eerọnị ọnịrị Eriyaza ozi anị nọ ịrẹsụ ataba Ihuuri nị.

²⁶ Dị ọ ka Imosiisi ọ̀ ngwa ẹnya ohirẹsụ irehi Ohomorihi ọnị kụ hi ẹngụ, dị o chire yị Eriyaza. Ịhị ọnọọ ẹkụhị anị usu gụ nị.

²⁷ Ịzẹyịza, dị Imosiisi mẹ̀ anka Ẹnẹyịmavara mẹ ka yị yọ nị; dị avaba ịragụ re wa ẹnịnị maa nọ ịrẹsụ ataba Ihuuri nị.

²⁸ Ịjị e tu ịzọọ, dị Imosiisi ngwa awuru hụrẹ Eerọnị ẹngụ, dị o chire yị Eriyaza ana vị ozi anị nị. Ịzọọ Eerọnị su tụ, dị Imosiisi ọnịrị Eriyaza chi hụrị ataba ve tu ịragụ Anisirẹrị nịnị nị.

²⁹ Ịjị avaba ẹnịnị re ka Eerọnị o wusu, dị avaba ẹnịnị va ẹngụ hi, dị ẹ zị ẹngụ anị ẹkụhị ohurẹẹwụ nị.