Ịrịka 10 - IWE ỌNỊNỊ

Ịkakanchị enyusẹ isiriva

¹ Ẹnẹyịmavara ộ kà yị Imosiisi ka,

² ọ sị enyusẹ ana a hị́ isiriva tu ịkakanchị ẹẹva, dị aa sị hị́ aza gụ ọnịrị a sị tama aza ayị ka e ne ajẹngụ ẹnịnị dị ẹ kụ̀rà.

³ Ee hu ịkakanchị ẹyịva ẹnẹẹ kẹnẹ, dị aza ẹ wara gụ enoze ajẹngụ Ẹnẹyịmavara.

⁴ Àa vị ụpẹ ọnya e hu ọ nị, ọdọvịdị ịrẹsụ-ịrẹsụ Anisirẹrị ẹwụrẹva kẹnẹ aa vaa gẹ ịzọọ nị.

⁵ Èe hu ọ ẹjịjị, avaba ịrẹsụ ene hi eyi ịzị ọyị zị hụrẹ vẹ aa kwẹẹtẹ jịnẹ tụ ẹhẹ nị.

⁶ Èe hu ụpẹ ọhụva, dị avaba ịrẹsụ ene re hi eyi ụvẹtẹ ẹnẹ rẹ jịnẹ tụ ẹhẹ. Ẹngụ ọyị hu ịkakanchị ọnọnị vị anaā sịị hị́ aza ka ẹẹ kwẹẹtẹ.

⁷ Ama àa hị́ avaba ịragụ gụ, dị e hu ọ ku.

⁸ Ohirẹsụ irehi Ẹnẹyịmavara nịnị ana vị ezi Eerọnị kẹnẹ e zụ hu ọ nị. Aanị a mẹ mẹ̀ ọda ọnọọ tịtẹ tịnatibe nị.

⁹ Ẹnẹyịmavara kà ịjị ẹ̀ẹ sị ngụ ịnị ẹtẹ ẹnịnị, dị ẹ ya nọ ịrẹkụ ọnịvị ẹnịnị nị, e hu ọ. Ịkakanchị ọnọọ vaa tama ọnị ayị ka ọnị ọ sị wa nyị ẹbẹẹba ọnịvị ẹnịnị.

¹⁰ Ọ kà e hu ọ ịnị ụmẹ ọnị ẹ yaa jẹ ịrajẹ ọnịrị ịnị ụmẹ avaba eche asụsụ ịrayị ẹnịnị. E hu ọ ụhwẹ ọ sị chị, dị ẹ si hine ayị ịrẹsụ ịsọvọ anaā rị ịra ọnịrị ịsọvọ ẹngwọọrọ. Ịkakanchị ọnọọ vaa tama ọnị ayị oto ọnị wo yị wa. Ọnị ọ vị Ẹnẹyịmavara ana vị Ohomorihi ẹnịnị nị.

Anisirẹrị è nyima ụsẹ

¹¹ Ịhị ẹ tụ ọ ẹkụhị ẹwụrẹva ịnị ụhwẹ ọhụva ịnị ịrayị ọhụva ọnị ẹ hụrẹ Ijipiti, dị eguhi kwẹẹtẹ hụrẹ ịrẹsụ ajẹngụ Ẹnẹyịmavara nị

¹² avọọ, dị Anisirẹrị nịnị kụ ẹnya ẹnịnị kwẹẹtẹ hụrẹ ụnọmị Ịsịnayị na ngụ ụnọmị Ịparanị nị.

¹³ Di e nyima aa zị ụsẹ anka Ẹnẹyịmavara mẹ ka Imosiisi ọ mẹ̀ ọda anị yị wa nị.

¹⁴ Inasoni ozi Aminadabi ọ vị ọdọvịdị ana kụ avaba ịrẹsụ ana jị udi beri Ijuda tụ ọvịdị aza ana vọ, dị ẹ sị uyi rị ụvọ nị.

¹⁵ Ịnẹtanẹrị ozi Izuwa ọ vị ọdọvịdị Aniisaka nị.

¹⁶ Dị Eriyabi ozi Iheroni ọnị rẹ vị ọdọvịdị Anizeburuni nị.

¹⁷ Anigesihoni ọnịrị Animerari nịnị ẹ kụ ẹnya ajẹngụ ana jị hi ẹtẹ tụ ịrẹma Anijuda nịnị nị.

¹⁸ Dị Erizuri ozi Isedewu ana vị ọdọvịdị Anirubẹnị kụ wa vaka ịrẹsụ ana vọ ẹnị ẹnịrị ra vatụra Anijuda nịnị nị.

