Ireevi 6 - IWE ỌNỊNỊ

Ịvị ana vọ ana a nyị ka a mẹ̀ ịsọvọ anị

¹ Ẹnẹyịmavara ộ kà a yị Imosiisi ka,

² Àa nyị ọza ọnị ọnọhụva anị Anisirẹrị sị ịsa yị tẹ, di o yi dị ẹ yị và a ịrẹma yọ nị, àa vị ka vị o sima a ụvọ dọ ịsa nị, àa vị ọ rẹ va mẹ ọnọhụva ịrẹma ụvọ nị, ọza ọnọọ ọ sị ịvị mẹ̀ hi Ẹnẹyịmavara.

³ Ọza oo re ve he ịsa ene vu di e cheeche hị́ eku ka ọnị e yi re e nị, ọza ọnọọ ọ sị ịvị mẹ̀ hi Ẹnẹyịmavara.

⁴ Ọza ana àa mẹ̀ ọnya ịnị ẹngụ ịvị ẹnẹnị, vee sí ịsa tụra ịsa ọnị ọ zị oze irikichi nyị avọọ varẹma.

⁵ Ọ̀ọ daka vị ịsa ọnị ọ hị́ eku ireche ụvọ anị. O vee sí avaba anị varẹma yị ọza ana nyị ịsa ọnọọ, dị ọ sị́ achehi ẹẹhị anị vaka a yọ ịhị tụra ịhị ana aa sịị mẹ̀ ịsọvọ ịvị ọnị ọ mẹ.

⁶ Ọ vaa sị ịdẹba ọnị ịsa ẹ yị zị hụụnị ịsụpa ọrụrụ ọnị ọ pá vee tu ohirẹsụ irehi Ohomorihi. Dị ọ̀ sị mẹ̀ ịsọvọ oyi sí ụta varẹma yị Ẹnẹyịmavara. Ịsa a ka à sịị ngọ ịsa aha ọnịnị ịnị irehi Ohomorihi a vaa sị ngọ ọ dị à yẹ ọpa ọnị ọ vị nị.

⁷ Ohirẹsụ irehi Ohomorihi ọnọọ vaa mẹ̀ ịsọvọ yị Ẹnẹyịmavara agụvị ịvị ọza ọnọọ, dị a vagu ọ.

Ịsọvọ eyinị-eyinị

⁸ Ẹnẹyịmavara ộ kà a yị Imosiisi ka

⁹ Ọ̀ mẹ ọda ẹnẹnị yị Eerọnị ọnịrị ezi anị ịnị ịpa ịsọvọ ọyị rị ịra. Ịsị ịsọvọ ọyị rị ịra vị ana a vaa navọ tụ ịrẹsụ ụta pooro dị eyi ọ̀ nị, dị ịra ọ̀ vavọọ zaa hi ọ.

¹⁰ Ohirẹsụ irehi Ohomorihi vee chire awuru ọgọdọ ọvwọọvụ anị, dị ọ rẹ vụ awuruchi oweyi ọvwọọvụ. Dị ọ na kụ atịtọ uye ọnọọ hụụ ịrẹsụ ụta ịsọvọ dị ọ sị tụ akaha anị.

¹¹ Ọ va naa vara ẹnya ọnị o ku hi ẹngụ, dị ọ va sị atịtọ ọnọọ jịnẹ hụụ ịzị aza ra hi, dị ọ na và hi aha ịnị ịrẹba.

¹² Ịra vị ana vaa za ịrẹsụ ụta ịsọvọ pooro kẹnẹ, dị asị a zẹẹ ka ò mí. Ẹnẹnẹ-ẹnẹnẹ vị ọnị ohirẹsụ irehi Ohomorihi vee che ọkụụ hi ọ. Dị o tò ịsị ịsọvọ ana a rị ịra tụ ọ ịrẹsụ, dị aa rị ụhị ịsị ịsọvọ ene sii pe Ohomorihi mẹ uzee ịra ịnị anị.

¹³ Ịra vị ana vaa za ịrẹsụ ụta ịsọvọ pooro kẹnẹ, dị asị a zẹẹ ka ò mí.

Ịsọvọ ana aā sịị kụ́ Ẹnẹyịmavara avọ

¹⁴ Ọda ana a vaa sị mẹ̀ ịsọvọ ịsọyịrị yị. Ezi Eerọnị nịnị ana vị ohirẹsụ irehi Ohomorihi ẹ vaa sị ọ vẹ ọvịdị Ẹnẹyịmavara ịrẹsụ ụta ịsọvọ nị.

¹⁵ Ọ vaa ka ayị ọyị kwọ ọnọọ uvoku ọnya beri angwẹ ọnịrị eturare ana a sị tụ ọ, dị ọ rị ọ ịra ịrẹsụ ụta ịsọvọ. Ọnọọ ọ sị zụ ka avaba anị a sị va yị Ẹnẹyịmavara nị. Agụ ịsị ịsọvọ ọnọọ vị eneē hine Ẹnẹyịmavara.

