Ireevi 20 - IWE ỌNỊNỊ

Ụya anaā sịị rị ọza ana mẹ̀ ebira odivi

¹ Ẹnẹyịmavara ộ kà a yị Imosiisi ka

² Ọ̀ kà a yị Anisirẹrị nịnị ka, àa nyị ọza ịnị ẹngụ ẹnịnị, ọ̀ọ vị anẹkụra ọsa ana ra ịnị akakana ẹnịnị ana sị ozi anị ọnyọọnyị mẹ ori ana aā hị́ Imorẹkị ẹyịza, avaba Anisirẹrị ẹ̀ sị ịrẹta-ịrẹta wụ̀ ọ.

³ Ọnị nyẹmba vaa và eyi ịrazịị ka ọza ọnọọ dị ọnị é yi kuku rò o vaka aza anị, agụvị ka ộ sị ọnya ịnị ezi anị mẹ Imorẹkị ẹyịza. Ịsị ọnị ọ́ mẹ avọọ vị ọnị ọ sị du aha ana aā yaa hẹkẹ ọnị ẹngụ, dị ẹ rẹ sị mẹ̀ ụhị nyị ịrẹha ọnịnị anị nị.

⁴ Anisirẹrị nịnị ẹ̀ẹ si eyi hụụnị ịrẹyị ọza ọnọọ ka ộ sị ọnya ịnị ezi anị mẹ Imorẹkị ẹyịza, dị ẹnịnị ẹ̀ yị wụ̀ ọ nị,

⁵ Ọnị ụvọta vaa và eyi ịrazịị ka ọza ọnọọ ọnịrị avaba anineehi anị, ọnị ọnịrị dudu naa mẹ ori ana aā hị́ Imorẹkị, dị ẹnịnị ẹ̀ yị mẹ ịzẹyịza hi ọnị, ọnị ẹ́ yi kụkụ vaa za wa ịrịka beri aza nị.

⁶ Ọza àa nọ ịdị aza ana aā họ̀ ụhwẹ aza ene sú usirẹyị, dị ahịka ẹnị ẹ kụkụ aa sị ajuwee yị ọ nị, ọnị Ẹnẹyịmavara vaa và eyirazịị ka ọza ọnọọ, dị ọnị ẹ́ yị kụkụ za a ịrịka beri aza anị.

⁷ Ọ kà ẹnịnị ẹ̀ sị ẹngụ ẹnịnị tụ irenyi, agụvị ka ọnị ọ vị Ẹnẹyịmavara, Ohomorihi ẹnịnị nị.

⁸ Ẹnịnị ẹ̀ sị ụvọ za ọda anị, dị ẹẹ saasa a, agụvị ka ọnị ọ vị Ẹnẹyịmavara ana nyị wa tụ irenyi nị.

⁹ Ẹnẹyịmavara ộ mẹ̀ ẹ ọda ka, ọza tụra ọza anaa kụ́ ada anị à vị ọnyị anịị ụhụ, à wụ̀ ọ. Ọza ọnọọ o si ẹngụ anị isu nị. À sị a nyị ọza ana á tụ ohuvọ.

¹⁰ Ọza ọ̀ọ sị ose ọnọhụva anị, à wụ ọnọrụ ọnọọ ọnịrị ọnyẹnẹẹ ọnọọ.

¹¹ Ọza ọ̀ọ sị ose ada anị, ọ sị ụhị mẹ nyị ada anị. Ọza ọnọọ ọnịrị ose ada anị ọnọọ vị ana vaa wụ̀. Ẹnị ẹyịva e sị ẹngụ ẹnịnị isu nị. À sị a nyị ọza ana á tụ ohuvọ.

¹² Ọza ọ̀ọ sị ose ozi anị, ụnọ ẹ́ mẹ avọọ nị. Ẹnị ẹyịva a vaa wụ̀ nị. Ẹnị e si ẹngụ ẹnịnị isu nị. À sị a nyị ọza ana á tụ ohuvọ.

¹³ Ọnọrụ òo pe ọnọrụ ọhụva anị mẹ anka ọza ọ̀ọ sị ọnẹẹ avọọ; ẹnịnị ẹ sị ụnọ mẹ. À wụ ẹnị ẹyịva. Ẹnị e sì ẹngụ ẹnịnị isu nị. À sị a nyị ọza ana á tụ ohuvọ.

¹⁴ Ọza ọ̀ọ nyị ọnyị rị ozi, ịrẹyị odivi hangụ-hangụ ọ vị ọnọọ nị. Ọnọrụ ọnọọ vị ana a vaa rị ịra a beri ọnyị rị ozi ẹnẹẹ, agụvị a sị aza kụkụ mẹ ẹngụ ebira odivi ọnọọ ịnị akakana ẹnịnị.

¹⁵ Ọza ọnịrị ịsụpa ọ̀ọ sụ anka ọnọrụ mẹẹ sị ọnyẹnẹẹ, ọza ọnọọ vị ana a vaa wụ̀ beri ịsụpa ọnọọ.

