Imatiwu 5 - IWE ỌNỊNỊ

Ịrẹyị oni Ijeesu kà ị́rẹsụ ataba

¹ Íjeesu mè re ọkọnị aza ẹnẹẹ, dị ọ hịrẹ nọ ịrẹsụ ataba ọnya, dị ọ yaayịtẹ nị. Dị ezirẹma anị ve tù ọọ nị.

² Di o nyima, dị aa zụ̀ wa ịsa nị, dị ọ ka:

³ “Aza ana yẹ ka ẹnị ẹ̀ yị yẹ Ohomorihi a mẹ̀ vọrọ, vaa daa jẹ, agụvị ka ẹnị ẹ vaa ngụ ịzị Ada ayị ẹbẹẹba yà aa mẹ ịjọva nị.

⁴ Aza ana aa jị òrèrè vaa da jẹ, agụvị ka Ohomorihi vee hunẹnẹ wa ayị.

⁵ Aza ana nyị ebira hẹẹ vaa daa jẹ, agụvị ka ẹnị Óhomorihi vaa sị avaba ẹhẹẹ yị nị.

⁶ Aza ene enyi aa kụ̀, dị ụngwẹ aa kụ̀ ka ẹnị ẹ̀ zụ mẹ ịzẹyịza vaa daa jẹ, agụvị ka Ohomorihi vaa vayị ẹnịnị.

⁷ Anayamva vaa daa jẹ, agụvị ka Ohomorihi vaa vayị ẹnịnị.

⁸ Aza ana ayị ẹnịnị nị vaa daa jẹ, agụvị ka e vee re Ohomorihi.

⁹ Aza eneē sì ẹngwọọrọ vaa daa jẹ, agụvị ka Ohomorihi vaa hị́ wa ezi anị.

¹⁰ Aza ana àaa sị ụyaa rị agụvị ịrẹyị ịzẹyịza vaa daa jẹ, agụvị ka ẹnị ẹ vaa ngụ ịzị Ada ayị ẹbẹẹba yà aa mẹ ịjọva nị.

¹¹ Ụ vaa daa jẹ nịnị, aza àa kụ̀ wụ nịnị ụhụ, dị ẹyaa sị ụyaa rị wụ nịnị nị, dị ẹyaa sị irechee kà avaba ịsa odivi hi wu nịnị nị agụvị amị.

¹² Waa jẹ, dị ịnẹ awụ nịnị òo hine ẹtẹẹtẹrẹ, agụvị ka Ohomorihi ọ raà sị ọgụ ọbanyị tẹ wụ nịnị tụ́ ẹbẹẹba. Avọọ gẹdẹ-gẹdẹ a mẹ̀ rẹ sị ụya rị ọnịsẹ nịnị ana vịdị vẹ tụ́ wụ nịnị nị.”

Anọ ọnịrị ẹtohweyi

¹³ “Ẹwụ nịnị ọ vị anọ yị anẹhẹ nị. Ama anọ ọ̀ọ sị uhine anị ne ta, sị a kụkụ aa sịị vara a ka ò hine? Ẹ yị kụkụ nyị ịsị ọ rụra mẹ, à yị vị ka è ne e ta, dị aza ẹ̀ẹ kụ́ ahụụ hi ọọ.

¹⁴ Ẹwụ nịnị ọ vị ẹtohweyi yị anẹhẹ nị. Ẹkụra ana yà ịrẹsụ ataba, ọ yị zụ tẹ.

¹⁵ Ọza o mē hú ozotupa, dị ọ sị ịchacha kú ọọ; ama ịzị aā sị ozotupaa gẹ, aa sị ọọ gẹ nị. Dị aa sị ẹtohweyi yị avaba aza ana yà ini eehi.

¹⁶ Navọ ẹtohweyi ọnị ụ vị nịnị ọ̀ vavọọ zẹtẹ ọ́vịdị aza, dị è zụ re ebira ozoza awụ nịnị dị ẹ̀ sị ụga yị Ada awụ nịnị ẹbẹẹba!”

Ijeesu ộ sị iruvo ọda Imosiisi zụ̀

¹⁷ “Asị u roo ka mị vẹ ka ma va kụ́ ọda kwooze nị, à vị ịrẹyị ọnịsẹ nịnị. Mẹ yị vẹ ka ma va kụ́ wa kwooze, ẹ̀ yị vị ka ma va sị iruvo avaba anị zụ̀.

¹⁸ Ịzẹyịza, mị kà wụ nịnị nị, pooro dị ẹbẹẹba ọnịrị ẹhẹ ọ̀ ta, ẹ yị nyị ikonya ịnị ọda ana vaa jịị ha vụrụ-vụrụ. Avaba anị saka-saka ọ vaa sẹ nị.

