Imika 4 - IWE ỌNỊNỊ

Ohomorihi vaa sị ẹngwọọrọọ vẹ

¹ Ụmẹ aa vẹ dị ataba ịzị dà irehi Ẹnẹyịmavara tụ́ aanị kuku vaa vị ataba ana nẹba hu ataba ana vọ, dị ọ da jịnẹ wa. Anẹkụra ọrụrụ-ọrụrụ vee tụraa hi ịzọọ.

² Anẹkụra ọrụrụ-ọrụrụ vaa vẹ di ẹ ka à vẹ ẹnị ẹ̀ nọ ịda Ẹnẹyịmavara. Dị ẹ ka ẹnị aa nọ ịzọọ ịzị a dà irehi Ohomorihi Anisirẹrị tụ́. Ohomorihi vaa sịị zụ̀ ịsị a vọrọ ka yaā mẹ di ebira ayị ò zụ zee e eyi. Ẹnẹyịmavara vaa sị ịrẹyị anịị zụ̀ aza ẹkụra Ijerusarẹmị. Ịzayọnị ọ vaa yàa kà ịrẹyị anịị yị aza nị.

³ Ohomorihi vaa mẹ̀ ọkarẹyị yị anẹkụra ene ee pè ẹngụụ zyaazị, ẹkụra ẹbanyị ana nyị ụkata ana gụrị ẹtẹ ọnịrị ene noze. Ụhwọ ana aza ẹnẹẹ vịdị aa sịị kụ́ ịrẹkụ vi eni e venee si tụ́ ẹdụ ana a sịị kụ́ ịrịkụ. Dị ẹ sị ọha ẹnịnị tù ụhwọ ana a sịị mẹ̀ ụkọrọ ini aarẹ, aanị tụ́ ịnị ịrẹyị ẹnịnị. Mị ka o vee ji ịrazị ana aza ee pè ẹngụụ zị. Anẹkụra ẹ mā vana kwẹẹtẹ tụ́ ẹngụ ka vị ẹnị aa kụ̀ ịrẹkụ nị. Ẹ yị kụkụ vaa nyị ka vị aza aa kọsẹ ịrẹkụ nị.

⁴ Ọzọza vaa ra ịnị ẹngwọọrọ. Dị ẹ yaa rị ịsa ịnị aarẹ ịvayịnị ọnịrị ihwigi ẹnịnị. Ẹ yị nyị ọza ene vee chẹrẹ wa angwa. Ẹnẹyịmavara Ochẹtẹẹngụ ọ vavọọ wo oto ọnọnị nị.

⁵ Ẹkụra ọzọza ẹ nyẹngụ aa hẹkẹ ori ẹnịnị Ẹnẹyịmavara ana vi Ohomorihi ayị ẹ́ yị vaa hẹkẹ pooro zịna-zịna nị. Anisirẹrị vaa vaa vẹ eehi.

Isirẹrị vaa va eehi hụrẹ ẹngwa ịrẹkụ

⁶ Ẹnẹyịmavara kà ụmẹ vaa vẹ dị ọnị na kụ́ aza anị ọnị ọnị hụ hụrẹ ẹkụra. Ọ kà aza ọnị ọnị vavọọ sị ụya rị avọọ, ọnị aa kú waa vaa vẹ.

⁷ Ịzẹyịza aza ẹnẹẹ vị ọkụmị, di ahịka ẹkụra huu ọ dụ wa ne hi nị. Ọ kà ọnị rẹ vaa mẹ ẹnị ana vọ anẹkụra ana nyị ụkata. Dị ahịka ọnị ọ kụkụ vị ohinọyị ẹnịnị tụ́ Ijerusarẹmị pooro zịna nị.

⁸ Ijerusarẹmị, ẹwụ vi irehi ọgọdọ oni oserẹtẹẹ̄ yà. Avọọ Ohomorihi mẹ̀ vaa yà ịzọọ di èe sere aza anị nị. Ụ rẹ vanaa vaa vẹ udi awụ anka ohirẹsụ ẹkụra aza awụ.

⁹ Anijerusarẹmị, sị ẹ vẹ dị ụ maanị aa tụ̀ orere boro-boro? Sị ẹ vẹ dị wee nowu anka ọza ana aa barẹẹ avọọ? Vị waaa nyị ohinọyị nịnị nị. Mâ yẹ ka e zụ pe wu nịnị juwe ộ!

¹⁰ Weē ti, weē rimanya ẹwụ nịnị Anijerusarẹmị mi ka weē ti anka ọza ana aa barẹẹ avọọ o si tù ka wa kụ̀rà hụrẹ ẹkụra di wa na ra ịnị avị nịnị Waa kụraa nọ Ịbabịrọnị nịnị. Ịzọọ Ẹ́nẹ ẹ̀ yị mā vara vàa yàa dọ wụụ tụ́ nịnị. Mị ka ọ vaa dọ wụ nịnị tụ hụụnị ụvọ ọnịvị awụ nịnị.

¹¹ Ẹwụ nịnị Anijerusarẹmị anẹkụra ọrụrụ ẹ kụ́ kwẹẹtẹ tù wu Ẹ ka à wụ Anijerusarẹmị ha, dị à jị ịzọọ eburu, dị ụhị ọ̀ nyị wa.

¹² Ama ẹnị ẹ yị va yẹ ịsị Ẹnẹyịmavara ee ro. Mị ka ẹnịnị ẹ yị yẹ ịsị ọnị ọ vaa mẹ. Ẹ yị yẹ ka vị ọ kụ́ Anisirẹrị gụ ka oni ò tụ́ wa kẹnẹ nị. Ọ kà ọnị ee tụ́ wa á mèe tụ́ ayị ịnị ịda avọọ.

¹³ Ẹnẹyịmavara kà ẹwụ nịnị Anijerusarẹmị ọ̀ kwẹẹtẹ. Ọ kà wa kwẹẹtẹ di we nee tù ọnịvị awụ nịnị. Ọ kà ọnị vaa mẹ ka wa nyị ụkata anka ụnọ ana nyị ọpanyị enyusẹ Dị ọnị sị ụkata wụ nịnị anka ụnọ ana nyị ẹtụpa enyusẹ Dị ụ vavọọ aa sịị gara ọnịvị awụ nịnịị ha. Dị ụ kụ́ avaba ogu ẹnị ẹ sị ụkata dọ aza. Dị ụ dọ wa dị ụ sị na yị Ẹnẹyịmavara ana nyị avaba ẹhẹ.