Ireevi 8 - IWE ỌNỊNỊ

A mẹmẹ sị Eerọnị ọnịrị ezi anị rị ohirẹsụ irehi Ohomorihi

¹ Ẹnẹyịmavara ộ kà a yị Imosiisi ka,

² Ọ̀ kụ́ Eerọnị ọnịrị ezi anị vẹ enoze ajẹngụ anị; dị ọ̀ kụ́ ẹnya ohirẹsụ irehi Ohomorihi, angwẹ ene e siī sisi ọza ịrẹsụ ọnịrị ụnọ ana aa sịị mẹ̀ ịsọvọ agụvị ebira odivi aza vaka wa vẹ, ọ ka Imosiisi ọ̀ rẹ kụ́ ịdẹba ẹẹva ọnịrị uji ana a kụ́ ịbụrẹdị ọnị ọza ẹ̀ yị sị owu tụ vẹ.

³ Ọ kà ọ̀ọ vavọọ sị ọ mẹ, dị ọ̀ hị́ avaba Anisirẹrị nịnị gụ ịzọọ.

⁴ Imosiisi ộ mẹ̀ ịsị Ẹnẹyịmavara mẹ ọda anịị yị ọ, dị avaba ẹkụra kụ ẹngụ gụ enoze ajẹngụ ana yaa gẹ nị.

⁵ Ịjị avaba aza sị gụ, dị Imosiisi ka ịsị Ẹnẹyịmavara mẹ ọda ka ọnị ọ̀ mẹ, ọnị aa vaa mẹ aanị nị.

⁶ Dị Imosiisi kụ Eerọnị ọnịrị ezi anị dị ọ hụ wa enyi nị.

⁷ Ô chire Eerọnị ọtịnịnẹ awuru, ọnịrị awuru ọgọdọ, dị ọ jị obo sụ́ ọ ọtẹ nị. Ô re chire e ịharamịra, dị ọ sị obo ana a ta ọyịza-ọyịza tụ ọ sụ́ ọ za ẹngụ nị.

⁸ Imosiisi ộ rẹ sị okurachị dị ọ và a ku ọ ịrachị nị ịsị e siī si iruvo ịrẹyị ana aā hị́ urimi ọnịrị itumini vị ọnị ọ kụ hi ini okurachị ọnọọ.

⁹ Ộ jị ọ ubobo, dị ọ sị igooru mẹ̀ ẹ ọvị ọvịdị nị, igooru ọnọọ ọ sị zụ ka â sị ọtirenyi yị Ohomorihi nị. Avọọ Ẹnẹyịmavara mẹ mẹ̀ ẹ ọda yị Imosiisi nị.

¹⁰ Ịjị Imosiisi maanị raa kụ ẹnya hi Eerọnị ẹngụ, dị Imosiisi sị angwẹ ene e siī sisi ọza ịrẹsụ, dị o che e sẹ ajẹngụ Ẹnẹyịmavara ọnịrị avaba ịsị ene hi ịnị anị. Aanị ọ́ mẹ mẹ sị avaba ẹnịnị tụ irenyi yị Ẹnẹyịmavara nị.

¹¹ Ô re che angwẹ ọnọọ sẹ ụta ụpẹ ịhịmba, dị o che e sẹ ẹnya ene hi ịzọọ ọnịrị ẹnya odenyi ọbanyị na ngụ ahẹtẹ anị nị. Aanị ọ́ mẹ mẹ rẹ sị avaba ẹsẹnị tụ irenyi yị Ẹnẹyịmavara nị.

¹² Imosiisi ộ và angwẹ ọnọọ hi Eerọnị ịrẹsụ ọnị ọ sị nyị ọtirenyi yị Ẹnẹyịmavara.

¹³ Imosiisi ộ rẹ kụ ezi Eerọnị vẹ ọvịdị, ộ chire wa ọtịnịnẹ awuru, dị ọ sị obo sụ́ wa ọtẹ nị. Ộ rẹ jị wa ubobo anka Ẹnẹyịmavara mẹ mẹ̀ ẹ ọda yị ọ.

