Ireevi 21 - IWE ỌNỊNỊ

Ido Ohirẹsụ irehi Ohomorihi

¹ Ẹnẹyịmavara ộ kà yị Imosiisi ka ọ jị ido ẹnịnị yị ezi Eerọnị ana ohirẹsụ irehi Ohomorihi. Ộ ka enyisi ọ vị nị ka ọza ẹnyẹnyị ẹnịnị ọ kanyị oku anda ẹnịnị eni ee su.

² Ama ẹ yị nyị ọ mẹ ka, ọza ịnị ẹngụ ọza oo su. Ẹhụ ọza ẹngụ ọza anka ọnyị ọza, ada ọza, ọyịnyara ọza,

³ ọ daka vị ozwoorihi ọnị ẹ yị nyị ọnọrụ ana gụrị ọza.

⁴ Vọrọ ka ohirẹsụ irehi Ohomorihi nịnị ẹ kanyị ịsa ene vee du wa ẹngụ anka ọdọvịdị aza.

⁵ Asị ẹnịnị zị ẹngụ oku pooro dị ẹ kụ́ ịrẹsụ, a vị dị ẹ hara ịrẹsụ, a vị dị ẹ jị ịrẹkụ.

⁶ Ẹnịnị ẹ mẹ̀ ebira aza Ohomorihi, asị ẹ mẹ̀ ụhị nyị ịrẹha anị; ka ẹ yaa sị ịsa ịsọvọ vaa yọ, ẹnịnị ẹ za ido.

⁷ Ohirẹsụ irehi Ohomorihi nịnị vị aza anị. Agụvị avọọ ẹnịnị ẹ yị vaa nyị ọsẹrẹka, a vị ọnyẹnẹẹ anaa sị hụ, a vị ọza ene ree yi ọnọrụ.

⁸ Ẹnịnị ẹ raa ẹhẹ ẹnịnị agụvị ịsa ịsọvọ ọnị ẹ sị yị Ohomorihi, Ẹnẹyịmavara ana nyị wa tụ́ irenyi vị ọza ọnịnị agụvị ẹnịnị ẹ vị aza ọnị ẹhẹ ẹnịnị nị.

⁹ Ozi ohirẹsụ irehi Ohomorihi àa sẹ̀ ịrẹka, aa mẹ̀ ụhị nyị ada nị ọnịrị ẹngụ anị avọọ nị. A rị ọ ịra o su.

¹⁰ Ohirẹsụ irehi Ohomorihi ọbanyị vị anaa ka angwẹ hi ịrẹsụ ọnị aa sị nyị ọ ka ọ navọ ka ẹyị anị o ta iyere hị́ ọ ịrẹsụ a vị ka ọ zị ẹngụ oku dị ọ ha awuru anị hi ẹngụ.

¹¹ Ọ yị vaa gụrị oku ọ daka vị ada anị ọ vị ọnyị anị agụvị asị o du ọ ẹngụ.

¹² Ohirẹsụ irehi Ohomorihi ọbanyị ọ yị vaa hụụnị ajẹngụ Ohomorihi nọ izoku. Enyisi ọ vị nị ka ọ vavọọ mẹ̀ nị. Ẹnẹyịmavara kà ọnị sị angwẹ nyị ọ ka ọ vị anị nị.

¹³ Abaabo ọ vị ka ohirẹsụ irehi Ohomorihi ọ nyị ozwoorihi ọnị ẹ yị yẹ ọnọrụ nị.

¹⁴ Ẹngụ ozwoorihi ọnọọ vị ana hụnị ịrẹsụ Anireevi, ọ yị vaa nyị ọsẹrẹka, a vị ozi anaa sị hụ, a vị ọza ene yi ọnọrụ da.

¹⁵ Ọ yị vaa mẹ̀ ụhị nyị ezi anị ịnị akakana aza anị, agụvị ka Ẹnẹyịmavara ọ raa nyị ọ tụ́ irenyi.

¹⁶ Ẹnẹyịmavara ộ ka yị Imosiisi

¹⁷ ka ọ̀ ka yị Eerọnị ka asị a nyị ụmẹ ọnị evere ana vị ọkụmị sị sịị ịsa ịsọvọ va yị ọnị.

¹⁸ Ọda ọnọọ ọ za ogweyi, oswahụ, ọza ana nyị akanya eyirẹsụ ọnịrị ịnị ọchẹngụ

¹⁹ Avọọ ọ mẹ za ochahụ a vị ọza ene che ụvọ,

²⁰ ọnịka ọnịrị ọza ana jị akụrẹ, ọza ana nyị akanya eyi a vị ụkụ ẹngụhụ neberi ọza ọnị ata anị sị va ha.

²¹ Ẹ yị nyị evere Ireevi ana vị ohirẹsụ irehi Ohomorihi ana nyị ụkụ ọnyọọnyị ana vaa sị̀ ịsa ịsọvọ vẹ ọvịdị Ẹnẹyịmavara vụrụ-vụrụ.

²² Ẹngụ ọza ọnọọ ọ yị zụ rị ịsa ịsọvọ Ohomorihi, ịsa ịsọvọ ọnịnị ọnịrị ịsa ịsọvọ ọnịnị keekere.

²³ Asị ọ ka gụrị ịta ana a sị jị oze a vị ka ọ gụrị ụta ịsọvọ. Asị o du ịsa ọnịnị ẹnẹnị ẹngụ agụvị ka Ẹnẹyịmavara ộ raà mẹ wa ọnịnị.

²⁴ Avọọ Imosiisi mmẹ ka yị Eerọnị ọnịrị ezi anị beri avaba Anisirẹrị nịnị nị.