Ireevi 25 - IWE ỌNỊNỊ

Ịrayị ọhụhịmba ana vị ụhwọtụ

¹ Imosiisi mẹ yà ịrẹsụ ataba Ịsịnayị, Ẹnẹyịmavara ộ kà a yị ọ ka,

² ọ kà a yị Anisirẹrị nịnị ka, ịjị ẹnịnị ẹ̀ẹ va sị ngụ ịnị ẹtẹ ọnị ọnị aa sịị yị wa, ẹnịnị ẹ̀ sị ụbanyị yị Ẹnẹyịmavara, dị ẹ̀ sị ụhwọtụ yị ẹtẹ ọnọọ, dị à sị ẹ kụ ọ ịrẹkụ ịnị ana tụ ọ ịrayị ọhụhịmba o.

³ Ịrayị ịhịnọnyị ẹnịnị vaa kụ ẹtẹ ọnọọ ịrụkụ, dị e tenyi hi ọchị ịvayịnị ẹnịnị, dị ẹ kụ ịsị ịnị aarẹ ẹnịnị gụ nị:

⁴ Ama ịnị ịrayị ọhụhịmba, vị ịrayị ana a sị tịtẹ yị Ẹnẹyịmavara, dị ọ vị ịrayị ọnị ẹtẹ ọnọọ vaa sị tụ́ ụhwọ́ saka-saka.

⁵ Ịsa ọnị ọnị ụvọta ọ̀ọ mẹ tụ ịnị aarẹ, ọnị ẹnịnị è yị chire, à sị ẹ na kụ ọ gụ. Ọchị ọnị ẹnịnị è yi tenyi hi dị ẹ tụ ẹtụtụ, à sị ẹ na ha wa. Ịrayị ọnọọ vị ọnị ẹtẹ ọnọọ vaa sị tụ́ ụhwọ́ saka-saka.

⁶ Ọ̀ọ daka vị ka ọza ẹ́ yị kụ ẹtẹ ọnọọ ịrụkụ ịnị ịrayị ọhụhịmba ọnọọ, ọ́ vaa mẹ̀ ịsọyịrị yị wụ nịnị, dị ọrịhị awụ nịnị anọrụ ọnịrị anẹẹ, aza ọnị ụ hị́ ụkọrọ nịnị, ẹnịrị azọga ana ra pe u nịnị ẹnị rẹ nyị ịsọyịrị.

⁷ Ẹtẹ ọnọọ rẹ yị vaa mẹ ịsọyịrịị yị ịsụpa ọnị ụ pa tụ ini eehi nịnị ọnịrị uye ịnị avị ene hi ịnị ẹtẹ awụ nịnị. Avaba ịsị ẹtẹ ọnọọ ọ̀ọ mẹ vị ana a vaa rị.

Ịrayị ọyị va ẹnya ana sị za ụta ịrẹma yị ọza ana nyị

⁸ Ẹnẹyịmavara kà Anisirẹrị vaa za ịrayị ịhịmba oze ịhịmba ịrịka, dị avaba anị vị ịrayị ọ jị ọnya ha ịnị ẹvarẹwụ.

⁹ Ịhị ẹ tụ ẹkụhị ẹẹwụ ịnị ụhwẹ ọhụhịmba, ana vị ẹkụhị ana a sịị vagu ịvịị yị aza, à tụ́ ọza dị ò ne hu ọpanyị ngụ avaba ẹkụra zịịzị.

¹⁰ Ọ kà aanị ẹnịnị mẹmẹ vaa sị ana gụ ọ ịrayị ẹvarẹwụ tụ irenyi nị. Ẹnịnị vaa nọ̀ọ ịnị ịrayị ọnọọ ka aa ngwa avaba aza ana ra ịnị ẹtẹ ọnọọ tịtẹ. A vaa và avaba ogu ana a vịdị ná ịrẹmaa yị aza ana vịdị nyị wa, à vị yị ezi ẹnịnị, dị a hụrẹ avaba aza ana vịdị hị́ ọrịhị ụvọ ka ẹẹ vàa ka anda ẹnịnịị na.

