Ireevi 4 - IWE ỌNỊNỊ

Ịsọvọ ịvị ọnị ọza nyeeyi mẹ

¹ Ẹnẹyịmavara ộ kà a yị Imosiisi ka

² ọ̀ kà yị Anisirẹrị nịnị ka ọza ọ̀ọ nyeeyi sị ahụ jịnẹ ọda Ẹnẹyịmavara, dị ọ mẹ̀ ịvị vaa mẹ saasa ọda ẹnịnị.

Ohirẹsụ ọbanyị irehi Ohomorihi ọ̀ọ mẹ ịvị

³ Àa vị ohirẹsụ ọbanyị irehi Ohomorihi ọ mẹ ịvị nị, ọ raa mẹ ka aza ana vọ ẹ̀ rị ịvị, ịvị ọnị ọ́ mẹ avọọ, ọ vaa sị ozi ụnọ araka ọnị ẹ̀ yị tụ ọkụmị vaa mẹ̀ ịsọvọ ịvị anịị yị Ẹnẹyịmavara.

⁴ Ọ vaa sị ọ vẹ enoze ajẹngụ Ẹnẹyịmavara, òo tu ịzọọ, dị ọ sị ụvọ tụra a ịrẹsụ, dị ọ wụ̀ ọ ọvịdị Ẹnẹyịmavara ịzọọ.

⁵ Dị ohirẹsụ ọbanyị irehi Ohomorihi ọnọọ ka ụnọ ọnọọ, dị ọ sị ọ ngụ ịnị ajẹngụ Ẹnẹyịmavara

⁶ Òo tụ ịzọọ dị ọ jị igege ngụ ọnọọ, dị o che e sẹ ẹtẹ ụpẹ ịhịmba ọvịdị ịta ana a sị jị oze aha ọnịnị ịzọọ.

⁷ Ohirẹsụ ọbanyị irehi Ohomorihi ọnọọ vaa ka ọnọọ ku ọpanyị ẹyịna ịrẹsụ ụta ana aā rị eturare ịra ịnị anị ana ya ịnị ajẹngụ ịzọọ. Dị ọ và ana vọ kara iruvo ụta ana a sịị rị ịsị ịsọvọ ịra ene hi tu enoze ajẹngụ Ẹnẹyịmavara ọnọọ.

⁸ Ọ vaa kụ avaba ụhị ụnọ ọnọnị, avaba ụhị ẹnya ịnị ịnẹ anị,

⁹ Ọ rẹ vaa kụ ẹhụ anị ẹyịva beri ụhị ẹnịnị ọnịrị ịpa ene hu ịnị ayị uye ọnọọ.

¹⁰ Dị ohirẹsụ irehi Ohomorihi ọnọọ rị avaba ụhị ọnọọ ịra ịrẹsụ ụta ịsọvọ. Ọ vaa rị ọ ịra anka ọ́ mẹẹ̄ rị ụhị uye ana a sị vaa mẹ̀ ịsọvọ oyi pe Ohomorihi mẹ uzee ịra avọọ.

¹¹ Ama ọ vaa sị ụpa ụnọ ọnọọ ọnịrị uye anị beri ịrẹsụ, ahụ, ẹnya ịnị ịnẹ anị beri iruvu

¹² dị ọ sị ọ jịnẹ tụ ẹhẹ hụrị udi ana aza hị́. Dị ọ sị ọ nọ aha ana nị ịzị aa va atịtọọ ha, òo tu ịzọọ, dị ọ sị ọkụ ka ịra, dị ọ sị rị avaba ụnọ ọnọọ ịra.

Avaba anẹkụra ẹ̀ẹ mẹ ịvị

¹³ Àa vị avaba Anisirẹrị e nyeeyi jịnẹ ọda Ẹnẹyịmavara dị ẹ mẹ ịvị, dị eyi ẹnịnị e yi tu ọ nị. Ẹnịnị ẹ̀ẹ mẹ̀ ịsa ọnyọọnyị ọnị Ẹnẹyịmavara kà à sị á mẹ, dị ẹ rị ịvị nị

¹⁴ obobooro ọnị ẹnịnị ẹ̀ẹ yẹ ka ẹnị ẹ́ sị ịvị mẹ, avaba ẹkụra vaa sị ozi ụnọ ọ yị mẹ̀ ịsọvọ ịvị ẹnịnị. Ẹ vaa sị ọ vẹ enoze ajẹngụ Ẹnẹyịmavara.

¹⁵ Ẹnị ọdọvịdị nịnị ẹkụra vaa sị ụvọ tụra ụnọ ọnọọ ịrẹsụ dị ẹ wụ̀ ọ ịzọọ.

¹⁶ Ohirẹsụ ọbanyị irehi Ohomorihi vaa ka ụnọ ọnọọ, dị ọ sị ọ ngụ ịnị ajẹngụ Ẹnẹyịmavara na

¹⁷ Ọ vaa jị igege ngụ ọnọọ, dị o che e sẹ ẹtẹ ụpẹ ịhịmba ọvịdị ịta ana a sị jị aha ọnịnị ịzọọ.

¹⁸ Ọ vaa ka ọnọọ kụ ọpanyị ẹyịna ịrẹsụ ụta ana a rị eturare ịra ịnị anị ana ya ịnị ajẹngụ ọnọọ. Dị ọ và ana vọ kara iruvo ụta ana a sịị rị ịsị ịsọvọ ịra ene hi tụ enoze ajẹngụ Ẹnẹyịmavara ọnọọ.

¹⁹ Dị ọ vaa sị avaba ụhị araka Imaaru ọnọọ dị ọ rị ọ ịra ịrẹsụ ụta ịsọvọ.

