Ireevi 18 - IWE ỌNỊNỊ

Ịrẹyị ụ̀nọ̀ ọyị mẹ

¹ Ẹnẹyịmavara ộ kà a yị Imosiisi ka,

² Ọ̀ kà a yị Anisirẹrị nịnị ka, ọnị ọ vị Ẹnẹyịmavara, Ohomorihi ẹnịnị nị.

³ À sị ẹ na mẹ ẹngụ ebira ana aā mẹ ẹtẹ Ijipiti, ịzị ẹ vịdị rá o; à sị ẹ rẹ na mẹ̀ ebira ene aa mẹ ẹtẹ Ikanaani, ịzị ọnị sị wa aa vẹ o. A sị ẹ saasa wa mẹ̀ ịsa ozi ẹtẹ ẹnịnị o.

⁴ Ọ kà ẹnịnị ẹẹ saasa ọda anị, dị ẹẹ mẹ̀ ịsa ọnị ọ̀ọ kà a ka ẹẹ mẹ. Ọnị ọ vị Ẹnẹyịmavara, Ohomorihi ẹnịnị nị.

⁵ Avọọ, ẹnịnị ẹẹ mẹ̀ ịsa aā mẹ, dị ẹẹ saasa ọda ọnị ọnị sị yị wa; ọ ka, vị́ ẹ́ vaa dọ ẹhẹ ẹnịnị ha ẹ̀ẹ vavọọ aa mẹ nị. Ọnị ọ vị Ẹnẹyịmavara.

⁶ Ẹnẹyịmavara kà, à sị a nyị ọza ẹnịnị ana na sị ọza ọnị ọnịrị gẹ o. Ọnị ọ vị Ẹnẹyịmavara nị.

⁷ À sị ẹ sị ọnyị ẹnịnị, ka ụhị ọ vị yị ada ẹnịnị nị. Asị ẹ mẹ̀ ụhị nyị ọnyị ẹnịnị o.

⁸ À sị ẹ sị ose ada ẹnịnị ọnyọọnyị ọsa, ka ẹ va mẹ̀ ụhị nyị ada ẹnịnị.

⁹ Ọ kà à sị ẹ sị ọyịnyara ẹnịnị à vị adẹnyara ẹnịnị ọnẹẹ, òo ze e eyi à pa ẹnịrị o ini eehi ọnya, òo ze e eyi ahịka aha ọsa á ya pa a nị.

¹⁰ À sị ẹ na sị aazị ẹnịnị ọnẹẹ, ka ụhị ọ vaa vịị yị wa nị.

¹¹ À sị ọza sị adẹnyara anị ọnẹẹ, agụvị ka ọyịnyara anị ụvọta ọ rẹ vị avọọ nị.

¹² À sị ọza sị ọyịnyara ada anị ọnẹẹ, agụvị ka anda ada anị ana gụrị ọ ẹtẹẹtẹrẹ ọ vị nị.

¹³ À sị ẹ sị ọyịnyara ọnya ẹnịnị ọnẹẹ, agụvị ka anda ọnyị ẹnịnị ana gụrị ọ ẹtẹẹtẹrẹ ọ vị nị.

¹⁴ À sị ọza sị ose ọyịnyara ada anị, ọyịnyara ada anị ọnẹẹ ọnọọ rẹ vị nị.

¹⁵ À sị ọza sị ose ozi anị o. Ose ozi anị ọ́ vị nị, à sị ọ sị ọ.

¹⁶ Ọ kà, asị ọza sị ose ọyịnyara anị; ahwaahụ ọyịnyara ọ vị nị.

¹⁷ Ọ kà, à sị ẹ sị ọnẹẹ, dị ẹ̀ rẹ varẹma sị ozi ọnẹẹ ọnọọ à vị aazị anị. Anda ẹnịnị ẹ kụkụ vị nị, ẹ̀ẹ sị wa, ụnọ ọ vị̀ nị.

¹⁸ À sị ọza nyị ọyịnyara ose anị, ịrẹma ọnị ose anị ọnọọ yị yà ịzọọ.

