Ireevi 15 - IWE ỌNỊNỊ

Ẹngụ ọnọrụ ọza èe tu

¹ Ẹnẹyịmavara ộ kà a yị Imosiisi ọnịrị Eerọnị ka,

² Ẹ̀ kà a yị Anisirẹrị nịnị ka, ẹngụ ọnọrụ ọza èe tu vaa ha, oyitu anị ọnọọ ọ raà mẹ̀ ẹ ka asị ọ nị

³ Ọda ịrẹyị enyi ana va hụụnị ẹngụ anị ana mẹ ka asị ọ kụkụ nị yị: òo zee eyi ahịka vị enyi ọnọọ ee sìi hụụnị ẹngụ ọnọrụ, òo zee eyi à raa za a jẹ, ọza ọnọọ ẹ́ yị kụkụ nị.

⁴ Ịvẹẹdị ọnị ọza ọnị enyi ọnọọ và hụụnị ẹngụ anị ọ̀ọ hụtẹtẹ, ẹ́ yị kụkụ nị; avaba ịsị ọ̀ọ yaatụ ịnị anị, ẹ́ yị rẹ kụkụ nị.

⁵ Ọza tụra ọza ana àa kanyị ịvẹẹdị anị vanaa nyịna ịta ọnị o ku hi ẹngụ, dị ọ hụ enyi; ọza ọnọọ ẹ́ yị nị pooro di oruva ò tu.

⁶ Ọza tụra ọza ana àa yaatụ ịnị ịsa ọnị ọza ọnị enyi ọnọnị và hụụnị ẹngụ anị aanị yaatụ, rẹ vanaa nyịna ịta anị, dị ọ hụ enyi; ọza ọnọọ ẹ́ yi vaa nị pooro di oruva ò tu ịhị ọnọọ.

⁷ Ọza tụra ọza ana àa kanyị ọchẹngụ ọza ọnị enyi và hụụnị ẹngụ anị aanị, vanaa nyịna ịta anị, dị ọ hụ enyi; ẹ́ yị vaa nị pooro dị oruva ò tu ịhị ọnọọ.

⁸ Ọza ọnị enyi và hụụnị ẹngụ anị aanị ọ̀ọ jị atẹ ku ọza ana nị, ọza ọnọọ vanaa nyịna ịta anị, dị ọ tụ enyi; ẹ́ yị vaa nị pooro dị oruva ò tu ịhị ọnọọ.

⁹ Ịsị ọza ọnị enyi và hụụnị ẹngụ anị aanị ọ̀ọ yaatụ ịnị anị ịnị ịsa anaā sịị ọzaa zị, ẹ́ yị kụkụ nị.

¹⁰ Ọza tụra ọza ana àa kanyị ịsị ọ sị yaatụ ẹ yị vaa nị pooro dị oruva ò tu ịhị ọnọọ. Ọza tụra ọza ene èe chema ịsị ọ sị yaatụ, vanaa nyịna ịta anị, dị o hú enyi, ẹ́ yị vaa nị pooro dị oruva ò tu ịhị ọnọọ.

¹¹ Ọza ọnị enyi và hụụnị ẹngụ anị aanị ẹ̀ẹ ẹ̀ yị nyịna ụvọ anị dị ọ sì ụvọ kanyị ọza nị, ọza ọnọọ vanaa nyịna ịta anị, dị ọ hụ enyi; ẹ́ yị vaa nị pooro dị oruva tu ịhị ọnọọ.

¹² Ụnọkọ ọnị ọ̀ọ sị ụvọ kanyị vị ana a vaa chaka, avaba ẹnya ana a sị ọchị bẹ ọnị ọ̀ọ sị ụvọ kanyị vị ana a vaa nyịna.

¹³ Àa sị ọza ọnị enyi và hụụnị ẹngụ anị aanị mẹ ụkụ, ọ vaa varẹma sị ẹkụhị ịhịmba tịtẹ, dị ọ va nyịna ịta anị. Ọ va naa hụ enyi ịnị okuha enee sì, dị ọ̀ kụkụ va nị.

¹⁴ Ịhị ẹ tụ ẹkụhị ịhịnta anị, ọ vaa sị arivadi à vị arekuku ẹẹva, dị ọ ve enoze irehi Ohomorihi, dị ọ sị va yị ohirẹsụ irehi Ohomorihi.

¹⁵ Ohirẹsụ irehi Ohomorihi vaa si ọnyaa mẹ̀ ịsọvọ ịvị, dị ọ sị ọsa mẹ̀ ịsọvọ ana aā rị ịra. Aanị ọ mẹ vaa mẹẹ mẹ̀ ịsa vọrọ ka à mẹ yị ọ dị ọza ọnọnị ọ̀ nị nị.

¹⁶ Àa vị enyi ịnị ẹngụ ọnọrụ ọza và hi ẹtẹ nị, áa nyị ka ẹ̀ hụ avaba ẹngụ anị enyi. Ẹ́ yị vaa nị pooro dị oruva ịhị ọnọọ ò tu.

¹⁷ Ịsa tụra ịsa ana a sị achị à vị ịtụmpaha mẹ̀ ọnị enyi ịnị ẹngụ ọnọrụ ọnọọ ọ̀ọ và hi, vị ana a vaa sị enyi nyịna. Ẹ yị vaa nị dị oruva ịhị ọnọọ ò tu.

