Ịrẹyị Ọzwọzịsa 7 - IWE ỌNỊNỊ

Ịrẹyọyẹ ana aa sị mẹ ẹhẹ

¹ Ọza ọ rị ịrẹha ọyịza o zoza huna agụ eturare ene zoza nị. Ẹkụhị ọnị ọza sị su o zoza huni ẹkụhị ana a sị ma a nị.

² Ọza ọ̀ọ nọ ịzị a yaa zị ẹngụ ọza ene su ọ zoza hu ka ọ nọ ịzị a yaa aa rị eche nị; ọza ana yara ọ tamayị ka ẹkụhị aa vẹ ọnị ọzọza vee su.

³ Ayodu o zoza huni unyi oyi nyị nị, agụvị ka ayodu vị anaā mẹ ọzaa rò ịrẹyị.

⁴ Ọyẹrẹyị oō ro o ka ọzaa su nị, onututu vị eneē rọ ịrẹyị ẹngwọmẹ pooro kẹnẹ.

⁵ Aza ana yẹ ịrẹyị ẹ̀ẹ tụ ọza ohuvọ o zoza hu ka ọnụra nịnị ẹẹ jị ahẹ gono ọza nị.

⁶ Wâ yẹ ka unyi onututu vị ana sị mẹ anka ọchị ikeyi-ikeyi mee che ịnị ịra avọọ. Osusu kẹnẹ ọsọnị rẹ vị nị.

⁷ Ịzẹyịza, ọza ọ̀ọ ka ọnị ọọ yẹ ịrẹyị dị aa mẹ ẹvaya yị ọza nị, ọnụra ọ vị nị. Avọọ ochirerenu mee du ọzaa ha nị.

⁸ Ẹzẹtẹ ịrẹyị ọ nyị ụbanyị huni oyi nyima anị nị. Avọọ usuuru ọyị nyị me zoza huni ka ọza ọọ sị ẹngụ tụ ẹba nị.

⁹ Asị ụ rẹ hụra kụ ayị, agụvị ka ọnụra kẹnẹ ọọ hụraa kụ ayị nị.

¹⁰ Asị ụ re họ̀ use ka: Sị ẹ vẹ dị ahịka ụmẹ ịyẹẹyẹ o zoza hu ụmẹ ọnọnị nị? Ọ ka ẹ yị nyị ịrẹyọyẹ ka ọza ọ̀ vavọọ họ̀ use ịrẹyị.

¹¹ Ọza ọ̀ọ yẹ ịrẹyị oo zoza, ọ́ sị mẹẹ anka ogu ana hụrẹ ụvọ yị ọza avọọ nị, aha ọ vị yị aza ana yị yàra nị.

¹² Ịrẹyọyẹ ọ zụ sere ọza anka ọza mẹẹ sị ẹkẹhị sere ẹngụ anị. Aha ana yà ịnị ka ọza ọ̀ yẹ ịrẹyị ọ vị ka, ọ vaa dọ ọzaa ha hụụnị ẹngụkata nị.

¹³ Zama ụkọrọ Ohomorihi re daa re, ịsị ọnị ọ mẹ ka ọ̀ ràrà, ẹnẹ zụ vọrọ ọ?

¹⁴ Ẹhẹ ee zozaa wụ waa jẹ, òo ve divi ụ rò ịrẹyị. Ohomorihi ọ mẹ ẹnị ẹyịva nị, avọọ, ẹnẹ ka ọnị ọọ yẹ anaa vẹ ụhwọọ?

¹⁵ Ọzwọzịsa ka, ịnị ẹhẹ ọnị ọnị vẹ ana ahịka osusu kẹnẹ ọ vị aanị nị, ọnị ọ sị ịsavị-ịsavị re: Ọnịzẹyịza ee su tụ ịnị ịzẹyịza nị, dị aza edivi ee ku orubo tụ ịnị udivi ẹnịnị nị.

¹⁶ Asị ụ na mẹ ịzẹyịza ọnịrị ịrẹyọyẹ ẹnẹmẹhị, ka ẹyị vavọọ ụ va wụ ẹngụ awụ.

¹⁷ Ama asị ụ rẹ na chamayị avị ka wa rẹ na mẹ ụra ẹnẹmẹhị. Asị ụ wụ ẹngụ awụ dị ụmẹ awụ o ve tu.

¹⁸ Asị ụ na mẹ ẹnẹmẹhị ịnị ẹnẹ ẹyịva ẹnẹẹ nị. Wâ hí angwa Ohomorihi, vị o vee zozaa yị wụ nị.

¹⁹ Ịsị ọza ana yẹ ịrẹyị zụ mẹ, ọdọvịdị ẹẹ gụ ẹẹwụ tụ ịnị ẹkụra ẹ yị zụ mẹ̀ ẹ.

²⁰ Ẹ yị nyị ọza ọyịza ịnị ẹhẹ ọnọnị ana mẹ ọyịza pooro dị asị ọ mẹ odivi ẹkụhị ọnya.

²¹ Asị ụ sị ụtọ pe avaba ịrẹyị ana aza aa kà, ẹyị vavọọ, ụ va wụ ka ezi ahụ awụ aa kụ wụ ụhụ.

²² Ẹwụ ụvọta ọọ yẹ ụpẹ ya ẹwụ rẹ kụ ọza ụhụ da.

²³ Ọzwọzịsa ka ọnị ọ raa sị ịrẹyọyẹ zama avaba ọsọnị re, dị ọnị ka, ẹ yị zụ nyị ka ọnị ẹ yị yaa yẹ ịrẹyị nị, ama ịrẹyọyẹ vị ana nị noze rịrị ọnị.

²⁴ Ịrẹyị ẹhẹ ọọ nyịnẹ yị ẹyị ọza ẹtẹẹtẹrẹ. Ọza ẹ yị yẹ iruvo anị.

²⁵ Ọzwọzịsa ka ọnị ộ sị avaba ẹhẹ anị sị iruvo ka ọnị ọ̀ yẹ iruvo ịsa ọrụrụ-ọrụrụ nị. Ọnị ọ sị yẹ ka ọza anaa chamayị dị aa mẹ̀ ebira kẹnẹ-kẹnẹ vị ọnụra.

²⁶ Ọ kà ọnị ọ sị yẹ ka ọnyẹnẹẹ anaā sẹ̀ ịrẹka o divi huni iswọọza nị. Ọ̀ọ ka ọnị oo sì ịrẹyị awụ, ịrẹpa aa vàa zi wụ nị. Ọ̀ọ ha ụvọ kara awụ, vị aa sịị mẹẹ anka aa sị ẹba sụ ọza avọọ nị. Aza anaā mẹ ịsị ọnị Ohomorihi sị kẹnẹ ẹ zụ ha hụrẹ ẹ ụvọ nị, ama ịrẹpa anị vị ana vaa za aza anaā mẹ̀ ebira odivi.

²⁷ Ọzwọzịsa ka ọnị ọ raa sị avaba ịrẹyọyẹ anị sì iruvo ka ọnị ọ̀ yẹ ẹhẹ ọnọnị mẹmẹ yà,

²⁸ ama vị va ngụ ọyaanị, ọnị ẹ yị va yẹ. Ọnị ọọ yẹ ka àa kụ aza ẹnị akahị gụ a vaa nyị ọnọrụ ikonya ịnị ẹnịnị, ama ọnị ẹ yị re ọnyẹnẹẹ ikonyara.

²⁹ Ọ kà ọnị ọ sị yẹ ka Ohomorihi vị ana sị ebira obooro tụ aza vẹ ẹhẹ ama dị ẹ ha tụ oze ẹnịnị.