Ịrịka 11 - IWE ỌNỊNỊ

Aza ê rị uhuhu

¹ Ẹ yị nyịnyịnyị, dị aza nyima aa rị uhuhu hi Ẹnẹyịmavara agụvị ẹngụkata ene tu wa nị. Ẹnẹyịmavara mẹ wụ̀ ọ, dị ayị kụ ọ hi wa, dị ọ sị ịra aa rị ụtụụtọ ajẹngụ ẹnịnị ne hu nị.

² Dị aza na owu va za Imosiisi ka ọ gụ ẹnị ụvọ nị. Ịzẹyịza, dị ọ da ịpẹ yị Ẹnẹyịmavara, dị ọ mi ịra ọnọọ nị.

³ Avọọ aa hị́ ịzọọ Itabera ọnị iruvo anị vị ịzị ẹ rị ịra. Ẹnẹyịmavara ộ rị ajẹngụ ẹnịnị ịra.

Aza ê na owu ụngwẹ

⁴ Anikinami nịnị ana saasa Anisirẹrị nịnị ẹ kwẹẹtẹ aa ha ọhọha ịsọyịrị, dị Anisirẹrị nịnị ẹnị ree sụ ùnè ka ẹnị e yi re uye rị.

⁵ Ẹ ka ẹnị ẹ tamayị ivovo ọnị ẹnị vịdị aa rị kẹnẹ-kẹnẹ ịnị Ijipiti. Ẹnị aa rị avaba ikukumba, ịpapara, ireeki, arịvasa, ọnịrị ịsa ana vọ o mee zee ẹnị eyi nị.

⁶ Ama booro aanị ẹnị e yi re ịsa rị, Imana kẹnẹ ẹnị wáá maanị vaa rị eyinị-eyinị nị.

⁷ Imana vị ọvwọọvụ yeere anka uhu ana a hị́ ịkọrịyanda avọọ.

⁸ Aza ẹ̀ẹ kụ ọ hụụnị eteesu, dị aa sị ịrẹta kụ ọ a vị dị aa sị ịnẹ tu ọ. Dị aa hụ ọ, dị aa mẹ Ịbụrẹẹdị patapata aanị. A vavọọ sị ọ mẹ, di o hine anka aa sị angwẹ orivi mẹ̀ ẹ avọọ.

⁹ Imana ẹnẹnị vị anaā sụ beri eguhi ịrahụ hi ịzị Anisirẹrị nịnị jị ajẹngụ ẹnịnị hi.

Aduwa Imosiisi

¹⁰ Imosiisi ộ wụ ka aza ẹ da jẹẹ ovwoovu-ovwoovu ẹ yaa jị òrèrè ọvịdị ajẹngụ Ẹnẹyịmavara nị. Ayị anị ô du agụvị ka Ẹnẹyịmavara vaa nyayịnẹ aa kụ ayị hi wa.

¹¹ Dị Imosiisi họ̀ Ẹnẹyịmavara kà sị ẹ vẹ dị ọ maanị aa mẹ̀ ọnị? Sị ọnị mẹ dị Ẹnẹyịmavara kune ẹnya aza ẹnịnị tụra ọnị booro aanị?

¹² Ọnị ọ́ọ́ ma wa nị? Ọnị ọ́ọ́ vị ada ẹnịnị nị? Sị ẹ vẹ dị ọ ka ọnị ọ sị wa rị ụvọ anka ozi anaa ka ịrẹva avọọ na ngụ ịnị ẹtẹ ọnị Ẹnẹyịmavara hị́ eku anị yị ohiku ẹnịnị?

¹³ Imosiisi kà Anisirẹrị nịnị aa kụ ịrẹka ka a sị uye yị ọnị. Ịzị ọnị ee ne re uye ọnị ọnị aa sị wa.

¹⁴ Ọnị ẹ yị zụ za ẹnya aza ẹnịnị. Ẹnya ẹnịnị ọ sị rata huna ọnị.

¹⁵ Imosiisi ka aa vị aanị Ẹnẹyịmavara mẹ vaa mẹ̀ ọnị nị, ọ vana mẹ ka ọ wụ ọnị dị ọnị ọ hụụnị ụya.

Aa nyị ọdọvịdị ẹtarẹwụ ka ẹ gụ Imosiisi ụvọ

¹⁶ Ẹnẹyịmavara ộ kà yị Imosiisi ka ọ hị́ aza ẹnị ẹtarẹwụ ana hụụ mẹ ọdọvịdị Anisirẹrị. Ẹnịrị Imosiisi ẹ vẹ ịnị ajẹngụ anị ve tu ọnị.

¹⁷ Ọnị vee chi vẹ, dị ọnị ọ ka ịrẹyị yị wa. Ọnị vaa ga ụkata ọnị ọnị sị Imosiisi yị wa agụvị di e pe e za ẹnya aza, dị asị ọ vị ọnị ịnyara.

¹⁸ Ẹnẹyịmavara kà Imosiisi ọ̀ ka ẹ yị aza ka e tenyi ẹngụ ẹnịnị tu ụhwọọ ka ẹ vaa rị ịsa. Ộ ka ọnị ọ wụ ẹnịnị maa jị òrèrè dị ẹ yaa va ụva ka ẹnị e yi re ịsa rị. Ẹ ka ọ vana gụ yị ẹnị ka ẹnị ẹ yaa Ijipiti. Agụvị avọọ ọnị vaa sị ịsọyịrị yị wa dị ẹ rị.

