Imatiwu 7 - IWE ỌNỊNỊ

Asị ụ jị ịvị yị ọza

¹ Dị Ijeesu rẹ ka, “Asị ụ sị ẹngụ awụ vị ọmọkarẹyị ọza, agụvị asị Ohomorihi mẹ̀ ọkarẹyị wụ!

² Ẹngụ ọkarẹyị ọnị ụ wàa mẹ yị aza, Ohomorihi rẹ vaa mẹẹ yị ẹwụ nị. Ịsị ụ wàa sị mọ ịsa yị ọza, a rẹ vaa sị mọọ yị wụ nịnị nị.

³ Sị ẹ vẹ di u wee re ẹchịchị ana yà ini eyi ọhụva awụ, dị ụ wẹ̀ yị tẹsị ọvọọvọrọ ana yà ịnị ẹ́ẹwụ?

⁴ Wâ zụ kà a yị ọhụva awụ ka: ‘Jẹẹ ma sị ẹchịchị hụụnị eyi awụụ wụ,’ ịrẹma ọnọ ọvọọvọrọ ọnị yà ini eyi ẹwụ?

⁵ Ẹwụ ọmọzakụyẹ, wẹ rẹ̀ vịdị sị ọvọọvọrọ ana yà ini eyi awụ daa! Ịjọnọọ di u wee re ẹtẹ ẹtẹẹrẹ, dị ụ wa va zụ sị ẹchịchị ana yà ini eyi ọhụva awụ.

⁶ Asị ụ sị ịsa ọnịnị yị irezi nịnị, ka ẹ va vara eyi, dị ẹyaa na wụụ rị! Asị u re ne ịsa akàaka tịtẹ yị ụ̀rá nịnị, ẹ̀ yị vị avọọ ka ẹ va kụ́ ahụ hi ọ para hu.”

Wee họ̀ use, wee sì ịsa, waa ká oze ịsa

⁷ “Wee họ̀ use ịsa nịnị ka a vaa sịị yị wụ nịnị! Wee sì ịsa nịnị ka u vee re e nịnị!

⁸ Agụvị ka avaba aza ene èe họ̀ use ịsa, aā sịị yị wa. Ọza ene èe sì ịsa, oō re e; ọza ana àa rẹ sị ụvọ ká oze, a vaa na oze yọ.

⁹ Áá nyị ọza oni ozi anị họ̀ use Ịbụrẹẹdị, dị ọ sị ịrẹta yọ ịnị ẹngụ awụ nịnị;

¹⁰ à vị òo họ̀ use ivovo, dị ọ na sị ẹwụ odivi va yọ?

¹¹ Ẹwụ nịnị ana vị aza edivi, wàa yẹ ka áa vọrọ ka wa sị ịsa ọyịza yị ezi ewu nịnị; ụ mẹmẹ va yẹ ka Ada awụ nịnị ẹbẹẹba ọ yị vaa sị ịsa ozoza yị aza ana aa họ̀ ọ use?

¹² Avaba ịsị u wèe sì ka ọza ọ̀ mẹ hi wu nịnị, ẹwà rẹ vavọọ mẹ̀ ẹ hi wa! Iruvo ọda ọnịrị ịrẹyị ọnịsẹ nịnị ọ vị ọnọọ nị.”

Oze dẹẹrẹ ọnịrị oze bamị-bamị

¹³ “Zị oze dẹẹrẹ ọnọọ ngụ eehi nịnị! Agụvị ka oze ana na ngụ ịzị aza yàā vu ẹtẹ, ộ gana, oze anị aa ba mị ba mị aanị. Aza ana zị oze avọọ ệ rụrụ ẹtẹẹtẹrẹ.

¹⁴ Oze ana aa sị ọza naa ngụ ịzị ọza yàā yà ịda Ohomorihi pooro zịna-zịna, ộ hana, oze anị aa dẹẹrẹ aanị. Aza chee aanị e ree nị.”

Ọchị ọnịrị ẹtụtụ anị

¹⁵ “Sị eyi pe ẹngụ awụ nịnị agụvị ọnịsẹ ireche nịnị. Ẹẹ̄ sị ịtụmpaha atẹmẹẹ kú ẹngụ, ama ịnịnẹ ẹnịnị, akatapooro odivi ẹ vị nị.