¹¹ Ịrayị ụnarenyi ịrayị ẹvarẹwụ ọnọọ vị yị wa nị. Ọ kà a sị ẹnịnị chire ịsa tụ ịnị aarẹ, dị asị ẹ rẹ na kụ́ ịsị ẹẹ mẹ yị ẹngụ anị tụ ịnị aarẹ. A sị ẹnịnị rẹ ha ẹtụtụ ọchị ịvayịnị ẹnịnị ọnị ẹnịnị è yi tenyi hi.

¹² Avaba ịrayị ọnọọ vị ana vaa vị ịrayị ụnarenyii yị wa. Ịsa ọnị ẹtẹ ọnọọ ọ̀ọ mẹ kẹnẹ ẹnịnị vaa rị nị.

¹³ Ịnị ana tụ ọ ịrayị ẹvarẹwụ ọnọnị, a vaa và avaba ogu ana vịdị ná ịrẹma yị aza ana vịdị nyị wa obooro.

¹⁴ Avọọ Anisirẹrị àaa ná ẹtẹ yị ọnọhụva anị Anisirẹrị à vị ka vaa hị́ ẹtẹ hụụnị ụvọ anị, ò re ka ọnị mẹ ịzẹyịza ịnị anị.

¹⁵ Ẹhwị ịrayị ọnị ẹtẹ ọnọọ va zụụ mẹ̀ ịsaa vị dị ịrayị ana a vana sịị và ẹtẹ ịrẹma yị aza ana nyị ò tù ọ́ vaa jị irihii tụ ọ, dị a rẹ vavọọ hị́ ọ nị.

¹⁶ Ịrayị ọnị ẹtẹ ọnọọ va zụụ mẹ̀ ịsa ọ̀ọ rụrụ, dị a ná a katarihi, ama ịrayị ọnị ọ́ vaa mẹ̀ ịsaa vị ẹ̀ yị rụrụ, dị a ná a pō.

¹⁷ Ẹnẹyịmavara kà Anisirẹrị nịnị è hí angwa ọnị Ohomorihi, dị à sị ẹnịnị mẹ ẹngụ rị; agụvị ka, ọnị ọ vị Ẹnẹyịmavara Ohomorihi ẹnịnị nị.

Aha ana yà ịnị ịrayị ọhụhịmba

¹⁸ Agụvị avọọ ẹnịnị ẹ̀ saasa avaba ọda anị, agụvị ẹnịnị ẹ̀ rá ịnị ẹtẹ ọnọọ dị à sị a nyị ịsị ẹ́ mẹ wa.

¹⁹ Ọ kà, ẹtẹ ọnọọ vaa mẹ̀ ịsaa yị wa, dị ẹyaa rị dị ịnẹ aa ha wa. Ẹ vaa rá ịzọọ, dị ẹ́ yị nyị ịsị ẹ mẹ̀ wa.

²⁰ Ama ọzọnyị ọ́ nyẹngụ ee họ̀ use ka sị ẹnị vaa rị ịnị ịrayị ọhụhịmba, ịrẹma ọnị ẹnị ẹ̀ yị vaa mẹ̀ ịsaa tụ ịnị aarẹ, dị ẹnị ẹ̀ yị rẹ vaa kụ ịsaa gụ?

²¹ Ẹnẹyịmavara kà ọnị vaa mẹ ka ò zé yị ẹtẹ ẹnịnị ịnị ịrayị ọhụhịnọnyị, dị ẹtẹ ẹnịnị mẹ̀ ịsa ẹtẹẹtẹrẹ ana vaa hụ waa rịị mẹ ịrayị ẹẹta.

²² Ọ kà ịjị ẹnịnị ẹ̀ẹ varẹma chire ịsa tụ ịnị aarẹ ẹnịnị ịnị ịrayị ọhụhịnta, ịsa ọkụkụ ene hi ẹtẹ ẹnịnị vaa rị pooro nee tu ịrayị ọhụhịịna dị ịsa ọwọọwa ọ̀ vaa jịnẹẹ tụ ẹhẹ.