¹⁹ Ẹ yị vị ẹkụhị ọnya kẹnẹ, a vị ẹkụhị ẹẹva, a vị ẹkụhị ẹẹhị, a vị ẹkụhị ẹẹwụ a vị ẹkụhị oohu,

²⁰ ama ụhwẹ ọnya ọyịvụrụ. Ẹ vaa rị ịsa, dị ọ du wa eyi, ka ẹnịnị e yị dọ yị Ẹnẹyịmavara ana yaa pe wa, dị ẹ ya rị uhuhu hi ọnị, dị ẹ ka sị ẹ vẹ dị ẹnị daka hụrẹ Ijipiti?

²¹ Dị Imosiisi ka anọrụ ana ya pe ọnị vị aza ẹnị (600,000). Ẹnẹyịmavara mẹmẹ nyẹngụ ka ka ọnị ọ zụ sị ịsọyịrị ana hụ wa rị ụhwẹ ọnya?

²² Ẹnị ẹẹ daka wụ̀ avaba atẹmẹ ọnịrị ụnọ, a vị dị ẹnị za avaba ivovo ene hi ịnị oku, ẹnị ẹ yị vaa nyị ịsa ana zụ hụ pa wa.

²³ Dị Ẹnẹyịmavara tụ Imosiisi ohi ka ẹ yị ịsa ọnị ọnị ẹ yị zụ mẹ. O nee zi ka o vee re ka ịrẹyị ọnị ka vaa sẹ.

²⁴ Ịzẹyịza, dị Imosiisi ka yị aza ịsị Ẹnẹyịmavara kà nị. Dị ộ nyị ọdọvịdị ẹnị ẹtarẹwụ, dị ẹ tara kara ajẹngụ Ẹnẹyịmavara nị dị Imosiisi jẹẹ ịnị akakana ẹnịnị nị.

²⁵ Ịjị ẹ sị gụ, dị Ẹnẹyịmavara chi vẹ ịnị eguhi, dị ọ ka ịrẹyị yị Imosiisi nị. Dị Ẹnẹyịmavara sị ụkata Imosiisi dị ọ sị yị ọdọvịdị ẹnị ẹtarẹwụ ẹnẹẹ nị. Ẹnịnị ẹ ka ịsẹ ịzịzọọ ama ẹnịnị ẹ yị vaa vọ mẹ.

²⁶ Â nyị anọrụ ẹẹva ịnị ọdọvịdị ẹnẹẹ ẹnẹ ẹ yaa ịzọọ ịnị ụmẹ ọnọọ. Ama ụkata ọnọọ o tu wa ịzị ẹ yaa, dị ẹnị re na owu booro-booro anka ọnịsẹ nịnị avọọ nị. Ịrẹha ẹnịnị ẹ rị Eridadi ọnịrị Imedadi nị.

²⁷ Ẹ mẹ vavọọ aa ka ịsẹ, dị ọzwọọmụha ọnya aanị zwe echeechi na ka yị Imosiisi ka Eridadi ọnịrị Imedadi aa ka ịsẹ nị.

²⁸ Dị Ijosuwa ozi Inuni ana vị ozi ahụ Imosiisi hụụnị ozweyi na ka yị Imosiisi ka ọ za wa jẹẹ.

²⁹ Ama dị Imosiisi tụ ọ ohi ka ọ́ọ́ waa kụ ịhị agụvị anị aanị nị? Dị ọ ka ọnị o si ka avaba aza ẹ nyị ụkata dị ẹ ka ịsẹ.

³⁰ Dị Imosiisi ọnịrị ọdọvịdị ẹtarẹwụ ẹnẹẹ hahi, dị ọzọza aa nọ ịnị ajẹngụ anị nị.

Ẹnẹyịmavara ộ sị ụnọmị ana a hị́ Ikweeri vaa yị wa.

³¹ Ẹ yị nyịnyịnyị dị Ẹnẹyịmavara tụ ahị ọbanyị ana kụ inomi ana aà ikweeri hụụnị òkū vẹ nị. Dị ẹ chaka ku ẹtẹ hi ozi ene noze ẹhụ ụsẹ ẹkụhị hụrị ẹ yaa. Dị ẹ vavọọ jesi kara udi ẹnịnị, dị e hira gụrị ẹtẹ ẹhụ ahụ ẹẹta avọọ nị.

³² Dị ọzọza za irekwose ẹkụhị ẹẹva ana rata ikirogirami (1,000). Dị ẹ gara a hịrẹ ọyị ẹkara udi ka ọ wụ nị.

³³ Ama ẹnịnị mẹ da tụ irenu kẹnẹ ka ẹnị ẹ rị ọ, dị ayị Ẹnẹyịmavara du hi wa, dị ộ tụ ụkụ ka ọ za wa nị.

³⁴ Avọọ aa hị́ ịzọọ Ikibiroti-Ihataava ọnị iruvo vị ụsị ọnọhọha.

³⁵ Dị Anisirẹrị nịnị kwẹẹtẹ hụụ ịzọọ na ngụ Ihazeroti nị.