Ịrịka 18 - IWE ỌNỊNỊ

Ụkọrọ ohirẹsụ irehi Ohomorihi nịnị ọnịrị Anireevi nịnị.

¹ Ẹnẹyịmavara ọ ka yị Eerọnị ka ọnịrị ezi anị beri avaba anovwoovu anị ẹ vaa sị eyi pe akụvị anaa mẹ ịnị ajẹngụ anị nị. Ama Eerọnị ọnịrị ezi anị kẹnẹ ẹ vaa sị eyi pe akụvị ọnị ohirẹsụ irehi Ohomorihi nịnị ẹ̀ẹ mẹ̀ ịnị ụkọrọ ẹnịnị nị.

² Ộ ka Eerọnị ọ̀ kụ́ anda ẹnịnị ana vị ezi Ireevi beri ẹngụ mẹ̀ ụkọrọ. Ẹnịnị ẹ gụ ọnịrị ezi anị ụvọ mẹ̀ ụkọrọ ịnị ajẹngụ oto.

³ Eerọnị ọ vaa sị eyi pe anọrụ ana hụrị ịnị ovwoovu Ireevi vẹ nị. Ẹnịnị ẹ yaa mẹ avaba ụkọrọ ana a vọrọ ka a mẹ ịnị ajẹngụ nị. Ama ẹnịnị ẹ yị vaa gụrị aha enyisi ọnịrị ụta ịsọvọ. Ẹnịnị ẹ̀ẹ vavọọ mẹ e yee su dị ọnị re su beri wa nị.

⁴ Ẹnịrị Eerọnị ẹ vaa mẹ̀ ụkọrọ vabẹ nị. Ẹnị ẹ vaa mẹ avaba ịsa ana a vọrọ ka a mẹ ịnị ajẹngụ nị. Ama ẹ yị nyị ọza ẹnịnị anaa gụrị ọ ịzị ọ ya.

⁵ Ẹnẹyịmavara kà Eerọnị kẹnẹ ee si eyi pe aha enyisi ọnịrị ụta ịsọvọ nị. Ộ kà a ọnị ẹ yị kụkụ si ka ọnị ọ kụ́ ayị hị́ Anisirẹrị nịnị.

⁶ Ẹnẹyịmavara kà a ọnị ụvọta ọ́ nyị Anireevi nịnị hụụnị akakana avaba Anisirẹrị nị. Ẹ sị mẹ̀ anka ẹyịza yị ọnị avọọ nị. Ẹnị ẹ vaa mẹ̀ ụkọrọ yị ọnị ịnị ajẹngụ anị nị.

⁷ Ama Eerọnị ọnịrị ezi anị ẹ vị ohirẹsụ irehi Ohomorihi ana vaa hẹkẹ ẹ nị. Ẹnị ịnya kẹnẹ ẹ zụ gụrị ụta ịsọvọ, dị ẹ rẹ ngụ aha enyisi nị. Ẹnẹyịmavara kà ẹyịza ọnị mẹ yị wa ka ẹẹ hẹkẹ ọnị anka ohirẹsụ Irehi anị nị. Aza ana vọ ẹ̀ẹ ngụ aha enyisi à wụ́ wa.

Ọnyịrẹva Ohirẹsụ irehi Ohomorihi ịnị ịsa ana aā sịị va yị Ẹnẹyịmavara

⁸ Ẹnẹyịmavara kà ọnị aa sị Eerọnị ka o sị eyi pe avaba ẹyịza anaā sịị va yị ọnị. Ọnị aa sị avaba ẹyịza ẹnẹẹ yị Eerọnị ọnịrị ezi anị. Avaba ẹyịza ọnị aa kụ́ vẹ vị ẹnịnị.

⁹ Aza vaa sị ịsa ịsọvọ vẹ idi anị. Ịsa ịsọvọ ẹnẹẹ ẹ zụ vị ịsọvọ ayị, a vị ịsọvọ ịvị. Aa nyị ịpa ịsa ịsọvọ ọnị ọza ẹ yị rị ịra ana vị Eerọnị, ama avaba ịsa ana vọ anaā sịị vẹ vị Eerọnị ọnịrị ezi anị.

¹⁰ Ẹnẹyịmavara kà ẹ̀ rị ẹngụ ịsa ịsọvọ ẹnẹẹ aha ọnịnị kere-kere ịnị ajẹngụ anị. Anọrụ kẹnẹ ịnị ovwoovu anị ẹ zụ rị ọ nị. Ama ẹ tamayị ka ịsa ịsọvọ ẹnẹẹ vị ọnịnị.

¹¹ Avaba ịsa ana a sị hụụnị ịsa ịsọvọ Anisirẹrị ana tana hi Ẹnẹyịmavara vị Eerọnị ọnịrị ezi anị anọrụ ọnịrị ezi anẹẹ anị. Ẹnị ẹ nyị ịsa ẹnẹẹ nị. Avaba aza ana nị ịnị ovwoovu ẹ zụ rị ọ nị.

¹² Ẹnẹyịmavara kà ọnị raa sị ịsa ịnị aarẹ ịpaapa ana aā vaa sị ọnị yị wa: angwẹ orivi ene zoza, ọnịrị eche ọwọọwa ene zoza ne beri akụ.

¹³ Avaba ịsa ọyịna ịnị aarẹ ịpaapa ịnị ẹtẹ ẹnịnị ana aā kụ́ va yị Ẹnẹyịmavara vị Eerọnị ọnịrị aza anị. Aza ana nị ịnị ovwoovu anị ẹ zụ rị ịnị anị.