¹⁶ Ebira ẹnẹ ẹyaa mẹ, ụ vaa sị yẹ wa nị. Ọza ọ́ọ́ zụ há osinkara hụrẹ ịrẹsụ ọchị agagana? Wáá rẹ zụ há ezu hụrẹ ịrẹsụ ọchị ikeyi-ikeyi?

¹⁷ Ọchị ozoza vị anaā tụ́ ẹtụtụ ozoza. Ama ọchị ọnị ụkụ za vị anaā tụ́ ẹtụtụ odivi.

¹⁸ Ọchị ozoza ọ yị zụ tụ́ ẹtụtụ odivi, avọọ ọchị ọnị ụkụ za ọnị ọ̀ yị mẹ̀ rẹ zụ tụ́ ẹtụtụ ozoza nị.

¹⁹ Avaba ọchị ẹnẹ ẹ̀ yị tụ́ ẹtụtụ ozoza vị anaa vaa má, di e nee ngụ ịra.

²⁰ Agụvị avọọ ẹtụtụ ẹnịnị, ụ vaa sị yẹ wa nị.”

Aza ana aa sị irenuu hẹkẹ Ohomorihi

²¹ “Ẹ yị vị avaba aza ana aa hị́ mị ka: ‘Ananyị yị!’ ẹ vaa ngụ ịzị Ada ayị ẹbẹẹba yà aa mẹ ịjọva; ẹ̀ yị vị aza ana aa mẹ̀ ịsa ana Ada amị ẹbẹẹba sì ka ẹ̀ mẹ.

²² Aza ọrụrụ-ọrụrụ ẹ vaa kà a mị ịhị ọnọọ nị ka: ‘Ananyị yị, Ananyị yị.’ Wẹ yị yẹ ka ịị̄ sị ịrẹha awụụ kà ịsẹẹ? Wẹ yị kụkụ yẹ ka yâ sị ịrẹha awụ dụ ụhwẹ echu jịnẹẹ?

²³ Dị mị kà a yị wa ka: ‘Mẹ yị vịdị yẹ wụ nịnị; hụrẹ mi eyi nịnị, ẹwụ nịnị enebira kẹnẹ-kẹnẹ!’ ”

Aza ẹnị ẹẹva ana dà irehi

²⁴ “Agụvị avọọ ọza tụra ọza ana àa wụ́ ịrẹyị amị ẹnẹnị, dị ọ rẹ mẹ̀ ịsa ọnị mị kà nị, vị ana vaa sị mẹẹ anka ọyẹrẹyị ọnya aanị ana dà irehi anị tụ́ ịrẹsụ ịda.

²⁵ Orihi ộ zụ̀, dị okuha vẹ, dị ahị tụ́ nị. Ộ tụ́ kú irehi ọnọọ, ama oyi wú; agụvị ka â dà a tụ́ ịrẹsụ ịda.

²⁶ Ọza tụra ọza ana àa rẹ wụ́ ịrẹyị amị ẹnẹnị dị ọ̀ yị mẹ ịsị mị kà nị, vị ana vaa sị mẹẹ anka ọnụra ọnya aanị ana dà irehi anị tụ́ ịrẹsụ aarẹ.

²⁷ Orihi ộ zụ̀, dị okuha vẹ, dị ahị tụ́ nị. Ộ tụ́ kú irehi ọnọọ, di o si wú nị. Avaba anị saka-saka o wú nẹrẹ-nẹrẹ nị.”

²⁸ Ịjọnọọ Íjeesu mẹ̀ sị avaba ịsa ọnọọ kà, avaba ịsa ọnọọ sị zụ̀ wa, ô hí avaba ẹnịnị irenu.

²⁹ Agụvị ka vị aa zụ̀ wa ịsa anka ọza ana nyị ọda avọọ nị; ọ yị zụ̀ wa ịsa, anka ọ́zwọzọda nịnị mẹ̀ẹ̄ zụ̀ ọza ịsa.