¹⁹ Iserumẹrị ozi Izurisadayị ọ vị ọdọvịdị Anisimiyọnị nị.

²⁰ Eriyasahwi ozi Idewẹrị ọ vị ọdọvịdị Anigadi nị.

²¹ Anikohati ọnị o tu, ẹ za ẹnya ịnị ajẹngụ Ẹnẹyịmavara nị. Ẹnịnị ẹ da ẹtẹ tịtẹ yi anọvịdị agụvị dị a zụ jị ajẹngụ dị e vee tu ịzọọ.

²² Anihuremi ọnịrị ịrẹsụ ẹnị ẹnịrị ra gụrị ẹngụ ẹ vatụra wa nị. Erisama ozi Amihudi ọ vị ọdọvịdị Anihuremi nị.

²³ Igamariyẹẹrị ozi Ipedazu ọ vị ọdọvịdị Anịmanasẹ nị.

²⁴ Abidanị ozi Igidiyọnị ọ vị ọdọvịdị Ịbẹnjamịnị nị.

²⁵ Anịdanị nịnị ẹnịrị ịrẹsụ ana vọ ana ra gụrị wa e hi ịrẹma ee sere Anisirẹrị nịnị agụvị aza anaa vaa kụ ịrẹkụ vee tu wa. Uye ẹnịnị vị ọnị ẹ sị rị ụvọ. Ahiyẹza ozi Amisadayi ọ vị ọdọvịdị Anịdanị nị.

²⁶ Ipagiyeri ozi Okiranị ọ vị ọdọvịdị Anaseri nị.

²⁷ Ahira ozi Enanị ọ vị ọdọvịdị Inahwitari nị.

²⁸ Aanị Anisirẹrị nịnị mẹ mẹ eto ụsẹ ẹnịnị ụmẹ tụra ụmẹ ọnị ẹ yaa zị ụsẹ nị.

Imosiisi ka ọyẹ anị ọ saasa ọnị

²⁹ Ẹkụhị ọnya, dị Imosiisi hị́ Ihobabi ọnyara ose anị ọnọrụ ana vị ozi Iruweri ana Imediya dị ọ ka, ẹnị aa kwẹẹtẹ nọ ịzị Ẹnẹyịmavara kà ọnị aa sị yị ẹnị. Imosiisi ka ọ kwẹẹtẹ dị ọ saasa ọnị ka ẹnị vaa mẹ̀ ẹ ebira ẹtẹẹrẹ. Ẹtẹ ọnị Ẹnẹyịmavara wo oto anị yị ẹnị o zoza ẹtẹẹtẹrẹ.

³⁰ Dị Ihobabi tụ ọ ohi ka ọnị ẹ yị saasa wa nị. Ọ kà ọnị aa va nọ eehi anị.

³¹ Dị Imosiisi ọ da ịpẹ yọ ka asị ọ para ẹnị hu agụvị ka ọnị ọ yẹ aha ana vọrọ ka ẹnị ka ahụ jẹẹ jị udi ịnị ụnọmị nị.

³² Dị Imosiisi ka ọ vaa zụ ẹnị oze, dị ẹnị ga avaba ịsa ozoza ọnị Ẹnẹyịmavara vaa sị yị ẹnị.

Aza ệ hụrị Ịsịnayị

³³ Dị ẹ zị ụsẹ ẹkụhị ẹẹta hụrẹ ataba Ịsịnayị Ẹnẹyịmavara beri apoti oto tụ ọvịdị aza ana vọ agụvị Ihobabi ọ sị zụ wa ịzị a vọrọ ka ẹ jẹẹ tụ́ ụhwọ́.

³⁴ Ẹkụhị-ẹkụhị vị ọnị eguhi Ẹnẹyịmavara ku wa ịrẹsụ ẹ maa zị ụsẹ na.

³⁵ Ụmẹ tụra ụmẹ ọnị apoti oto aa jịnẹ, dị mẹ̀ aduwa ka Ẹnẹyịmavara ọ kwẹẹtẹ, dị ọnịvị anị nịnị ẹ gara hi ozi. Ọnịvị ẹnịnị ee zwe eyi ẹnịnị.

³⁶ Ama ụmẹ ọnị e si chi apoti oto hi ẹtẹ, dị Imosiisi rẹ mẹ̀ aduwa ka Ẹnẹyịmavara ọ vaa ka ẹnị vẹ ụpẹ otomiroku.