Ireevi 17 - IWE ỌNỊNỊ

Ọda ana vọ ana za ịsụpa ọyị wụ̀

¹ Ẹnẹyịmavara ộ kà a yị Imosiisi ka,

² Ọ̀ kà a yị Eerọnị ọnịrị ezi ọnọrụ anị beri avaba Anisirẹrị nịnị ka, ọda ọnị Ohomorihi mẹ yị o.

³ Ọ kà, àa nyị Anisirẹrị ana wụ́ ụnọ à vị ozi atẹmẹ, à vị ẹvụ udi, ọ̀ọ daka vị ịrẹma udi ọ́ ya wụ̀ ọ nị,

⁴ àa vị ka ẹ́ yị vị ọ sị ọ vẹ enoze ajẹngụ Ẹnẹyịmavara dị ọ sị va mẹ ịsọvọọ yị ọ, ọza ọnọọ ọ sị ịvị rị ka ộ jị ịsa hi ẹtẹ. Vị ọ jị ịsa avọọ nị; ọza ma vana kụkụ ro ọza ọnọọ vaka aza Ohomorihi.

⁵ Iruvo ana a sị mẹ ọda ọnọnị ọ vị ka, Anisirẹrị ẹẹ sị ịsụpa ẹnẹ ẹẹ̄ wụ aha ana vọ va yị Ẹnẹyịmavara nị. Ẹnịnị ẹ̀ sị ọ vẹ ve tu ohirẹsụ irehi Ohomorihi enoze ajẹngụ Ẹnẹyịmavara dị a wụ̀ ọ ọ̀yị mẹ̀ ịsọvọ ẹngwọọrọ hi Ẹnẹyịmavara.

⁶ Ohirẹsụ irehi Ohomorihi ọnọọ vee che anịị sẹ ụta ana ya enoze ajẹngụ Ẹnẹyịmavara, dị ọ rị ụhị anịị ịra ụvị dị ọ̀ dà agụ ene vee hine Ẹnẹyịmavara.

⁷ Asị Anisirẹrị nịnị kụkụ va hụrẹ ịrẹma Ẹnẹyịmavara, dị ẹ̀ naa wụ̀ ịsụpa ẹnịnị mẹ̀ ịsọvọ ịnị orere yị echu ana sị mẹẹ anka ẹvụ avọọ. Ẹwụ nịnị Anisirẹrị vị ana vaa saasa ọda ọnọnị pooro zịna-zịna.

⁸ Ẹnẹyịmavara kà Imosiisi ọ̀ kà a yị wa ka, Anisirẹrị ọnyọọnyị, à vị anẹkụra ọsa ana ra vahụra wa ọ̀ọ mẹ̀ ịsọvọ ana aā rị ịra, à vị ịsọvọ ọnyọọnyị ọsa aha ọsa,

⁹ dị ẹ̀ yị sị ọ vẹ enoze ajẹngụ Ẹnẹyịmavara ọ̀ yị va mẹ̀ ịsọvọ yị ọ nị, ọza ẹ́ yị ma vana kụkụ ro ọza ọnọọ vaka aza Ohomorihi.

Asị ọza rị anya

¹⁰ Àa nyị Anisirẹrị ọnyọọnyị à vị anẹkụra ọsa ana ra vahụra wa ana rị uye, ọnị vaa và eyirazịị kà ọza ọnọọ, dị ọnị é yi me vene rò o vaka anda ẹnịnị nị.

¹¹ Ịnị ẹhẹ avaba ịsa ana yara ya nị; agụvị avọọ, Ẹnẹyịmavara sị kà a ka àa và a hi ịrẹsụ ụta ịsọvọ, dị à sị kụ ịvị aza kwooze nị. Anya ana vị ẹhẹ, ọọ̄ kụ ịvịị kwooze nị.

¹² Avọọ ọnị Ẹnẹyịmavara kà a yị ẹwụ nịnị Anisirẹrị ka, à sị a nyị ọza ịnị ẹngụ awụ nịnị ana rị uye; dị à sị á rẹ nyị anẹkụra ọsa ana rá vahụra wụ nịnị ana rị uye nị.

¹³ Àa rẹ nyị Anisirẹrị ọnyọọnyị àa vị anẹkụra ọsa ana ra vahụra wa ene ne zụ ube, dị ọ zá uye àvị inomi ana aā rị nị, ọ̀ jị ọ anya hi ẹtẹ dị ò kú ezi ku ọ.

¹⁴ Ka ịnị ẹhẹ avaba ịsa ana yara ya nị; agụvị avọọ ọnị Ẹnẹyịmavara sị kà a yị ẹwụ nịnị Anisirẹrị ka, à sị ụ rị uye nị. Dị ọnị rẹ ka, ọza ana àa vavọọ mẹ, ọnị é yi me vene rò o vaka anda ẹnịnị nị.

¹⁵ Avaba ọza ana àa rị oku uye ene sú yị ẹngụ anị à vị oku uye ọnị uye ọsa wụ, ọ̀ọ vị ozi ẹtẹ, ọ̀ọ va vị anẹkụra ọsa; ọ̀ na nyịna ịta anị, dị ọ̀ hụ enyi. Ẹ́ yị kụkụ vaa nị pooro dị oruva ò tu ịhị ọnọọ, dị ọ̀ va nị.

¹⁶ Ama ẹ̀ yị nyịna ịta anị, dị ẹ yị hụ enyi nị, ọ vaa rị ụya ịvị anị.