Ịrẹyị Ọzwọzịsa 4 - IWE ỌNỊNỊ

Ịrẹyị ẹhẹ ẹnyị

¹ Ọzwọzịsa ka ọnị o re ré avaba ẹvaya ana aza mẹẹ yị ẹngụ ịnị ẹhẹ ọnọnị. Aza ana a mẹ ẹvaya yị aa jị òrèrè ẹnịnị e yị re ọza sị wa ayị nẹtẹ agụvị ka aza ana a mẹ ẹvaya yị wa ẹẹ nyị ụkata ẹtẹẹtẹrẹ.

² Dị ọnị vaa kà a ka oku ene wusu ọ vana dahi hu aza ana yára nị.

³ Ọza ọnị ọza ẹ̀ẹ yị hyakụ ma dị ò ve re odivi anaa na ịnị ẹhẹ ọ dahi hu kere-kere nị.

⁴ Ọ kà ọnị ọ sị yẹ ka agụvị ọzọza ọ̀ dụ ọpa anị kẹnẹ aa sị aza mẹ̀ ụkọrọ dị ẹ yị nyị eyi tụ́ ụhwọ́ nị. Ịsị aa sị aza dụ ọyịkà tụ ọvịdị baaba ọ vị ọnọọ nị. Ọsọnị bẹẹ rẹ vị osusu, anka ọza o rere aa dụ ahị avọọ.

⁵ Ọnụra nịnị ẹ maa zẹẹ ka à nyị ịsị ẹnị aa mẹ ama dị ụngwẹ aa vaa wụ̀ wa.

⁶ Ọ kà ịsa chee ọnị ọza nyị beri ẹngwọọrọ ọ dahi huni ka ọza ọọ sị ụvọ ẹẹva mẹ̀ ụkọrọ dị asị o nyị eyi tụ́ ụhwọ́ nị. Ụkọrọ ẹnẹẹ sị mẹẹ anka ọza rere è si ka ọnị ọ za ahị avọọ nị.

⁷ Ọnị o re re ịsa ana ahịka osusu kẹnẹ ọ vị ịnị ẹhẹ nị:

⁸ Ọza ana vị ọnị ịnyaa, dị ẹ yị ma ozi ọnọrụ, dị ẹ̀ yị nyị ọyịnyara ọnọrụ. Ama aa mẹ̀ ụkọrọ ẹ yị nyị eyi tụ́ ụhwọ́, ẹ ma kà a ka ogu ọ sị hụ ọnị. Ẹ yị daba họ̀ use ka ẹnị ọnị maanị aa hụ ụvọ anị aa rị ụya, dị ọnị ẹ yị nyị ẹngwohyahị kẹ? Ọsọnị bẹẹ vị ụkọrọ ayodu, dị ọ rẹ vị osusu nị.

⁹ Aza ẹnị ẹẹva ọ dahi huni ọza ịnyara nị, ka ẹ vaa zụụ mẹ̀ ụkọrọ ẹtẹẹrẹ dị e re ọgụ ọyịza hụụnị anị.

¹⁰ Ọnyara ọ̀ọ hyẹdụ, ọsa vaa sị ọ kwẹẹtẹ. Ama ọza ana vị ọnị ịnyara ọ̀ nyarị iruwa, ọ̀ọ hyẹdụ, ẹ naa sị ọ kwẹẹtẹ kẹ?

¹¹ È re daa re, Aza ẹnị ẹẹva ẹ̀ẹ sụ vabẹ aha ọnya, ẹnịnị vị ana ka ịra za ẹngụ dị ahị ọ yị za wa. Ama ọza ịnyara ọ́ọ́ zụ vavọọ kụ ahị hụrị ẹngụ anị ẹngụ?

¹² Ọza ẹ yị zụ nyị huna aza ẹnị ẹẹva anka a mẹ yị sẹ zụ nyị huna ọnịịnyara Arasị ẹẹta aka ọọ vị́ ịsa nị.

¹³ Ozweyi ọ̀ọ vị onuruwa dị ọ yẹ ịrẹyị nị, ọ dahi huna ohinọyị ọzọkụ ana vị ọnụra dị ẹ̀ yị ma dọ ajuwe ọza nị.

¹⁴ Ẹngụ ozweyi ọnọọ ọ zụ hụụnị ẹngwa va rị ohinọyị, ọ̀ọ daka vị ka ịnị osiye a ma a tụ nị.

¹⁵ Ọzwọzịsa ka ọnị o re avaba anẹhẹ pooro, dị ọnị re ka ẹnịnị ẹẹ dọ yị ozweyi ọnọọ ana vaa dọ ohinọyị ịrẹsụ nị.

¹⁶ Ohinọyị ọ zụ mẹ ịjọva tụra aza ọnị ọza ẹ yị yẹ za ịrịka ịrẹsụ, ama ịjị oo si hu, dị ahịka ọhịmị anị kẹnẹ aza aa kà nị. Ẹngụ ọsọnị bẹẹ rẹ vị osusu, ọ sị mẹẹ ọza òo rere ee sì ka ọnị ọ za ahị avọọ nị.