Ịrịka 14 - IWE ỌNỊNỊ

Anisirẹrị ệ mẹ̀ akamawụ hi Ẹnẹyịmavara

¹ Ịjị avaba Anisirẹrị wụ enube ọnọọ, dị ẹ vị orere hi, dị ẹ jị òrèrè pooro ịrahụ dị eyi nị nị.

² Dị ẹ yaa kụ ịrẹkaa hi Imosiisi ọnịrị Eerọnị ẹngụ ka sị ẹ vẹ dị ẹ yị navọ ẹnị dị ẹnị e su tụ́ Ijipiti, a vị ịnị ụnọmị?

³ Sị ẹ ve dị Ẹnẹyịmavara kụ ẹnị vẹ ịzẹnị ka enee ve su eyi ịrẹkụ? Dị ẹnị e wu su, dị ọnịvị ẹnịnị ẹ kụ ese ọnịrị ezi ẹnịnị vị ọrịhị ẹnịnị. Ọ vị ana mẹ ka ẹnị ẹ va na Ijipiti.

⁴ Dị ẹnịnị gẹ eyi ka ẹnị ẹ nyị ọdọvịdị ọsa, dị ẹnị ẹ varẹma nọ Ijipiti nị.

⁵ Dị Imosiisi ọnịrị Eerọnị tana tụra ẹtẹ ọvịdị ẹnịnị.

⁶ Ijosuwa ozi Inuni ọnịrị Ịkarẹbị ozi Ijehwụnẹ ya ịnị aza ana a tụ́ ne re ẹtẹ ọnọọ. Ịjị e re ịsa anaa na, ayị ẹnịnị e si du, dị ẹ za awuru ẹnịnị dị ẹ na a nị.

⁷ Dị ẹ ka yị ịragụ Anisirẹrị nịnị ka ẹtẹ ọnị ẹnị ne ree vị aha ọyịza.

⁸ Ayị Ẹnẹyịmavara òo hine tu ẹnị, ọ va sị ẹnị na ngụ ịzọọ ẹngwọọrọ, dị ọ sị ẹtẹ ọnọọ yị ẹnị. Ịzọọ vị ẹtẹ ozoza, ẹtẹ ize.

⁹ Avọọ asị ẹnịnị hí angwa aza ene hị́ ịzọọ, dị asị ẹ mẹ̀ akamawụ hi Ẹnẹyịmavara. Ịsa ịnị ịhị ẹnịnị aza ẹnẹẹ vị nị. Ẹ yị nyị ọza ana vaa dọ wa ha. Asị ẹnị re hí angwa ẹnịnị ka Ẹnẹyịmavara ya pe ẹnị.

¹⁰ Ama dị avaba Anisirẹrị aa kà a ka ẹnị a sị ịrẹta-ịrẹta wụ Ijosuwa ọnịrị Ikarẹbị nị. Obooboro ọnọọ Ẹnẹyịmavara sị ụbanyị anị zụ ịrẹsụ ajẹngụ anị dị avaba Anisirẹrị nịnị re e nị.

¹¹ Dị Ẹnẹyịmavara kà a yị Imosiisi ka, aanị ka aanị aza ẹnẹnị me vee yi ọnị tịtẹ nị? Avaba ohyozirenu pọpọrọpọ ọnị ọnị mẹ̀ ẹyị ẹnịnị, ẹnịnị ẹ yị yị sị ayị tụra ọnị.

¹² Dị Ẹnẹyịmavara kà ọnị vaa hụrẹ wa ụvọ, dị ọnị sị ụkụ wụ̀ wa va ha nị. Dị ọnị mẹ Imosiisi ẹkụra ọbanyị, dị ọ nyị ụkata huu ẹnẹnị.

Imosiisi ộ da ịpẹ Anisirẹrị yị Ẹnẹyịmavara

¹³ Ama dị Imosiisi da ịpẹ yị Ẹnẹyịmavara nị. Dị ộ kà Ẹnẹyịmavara o re ịsị Anijipiti nịnị vee ro ẹnịnị ẹ̀ẹ wụ ịsị e tu ẹnị. Ẹnịnị ẹ̀ yẹ ụkata ọnị ụ sị dọ aza awụ ha hụrị Ijipiti.