¹⁹ Ọza ana àa jịnẹ ene weyi hu kere-kere ịnị ọda ẹnẹnị, dị ọ rẹ vavọọ sị kọ aza nị, ọnị ọ vaa vị ọza ene weyi hu ịzị Ada ayị ẹbẹẹba yà aa mẹ ịjọva nị. Ama ọza ana àa mẹ̀ ẹ, dị ọ rẹ kọ ọ yị aza nị, ọnị ọ vaa vị ọzọbanyị ịzị Ada ayị ẹbẹẹba yà aa mẹ ịjọva nị.

²⁰ Maa kà a wụ nịnị ka ẹ̀ yị vị ịzẹyịza awụ nịnị huna ọ́ọzwọzọda nịnị ọnịrị Áanihwarisi nịnị, wẹ yị va nyẹngụ ngụ ịzị Ada ayị ẹbẹẹba yà aa mẹ ịjọva nịnị.”

Ọyịkụ

²¹ “Wâ wụ́ nịnị, a mẹ̀ vịdị kà a yị anụmọkụkụ nịnị ka, ‘Asị ụ wụ̀ ọza. Ọza ana àa wụ̀ ọza, vị aa mẹ̀ ọkarẹyị yọ nị.’

²² Ama ẹ ma kà a yị wụ nịnị nị ka ọza ọ̀ọ kụ́ ayị hi ọnọhụva anị, vị aa mẹ̀ ọkarẹyị yọ nị. Ọza ana àa rẹ kụ̀ ọnọhụva anị ụhụ, a vaa hị́ ọọ ịrẹka; ama ọza ana àa tụ́ ozirenu hi ọza, ọ nyayịnẹ nọ ini ẹkụra.

²³ Agụvị avọọ, wàa sị ẹyịza aa nọ ịnị ụta naa yị Ohomorihi, dị ụ tamayị ka ọnọhụva awụ ee roo ka wâ mẹ̀ ọnị ịrẹyị nị,

²⁴ navọ ẹyịza awụ tịtẹ ọ́vịdị ụta, varẹma ne pe ọnọhụva awụ ze da, dị ụ wa vavẹ, dị ụ wa va sị ẹyịza awụ yị Ohomorihi.

²⁵ Juntu pe ọnịrẹyị awụ ze óze, ụ màa nọ ini ikootu, ẹ̀ yị va avọọ ka ọ va sị wụ yị ọmọkarẹyị, dị ọmọkarẹyị sị wụ́ chire iporisi ụvọ, dị a kụkụ sị wụ tụ́ ịnị ẹngwa.

²⁶ Ịzẹyịza mị kà a wụ nị, wẹ yị vaa jịnẹ hụụ ịzọọ, pooro di u we sí avaba ụta awụ ta.”

Ịrẹyị Ịrẹkọyịsẹ

²⁷ “Wâ wụ́ nịnị, a mẹ̀ vịdị kà a yị anụmọkụkụ nịnị ka, ‘Asị ụ sẹ̀ ịrẹka!’

²⁸ Ama ẹma kà a wụ nịnị nị ka ọza ene èe re ọnyẹnẹẹ, di eyi anị ọ̀ yị hụụnị ẹngụ anị nị, ọ raà sị ayị anị pee sẹ̀ ịrẹka da.

²⁹ Eyi ụvọrị awụ ọ̀ọ mẹ ka wa mẹ ịvị, tụ̀ ọ kwooze, di u we ne e ta! Agụvị ka ọ́ọ gụụ wụ ka ọchẹngụ awụ ọnya ọ̀ dà vú hu ka è ne ẹwụ ụvọta ngụ ẹkụra.

³⁰ Ụvọrị awụ ọ̀ọ rẹ mẹ ka wa mẹ ịvị, jị ọ kwooze ne ta! Agụvị ka ọ́ọ gụ wụ ka ọchẹngụ awụ ọnya ọ̀ dà vú hu ka è ne ẹwụ ụvọta ngụ ẹkụra.”

Ịrẹyị ẹhahi ẹvarose

³¹ “A rẹ kà a ka: ‘Ọza ene èe yi ose anị, ọ̀ sị iwe ivenu yọ!’

³² Ama ẹma kà a wụ nịnị nị ka ọza ene èe yi ose anị, ẹ̀ yị vị ọ hụhụ sẹ̀ ịrẹka, ọ́ọ mẹ̀ ẹ ka ọ̀ sẹ̀ ịrẹka, ọ̀ọ na nyị ọnọrụ ọsa. Ọza ana àa nyị ọnẹẹ ọnọọ ene e yi, vị ana rẹ sẹ̀ ịrẹka.”