Ọyị va ogu ọza ịrẹma yọ

²³ Ẹnẹyịmavara kà à sị Anisirẹrị nịnị ná ẹtẹ ẹnịnị yị ọza ka ọ̀ vị ọ́ọza ọnọọ pooro, agụvị ka ẹ́ yị vị ẹnị ẹ nyị; Ohomorihi ọ nyị nị. Ọ kà Anisirẹrị nịnị vị ana sị mẹẹ anka anẹkụra ọsa ana á zẹẹ ka ee rò ẹtẹ ọnọọ avọọ.

²⁴ Ịnị avaba ẹtẹ ẹnịnị, aa nyị ka à yẹ ka ọza ana nyị ẹtẹ dị ọ́ ná a, ọ́ rẹ zụ hị́ ọ varẹma.

²⁵ Ọ kà, àa nyị Anisirẹrị ọnị osiye za, dị ọ dà ẹtẹ anị, dị ọ́ ná a nị, aza ẹngụ anị ana gụrị ọ hu kere-kere vaa vẹ vaa hị́ ọ varẹma.

²⁶ Ọza ẹnẹ ẹ̀ yị nyị anda ana vọrọ ka ọ̀ hị́ ẹtẹ ọnọọ varẹma, ọ́ zụ vana nyị ịsa ụhwọọ dị ọ hụ ọ hị́ ọ varẹma yị ẹngụ anị.

²⁷ Ọ̀ọ maanị ya, ọza ọnọọ vee sí ọza ana hị́ ẹtẹ ọnọọ ụta ịrayị ana vọ dị ịrayị ana á vana sịị và ẹtẹ ịrẹmaa yị aza ana nyị ò tu. Ụmẹ ọnọọ ọ́ yaanị sị dọ ẹtẹ anị varẹma nị.

²⁸ Ama, ẹ̀ yị nyị ẹkẹhị ana hụ ọ hị́ ẹtẹ anị varẹma, ẹtẹ ọnọọ vaa vị ọza ana hị́ ọ pooro nee tu ịrayị ana vana sịị và ẹtẹ ịrẹmaa yị aza ana nyị. Ịrayị ọnọọ á vaa và ẹtẹ ọnọọ ịrẹma yị ọza ana nyị obooro nị.

²⁹ Ọza ọ̀ọ ná irehi ana aza ra ịnị anị ịnị ẹkụra ana jị ọvọ kara, oze ọọ tịtẹ yị ọ ọ̀ yị hị́ ọ varẹma ịnị ịrayị ọyịvụrụ ịpaapa, nyima hụrị ẹkụhị ọnị ọ sị ná a.

³⁰ Ama àa vị ka ẹ yị hị́ ọ varẹma ịnị akakana ịrayị ọyịvụrụ ọnọọ, ọza ọnọọ ẹ́ yị ma vana kụkụ hị́ ọ varẹma paa. Ọza ana hị́ irehi ọnọọ ọnịrị evere anị ẹ kụkụ nyị pooro nị. Ọza ẹ́ yị vaa và a ịrẹma ịnị ịrayị ana a sịị̄ và ịsa ịrẹmaa yị aza ana nyị.

³¹ Ama irehi ene hi ịnị ẹkụra eweyi-eweyi ọnị ọza ẹ̀ yị jị ọvọ kara vị ana a vaa sị eyi ọnyọọnyaa ré ọnịrị aarẹ. Aza ana nyị irehi ẹnẹẹ obooro ee re oze hị́ ọ varẹma. Ẹnịnị vị ana a vaa varẹma yị aza ana nyị ịnị ịrayị ana a sịị̄ và ịsa ịrẹma.

³² Ama ẹ́ yị nyị ụmẹ ọnị Anireevi nịnị ẹ̀ yị nyẹngụ sị hị́ ịsa ẹnịnị varẹma ịnị ẹkụra-ẹkụra ana a sị yị wa.

