Imatiwu 27 - IWE ỌNỊNỊ

 za Ijeesu ne tù Ipayireti

¹ Ịnị ẹnẹnẹ viri-viri, avaba ohirẹsụ ẹbanyị irehi Ohomorihi beri ọdọvịdị Aniju nịnị ê gẹ eyi Ijeesu ka à wụ ọọ.

² Ệ sụ́ Ijeesu orupa, dị ẹ và a tụ́ ọvịdị, dị ẹ sị ọọ na yị Ipayireti ana vị ịgọvọnọ ịzọọ nị.

Íjudasi meme sú

³ Ịjị Ijudasi ana sị ọ chire ọnịvị anị ụvọ re ka a sị ịvị jị yị Ijeesu, ô ro ịnẹ varẹma, dị ọ sị ẹkẹhị ọnọọ, akata, dị ọ và a ịrẹma na yị ohirẹsụ ẹbanyị irehi Ohomorihi ọnịrị ọdọvịdị nịnị nị.

⁴ Dị ọ ka, “Ma sị ịvị mẹ, agụvị ka mâ sị ọza ẹnẹ ẹ̀ yị nyị ịsị ọ mẹ chire ọnịvị ụvọ ka ẹ̀ wụ̀ ọọ.” Dị ẹnịnị tụ́ ohi, dị ẹ ka, “Ịzị ọnọọ gẹ ẹyịrị ẹwụ? Áawụ ọ́nọọ kụkụ vị nọ!”

⁵ Dị ọ và ẹkẹhị ẹnẹẹ hi ẹtẹ ini irehi Ohomorihi, dị ọ na, di o ne zù obo yị ẹngụ anị nị.

⁶ Dị ohirẹsụ ẹbanyị irehi Ohomorihi kụ́ ẹkẹhị ẹnẹẹ, dị ẹ ka, “Ẹkẹhị enee si sí ọza ana wụ̀ ọza ụta yị; ọda ayị ọ yị zẹẹ ka à sị tụ́ ini irehi Ohomorihi.”

⁷ Dị ẹ gẹ eyi, dị ẹ sị ẹkẹhị ọnọọ na hị́ ẹtẹ ọnụnọkọ, ka èe ne azọgaa tụ́ ịzọọ nị.

⁸ Agụvị avọọ a kụkụ hụrẹ aa hị́ ẹtẹ ọnọọ Ẹtẹ anya pooro ve tù ajịnị nị.

⁹ Ịhị ọnọọ, ịrẹyị oni Ijeremaya ọnịsẹ vịdị kà ọ sị sẹ. Ộ kà a ka, “Ệ sị akata ọnọọ, ọpa ana Anisirẹrị nịnị ro ka ộ hụ;

¹⁰ ệ sị hị́ ẹtẹ ọnụnọkọ, anka Óhomorihi mẹ̀ kà a mị.”

Ipayireti ộ họ̀ Ijeesu use ịrẹyị

¹¹ Ijeesu ộ jẹẹ ọvịdị ịgọvọnọ, di ịgọvọnọ họ̀ ọ use ka, “Ẹwáá vị ohinọyị Aniju nị?” Dị Ijeesu tụ́ ohi, dị ọ ka, “Ụ mẹ̀ yị kà a avọọ yọ nị.”

¹² Ohirẹsụ ẹbanyị irehi Ohomorihi ọnịrị ọdọvịdị nịnị ệ kụ́ ịrẹka za a, ama o yi tụ́ ohi.

¹³ Dị Ipayireti rẹ họ̀ ọ ka, “Wáá wụ́ avaba ịrẹyị awụ anaa sị tụ́ ịrẹka aanị?”

¹⁴ Ama Ijeesu o yi tụ́ ohi vụrụ-vụrụ; agụvị avọọ di o si hí ịgọvọnọ ọnọọ irenu ẹtẹẹtẹrẹ nị.

Ệ jị ịvị isu yị Ijeesu

¹⁵ Eche ọ̀ọ maanị si tù, ịgọvọnọ ọọ̄ hụrẹ anịnẹngwa ọnya ana aza èe sì ụvọọ yị aza ẹnẹẹ.

¹⁶ Ịnị ụmẹ ọnọọ, â nyị anịnẹngwa ọnya aanị ana aā hị́ Ibaraba. Ộ ngụ ịrẹyị ẹtẹẹtẹrẹ.