¹⁴ Dị ọ va sị ụnọ araka ana aa sịị mẹ̀ ịsọvọ agụvị ebira odivi aza vẹ nị. Ịjị ọ raa sị ọ vẹ dị Eerọnị ọnịrị ezi anị sị ụvọ tụra a ịrẹsụ nị.

¹⁵ Imosiisi ộ wụ ụnọ ọnọọ, dị ọ ka anị nị, ộ jị igege ngụ ọnọọ, dị ọ sị dá ọpanyị ụta ọnọọ ịnị ọgọgọ ẹyịna, ọnị ọ̀ sị sị ọtirenyi nị. Ộ sị ọnọọ ana vọ, dị ọ́ và a hi iruvo ụta ọnọọ nị. Aanị ọ́ mẹmẹ sị ụta ọnọọ tụ irenyi yị Ẹnẹyịmavara, dị ọ vara a ọnịnị nị.

¹⁶ Ộ kụ ụhị ene ku ẹnya ịnịnẹ ụnọ ọnọọ beri ịpa ene hu ịnị ayị anị, dị ọ rẹ kụ ẹhụ anị vaka ụhị ẹnịnị, dị ọ rị wa ịra ịrẹsụ ụta nị.

¹⁷ Ama, dị ọ sị ana vọ ịnị ụnọ ọnọọ: ụpa anị, uye anị ọnịrị iruvu anị jịnẹ tụ ẹhẹ hụrị udi ẹnịnị, dị ọ na rị ọ ịra anka Ẹnẹyịmavara mẹ mẹẹ ọda yọ nị.

¹⁸ Ịjị Imosiisi sị ọsọnị mẹ, dị ọ va sị ịdẹba ana aa sị mẹ̀ ịsọvọ ana a rị ịra vẹ. Dị Eerọnị ọnịrị ezi anị sị ụvọ tụra a ịrẹsụ nị.

¹⁹ Imosiisi ộ wụ ịdẹba ọnọọ, dị ọ và anị ku ụta ọnọọ jesi kara a ẹngụ-ẹngụ nị.

²⁰ Ịjị a sị ịdẹba ọnọọ vọ, dị Imosiisi kụ uye anị ọnịrị ịrẹsụ beri ụhị anị, dị ọ rị wa ịra nị.

²¹ Á mẹ raà nyịna iruvu ịdẹba ọnọọ ọnịrị ahụ anị, dị Imosiisi na rị ana vọ ịra nị. Ịsị ịsọvọ ana a rị ịra aanị vị ịsọyịrị. Agụ anị ô hine Ẹnẹyịmavara.

²² Imosiisi ọ̀ rẹ sị ịdẹba ọsa vẹ, ọnọnị vị ana aa sịị sị ọzaa rị ohirẹsụ irehi Ohomorihi, dị Eerọnị ọnịrị ezi anị sị ụvọ tụra a ịrẹsụ nị.

²³ Imosiisi ộ wụ ịdẹba ọnọnị, dị ọ sị ụvọ dá anị, dị ọ sị da Eerọnị ụtọ ụvọrị nị. Ộ rẹ sị da a igege ọbanyị ụvọrị ọnịrị igege ọbanyị ahụ ụvọrị anị.

²⁴ Â rẹ kụ ezi Eerọnị vẹ, dị Imosiisi sị ụvọ da ọnọọ, dị ọ sị dá wa ụtọ ụvọrị, igege ọbanyị ụvọrị ọnịrị igege ọbanyị ahụ ụvọha ẹnịnị nị. Dị Imosiisi sị ana vọ dị ọ vàa ku ụta jesi kara a ẹngụ-ẹngụ nị.

²⁵ Imosiisi ộ kụ ụhị ịnị ochomu ịdẹba ọnọọ ọnịrị ụhị ene kú ẹnya ịnịnẹ anị; dị ọ dà ịpa ene zoza hu kere-kere ịnị ayị anị, ẹhụ anị vaka ụhị ẹnịnị ọnịrị ahụ ụvọrị ịdẹba ọnọọ nị.

²⁶ Â nyị ịbụrẹdị ọnị ọza ẹ̀ yị sị owu tụ ana a sị va yị Ẹnẹyịmavara dị a kụ ọ hi ini uji tịtẹ. Dị Imosiisi sị ọnyara ana a sị angwẹ po a maa mẹ̀ ẹ, dị ọ rẹ sị Ịbụrẹẹdị hẹvẹ-hẹvẹ ọnyara dị ọ kụ wa tụra ụhị ọnọnị ọnịrị ahụ ịdẹba ọnọnị nị.