¹⁸ Ọnọrụ ọnịrị ọnyẹnẹẹ ẹ̀ẹ sụ, enyi jịnẹ hụụnị ẹngụ ẹnịnị nị, ẹnị ẹyịva vaa hụ enyi. Ẹnịnị ẹ́ yị vaa nị pooro dị oruva ịhị ọnọọ ò tu.

¹⁹ Ọnyẹnẹẹ èee re ịsị ụhwẹ anị, ẹ́ yị vaa nị pooro dị ẹkụhị ịhịmba ọ̀ mẹ. Ọza tụra ọza ana àa kanyị ọ, ẹ́ yị vaa nị pooro dị oruva ịhị ọnọọ ọ̀ tu.

²⁰ Ịsa tụra ịsa ọnị ọnyẹnẹẹ ọnọọ ọ̀ọ yaatụ ịnị anị à vị ka dị ọ́ hụtụ ịnị anị, ụmẹ enee re ịsa ụhwẹ nị, ẹ́ yị kụkụ nị.

²¹ Ọza tụra ọza ana àa kanyị ịvẹẹdị anị ọ̀ na nyịna ịta anị, dị ọ̀ hụ enyi. Ọza ọnọọ ẹ́ yị vaa nị pooro dị oruva ò tu ịhị ọnọọ.

²² Ọza tụra ọza ana àa kanyị ịsa ọnyọọnyị ọnị ọ̀ọ yaatụ ịnị anị ọ̀ na nyịna ịta anị, dị ọ̀ hụ enyi; ọza ọnọọ ẹ́ yị vaa nị pooro dị oruva ò tu ịhị ọnọọ.

²³ Ọ̀ọ vị ịvẹẹdị anị, ọ̀ọ va vị ịsa ọnyọọnyị ọnị ọ́ yaatụ ịnị anị ọza kanyị nị, ọza ọnọọ ẹ́ yị kụkụ vaa nị pooro dị oruva ò tu ịhị ọnọọ.

²⁴ Ọnẹẹ ọnọọ ọnịrị ọza ọnyọọnyị ọ̀ọ sụ, dị ịsị ụhwẹ anị dà gẹ ẹ nị, ọza ọnọọ ẹ́ yị kụkụ vaa nị pooro dị ẹkụhị ịhịmba ọ̀ mẹ. Avaba ịvẹẹdị ọnị ọ̀ọ hụtụ ịnị anị ẹ́ yị kụkụ nị.

²⁵ Ọnyẹnẹẹ òo ré mẹ ẹkụhị ọrụrụ-ọrụrụ dị ẹ̀ yị vị ụmẹ ịsị ụhwẹ anị nị, à vị ka òo ré ịsị ụhwẹ gọdọ huni ụmẹ ọnị óo ré e, ọnyẹnẹẹ ọnọọ ẹ́ yị vaa nị ịnị avaba ụmẹ ọnị ọ́ vavọọ ee ré. Vị́ ọ rẹ yị ya anka èee ré ịsị ụhwẹ anị avọọ nị; ẹ́ yị nị.

²⁶ Avaba ịvẹẹdị ọnị ọnẹẹ ọnọọ ọ̀ọ hụtẹtẹ ịnị anị ọnịrị avaba ịsa ọnị ọ̀ọ yaatụ ịnị anị, avaba ụmẹ ọnị ọ́ vavọọ ee ré ẹ́ yị kụkụ nị.

²⁷ Ọza tụra ọza ana àa kanyị ịsa ẹnẹnị ẹ́ yị kụkụ vaa nị. Ọ vanaa nyịna ịta anị, dị ọ hụ enyi; ẹ́ yị kụkụ vaa nị pooro oruva ò tu ịhị ọnọọ.

²⁸ Ịrẹma ana anị òo si ji, ọ vaa jẹẹ mẹ ẹkụhị ịhịmba, dị ọ̀ kụkụ va nị.

²⁹ Ịhị ẹ tụ ọ ẹkụhị ịhịnta, ọnẹẹ ọnọọ vaa sị arivadi ẹẹva à vị ezi arekuku ẹẹva, dị ẹ sị ọ ve tu ohirẹsụ irehi Ohomorihi enoze irehi Ohomorihi.

³⁰ Ohirẹsụ irehi Ohomorihi ọnọnị vaa sị ọnyaa mẹ̀ ịsọvọ ịvị, dị ọ sị ọsa mẹ̀ ịsọvọ ana aa rị ịra. Aanị ọ mẹ vaa mẹẹ mẹ̀ ịsa vọrọ ka à mẹ, dị ọnyẹnẹẹ ọnọọ ọ̀ varẹma nị.

³¹ Ẹnẹyịmavara ộ kà a yị Imosiisi ka ọ̀ kà Anisirẹrị nịnị ọnọ ịnị ịpa ịdọtị ẹnịnị agụvị à sị ẹnịnị ne du irehi anị ẹngụ. Irehi anị ọnọnị vị ana ya ịnị akakana udi ịzị aza hi. Ẹnịnị ẹ̀ẹ vavọọ mẹ, vị ọnị aa wụ̀ wa nị.

³² Ọda ịrẹyị ọnọrụ ọnị enyi ẹngụ anị ọ̀ọ va ha yị,

³³ Ọda ọnọnị gẹdẹ-gẹdẹ ọ rẹ za ọnyẹnẹẹ enee ré ịsị ụhwẹ anị, à vị ọnọrụ ọnị ọnịrị ọnyẹnẹẹ ẹnẹ ẹ̀ yị nị ọ̀ọ sụ̀ nị.