¹⁴ Anijipiti nịnị ẹ̀ yẹ ka waa sị ẹngụ zụ aza awụ chengede ịnị eguhi ana da jẹẹ ku wa ịrẹsụ. Ụ ya ịnị eguhi ọnọọ tụ ọvịdị aa zụ aza awụ oze. Ịrahụ dị eguhi ọnọọ vara ịra yị wa. Ẹnịnị vaa ka yị anẹkụra ọnọnị ana yẹ ka ụ ya pe aza awụ.

¹⁵ Booro aanị, Ẹnẹyịmavara ọ̀ọ wụ̀ avaba aza anị ẹnịnị va ha, sị avaba ẹkụra nịnị ana vịdị wụ́ ịrẹkụkụ anị vaa ka?

¹⁶ Dị ẹ ka, Ẹnẹyịmavara ẹ yị rẹ va zụ kụ ẹnị na ngụ ịnị ẹtẹ ọnị ọ hị́ eku ka ọnị aa sị yị ẹnị, avọọ ọ wụ ẹnị hi ịnị ụnọmị nị.

¹⁷ Dị Imosiisi da ịpẹ ka ọ navọ ọ sị zụ ka ọnị ọọ̄ ka avọọ mẹ avọọ nị.

¹⁸ Ẹnẹyịmavara ọ mā hụra kụ́ ayị. Oo sì ịrẹyị ọza ẹtẹẹtẹrẹ, dị ọọ̄ vagu avaba ebira ọnịrị akamawụ aza. Ama ọọ̄ sị ụya rị ọza anaa mị ebira odivi nị. Ụya ebira odivi ẹnịnị ọ yị hụrị ịrẹsụ ẹnịnị paa.

¹⁹ Ama aarịhịnị ọ vagu ebira odivi aza anị agụvị ụbanyị anị ọnịrị ọyịsị ọnị ọ nyị yị wa. Ọ vagu wa anka ọ mẹ vịdị aa yịị mẹ hụrẹ ụmẹ ọnị ẹ sị hụrẹ Ijipiti.

²⁰ Ịzẹyịza, dị Ẹnẹyịmavara kà ọnị ọ vagu wa anka Imosiisi mẹ̀ da ịpẹ anị,

²¹ Ama anka ọnị mẹ yara dị ụbanyị dọ avaba ẹhẹ,

²² ẹ yị nyị ọza ịnị aza ẹnẹnị ana vaa ngụ ịnị ẹtẹ ọnọọ. Ẹnịnị è re ụbanyị anị ọnịrị ịvọpa irenyi-irenyi ọnị ọnị mẹ̀ ịnị ẹtẹ Ijipiti ọnịrị ịnị ụnọmị, ama dị ẹ̀ yaa sị akamawụ zama ọnị re nị.

²³ Ẹnịnị ẹ yị vee re ẹtẹ ọnị ọnị hị́ eku anị yị ohiku ẹnịnị. Ẹ yị vaa nyị ọza ana sị eyi wụ ọnị ana vaa ngụ ịzọọ.

²⁴ Ama ozi ahụ anị Ikarẹbị vị irenyi ya aza ana vọ, ọ wụ́ chire ọnị, avọọ ọnị vaa sị ọ na ngụ ịnị ẹtẹ ọnọọ. A rẹ vaa ga ẹtẹ tu evere anị.

²⁵ Ẹnẹyịmavara kà ẹ vara eyi asị ẹ nọ ịzị Anamarẹkị ọnịrị Anikenaani ya. Ụhwọọ, ẹ̀ na ịnị ụnọmị ana va eyi ka okuha ịkẹ.

Ẹnẹyịmavara ộ sị ụya rị Anisirẹrị ụvị uhuhu

²⁶ Ịjọnọọ dị Ẹnẹyịmavara kà yị Imosiisi ọnịrị Eerọnị ka;

²⁷ Ụpẹ ịrịka ya aza edivi ẹnịnị va sị rị uhuhu hi ọnị kẹ? Ụtọ anị o si hi yị ịrẹka ọnị ẹ yaa kụ́ ku ọnị.

²⁸ Dị Ẹnẹyịmavara kà Imosiisi ọ̀ ka yị wa ka ọnị o hị́ eku ka ọnị aa mẹ ịsị e yee họ̀ use anị aanị.