³³ Àa nyị Anireevi ana ná irehi ịnị ẹkụra ẹnịnị ọnya, dị ẹ̀ yị hị́ ọ varẹma nị, a vaa và irehi ọnọọ ịrẹma yị ọ ịnị ịrayị ana a sịị̄ và ịsa ịrẹma yị aza ana nyị; ka irehi ọnị Anireevi nịnị nyị hi ịnị ẹkụra ẹnịnị vị ịsa ẹnịnị pooro ịnị akakana Anisirẹrị nịnị.

³⁴ Ama ẹ́ yị nyị ọza ana nyayịnẹ ná ẹtẹ ana aa kụ ịsụpaa rị ana kara ẹkụra Anireevi nịnị. Ịsa ẹnịnị ọ vị pooro nị.

Ẹkẹhị ọyị rere Onosiye

³⁵ Ẹnẹyịmavara ộ kà a yị Anisirẹrị nịnị ka, Anda ẹnịnị Anisirẹrị ana ra gụrị wa èe re osiye, dị ẹ̀ yị zụ pá ẹngụ anị nị, ẹnịnị è sì ịsa yị ọza ọnọọ anka anẹkụra ọsa avọọ ụvị dị ọ̀ yị ra pe wa.

³⁶ Ọ kà à sị ẹ́ dọ ọtụrọsarẹsụ tụ ịnị ịsa e si rere ọza ọnọọ, ama ẹnịnị ẹ̀ saasa ịrẹyị Ohomorihi, dị anda ẹnịnị Isirẹrị ọ ra pe wa.

³⁷ Ọ kà a sị ẹ́ sị ẹkẹhị rere anda ẹnịnị dị ẹ̀ dọ ọ ọtụrọsarẹsụ tụ ọ. À sị ẹ rẹ ná ịsọyịrị yị ọ agụvị ẹnị ẹ rị ọ ọgụ.

³⁸ Ọ kà, ọnị ọ vị Ẹnẹyịmavara Ohomorihi ẹnịnị, ana kụ wa hụrị ẹtẹ Ijipiti ka ọnị ọ va sị ẹtẹ Ikanaani yị wa, dị ọnị ọ̀ vị Ohomorihi ẹnịnị nị.

Ụmẹ ọyị hụrẹ ọrịhị ụvọ

³⁹ Ẹnẹyịmavara kà, osiye ọ̀ọ za Anisirẹrị ọnyọọnyị pooro dị ọ ná ẹngụ anị ọrịhị yị ọnọhụva anị Anisirẹrị nị, à sị ẹ za a mẹ̀ ụkọrọ orihi o.

⁴⁰ Ọ kà ọza ọnọọ vị ana vaa yàa pe wa anka ozi ahụ ọnịrị ọzọga avọọ. Ọ vaa mẹ̀ ụkọrọ yị wa pooro nee tu ịrayị ana a sịị̄ và ịsa ịrẹmaa yị aza.

⁴¹ Ịjị ụmẹ ọnọọ òo tu, ọza ọnọọ ọnịrị ezi ọnị ọ́ ma ịzọọ vaa vàa ka anda ẹnịnịị na, dị ọ na ya ịnị ẹtẹ ohiku anị nịnị.

⁴² Ẹnẹyịmavara kà Anisirẹrị nịnị vị ezi ahụ anị, ọnị ọ kụ wa hụrị ẹtẹ Ijipiti. A sị ọza ná wa ọrịhị o.

⁴³ Ọ kà Anisirẹrị ẹ̀ saasa ịrẹyị ọnị Ohomorihi ẹnịnị, dị à sị ẹ́ chamayị yị anda ẹnịnị ana àa ná ẹngụ anị ọrịhị.

⁴⁴ Ẹnịnị èe si ka ẹnị ẹ̀ nyị ọrịhị, àa vị ọnọrụ, àa vị ọnẹẹ, ẹnịnị ẹ nyẹngụ na hị́ wa hụụ ịdị anẹkụra ana vọ kara wa.

⁴⁵ Ọ kà ẹnịnị ẹ́ rẹ nyẹngụ hị́ ezi anẹkụra ọsa ana ra pe wa. Ẹngụ ezi ẹnẹẹ ana á ma ịnị ẹtẹ ẹnịnị ẹ́ zụ vara ogu yị wa.

