Inehemaya 1 - IWE ỌNỊNỊ

Inehemaya ộ mẹ̀ aduwa agụvị Ijerusarẹmị

¹ Â nyị ọnọrụ ọnya aanị ọnị ịrẹha anị rị Inehemaya ana vị ozi Ịhakarịya. Ịtọpa avaba ịsị ọ mẹ yị. Â nyị ụmẹ ọnya aanị ọnị ọnọrụ ọnya aanị ana aā hị́ Atazazasisi sị vị ohinọyị tụ ẹtẹ Ipesiya. Ịnị ụhwẹ ẹwụrọnya ọnịrị ẹwụrẹva ana a hị́ ụhwẹ Ikisirevi ịnị ịrayị ana tụ ọ ịrayị oohu ọnị ọ rị ohinọyị, Inehemaya yá ẹkụra ana aā hị́ Isusa. Ẹkụra ọnọọ ọ vị ohi ẹtẹ ẹkụra Ipesiya nị.

² Ịnị ụmẹ ọnọọ, Ihanani ọnya ịnị ẹyịnyara Inehemaya ọnịrị anọrụ ẹnyị ệ hụrẹ Ijuda ve hee yi. Dị ọ họ̀ wa use Ijerusarẹmị ọnịrị anda ẹnịnị ana varẹma hụrị Ịbabịrọnị nọ eehi nị.

³ Ẹnịnị ệ tụ Inehemaya ohi ka aza ana vọ tụ eehi vị ana ya ịnị akanya obobooro. Ẹnịnị vị ana ya ịnị ẹngụkata, dị anẹhẹ ana vọ ee nyi wa unyi. Ẹ ka ọvọ ana a jị kara Ijerusarẹmị e ku wu, dị avaba oze ọbanyị Ijerusarẹmị kụ́ rị ịra nị.

⁴ Ịjị Inehemaya maanị wụ́ ịrẹyị ọnọnị, dị ẹngụ anị sị va hi, dị ọ yaayịtẹ aa jị òrèrè nị. Agụvị ka ịrẹyị ọnọọ ộ zị ọ ẹngụ, ộ yaatụ mẹ ẹkụhị ọrụrụ-ọrụrụ ệ yị rị ịsa, dị aa da ịpẹ yị Ohomorihi ana nyị ẹbẹẹba nị.

⁵ Dị ọ ka: Tee! Ẹnẹyịmavara, Ohomorihi ana nyị ẹbẹẹba, Nda ana nyị ụbanyị, ọnị ọzọza ee hí angwa anị. Ọnịrẹyịzẹyịza ana aā mẹ̀ ịsa ọnị ọ ka yi aza ene sì ịrẹyị anị dị aa saasa ọda anị.

⁶ Ọ kà ọ̀ navọ ọ̀ wụ́ aduwa anị. Ò re ọnị maa mẹ̀ aduwa ọọdụ ọnịrị ịrahụ agụvị Anisirẹrị ana vị ezi ahụ anị. Inehemaya kà ọnị ọ dọ irenu ka Anisirẹrị nịnị ẹ raà mẹ̀ ebira odivi hi Ohomorihi. Ọ kà ọnịrị ohiku ẹnịnị ệ raà mẹ divi.

⁷ Ẹnị ẹ raà mẹ̀ ebira kẹnẹ-kẹnẹ hi Ohomorihi. Ẹnị ẹ yị saasa ọda ọnị ọ sị tụ Imosiisi ozi ahụ anị hi ẹnị.

⁸ Ama ọ̀ tamayị ịrẹyị ọnị ọ kà tịtẹ yị Imosiisi ana vị ozi ahụ anị. Ẹnẹyịmavara ộ kà a ka ọnị vaa gara wa hi avaba ẹhẹ ẹnịnị ẹ̀ẹ mẹ̀ akamawụ hi ọnị.

⁹ Ama ẹnịnị èe ro ịnẹ varẹma, dị ẹ saasa ọda anị nị, ẹ̀ẹ daka che hi ozi, ọnị vaa kụ wa varẹma vẹ ịzị ọnị nyị yị wa ịzị aza ẹ yị vee hi ayị ịrẹha anị pooro.

¹⁰ Dị Inehemaya ka, ẹnị vị ezi ahụ Ẹnẹyịmavara, dị ẹnị rẹ vị aza anị ọnị ọ sị ụkata ọnịrị Igirima anị dọ ha nị.

¹¹ Dị ọ ka, Ananyị yị ọ̀ navọ ọ̀ wụ́ aduwa anị ọnịrị aduwa ezi ahụ ana vọ anaa sị ụbanyị yị ọ. Ẹnẹyịmavara ọ̀ gụ ọnị ụvọ ịnị ịsa ọnị ọnị ọ̀ọ họ̀ use anị hụụnị ụvọ ohinọyị. Ọ̀ mẹ ka ohinọyị ọ̀ nyị ayamva yị ọnị. Ịnị ụmẹ ọnọọ, Inehemaya ọ vị ọza ene si eyi pe ịsọyịrị ohinọyị.