¹⁹ À sị ọza sị ọnẹẹ enee ré ịsị ụhwẹ anị, agụvị ka ọnẹẹ ọnọọ ẹ́ yị nị ụmẹ ọnọọ.

²⁰ Ẹnẹyịmavara kà Imosiisi ọ̀ kà a yị wa ka, a sị ẹ na sị ose ọza ẹnẹsa ka e ve du ẹngụ ẹnịnị ẹngụ.

²¹ Ọ kà à sị ẹ hụrẹ ozi ẹnịnị ọnyọọnyị ụvọ ka ana rị ọ ịra mẹ̀ ịsọvọ yị ori ana aā hị́ Imorẹkị. Ẹ̀ẹ vavọọ mẹ, vị ẹ́ yaa sị mẹ ụhịị nyị ịrẹha Ohomorihi nị; ọnị ọ vị Ẹnẹyịmavara nị.

²² Asị ọza ọnịrị ọnọrụ ọhụva nị sụ̀ anka òo rere aa sị ọnyẹnẹẹ avọọ. Ohomorihi ọ́ọ nyị ịhyẹrẹ ẹngụ ebira ọnọọ.

²³ À sị a nyị ọnọrụ à vị ọnẹẹ ọnị ọnịrị ịsụpa na mẹ vabẹ, ịsị ẹ̀ yị vọrọ ọ́ vị nị. Vị́ oo du ọza ẹngụ nị.

²⁴ À sị ẹ sị ịsị ẹnẹnị ọnyọọnyị du ẹngụ ẹnịnị ẹngụ, agụvị ka ịsị anẹkụra ọnị ọnị aa dụụ kwooze yị wa aanị aa mẹ ene si du ẹngụ ẹnịnị ẹngụ ọ vị ọnọọ nị.

²⁵ Ịsị ẹnẹnị ẹnẹ yaa mẹ e sị du ẹtẹ ẹnịnị ẹngụ ana mẹ ka ọnị Ẹnẹyịmavara ọ̀ sị ụya rị ọ agụvị ebira odivi ọ nị aza ana ra hi ịzọọ aa mẹ nị. Dị ẹtẹ ẹnịnị dụ aza ana ra ịnị anị hi ẹhẹ anka ọza mẹẹ hẹ̀rẹ ịsọyịrị avọọ nị.

²⁶ Ọ kà, ama ẹnịnị ẹẹ mẹ ịsị ọnị ka, dị ẹẹ saasa ọda anị, ọ̀ọ vị ozi ẹtẹ ẹnịnị Anisirẹrị, ọ̀ọ va vị anẹkụra ọsa ana ra vahụra wa, à sị ẹnịnị mẹ ịsị eenyisi ẹnẹnị ọnyọọnyị,

²⁷ ka ịsị eenyisi ẹnẹnị aza ene vịdị hi ịnị ẹtẹ ọnọọ mẹ dị e sị du ẹtẹ ẹnịnị ẹngụ nị,

²⁸ Ọ kà Anisirẹrị nịnị ẹ̀ẹ vavọọ mẹ dị e du ẹtẹ ọnọọ ẹngụ nị, vị ẹtẹ ọnọọ aa dụ wa hi ẹhẹ anka ọ́ mẹ mẹ aza ana vịdị ra hi ịzọọ nị.

²⁹ Ka ọza tụra ọza anaa mẹ ịsị eenyisi ẹnẹnị ọnyọọnyị, ọnị e yi me vene rò ọza ọnọọ vaka anda ẹnịnị.

³⁰ Ẹnẹyịmavara kà, ẹnịnị ẹẹ saasa ọda ọnị ọnị mẹ yị wa; à sị ẹ saasa ebira ọnị aza ana vịdị ra hi ịnị ẹtẹ ọnị ọnị kụ wa aa nọ aa mẹ. À sị ẹ mẹ ịsị ẹnẹnị ọnyọọnyị dị è sị du ẹngụ ẹnịnị ẹngụ. Ọnị ọ vị Ẹnẹyịmavara, Ohomorihi ẹnịnị nị.