²⁹ Ộ ka avaba ẹnịnị vi ene vee su tụ́ ịnị ụnọmị ọnọnị, dị oku ẹnịnị chata ku ẹtẹ, ka ẹnịnị ẹ̀ kụ̀ mị ụhụ ẹ yị vaa nyị anọrụ ẹnịnị hụrị ẹhụ ịrayị oohu ịnị ụmẹ ana a sị za ọza ịrịka ana a vọ tịtẹ.

³⁰ Ịrẹma Ijosuwa ọnịrị Ịkarẹbị, a yi vaa nyị ọza ẹnịnị anaa na ngụ ịnị ẹtẹ ọnị ọnị hị́ eku anị yị wa.

³¹ Ẹnịnị ệ kà a ka ezi ẹnịnị vị ana a vaa za ọrịhị, ama ọnị vaa kụ wa na ngụ ẹtẹ ọnị e sị eyi wụ.

³² Ama ẹnịnị vị ene vee su hi ịnị ụnọmị ọnọnị.

³³ Ezi ewu nịnị vene vee sere atẹmẹ ịnị ụnọmị ịrayị ẹbẹẹva, ka we yị sị ayị tụra a nịnị, ezi ewu nịnị vaa rị ụya pooro dị avaba ẹnịnị e su ha saka-saka.

³⁴ Anka ẹkụhị ẹbẹẹva ọnị e si ne re ẹtẹ, avọọ ẹkụhị ọnyọọnya mẹ va jẹẹ yị ịrayị nị. Ịrayị ẹbẹẹva

³⁵ Ẹnẹyịmavara kà a aza edivi ana gẹ eyi tu ọnị ịnị ụnọmị vị ene vee su hi ịzọọ.

³⁶ Ẹnị ọnụtụ ẹẹwụ ene ne re ẹtẹ ana vaa ka enube odivi ẹ mẹ ka aza ẹẹ rị uhuhu hi ọnị nị,

³⁷ avọọ Ẹnẹyịmavara tụ ụkụ odivi ka ọ wụ̀ wa nị.

³⁸ Ama Ijosuwa ọnịrị Ịkarẹbị kẹnẹ ẹ ha nị.

Ịpaapa ọnị Anisirẹrị nịnị ngụ ẹtẹ ọnọọ

³⁹ Imosiisi mẹ maanị ka enube zụ wa, dị ẹ va ẹngụ hi nị.

⁴⁰ Ẹnẹnẹ eyinẹhẹ anị dị ẹ kwẹẹtẹ ka ẹnị aa nọ ẹkụra ene hi ịnị ataba. Dị ẹ kà a yị vọrọ ka ẹnị ẹ rị uhuhu hi Ẹnẹyịmavara; avọọ, ẹnị a nọ ịnị ẹtẹ ọnị o wo oto anị yị ẹnị.

⁴¹ Dị Imosiisi họ̀ wa ka sị ẹ vẹ dị ẹ yaa yị mẹ akamawụ hi ọda Ẹnẹyịmavara? Ọ kà ẹnịnị e yi vee re mẹ.

⁴² Avọọ asị ẹ nọ ịrẹkụ ka Ẹnẹyịmavara ọ yị ya pe wa. Ọnịvị ẹnịnị vị anaa nyị ẹbẹẹba ẹnịnị.

⁴³ Ẹnịrị Anamarẹkị ọnịrị Anikenaani nịnị ẹ̀ẹ gẹ ẹ yaa sị ụ̀hwọ̀ wụ̀ wa ha nị. Ẹnẹyịmavara ọ ra va ịrẹma ẹnịnị agụvị ka ẹnịnị e re yi ọ tịtẹ.

⁴⁴ Dị ẹnịnị sị eyi jịnẹ ịrẹyị Imosiisi, dị ẹ yaa nọ ịrẹkụ anẹkụra ẹnẹẹ nị, ama Imosiisi ọnịrị apoti oto Ẹnẹyịmavara ẹ yị saasa wa.

⁴⁵ Dị Anamarẹkị ọnịrị Anikenaani nịnị ene hi ịrẹsụ ataba chi vẹ vaa rị wa dị dụ wa huu va ngụ ẹkụra ana aa hị́ Ịhọma nị.