¹⁴ Ịsa tụra ịsa ọnị Ẹnẹyịmavara ọ̀ ka ọ vị anị vị ẹnịnị.

¹⁵ Ezi ịpaapa ọnọrụ ọza ọ vị uye ana aā sị va yị Ẹnẹyịmavara rẹ vị Ẹnịnị.

¹⁶ Ẹnịnị ẹ̀ẹ sị gụ ụhwẹ ọnya, aa nyị ka a sị ẹkẹhị jị wa. Ẹkẹhị ana a sị jị ọnyọọnya anị vị isiriva ẹẹhị.

¹⁷ Ama ọ zụ mẹ dị wẹ yị sị ẹkẹhị jị ezi ịpaapa imaaru atẹmẹ ne beri ẹvụ. Ẹnịnị ẹ̀ sị vị Ẹnẹyịmavara agụvị ka ẹnịnị a raa sị wa tụ́ irenyi. Che ẹnịnị sẹ ụta, dị ọ rị ụhị anị ịra mẹ̀ ịsọvọ ana aa rị ịra. Ayị Ẹnẹyịmavara vee hine tu ọ.

¹⁸ Uye ịsọvọ ẹnẹnị vị ẹnịnị anka aā mẹ sị ịrẹva uye ọnịrị usi ụvọrị anị tụ ẹba ịrẹsụ ụta ịsọvọ avọọ.

¹⁹ Ẹnẹyịmavara kà a ọnị ọ sị avaba ịsa ọnị Anisirẹrị nịnị sịị̄ vaa yị ọnị yị Eerọnị ọnịrị ezi anị, dị ọ vị ọnyịrẹva ẹnịnị. Ọsọnị vị oto ọnị Ẹnẹyịmavara wu ọnị ẹ yị vee vú ẹtẹ.

²⁰ Dị ọ rẹ kà a yị Eerọnị ka, ẹnị ana vị ohirẹsụ irehi Ohomorihi ẹ yị vaa nyị tụ ịnị ẹtẹ ọnịrị ogu ana a ga yị Anisirẹrị ana vọ. Ẹnẹyịmavara kà a ọnị ọ vị ogu ẹnịnị nị.

Ọnyịrẹva Anireevi ịnị ịsa ana aā sịị va yị Ẹnẹyịmavara

²¹ Ẹnẹyịmavara kà ọnị ọ sị agẹẹwụ avaba Anisirẹrị nịnị si Anireevi nịnị ụta ụkọrọ ẹnịnị.

²² Ọ kà hụrị ụmẹ ọnọọ, enyisi ọ vị ka Anisirẹrị nịnị ana vọ ẹ ngụ ajẹngụ Ẹnẹyịmavara nị, ẹ yị vị ẹnịnị aa hị́ usu tu ẹngụ ẹnịnị.

²³ Anireevi nịnị kẹnẹ ẹ vaa mẹ avaba ụkọrọ ịnị ajẹngụ anị nị. Ẹnịnị ẹ̀ yaa rị ụya akụvị ana aa mẹ̀ ịzọọ nị. Ọda ọnọnị vị ana va ya ịzọọ pooro. Ẹnịnị ẹ yị vaa nyị tụ ịnị ẹtẹ ana a sị yị ịrẹsụ-ịrẹsụ Anisirẹrị ana vọ.

²⁴ Ẹnẹyịmavara kà ọnị raà sị avaba agẹẹwụ ọnị Anisirẹrị aa sị vaa yị ọnị yị wa agụvị avọọ ẹnịnị ẹ yị nyị tụ ịnị ogu ẹtẹ ana ga ya Anisirẹrị nịnị. Ịsa ịsọvọ ana sị vaa yị ọnị ọ vị ọnyịrẹva ẹnịnị nị.

Agẹwụ Anireevi nịnị

²⁵ Dị Ẹnẹyịmavara kà yị Imosiisi ka;

²⁶ ọ kà a yị Anireevi ka, ẹnịnị ẹ dọ avaba agẹẹwụ ịsa ịnị aarẹ ọnịrị ezi ịpaapa ịsụpa ẹnị Anisirẹrị nịnị aa sị vaa yị ọnị.

²⁷ Dị ẹnị ẹ rẹẹ̀ sị agẹẹwụ ịsa ọyịna ọnịrị eche ẹnẹnị vaa yị Ẹnẹyịmavara anka ịsa ụvọta ẹnịnị hụụnị aarẹ avọọ.

²⁸ Ẹ̀ẹ vavọọ sị ọ vẹ, dị ẹ sị yị Eerọnị ana vị ohirẹsụ irehi anị.

²⁹ Dị ẹ rẹ kụ ene hu ịnị ịsa ẹnẹẹ vaa yị ọnị

³⁰ Ẹnẹyịmavara kà ẹ̀ẹ raa sị ọnyịrẹva anị vaa yị ọnị, ịsa ana vọ kụkụ vị ịsọyịrị ẹnịnị anka Anisirẹrị nịnị mẹ̀ẹ rị ịsa ịsọvọ ana vẹtẹ avọọ.

³¹ Ẹnịrị ovwoovu ẹnịnị ẹ zụ rị ọ ịzị e zee wa eyi. Utosi ụkọrọ ọnị ẹ yaa ịnị ajẹngụ anị ọ vị ọnọọ nị.

³² Ẹnẹyịmavara kà ọnị ẹ yị vaa sị ụya rị wa agụvị ka ẹ̀ vịdị raa sị ene hu ịnị anị yị ọnị. Ama ẹnịnị ẹ̀ẹ dọ ọvịdị anị na rị, e yee su nị agụvị ka enyisi ọ vị nị.