¹⁷ Ịjị aza ẹnẹẹ sị wara gụ, dị Ipayireti họ̀ wa ka, “Eni u sì ka ma hụrẹ ụvọ wụ nịnị, Ibaraba wáá yọ nị, à vị Ijeesu ana aā hị́ Ikirisiti?”

¹⁸ Ộ yẹ ka agụvị ayamịkụ ẹ sị za Ijeesu chire ọnị ụvọ nị.

¹⁹ Ípayireti mẹ̀ yaayịtẹ ịnị aga ọkarẹyị anị, ose anị ộ tụ́ ụtụ hi ọọ ka, “Asị ụ bẹ ụvọ tụ́ ịrẹyị ọnọrụ ọnọọ, oo, agụvị ka ẹ yị nyị ịsị ọ mẹ. Eyi amị ô re ịrẹyị ẹtẹẹtẹrẹ ịnị ụra ajịnị agụvị ịrẹyị anị.”

²⁰ Dị ohirẹsụ ẹbanyị irehi Ohomorihi beri ọdọvịdị nịnị tụ́ aza ịrẹyị ka ẹ̀ kà a ka Ipayireti ọ̀ vana hụrẹ Ibaraba ụvọ yị ẹnị, dị ọ̀ wụ Ijeesu nị.

²¹ Dị ịgọvọnọ ọnọọ ka, “Ye re ọnị ụ ka ma hụrẹ ụvọ wụ nịnị ịnị ẹnị ẹyịva?” Dị ẹnịnị ka Ibaraba yọ nị.

²² Dị Ipayireti họ̀ wa ka, “U mè sì ka ma mẹ Ijeesu ana aā hị́ Ikirisiti?” Dị avaba ẹnịnị ka, “Kanyị ọọ zị apavahị!”

²³ Dị Ipayireti rẹ ka, “Sị ẹ vẹ? Sị ẹ vị ịsa odivi ọnọọ mẹ?” Dị e re nowu hu avọọ, dị ẹ ka, “Kanyị ọọ za apavahị!”

²⁴ Ịjị Ipayireti re ka ẹ yị nyị ịsị ọnị zụ mẹ, ka ịrazị hyakụ aa vaa chị, dị ọ sị enyi, dị ọ sị nyịna ụvọ anị éyi avaba aza nị, dị ọ ka, “Ẹ yị nyị ụvọ amị rị tụ́ ịnị iswọọza ẹnẹ ẹ̀ yị nyị ịsị ọ mẹ aanị, oo! Ịrẹyị awụ nịnị ọ vị nị.”

²⁵ Dị avaba ẹnịnị tụ́ ohi, dị ẹ ka, “Naavọ, ịvị isu anị ọ̀ọ yà ịnị ịrẹsụ ayị ọnịrị ịrẹsụ ezi eyi!”

²⁶ Dị Ipayireti hụrẹ Ibaraba ụvọ yị wa nị. Dị ọ ka è tụ́ Ijeesu ịjapa, dị à sị ọọ, dị à na kanyị ọọ za apavahị nị.

Ezirẹkụ ệ sị Ijeesu mẹ enyinyi

²⁷ Dị isoja ịgọvọnọ ẹnẹẹ sị Ijeesu nọ ịnị ọba irehi anị nị, dị ẹ hị́ isoja nịnị ana vọ gụ kara a nị.

²⁸ Dị ẹ ngwa Ijeesu awuru, dị ẹ sị awuru ohinọyị ovivi ọnya chire e nị.

²⁹ Dị ẹ mẹ ọkẹkẹrẹkụ ikeyi-ikeyi, di e si kú ọọ ịrẹsụ nị. Dị ẹ sị okutẹ chire e ụvọ nị, di e nyima dị ẹyaa kụ́ ọọ ụkụ́ isiya nị, dị ẹ ka, “Taarụ, Ohinọyị Aniju nịnị.”

³⁰ Dị ẹyaa jị atẹẹ kú ọọ nị, dị ẹ dọ ọ okutẹ ọnọọ, dị ẹyaa vàa hi ọọ ịrẹsụ nị.

³¹ Ịjị ẹ raà sị ọọ mẹ enyinyi, dị ẹ ngwa awuru ọnọọ, dị ẹ sị awuru anị ụvọta chire e nị. Dị ẹ sị ọọ jịnẹ ka ẹnị ẹ̀ na kanyị ọọ za apavahị nị.

 kanyị Ijeesu za apavahị

³² Ẹ mẹ̀ sị ọọ aa na, ê re Anisayireni ọnya aanị. Aā hị́ ọọ Ịsayịmọnị. Dị ẹ sị ụkata za a ka ọ̀ va za apavahị Ijeesu nị.

