Ịrịka 15 - IWE ỌNỊNỊ

Ọda ịsọvọ irenyi-irenyi ọyị mẹ

¹ Ẹnẹyịmavara ộ kà Imosiisi ka

² ọ ka yị Anisirẹrị nịnị ka ẹnịnị ẹ̀ẹ sị ngụ ịnị ẹtẹ ọnị ọnị vaa sị yị wa,

³ di e si ka ẹnị ẹ mẹ̀ ịsọvọ ene vee hine ọnị ayị nị, ẹ sị uye ịsọvọ ọnọọ hụụnị ịsụpa ẹnịnị. Ọ daka vị ịsọvọ tụra ịsọvọ ana aā rị ịra, ọ vị ịzẹzẹ, a vị ịsọvọ ayohine, a vị ịsọvọ ana aā mẹ ịnị eche irenyi-irenyi ana aā rị ịrayị-ịrayị.

⁴ Ọza anaa sị ẹngụ ịsọvọ ẹnẹẹ vaa yị Ẹnẹyịmavara, ọ sị ayị ikirogirami ọnya vahụra angwẹ orivi vẹ.

⁵ Avọọ ọ mẹ rẹ vaa sị eche irita ọnya saasa ịsọvọ ozi atẹmẹ ọnyọọnya ana a vaa ka tụ ịrẹsụ ụta nị.

⁶ A vị ịsọvọ ịdẹba yọ nị, dị aa sị ayị ikirogirami ẹẹva vahụra angwẹ orivi irita ọnya rị ẹjịjị

⁷ ne beri eche irita ọnya rị ẹjịjị ana a và hí ịrẹsụ ụta. Agụ areyi anị o hine Ẹnẹyịmavara ayị.

⁸ Àa sị ụnọ mẹ̀ ịsọvọ anaā rị ịra, a vị ịsọvọ kẹnẹ, a vị ịzẹzẹ, a vị ịsọvọ ẹngwọọrọ,

⁹ ẹ sị ayị ikirogirami ẹẹta vahụra angwẹ orivi irita ẹẹva.

¹⁰ Dị ẹ sị eche irita ẹẹva ana aa vaa và hí ịrẹsụ ụta agụvị agụ anị o hine Ẹnẹyịmavara ayị.

¹¹ Avọọ ọ mẹ vaa vị yị ịsọvọ ụnọ ọnịrị ịdẹba, ne beri ozi atẹmẹ a vị ẹvụ.

¹² Ụpẹ ịrịka aa sị mẹ̀ ịsọvọ aa sịị vavọọ mẹ nị.

¹³ Ezi ẹtẹ Anisirẹrị nịnị ene e si ka ẹnị mẹ̀ ịsọvọ ọnị agụ anị vee hine Ẹnẹyịmavara vaa saasa avaba ọda ẹnẹnị.

¹⁴ Àa nyị ọzọga ana ra beri wa ene si ka ọnị ọ mẹ̀ ịsọvọ ene hine Ẹnẹyịmavara ayị, ọ saasa avaba ọda ẹnẹẹ.

¹⁵ Ezi ẹtẹ Anisirẹrị nịnị ẹnịrị azọga vị ọnyọọnya eyi Ẹnẹyịmavara. Avaba ẹnịnị ọda ẹnẹnị za pooro nị.

¹⁶ Ọda ana za Anisirẹrị nịnị ọ rẹ yị za azọga ana ya ịnị akakana ẹnịnị nị.

¹⁷ Ẹnẹyịmavara ọ rẹ kà a Imosiisi ka

¹⁸ ọ ka yị Anisirẹrị nịnị ka ọnị ọ raa sị wa na ngụ ẹtẹ ọnị ọnị sị wa aa nọ aanị,

¹⁹ ẹ̀ẹẹ ya rị ịsa ẹtẹ, ẹ sị ịsa va yị ọnị.

²⁰ Ẹ̀ mẹ apapa hụụnị ayị ịpaapa ẹnịnị va yị ọnị anka a mẹrẹ mẹ akụ ịpaapa ene e tú avọọ nị.

²¹ Avọọ ụnanka ẹnịnị mẹ vaa mẹẹ hí Ẹnẹyịmavara pooro nị.