⁴⁶ Ọ kà, ẹnịnị ẹ zụ navọ ẹngụ ezi ẹnẹẹ ẹnẹ hị́ yị ezi ẹnịnị ka ẹ̀ vị ogu yị wa; dị ẹnịnị aa kụ́ yị wa pooro zịna-zịna. Ama à sị ẹnịnị chamayị yị anda ẹnịnị Anisirẹrị ọnyọọnyị.

⁴⁷ Ẹnẹyịmavara kà, à kà a ka anẹkụra ọsa ana ra pe wa ọọ vara ọnyẹkẹhị, dị anda ẹnịnị Anisirẹrị ọnya ee re osiye, dị ọ́ ná ẹngụ anị ọrịhị yị anẹkụra ọsa ọnọnị, avị yị ọza ịnyara ịnị anda anẹkụra ọsa ọnọnị nị,

⁴⁸ ịrẹma ọnị ọnyẹkẹhị ọnọnị sị ọ hị́, oze ọọ tịtẹ ka à yị hị́ Anisirẹrị ọnọnị varẹma. Ọyịnyara anị ọnya ọ́ zụ hị́ ọ varẹma.

⁴⁹ Ọyịnyara ada anị ọnọrụ, à vị ọnị ọnịrị vị ezi ẹyịnyara ọnọrụ, à vị aza ẹngụ anị ọnya ana gụrị ọ, ọ́ zụ hị́ ọ varẹma. Àa va vị ọnị ụvọta ọ vana nyị ẹkẹhị nị, ọ́ rẹ zụ hị́ ẹngụ anị varẹma.

⁵⁰ Anisirẹrị ọnọnị ọnịrị ọza ana hị́ ọ vaa geyi, dị ẹ za ịrayị ịrịka hụrị ịrayị ọnị ọ́ sị ná ẹngụ anịị yị ọ na ngụ ịrayị ọnị ọ́ sị ná ẹngụ anịị yị ọ na ngụ ịrayị ana a vana sịị và ịsa ịrẹmaa yị aza ana nyị. O vee sí ụta ọpa ịrayị ana vọ, dị ịrayị ana a sịị và ịsa ịrẹmaa yọ tù. Ọpa ụta ene eē si ọza ana á dọ ụkọrọ a vaa sị jị irihi ụta ọnị Anisirẹrị ọnọọ vee sí nị.

⁵¹ Ịrayị ọ̀ọ vọ rụrụ dị ụmẹ ana a sịị và ịsa ịrẹma ò tu, dị o sí ọpa ana vọ ịnị ẹkẹhị ene e sí á mẹ hị́ ọ.

⁵² Àa vị ịrayị chee ọ vọ nị, ọpa ụta ọnọọ ó re vee síi yị ọza ana hị́ ọ dị ọ̀ hụrẹ ẹ ụvọ nị.

⁵³ Vị́ ọ vaa sị mẹ anka ọza ana á dọ ka ọ̀ vaa mẹ̀ ụkọrọ ịrayị-ịrayị avọọ ịdị ọza ana hị́ ọ nị. Ọga anị ẹ́ yị nyayịnẹ chamayị yọ.

⁵⁴ Àa vị ka ọza ẹ́ yị zị oze ẹnẹnị ọnyọọnyị hị́ ọ varẹma, ọza ana hị́ ọ vaa hụrẹ ọnịrị ezi ọnị ọ́ ma ịzọọ ụvọ ịnị ịrayị ana á vana sịị và ịsa ịrẹmaa yị aza ana nyị.

⁵⁵ Ẹnẹyịmavara kà, Anisirẹrị ọnyọọnyị ẹ́ yị zụ vị ọrịhị yị ọza pooro, agụvị ka Anisirẹrị nịnị vị ezi ahụ ọnị Ẹnẹyịmavara. Ọnị ọ kụ wa hụrị Ijipiti nị. Ọnị ọ vị Ẹnẹyịmavara Ohomorihi ẹnịnị nị.