³³ Ịjị ẹ va sị ngụ ịzị aā hị́ Ịgọrịgọta, oni iruvo anị vị “Aha akokoro ịrẹsụ.”

³⁴ Ệ sị eche ana a sị ịsa ọnyịrẹyị và hura yọ ka ò hú ọọ. Íjeesu mẹ̀ sị ọọ dá ree, o yi hú ọọ.

³⁵ Dị ẹ za a, dị ẹ kanyị ọọ za apavahị nị. Dị ẹ gà ịta anị tịtẹ, dị ẹ jị osisi tụ́ ọọ nị. Ệ vavọọ mẹ, agụvị ịrẹyị ọnị ọnịsẹ nịnị vịdị kà, ọ̀ zụ sẹ ka, “Ệ gà ịta amị hi ẹngụ ẹnịnị ụvọ, dị ẹ jị osisii tụ́ ọọ nị.”

³⁶ Dị ẹ yaayịtẹ, dị ẹ sị eyi pe e nị.

³⁷ Ệ chẹrẹ ịrẹka ẹnẹẹ kụ́ za a tụ́ ịrẹsụ apavahị ka, “Ijeesu Ohinọyị Aniju nịnị yị.”

³⁸ Ẹ rẹ kanyị oyi ẹẹva za apavahị; ọnyara yà eyi ụvọrị anị, dị ọsa rẹ yà eyi ụvọha anị nị.

³⁹ Dị aza ẹnyị ana aa parahu aa kụ̀ Ijeesu ụhụ nị; dị eyee mi ịrẹsụ nị.

⁴⁰ Dị ẹ ka, “Ẹwụ ene vee wú irehi Ohomorihi, di u re tenyi ọọ dà ịhyẹgwẹta anị! Àa vị Ozi Ohomorihi ụ vị nị, dọ ẹngụ awụ tụ́, di u we chí hụụ ịrẹsụ apavahị vẹ!”

⁴¹ Avọọ ohirẹsụ ẹbanyị irehi Ohomorihi ne beri ọzwọzọda nịnị ọnịrị ọdọvịdị nịnị mẹ̀ raa sị ọọ mẹ enyinyi nị. Dị ẹ ka:

⁴² “Ọọ̄ dọ aza ẹnẹsa há, ama ọ yị zụ dọ ẹngụ anị há. Ọ kà ọnị ọ vị Ohinọyị Anisirẹrị nị; ò chí hụrẹ ịrẹsụ apavahị vẹ booro aanị kẹ, di yee re e, dị ya dọ ọ wụ́.

⁴³ Ộ sị ayị tụra Ohomorihi; Ohomorihi òo sì ọọ, ọ̀ dọ ọ tụ́ booro aanị kẹ! Ộ kà a ka Ozi Ohomorihi ọ́nị vị nị.”

⁴⁴ Dị oyi nịnị ana a rẹ kanyị za apavahị ẹnị rẹ vavọọ aa kụ̀ ọọ ụhụ nị.

Íjeesu meme sú

⁴⁵ Ịnị ụmẹ agogo ẹwụrẹva, avaba ẹtẹ ọnọọ saka-saka ọ sị vara ịrahụ, pooro na ngụ ụmẹ agogo ẹẹta.

⁴⁶ Ịnị ẹhụụ ụmẹ agogo ẹẹta, dị Ijeesu nowu tụ́ ẹba, dị ọ ka, “Ohomorihi amị, Ohomorihi amị, sị ẹ vẹ dị ụ sị ayị hụụnị ịrẹyị amị?”

⁴⁷ Aza ẹnyị ana jẹẹ ịzọọ, dị ẹ wụ́, ệ kà a ka vị aa hị́ Erija nị.

⁴⁸ Dị ọza ịnya ẹnịnị wuse zwe na sị awẹ, dị ọ jị ọọ ngụ ini eche ọsụrẹyị, dị ọ sị tụ́ ịrẹsụ ọchị, dị ọ tana ẹ yị Ijeesu ka ò hú ọọ nị.

⁴⁹ Dị ẹnị ana vọ ka, “Naavọ nịnị ye re e, àa vị Erija aa vaa dọ ọ há nị!”

⁵⁰ Ijeesu o re nowu tụ́ ẹba, dị ọ hụrẹ ụhwẹ anị ụvọ nị.