²⁷ Imosiisi ộ kụ avaba ịsọyịrị ẹnẹnị chire Eerọnị ọnịrị ezi anịị ụvọ, dị ẹnịnị sị ọ vẹ anka ẹyịza ụnarenyi ẹnẹ ẹ sị va yị Ẹnẹyịmavara nị.

²⁸ Dị Imosiisi dọ wa ịsọyịrị ọnọnị, dị ọ sị tụra ịsị ịsọvọ ana aā rị ịra, dị ọ rị wa ịra ịrẹsụ ụta nị. Ịsị ịsọvọ ana a sị sị wa rị ohirẹsụ irehi Ohomorihi ọsọnị vị nị, agụ anị ô hine Ẹnẹyịmavara ẹtẹẹtẹrẹ.

²⁹ Imosiisi ộ sị ịrachị ịdẹba ana a sị mẹ̀ ịsọvọ aanị, dị ọ sị ọ tụ́ ẹba, dị o mí ọ ọvịdị Ẹnẹyịmavara anka ẹyịza oturenyi nị. Ịpa ene tu Imosiisi ịnị ịdẹba ana a sị mẹ̀ ịsọvọ aanị ọ vị ọnọọ nị. Avọọ gẹdẹ-gẹdẹ Ẹnẹyịmavara mẹ mẹẹ ọdaa yọ nị.

³⁰ Imosiisi ộ sị eturare ọnịrị ana ya ịrẹsụ ụta, dị o po o vabẹ, dị o che e sẹ Eerọnị ọnịrị ezi anị ẹngụ, dị o re che e sẹ ịta ẹnịnị nị. Ọsọnị ọ sị sị wa ọnịrị ịta ẹnịnị tụ irenyi yị Ẹnẹyịmavara nị.

³¹ Imosiisi ộ kà a yị Eerọnị ọnịrị ezi anị ka, ẹ̀ sị uye ịsị ịsọvọ ọnọnị nọ enoze ajẹngụ Ẹnẹyịmavara, dị ẹ̀ chịnẹ ẹ ịzọọ. Ẹ̀ẹ sị ọ chịnẹ, dị ẹ̀ rị ọnịrị ịbụrẹdị ana yà ịnị uji ịsị ịsọvọ ana a sịị̄ sị ọzaa rị ohirẹsụ irehi Ohomorihi ịzọọ, anka Ẹnẹyịmavara mẹ mẹ̀ ẹ ọda.

³² Ana àa vẹtẹ ịnị uye ọnịrị ịbụrẹdị ọnọọ, ẹnịnị ẹ̀ rị ọ ịra.

³³ Ọ kà, asị ẹnịnị hụrị enoze ajẹngụ Ẹnẹyịmavara pooro dị ẹkụhị ịhịmba ọ̀ mẹ, dị à mẹ avaba ịsị ana a sịị̄ sị ọzaa rị ohirẹsụ irehi Ohomorihi gụ.

³⁴ Imosiisi ka, Ẹnẹyịmavara ọ mẹ̀ ẹ ọda ka ya mẹ avaba ịsị ọnị ị maanị mẹ ajịnị aanị nị, agụvị dị a sị sị ịvị awụ nịnị kwooze nị.

³⁵ Enoze ajẹngụ Ẹnẹyịmavara ụ́ vaa yà nịnị ọọdụ ọnịrị ịrahụ pooro dị ẹkụhị ịhịmba ọ mẹ nị, dị waa mẹ ịsị ọnị Ẹnẹyịmavara mẹ ọda anị yị wụ nịnị. Wẹ̀ yị vavọọ mẹ̀ ẹ nịnị, u wee sú nịnị nị o. Aanị Ẹnẹyịmavara mẹ mẹ̀ ẹ ọda yị mị nị.

³⁶ Dị Eerọnị ọnịrị ezi anị mẹ avaba ịsị Ẹnẹyịmavara mẹ ọda anị yị Imosiisi nị.