¹⁶ Ohirẹsụ irehi Ohomorihi nịnị ẹ vaa rị ana vọ nị, Ẹ vaa sị mẹ ịbụrẹdị ọnị ọza ẹ yị sị owu tụ, dị ẹ rị ọ ịzị a jị ka àa rị ọọ; ọnị vị ohweje ịnị ajẹngụ Ẹnẹyịmavara nị.

¹⁷ Ọnọọ vị ọnị Ẹnẹyịmavara sị yị ohirẹsụ irehi Ohomorihi nịnị ịnị ịsọyịrị ana a sị va mẹ̀ ịsọvọ yọ. Ẹnẹyịmavara ịnya kẹnẹ ọ nyị nị anka ịsị a sị va mẹ̀ ịsọvọ ịvị ọnịrị ọ yị sí ụta varẹma avọọ nị.

¹⁸ Avaba ezi ọnọrụ ịpa Eerọnị ẹ zụ rị ịnị ịsọyịrị ana a sị́ va mẹ̀ ịsọvọ yị Ẹnẹyịmavara pooro nị, ọza ẹnẹsa ọ̀ọ na sị ụvọ kanyị ọ, vị ee re ẹngụkata nị.

Àa nyị ohirẹsụ irehi Ohomorihi

¹⁹ Dị Ẹnẹyịmavara kà a yị Imosiisi ka,

²⁰ Ịhị àa sị ụvọ tụra wa ọyị vara wa ohirẹsụ irehi Ohomorihi, ẹ vaa mẹ̀ ịsọvọ ọnọnị yị Ẹnẹyịmavara: ẹ vaa sị ayị ọyị kwọ ikirogirami ọnyara ọ̀yịmẹ ịsọvọ ịsọyịrị naa yị Ẹnẹyịmavara. Ẹ̀ sị achẹva ẹnẹnẹ, dị ẹ̀ sị achẹva oruva.

²¹ A vaa sị angwẹẹ hùra a, dị a mẹ̀ ẹ nị. Àa sị ọ mẹ, dị a chaka a wiri-wiri, dị a sị ọ vẹ anka ịsọvọ ana a sị ayị mẹ, dị agụ anị ee hine Ẹnẹyịmavara.

²² Evere Eerọnị ana aa mẹ̀ ụkọrọ ohirẹsụ ọbanyị irehi Ohomorihi ọ vaa mẹ̀ ịsọvọ ọnọnị pooro nị. Avaba anị vị ana a vaa sị mẹ̀ ịsọvọ yị Ẹnẹyịmavara dị a rị ọ ịra saka-saka.

²³ Avaba ịsọvọ ọnị ohirẹsụ irehi Ohomorihi sị ayị mẹ vị ana a vaa rị ịra. Ẹ́ yị nyị ana a vaa rị ịnị anị.

Ịsọvọ ịvị

²⁴ Ẹnẹyịmavara ộ kà a yị Imosiisi ka,

²⁵ ọ̀ kà a yị Eerọnị ọnịrị ezi anị ka, ọda ịrẹyị ịsa ịsọvọ ịvị yị. Ịzị a ya wụ̀ ịsụpa ana a sị mẹ̀ ịsọvọ ana aā rị ịra, a rẹ vaa yaa wụ̀ ịsụpa ana a sị mẹ̀ ịsọvọ ịvị ọvịdị Ẹnẹyịmavara nị; Ẹnẹyịmavara ịnya kẹnẹ ọ nyị nị.

²⁶ Ohirẹsụ irehi Ohomorihi ana sị ịsụpa ọnọọ mẹ̀ ịsọvọ ịvị vị ana vaa rị ọ aha ana a kà yaa rị ọọ ịnị ohweje ajẹngụ Ẹnẹyịmavara ọ vaa yaa rị ọ nị.

²⁷ Ịsa tụra ịsa ana àa kanyị uye ịsụpa ọnọọ vaa vara ọnịnị; anị òo che ku awuru, awuru ọnọọ vị ana a vaa nyịna aha ọnịnị.

²⁸ Ụnọkọ ana àa sị hụ́ uye anị vị ana a vaa chaka; ama àa vị ụnọkọ enyusẹ a sị hụ́ ọ nị, a vaa nyịna ẹtẹẹtẹrẹ, dị a sị enyi họ̀kọ ọ.

²⁹ Ezi ọnọrụ ọnyọọnyị ịnị ovwoovu ohirẹsụ irehi Ohomorihi ọ zụ rị ịnị anị; ịsa Ohomorihi ịnya kẹnẹ ọ vị nị.

³⁰ Ama ẹ́ yị nyị ịsụpa ana a sị mẹ̀ ịsọvọ ịvị, ana a sị anya anị ngụ ịnị irehi Ohomorihi naa mẹ ịdanbono ẹvagu ịvị yị aza ana a vaa rị. Vị́ a vaa rị avaba anị ịra saka-saka nị.