⁵¹ Dị achị ọratụpọ anaa sị che irehi Ohomorihi, há hi ẹẹva hụrẹ ẹbẹẹba na ngụ ụvẹtẹ waara nị. Dị ẹtẹ henyi, dị ịrẹta nịnị há hi ẹẹva nị.

⁵² Ikuta nịnị ệ há irenu, ọrụrụ ịnị aza Ohomorihi ene sú, ệ ha kwẹẹtẹ,

⁵³ dị ẹ hụụnị ikuta jịnẹ vẹ, Ịjị Ijeesu sị ha kwẹẹtẹ; dị ẹnịnị nọ ịnị ẹkụra ọnịnị, dị aza ọrụrụ-ọrụrụ re wa nị.

⁵⁴ Ọga isoja ẹchẹhị nịnị ọnịrị isoja nịnị ana yà pe e ene ee sere Ijeesu, ê re, ẹ́tẹ mè henyi ọnịrị avaba ịsa ana mẹ. Angwa ô hí wa, dị ẹ ka, “Ịzẹyịza, ọnọrụ ọnọnị vị Ozi Ohomorihi o!”

⁵⁵ A rẹ nyị anẹẹ ẹnyị aanị ana jẹẹ ẹ́nẹẹnẹ, di eyee re ẹtẹ nị. Ẹnịnị ệ saasa Ijeesu hụrẹ Igariri vẹ, ka ẹnị ẹ̀ va gụ ọ ụvọ.

⁵⁶ Imeri Anịmagịdara, ọnịrị Imeri ọnyị Ijemiisi ọnịrị Ijosẹẹhụ, ne beri ọnyị ezi Izebedi yà ịnị ẹnịnị.

A mẹmẹ sị oku Ijeesu tụ́ ịnị ụsị ịnị ịrẹta

⁵⁷ Óruva mè si tù, ọzọbanyị ọnya ana vị Anarịmatịya ộ vẹ. Ịrẹha anị ọ rị Ijosẹẹhụ nị, ozirẹma Ijeesu ọnị rẹ vị nị.

⁵⁸ Ộ nọ ịdị Ipayireti, di o ne họ̀ use oku Ijeesu nị. Dị Ipayireti ka à sị oku Ijeesu yọ nị.

⁵⁹ Dị Ijosẹẹhụ sị ọọ, dị ọ na sị ịta ọvụ ọwọọwa, di o si chire e ikuma nị.

⁶⁰ Dị ọ sị ọọ na tụ́ ịnị ụsị ọwọọwa ọnị ọ vịdị chị tụ́ ịnị ịrẹta yị ẹngụ anị nị. Dị ọ zina ịrẹta ọbanyị ọnya gù ụsị ọnọọ irenu nị.

⁶¹ Imeri Anịmagịdara ọnịrị Imeri ọsa ệ yaayịtẹ ịzọọ, dị ẹ và eyi kà ikuta ọnọọ nị.

Oserẹtẹ nịnị ê sere ikuta ọnọọ

⁶² Ini eyinẹhẹ anị, ana vị eyinẹhẹ ẹkụhị enee si tenyi ẹngụ ẹkụhị ụhwọtụ, ohirẹsụ ẹbanyị irehi Ohomorihi ọnịrị Anihwarisi nịnị e ne tù Ipayireti.

⁶³ Dị ẹ ka, “Ọga, yâ tamayị ka ovenọza ọnọọ mẹ̀ yà ẹhẹ, ộ kà a ka ịhyẹgwẹta ọnị ọnị sú, ọnị rẹ vaa haa kwẹẹtẹ.”

⁶⁴ Agụvị avọọ, mẹ ọda ka è ne sere ikuta ọnọọ ẹtẹẹtẹrẹ pooro dị ẹkụhị ẹẹta ọ̀ gụ, agụvị asị ezirẹma anị re oze ne yi ọọ, dị ẹ̀ẹ kà a yị aza ka vị ọ ha kwẹẹtẹ nị. Ireche ọnọọ o vee divii hu ị́ịyẹẹyẹ nị.

⁶⁵ Dị Ipayireti ka, “Wâ nyị oserẹtẹ nịnị, nyị wa ne sere e, u wèe mè sì nịnị!”

⁶⁶ Dị ẹ na, dị ẹ sị apọtẹrẹwa tụ́ ịnị ịrẹta ọnọọ ka asa a nyị ọza ana kanyị ọọ nị. Dị ẹ nyị oserẹtẹ tụ́ ịzọọ ka òo sere e nị.