Imatiwu 4 - IWE ỌNỊNỊ

Echu ộ zama Ijeesu re

¹ Ịjọnọọ dị Ụhwẹ Ọnịnị sị Ijeesu hịrẹ nọ ịnị ụnọmị ka Echu ọ̀ na zama a re nị.

² Ịjị Ijeesu sị awẹ ba ẹkụhị ẹbẹẹva ọọdụ ọnịrị ịrahụ, dị ụngwẹ aa kụ̀ ọ nị.

³ Dị ọzamọzare ọnọọ ka a vẹ, dị ọ ka, “Àa vị Ozi Ohomorihi ụ vị nị, mẹ ọda ka ịrẹta ẹnẹnị ẹ̀ vara akara!”

⁴ Ama dị Ijeesu tụ́ ohi, dị ọ ka, “Â chẹrẹ ẹ ka, ‘A yị vị ịsọyịrị kẹnẹ ọ zụ sị ọza yàra, ẹ̀ yị vị avaba ịrẹyị oni Ohomorihi kà.’ ”

⁵ Dị Echu rẹ sị ọọ hịrẹ nọ Ijerusarẹmị ana vị ẹkụra ọnịnị, dị ọ sị ọọ na tụ́ oregerege ini irehi Ohomorihi nị.

⁶ Dị ọ kà a yọ ka, “Àa vị Ozi Ohomorihi ụ vị nị, ji hi ẹtẹ! Wâ yẹ ka a sị ọọ chẹrẹ ka: ‘Ọ vaa mẹ ọdaa yị anggẹẹrị anị agụvị awụ, dị ẹ gụ wụ rị ụvọ, agụvị asị ụ na gù ahụ awụ chire ịrẹta.’ ”

⁷ Dị Ijeesu re tụ́ ọọ ohi, dị ọ ka, “A rẹ chẹrẹẹ ka: ‘Wẹ yị nyayịnẹ zama Ananyị yị Ohomorihi awụ re!’ ”

⁸ Dị Echu rẹ sị ọọ nọ ịrẹsụ ataba ana nẹba ẹtẹẹtẹrẹ nị, dị ọ sị avaba ẹkụra irenyi-irenyi ene hi ịnị ẹhẹ ọnọnị ọnịrị ụbanyị ẹnẹnị zụ̀ ọ nị.

⁹ Dị ọ kà a yị Ijeesu ka, “Avaba ịsa ẹnẹnị mị vaa sịị yị wụ nị, wàa zẹẹ ka wa va ku ẹtẹ, dị ụ wa kụ́ mị.”

¹⁰ Ịjọnọọ dị Ijeesu kà a yọ ka, “Và ị́rẹma amị, ẹwụ Isitani, agụvị ka â chẹrẹẹ ka: ‘Waa va ku ẹtẹẹ yị Ohomorihi Ananyị yị; ọnị ịnyara kẹnẹ ụ rẹ vaa hẹkẹ nị!’ ”

¹¹ Ịjọnọọ dị Echu kwooze yọ, dị anggẹẹrị nịnị vaa mẹ ozi ahụụ yị Ijeesu nị.

Ijeesu ô nyima ụkọrọ anị Igariri

¹² Íjeesu mẹ̀ wụ́ ka a sị Ịjọọnụ za tụ́ ịnị ẹngwa, dị ọ tangwa nọ Igariri nị.

¹³ Dị ọ hụrẹ Ịnazarẹtị, dị ọ va yà Ikapanawumi ana yà akaha ụtọ irehu, ana yà ịnị ẹtẹ Izeburuni ọnịrị Inahwitari nị.

¹⁴ Ộ vavọọ mẹ agụvị ịsa ana Ayịsaya ọnịsẹ kà, ọ̀ zụ sẹ ka:

¹⁵ “Ẹwụ ẹtẹ Izeburuni ọnịrị ẹtẹ Inahwitari ana yà ọgụrị ụtọ irehu, ákẹnẹ Ijodani, ana vị Igariri ẹtẹ anarịmadọwụ nịnị.

¹⁶ Aza ene hi ịnị ịrahụ vee re ẹtohweyi ọbanyị. Etohweyi vee hweyii tụra aza ene hi ịnị ịrahụ ịnị ụvọ isu.”

¹⁷ Hụrẹ ụmẹ ọnọọ, dị Ijeesu nyima dị aa kà ịrẹyị Ohomorihi nị. Dị ọ ka, “Ro ịnẹ varẹma hụụnị ịvị awụ nịnị, agụvị ka ụmẹ ana Ada ayị ẹbẹẹba vaa sị mẹ ịjọva aa gụrị ẹtẹ.”

Ijeesu ộ hị́ ozube ivovo ẹẹna

¹⁸ Ijeesu màa zị ụsẹ ụtọ irehu Igariri, ô re ẹyịnyara ẹẹva, Ịsayịmọnị ana aā hị́ Ipita, ọnịrị Andụrụ ọyịnyara anị. Eyee ne ọhaa ngụ enyi, agụvị ka ozube ivovo ẹ vị nị.

¹⁹ Dị Ijeesu kà a yị wa ka, “Waa dụ mị ịrẹma nịnị, ka mị vaa vara wụ nịnị ọza anaā kụ́ azaa vẹ, anka ụ mẹ̀ẹ̄ kụ́ ivovo nịnị avọọ.”

²⁰ Obooboro ọnọọ, dị ẹ và ọha ẹnịnị hi ẹtẹ, dị ẹyaa dụ ọọ ịrẹmaa na nị.

²¹ Ọ mẹ̀ rẹ hụụ ịzọọ aa na, o re re ẹyịnyara ẹẹva ọsa, Ijemiisi ozi Izebedi ọnịrị Ịjọọnụ ọyịnyara anị. Ẹnịnị hi ịnị ẹpa beri Izebedi ada ẹnịnị, ẹ yaa gẹ ọha ẹnịnị. Dị Ijeesu hị́ wa nị.

²² Dị ẹ wụsẹ navọ ẹpa ọnịrị ada ẹnịnị hi ẹtẹ, dị ẹ yaa dụ ọọ na nị.

Aza ọrụrụ-ọrụrụ ệ ká Ijeesu vẹ

²³ Ijeesu aa ngụ avaba Igariri zị, dị aa zụ̀ wa ịsa ini irehi ahẹkẹ Aniju ẹnịnị, dị aa kà enube ọyịza ịjọva Ohomorihi, dị ọ raa mẹ avaba ụkụ irenyi-irenyi yị aza ịnị akakana aza ẹnẹẹ nị.

²⁴ Ịrẹyị anị ọ sị ngụ ịrẹyị na ngụ avaba ẹtẹ Isiriya. Dị ẹnịnị kụ́ avaba aza ọnị ụkụ irenyi-irenyi aa sị ụyaa rị ka a vẹ nị, ọnịrị aza ana nyị ụhwẹ echu, ọnịrị aza oni odumpapara aa za beri aza ene sú ẹngụ, dị ọ mẹ wa ụkụ nị.

²⁵ Dị ọkọnị aza wara hụrẹ ẹkụra ẹnẹnị vẹ, dị ẹ yaa dụ ọọ ịrẹma nị: Igariri ọnịrị Idekapori beri Ijerusarẹmị ne beri Ijudiya ọnịrị akẹnẹ Ijodani.