¹⁶ Ọnyẹnẹẹ ọnịrị ịsụpa ẹ̀ẹ sụ, à wụ ẹnị ẹyịva. Ẹnị e sị ẹngụ ẹnịnị isu nị. À sị a nyị ọza ana tụ ohuvọ.

¹⁷ Ọnọrụ ọ̀ọ nyị ọyịnyara anị ọnẹẹ à vị adẹnyara anị, dị ọnịrị ọ sụ nị, à mẹ̀ ụhị nyị wa eyi avaba aza, dị à dụ wa hụụnị ẹkụra. Ọnọrụ ọnọọ ó ree ré ahwaahụ ọyịnyara anị ọnẹẹ à vị adẹnyara anị, agụvị avọọ, áa nyị ka ọ̀ rị ụya anị.

¹⁸ Ọnọrụ ọ̀ọ sị ọnyẹnẹẹ enee ré ịsị ụhwẹ anị, à dụ ẹnị ẹyịva hụụnị ẹkụra, agụvị ka ẹnịnị ẹ́ raà sị ahụ jịnẹ ọda ịrẹyị anaa mẹ ka à sị ọza nị.

¹⁹ Ọza ọ̀ọ sị ọyịnyara ada anị ọnẹẹ, à vị ọyịnyara ọnyị anị ọnẹẹ, ụnọ ẹ́ mẹ avọọ nị; ẹnị ẹyịva vaa rị ụya ụnọ ẹnịnị.

²⁰ Ọza ọ̀ọ sị ose ọyịnyara ada anị à vị ose ọyịnyara ọnyị anị, vị ọ́ mẹ̀ ụhị nyị ọyịnyara ada anị à vị ọyịnyara ọnyị anị ọnọọ avọọ nị. Ẹnị ẹyịva vaa rị ụya ebira odivi ẹnẹ mẹ̀. Ẹ́ yị nyị ọza ana vaa ma ozi ịnị ẹnị ẹyịva. Ẹnịnị ẹ̀ẹ vịdị ma ozi, ozi ọnọọ vị enee sú.

²¹ Ọza ọ̀ọ sị ose ọyịnyara anị, ịdọtị ọ vị ọnọọ nị, ọ sị ahwaahụ ọyịnyara anị ré, agụvị avọọ, ẹnị ẹyịva ẹ́ yị vaa ma ozi pooro di è sú. Ẹnẹ ẹ̀ẹ vịdị ma vị enee sú.

²² Ẹnẹyịmavara kà agụvị avọọ, Anisirẹrị nịnị ẹ̀ sị ụvọ za ịrẹyị anị ọnịrị avaba ọda anị, dị ẹnịnị ẹẹ saasa wa; agụvị à sị ẹtẹ ọnị ọnị kụ wa aa vẹ ịnị anị va dụ wa va hi ẹhẹ anka ọza mẹẹ hẹ̀rẹ ịsọyịrị avọọ.

²³ Ọ kà à sị ẹnịnị na mẹ ẹngụ ebira ọnị anẹkụra ọnị ọnị aa dụụ kwooze yị wa aanị aa mẹ o; agụvị ka avaba ebira ẹnẹnị ẹ́ mẹ ana mẹ ka ẹnịnị ẹẹ nyị ọnị ịhyẹrẹ nị.

²⁴ Ama ọnị ọ sị kà yị Anisirẹrị nịnị ka, ẹnị ẹ vanaa nyị ẹtẹ anẹkụra ẹnẹẹ nị. Ọnị vaa sị mẹ oguu yị wa. Ẹtẹ ọnọọ vị ẹtẹ ịzị Imiriiki ọnịrị ẹhụ gwẹtẹ kẹnẹ. Ọnị ọ vị Ẹnẹyịmavara Ohomorihi ẹnịnị ana nyị wa tụ irenyi yị aza ana vọ nị.

²⁵ Ẹnẹyịmavara kà ẹnịnị è ré ka ẹnị ẹẹ sị uye ana wụra rị tụ irenyi yị uye ẹnẹ ẹ̀ yị wụra rị, dị ẹ̀ rẹ sị inomi ẹnẹ ẹ̀ yị wụra rị tụ irenyi yị ana wụra rị. À sị ẹnịnị na rị uye à vị inomi ọnị ọnị raa kà a ka é yi zoza di è ve si du ẹngụ ẹnịnị ẹngụ.

²⁶ Ọ kà ẹnịnị ẹ̀ sị ẹngụ ẹnịnị tu irenyi yị ọnị, agụvị ka ọnị Ẹnẹyịmavara vị ana sị ẹngụ anị tụ irenyi. Ọnị ọ sị wa nyị tụ irenyi yị aza ana vọ, ka ẹnịnị ẹ̀ vị aanị.

²⁷ Ọnọrụ ọnyọọnyị à vị ọnyẹnẹẹ ana àaa na họ̀ usirẹyị hụụnị ụvọ ụhwẹ aza ene sú, vị ana vaa sị ịrẹta-ịrẹta wụ. Ọza ana àa mẹ ẹngụ ịsa ọnọnị o sì ẹngụ anị isu nị. À sị a nyị ọza ana tụ ohuvọ.