Ireevi 1 - IWE ỌNỊNỊ

Ịsọvọ ana aā rị ịra

¹ Â nyị ọnọrụ ọnya ana aā hị́ Imosiisi. Ẹkụhị ọnya Ẹnẹyịmavara ộ yà ịnị ajẹngụ ọnị ọnịrị ọọ yàa gẹ, dị ọ hị́ ọ, dị ọ sị ọda ẹnẹnịị yọ nị.

² Ọ kà Imosiisi ọ̀ kà a yị Anisirẹrị nịnị ka, ọza ọnyọọnyị aa sị ịsụpa vaa yị ọnị, ọ̀ sị ọ hụụnị ịnị ịsụpa ana aa pa, ọ̀ọ vị imaaru, ọ̀ọ vị atẹmẹ à vị ẹvụ.

³ Àa vị ịsị ịsọvọ ana a rị ịra ọza ọnọọ aa sị vẹ nị, abaabo ọ vị ka ọ̀ sị imaaru araka ẹnẹ ẹ̀ yị tụ ọkụmị nị. Dị ọ̀ sị ọ vẹ enoze ọnị ọnị Ẹnẹyịmavara ọnịrị Imosiisi yàa gẹ agụvị dị ịsọvọ anị ọ̀ dọ rị.

⁴ Ọza ọnọọ vaa sị ụvọọ tụra a ịrẹsụ dị Ohomorihi dọ ịsọvọ anị, dị ọọ vagu ịvị anịị yọ.

⁵ Ọza ọnọọ vaa wụ̀ imaaru ọnọọ ịzọọ. Ohirẹsụ irehi Ohomorihi nịnị anka Eerọnị vaa sị ịsụpa ọnọọ nọ ọvịdị Ẹnẹyịmavara, dị e ve che e sẹ ụta ịsọvọ eyi ẹnyị eyi ọsa. Ụta ịsọvọ ọnọọ vị ene hi tu enoze ana zịị ngụ ịnị ajẹngụ ọnọọ.

⁶ Ọza ọnọọ vaa nọ ịsụpa ọnọọ ịtụmpaha, dị ọ rẹ vọ ọ.

⁷ Ohirẹsụ irehi Ohomorihi nịnị vee to ọkụụ hi ịrẹsụ ụta ịsị ịsọvọ ọnọọ dị ẹ sị ịra tụ ọ.

⁸ Ẹnịnị vaa kụ uye ana a vọ aanị ọnịrị ịrẹsụ anị beri ụhị anịị hi ịnị ịra.

⁹ Ọza ọnọọ vaa nyịna ẹnya ịnịnẹ uye ọnọọ ọnịrị ahụ anị, dị ohirẹsụ irehi Ohomorihi anaa mẹ̀ ụkọrọ ịzọọ rị avaba ịsị ịsọvọ ọnọọ ịra ịrẹsụ ụta. Agụ ịsa ịsọvọ ọnọnị vị eneē hine Ẹnẹyịmavara.

¹⁰ Àa vị ịdẹba à vị ịdẹ ọza ọnọọ aà sị hụụnị ịsụpa ana aa pá vaa mẹ̀ ịsọvọ nị, ọ̀ sị ẹnẹ ẹ̀ yị tụ ọkụmị.

¹¹ Ọ vaa wụ̀ ọ akẹbẹẹba ụta ịsọvọ, dị ohirẹsụ irehi Ohomorihi nịnị che uye ọnọọ sẹ ụtọ ịsọvọ eyi ẹnyị eyi ọsa.

¹² Ọza ọnọọ vaa vọ ọ, dị ohirẹsụ irehi Ohomorihi anaa mẹ̀ ụkọrọ ụmẹ ọnọọ va kụ avaba anị ọnịrị ịrẹsụ beri ụhị anị hi ịnị ịra.

¹³ Ọza ana va mẹ̀ ịsọvọ aanị vaa nyịna ẹnya ịnịnẹ uye ọnọọ ọnịrị ahụ anị, dị ohirẹsụ irehi Ohomorihi va sị ịsị ịsọvọ ọnọọ nọ ọvịdị Ẹnẹyịmavara. Ịrẹma anị dị ọ va rị ọ ịra ịrẹsụ ụta ịsọvọ. Agụ ịsị ịsọvọ ọnọnị vị eneē hine Ẹnẹyịmavara.

¹⁴ Àa vị inomi ọza ka ọnị aa sị vaa mẹ̀ ịsọvọ hị́ Ohomorihi nị, ọ̀ sị arivadi avị ozi arekuku.

¹⁵ Ohirẹsụ irehi Ohomorihi vaa sị ọ vẹ ịnị ụta ịsọvọ. Òo tu ịzọọ, dị ọ tụ inomi ọnọọ ịrẹsụ, dị ọ rị ịrẹsụ anị ịra ịnị ụta ịsọvọ ọnọọ. Dị o che anị sẹ ụta ịsọvọ eyi ẹnyị eyi ọsa.

¹⁶ O vee hu inomi ọnọọ asịsẹ, dị ọ kụ asịsẹ anị ọnịrị iruvu va hị́ eyi ọnị ụta ịsọvọ và ka ịzị ọyịị̄ hụrẹẹ vẹ ana aā kụ atịtọ hi.

¹⁷ Ana vọ ịnị inomi ọnọọ vị ọnị ohirẹsụ irehi Ohomorihi vaa vọ zị oze ịnị avaka anị, ama ẹ yị vaa jị avaka anị kwooze. Dị ọ va rị avaba anị ịra ịrẹsụ ụta ịsọvọ. Agụ ịsị ịsọvọ ọnọnị vị eneē hine Ẹnẹyịmavara.