²⁰ Ọ vaa mẹ araka imaaru ọnọnị anka ọ́ mẹ mẹ ana á sị vaa mẹ̀ ịsọvọ ịvị avọọ. Aanị ọ mẹ vaa mẹ̀ ịsọvọ yị aza agụvị ịvị ẹnịnị, dị a vagu ịvị ẹnịnị yị wa nị.

²¹ Ohirẹsụ ọbanyị irehi Ohomorihi vaa sị araka imaaru ọnọọ tụ ẹhẹ hụrị udi ana aza hi, dị ọ na rị ọ ịra anka ọ mẹ rị ọnị ọ sị mẹ̀ ịsọvọ ịvị ọnị ụvọta ịra avọọ. Ịsọvọ ọnọnị a sịị vaa gu ịvị ana avaba anẹkụra mẹ nị.

Àa nyị ọdọvịdị ịrẹsụ ana mẹ ịvị

²² Àa vị ọdọvịdị ẹkụra o nyeeyi jịnẹ ọda Ẹnẹyịmavara dị ọ sị ịvị mẹ̀ nị,

²³ Àa maanịị ka a yọ kẹnẹ ka ọ sị ịvị mẹ, ọ vaa sị ịdẹ ẹnẹ ẹ̀ yị tụ ọkụmị vaa mẹ̀ ịsọvọ ịvị anị.

²⁴ Ọ vaa sị ụvọ tụra ịdẹ ọnọọ ịrẹsụ, dị ọ wụ̀ ọ ịzị a yaa wụ ịsị ịsọvọ ana aā rị ịra ọvịdị Ẹnẹyịmavara ịsị ịsọvọ ana aa sịị vaa gụ ịvị ọ vị nị.

²⁵ Ohirẹsụ irehi Ohomorihi vaa jị igegee ngụ ịsụpa ọnọọ dị ọ sị da ọpanyị ẹyịna ụta ịsọvọ, dị ọ và ana vọ kara iruvo ụta ọnọọ.

²⁶ Ọ vaa rị avaba ụhị ịsụpa ọnọọ ịra ịrẹsụ ụta ịsọvọ anka ọ mẹ rị ụhị ịsụpa ana a sị mẹ̀ ịsọvọ ọ yị pe Ohomorihi mẹ uzee ịra avọọ. Aanị ohirẹsụ irehi Ohomorihi mẹ vaa mẹ̀ ịsọvọ yị ọdọvịdị ọnọọ, dị aa va gụ ịvị anị yọ nị.

Ọza kẹnẹ ọ̀ọ mẹ ịvị

²⁷ Àa vị ọza ịnya ịnị aza kẹnẹ ana vọ, o nyeeyi jịnẹ ọda Ẹnẹyịmavara, dị ọ sị ịvị mẹ̀ nị,

²⁸ Àa maanịị kà a yọ kẹnẹ ka ọ sị ịvị mẹ, ọ vaa sị ọnyị ẹvụ ẹnẹ ẹ̀ yị tụ ọkụmị vaa mẹ̀ ịsọvọ ịvị anị.

²⁹ Ọ vaa sị ụvọ tụra ọnyị ẹvụ ọnọọ ịrẹsụ, dị aa wụ̀ ọ ịzị a yàa wụ̀ ịsụpa ana a sị vaa mẹ̀ ịsọvọ ana a rị ịra.

³⁰ Ohirẹsụ irehi Ohomorihi vaa jị igegee ngụ ịsụpa ọnọọ, dị ọ sị da ọpanyị ẹyịna ụta ịsọvọ, dị ọ và ana vọ kara iruvo ụta ọnọọ.

³¹ Ọ vaa kụ avaba ụhị ịsụpa ọnọọ anka a mẹ kụ ụhị ịsụpa ana a sị vaa mẹ̀ ịsọvọ ọ yị pe Ohomorihi mẹ uzee avọọ. Ohirẹsụ irehi Ohomorihi vaa rị ọ ịra ịrẹsụ ụta ịsọvọ dị ọọ dà agụ ohine hi Ẹnẹyịmavara. Aanị ohirẹsụ irehi Ohomorihi mẹ vaa mẹ̀ ịsọvọ yị ọza ọnọọ, dị aa vagu ịvị anị yọ nị.

³² Ọza àa sị ozi atẹmẹ vaa mẹ̀ ịsọvọ agụvị ịvị anị, ọ sị ẹnẹ ẹ̀ yị tụ ọkụmị.

³³ Ọ vaa sị ụvọ tụra a ịrẹsụ, dị a wụ̀ ọ ịzị a yaa wụ̀ ịsụpa ana a sị va mẹ̀ ịsọvọ ana a rị ịra.

³⁴ Ohirẹsụ irehi Ohomorihi vaa jị igegee ngụ ịsụpa ọnọọ, dị ọ sị da ọpanyị ẹyịna ụta ịsọvọ. Dị ọ va ana vọ kara iruvo ụta ọnọọ.

³⁵ Ọ vaa kụ avaba ụhị atẹmẹ ọnọọ anka a mẹ kụ ụhị atẹmẹ ana a sị va mẹ̀ ịsọvọ ọyị pe Ohomorihi mẹ uzee avọọ, dị ọ rị ọ ịra ịrẹsụ ụta beri ịsọyịrị ana a sì va mẹ̀ ịsọvọ yị Ẹnẹyịmavara. Aanị ohirẹsụ irehi Ohomorihi mẹ vaa mẹ vaa mẹ̀ ịsọvọ yị ọza ọnọọ, dị a vagu ịvị anị yọ nị.