²² Ama aza ẹnyị ịnị ẹngụ ẹnịnị èe nyeeyi sị ahụ jịnẹ ọda ọnị Ẹnẹyịmavara sị yị Imosiisi aanị,

²³ a vị àa nyị aza ịnị evere ẹnịnị ana sị ahụ jịnẹ ọda ẹnẹnị ụhụhwọọ,

²⁴ a vị ka avaba ịragụ o nyeeyi va jịnẹ ọda ẹnyẹẹnyị, dị ịragụ sị ụnọ ọnịrị ayị vaka eche mẹ̀ ịsọvọ ene hine Ẹnẹyịmavara ayị. Anka ọda mẹ kà a, dị a sị ịdẹ mẹ̀ ịsọvọ ịvị.

²⁵ Dị ohirẹsụ irehi Ẹnẹyịmavara sị ịsa ịsọvọ ẹnẹnị da ịpẹ ịvị ịragụ Anisirẹrị nịnị, dị Ẹnẹyịmavara ọ vagu wa agụvị ka ẹnịnị ẹ yị yẹ. Dị ọ nị wa agụvị ịsa ịsọvọ ana a rị ịra ọnịrị ịsọvọ ịvị ẹnịnị.

²⁶ Àaa vavọọ sị ọ mẹ, dị Ẹnẹyịmavara vagu avaba ịragụ Anisirẹrị ẹnịrị azọga ana ra beri wa agụvị ka avaba ẹnịnị saka-saka ẹ nyị ụvọ tụ ịnị ọnọọ nị.

²⁷ Ọza ịnya ọ̀ọ nyeeyi mẹ ịvị, dị ọ sị ịdẹ ịrayị ọnya na mẹ̀ ịsọvọ ịvị anị.

²⁸ Dị ohirẹsụ irehi Ẹnẹyịmavara da ịpẹ ẹvagu ịvị anị ọvịdị Ẹnẹyịmavara, dị ọ vagu ọ.

²⁹ Ọda ọnọnị vị ana za ezi ẹtẹ ọnịrị anikinami ene èe nyeeyi mẹ ịvị.

³⁰ Ama ozi ẹtẹ ọnịrị anikinami ana aa sị ayị ọvị du Ẹnẹyịmavara vị ana a vaa wụ̀ ọ,

³¹ ka ọ sị eyi wụ́ ịrẹyị Ẹnẹyịmavara, dị ọ yẹ va jịnẹ ọda anị, ọnị ọ kụ usu tu ẹngụ anị nị.

Ụya ana a sị rị ọza ana jịnẹ ọda ẹkụhị ụhwọtụ

³² Â nyị ụmẹ ọnya aanị, ịnị ụmẹ ọnọọ Anisirẹrị nịnị hi ịnị ụnọmị. Ẹnịnị e re ọza ana kụ ọkụ gụ ẹkụhị ụhwọtụ.

³³ Dị a za a ne tu Imosiisi ọnịrị ne beri ịragụ ana vọ nị,

³⁴ ka ẹnịnị ẹ yị yẹ ịsị a vọrọ ka a mẹ̀ ẹ, di e gu oze hi ọ nị.

³⁵ Dị Ẹnẹyịmavara kà yị Imosiisi ka a vọrọ ka a wụ̀ ọ nị. Avaba anẹkụra ẹ sị ọ nọ ịrẹma ẹkụra, di e tu ọ ịrẹtịrẹta di o su.

³⁶ Ịzẹyịza, dị avaba anẹkụra sị ọ nọ ịrẹma ẹkụra ịzị ẹ yaa sị ịrẹta wụ anka Ẹnẹyịmavara mẹ mẹ ọda yị wa.

Ọda ana za ụtụtọ awuru

³⁷ Ẹnẹyịmavara ộ kà yị Imosiisi ka,

³⁸ ọ ka yị Anisirẹrị ka ẹ gẹ izahu tụ ụtọ achị, dị ẹ sụ́ owu ọdọzeeyirị za ọnyọọnya anị.

³⁹ Ẹnịnị e re izahu ẹnịnị, ẹ vaa tama wa ayị ọda Ẹnẹyịmavara, dị ẹ saasa a, Ẹnịnị ẹ yị kụkụ vaa mẹ ịsị ọnị e yee si anka ẹ mẹ vịdị mẹ̀.

⁴⁰ Avọọ ẹnịnị mẹ vaa tamayị avaba ọda anị, di e sị ẹngụ ẹnịnị chire Ohomorihi ụvọ nị.

⁴¹ Ẹnẹyịmavara kà ọnị ọ vị Ohomorihi ana kụ wa jịnẹ hụrị Ijipiti.