Ịrẹyị eku ọyịhị́

³³ “Wa rẹ wụ́ nịnị ka â kà a yị anụmọkụkụ nịnị ka: ‘Asị ụ hyeku ireche, ama mẹ ịsị ụ wàa hyeku anị yị Ananyị yị!’

³⁴ Ama ẹma kà a yị wụ nịnị nị ka asị ụ hyeku vụrụ-vụrụ; asị ụ sị ẹbẹẹba hyeku, agụvị ka ịzị Ohomorihiī yaayịtẹ yọ nị!

³⁵ Asị ụ rẹ sị ẹtẹ hyeku, agụvị ka ịzị Ohomorihiī kụ́ ahụụ hi yọ nị! Asị ụ rẹ sị Ijerusarẹmị hyeku, agụvị ka ẹkụra Ohinọyị ọbanyị ọnọọ yọ nị!

³⁶ Asị ụ rẹ sị ịrẹsụ awụ hyeku, agụvị ka wẹ yị zụ mẹ ka ẹyị awụ ikonya ọ̀ vị ọvwọọvụ, à vị ojooji!

³⁷ Wàa kà a ka ‘Hịịn’, ọ̀ vị hịịn; wàa kà a ka ‘Eyiye’, ọ̀ rẹ yị vị eyiye! Ịsị èe si huna ẹnẹẹ, ịdị Echu ọ hụrẹ vẹ nị.”

Ịrẹyị atọ oyisí

³⁸ Wâ wụ́ nịnị, a mẹ̀ kà a ka, “Ọza ọ̀ọ tụ̀ wụ eyi ọnya, ẹwà rẹ tụ̀ ọ eyi ọnya; ọza òo hu wu anyị ọnya, ewè re hu ọ anyị ọnya

³⁹ Ama ẹma kà a yị wụ nịnị nị ka, ọza ọ̀ọ mẹ wụ odivi, asị u sí ọ atọ! Ọza ọ̀ọ nya wụ arụhwọtọ eyi ụvọrị, rẹ vara eyi ọsa kà a bẹẹ.

⁴⁰ Ọza ọ̀ọ hị́ wụ ịrẹka ini ikootu, dị ọ dọ wụ ọtịnịnẹ awuru nị, sị awuru awụ obooro yọ vakaa bẹẹ.

⁴¹ Ọza ọ̀ọ za wụ ka wa zị ụsẹ ikiromita ọnya, dụ ọ na gụ ikiromita ẹẹva.

⁴² Ọza ọ̀ọ họ̀ wụ use ịsa, ụ sị yọ. Ọza ana àa ka ọnị aa dọ wụ ịsaa rere, u si rere e.”

Sì ịrẹyị ọnịvị awụ

⁴³ “Wâ wụ́ nịnị, a mẹ̀ kà a nịnị ka: ‘Sì ịrẹyị ọnọhụva, dị ụ wa nyị ịhyẹrẹ ọnịvị awụ!’

⁴⁴ Ama ẹma kà a yị wụ nịnị nị ka, sì ịrẹyị ọnịvị awụ nịnị, waa mẹ̀ aduwaa yị aza ene ee chìi hi wu nịnị, waa mẹ ọyịzaa yị aza anaā kụ́ ayị awụ nịnị! Dị ụ wa rẹẹ mẹ̀ aduwaa yị aza ana aa mẹ wụ nịnị kẹnẹ-kẹnẹ, ọnịrị aza ana aa sị ụyaa rị wụ nịnị!

⁴⁵ Wa vavọọ mẹ agụvị dị è re ka ezi Ada awụ ẹbẹẹba ụ vị nịnị nị, agụvị ka aa mẹ ka ọyị anị ọ̀ọ háa yị aza edivi ọnịrị aza ọyịza. Ọ raa zụ̀ orihii yị ọnịzẹyịza ọnịrị aza ẹnẹ ẹ̀yị nyị ịzẹyịza.

⁴⁶ Àa vị ọza ene sì ịrẹyị awụ nịnị kẹnẹ, ẹwụ nịnị re sì ịrẹyị anị nị, ye re ọgụ ọnị ụ nyị? Avọọ aza edivi ẹnị mẹ̀ rẹẹ̄ mẹ nị.

⁴⁷ Àa vị ẹyịnyara awụ nịnị kẹnẹ, ụụ̄ kụ́ nị, sị ụ sị jị aza ana vọ nyee? Avọọ aza edivi ẹnị mẹ̀ rẹẹ̄ mẹ nị.

⁴⁸ Agụvị avọọ, áa vọrọ ka wa gụ nịnị, anka Áda awụ nịnị ẹbẹẹba mẹ̀ gụ.”