Ịrịka 12 - IWE ỌNỊNỊ

Imeriyamị ọnịrị Eerọnị ệ kụ ụhị Imosiisi

¹ Imeriyamị ọnịrị Eerọnị ê du Imosiisi agụvị ka ộ nyị ọnẹẹ ana vị Anikusi;

² avọọ dị ẹ yaa ka kà a, ẹ yị vị Imosiisi ịnyara Ẹnẹyịmavara ee pe ka ịrẹyị. Ẹnẹyịmavara vi ene re pe ẹnị ka ịrẹyị. Ẹnẹyịmavara ộ wụ̀ avaba ịrẹyị ọnị ẹ ka.

³ Ama Imosiisi ọnị vị ọza ana ka ẹngụ chi huu kere-kere ịnị ẹhẹ nị. Ọ mā sị ẹngụ tụ ẹba.

⁴ Ka ẹ yaa kụ ụhị Imosiisi, dị Ẹnẹyịmavara hị́ ẹnịrị Imosiisi va gẹ ọvịdị ajẹngụ anị. Ẹnịnị mẹ zị vẹ ịzọọ,

⁵ dị Ẹnẹyịmavara chi vee tu wa ịnị eguhi ana da jẹẹ ẹbẹẹba irehi ọnọọ nị. Dị ộ hị́ Imeriyamị ọnịrị Eerọnị tụ́ ọvịdị nị.

⁶ Dị ộ kà ẹnịnị batọ, dị ẹ wụ́ ịrẹyị ọnị aa vaa ka. Ọ kà ụmẹ ana a sị nyị ọnịsẹ anị nịnị ịnị akakana Anisirẹrị nịnị, ọnịị̄ pe wa ka ịrẹyị ịnị etore ọnịrị ịnị ụra nị.

⁷ Ama oze irenyi ọnịrị Imosiisi aa zị mẹ ụna nị. Imosiisi ọnị sị avaba irehi anị chire ụvọ nị.

⁸ Ẹnẹyịmavara kà ọnịrị Imosiisi vị eneē re ẹngụ, dị ọnị e pe e ka ịrẹyị. Ọnị ọ mā da ịrẹyị gu yị ọ. Ọnị ọ vị ọza ene re ọnị mẹmẹ ya nị. Sị ẹ vẹ dị ẹnịnị e yị hí angwa anị, dị ẹ yaa du ọ?

⁹ Ayị ọ kụ Ẹnẹyịmavara ẹtẹẹtẹrẹ, dị ọ para wa hu,

¹⁰ dị eguhi ana da jẹẹ ịrẹsụ ajẹngụ va hịrẹ nị. Obobooro ọnọọ ụkụ za Imeriyamị, dị ẹngụ anị aa vwẹtẹ anka owu ochiche avọọ nị. Eerọnị mẹ maanị re e kẹnẹ,

¹¹ dị aa da ịpẹ yị Imosiisi nị. Dị ọ ka, Kwoogwo Ananyị mị, asị ụ sị ụya rị yị agụvị ụra ọnị ị mẹ̀.

¹² Asị ọ zẹ ka ụpẹngụ Imeriyamị ọ vụ anka ozi ene su tụ ịnị ịnẹ ọnya anị, dị a va ma a avọọ.

¹³ Ịzẹyịza, dị Imosiisi vee na owu na za Ẹnẹyịmavara Ohomorihi ka ọ mẹ ụkụ anị.

¹⁴ Dị Ẹnẹyịmavara tụ Imosiisi ohi ka, “Ada Imeriyamị ọ̀ọ jị atẹ ku ọ eyi, aanịka ọ yị yaanị hụụ ịnị akakana aza ẹkụhị ịhịmba? A sị ọ hụụnị akakana aza ẹkụhị ịhịmba, dị ọ va varẹma vẹ.”

¹⁵ Dị a sị Imeriyamị tụ ịrẹma ẹkụra ẹkụhị ịhịmba ama dị aza jẹẹ zi ọ dị ẹ vaa kwẹẹtẹ na aha ọsa nị.

¹⁶ Ọ mẹ zị vẹ kwooze, dị avaba ẹnịnị kwẹẹtẹ hụrị Ihazeroti na jị udi tụ inoze Ịparanị nị.